Cuézanu dxi stiʼ Jiobá sin guireʼnu gana
«Yáquexa ma runi cre tu la? [...] cadi iree tu gana.» (2 PEDRO 1:5, 6.)
1, 2. Xi caquiiñenu para gudxíʼlunu ca guendanagana ca, ne xiñee.
MAʼ GAXHA nuu dxi risaca stiʼ Jiobá (Joel 1:15; Sofonías 1:14). Ca xpinni Cristu maʼ cabézacaʼ guedandá dxi guihuinni dxandíʼ napa Dios derechu para guni mandar; peru laga cabézanu dxi ca la? maʼ gudixhe íquenu guzúʼbanu stiidxaʼ Dios neca gacananaláʼdxicabe laanu, guixhacaláʼdxicabe laanu, sanándacabe laanu ne dede gúticabe laanu pur fe stinu (Mateo 5:10-12; 10:22; Apocalipsis 2:10). Nga runi caquiiñeʼ guni huantarnu ca guendanagana ca, o cadi guireʼnu gana. Apóstol Pedru cayabi laanu xi gúninu: «Yáquexa ma runi cre tu la? [...] cadi iree tu gana» (2 Pedro 1:5, 6). Dxandíʼ nga caquiiñeʼ guni huantarnu ne cadi guireʼnu gana, purtiʼ Jesús guníʼ: «Peru tu [guni huantar] dede dxi iluxe irá ni la? zalá» (Mateo 24:13).
2 Ora gaca huaranu, gati tuuxa binnilídxinu ne guizaacanu xcaadxi cosa malu la? laaca racaná ladxidoʼno. ¡Biaʼ ñecheʼ Binidxabaʼ ñuuyaʼ maʼ qué gápanu fe la?! (Lucas 22:31, 32.) Peru, Jiobá zacané laanu guni huantarnu intiica guendanagana guidxaagalunu (1 Pedro 5:6-11). Guidúʼyanu chupa chonna ejemplu stiʼ caadxi binni ni cusihuinni zanda cuézanu dxi stiʼ Jiobá sin guireʼnu gana ne sin gusaana de gápanu fe.
Qué nucueeza guendahuará laacabe
3, 4. Guníʼ ti ejemplu ni rusihuinni zanda gúninu ni na Jiobá neca huaranu.
3 Dios qué runi diʼ milagru para gusianda binni yanna riʼ, peru rudiibe stipa laanu para guni huantarnu ca guendahuará ca (Salmo 41:1-3). Ti gunaa Testigu ni láʼ Sharon guníʼ: «De ra randa si rietenalaʼdxeʼ la? silla de rueda riʼ nga ni huayaca xcompañeraʼ ni qué rixeleʼ de naa. Dede dxi guleʼ gunaazeʼ ti guendahuará ni rábicabe parálisis cerebral naa, ne pur laani qué ñanda ñuneʼ ni runi ti baʼduhuiiniʼ ora nazaaca». Ora binibiaʼbe Jiobá ne gúnnabe ziuu dxi zabee guendahuará la? gucaneni laabe stale, ne neca qué riníʼ chaahuibe ne qué rizabe galán la? guizáʼ riéchebe chigucheechebe stiidxa Dios. Raca quince iza guníʼ Sharon sicaríʼ: «Zándaca jma gacaʼ huaraʼyaʼ, peru ni zacané naa guneʼ huantar nga fe ni napaʼ Dios, ne guuyaʼ laabe casi ti xhamiguaʼ ni zanda guinieniáʼ. ¡Guizáʼ nayecheʼ nuaa purtiʼ racané Jiobá naa guiráʼ ora ne purtiʼ nuaa ndaaniʼ xquídxibe!».
4 Apóstol Pablu gudxi ca diidxaʼ riʼ ca xpinni Cristu de Tesalónica: «Lagacané cani cadxibi» (1 Tesalonicenses 5:14). Nuu tiru nabé riuu binni triste dede raca huará ora qué guiree xiixa ni guni casi modo racalaʼdxiʼ. Lu iza 1993 bicaa Sharon ca diidxaʼ riʼ: «Rabeʼ maʼ qué zanda guneʼ gastiʼ, ne [...] nabé guyuaa triste dede gupaʼ guendahuará ni rábicabe depresión ca chonna iza. [...] Ca binnigola que gucanecaʼ naa stálepeʼ ne bidiicaʼ caadxi conseju naa. [...] Jiobá gucané naa, purtiʼ lu ti La Atalaya bieneʼ chaahueʼ xii nga depresión. Dxandipeʼ nga rizaalaʼdxiʼ Jiobá ca xpinni ne nánnabe xi runi sentircaʼ» (1 Pedro 5:6, 7). Gunaa riʼ cayúnirube ni na Jiobá dede yanna, ne cabézabe guedandá dxi jma risaca stiʼ.
5. Xi rusihuinni zanda guni huantar ca xpinni Cristu ni guizaacacaʼ.
5 Caadxi de ca xpinni Cristu qué riuucaʼ galán pur guiráʼ ni bizaacacaʼ dxiqué. Casi Harley, laa biiyaʼ modo guti stale binni lu guiropa guendaridinde roʼ ni guca lu guidubi naca Guidxilayú ne pur laani nabé feu guiráʼ ni riníʼ xcaandaʼ. Ora maʼ nisiaasibe rucaabe ridxi: «¡Laguuyagá laatu! ¡Laguuyagá laatu!», ne ora guibánibe dede maʼ cuzunísabe. Galanpeʼ nga yenándabe ca conseju stiʼ Dios, despué la? maʼ qué niníʼ xcaandapebe ni biiyabe que.
6. Ximodo bidxiilú ti xpinni Cristu xquendahuará.
6 Guizáʼ nagana guca para ti hombre ni naca Testigu gucheeche stiidxaʼ Reinu de yoo pur yoo, purtiʼ nuucabe galán málasi chuʼbe triste o guidxiichibe (guendahuará riʼ rábicabe ni trastorno bipolar). Peru neca zaqué qué nusaanabe de nucheechebe diidxaʼ purtiʼ nánnabe zaquetiʼ nga zanda guilabe ne guilá ca binni ni guiziidiʼ de stiidxaʼ Dios (1 Timoteo 4:16). Guyuu biaje bidxíbibe guxhídxibe timbre stiʼ xiixa yoo. Xpinni Cristu riʼ guníʼ: «Ora maʼ napa ratu de cucheecheʼ diidxaʼ la? randa rucueezaʼ dxiibi que, de raqué riaa sti yoo ne runeʼ stipa para guzuluáʼ sti biaje. Qué nusaanaʼ de nucheecheʼ diidxaʼ neca huaraʼyaʼ, ne nga gucané naa guzuhuaa dxiichiʼ ndaaniʼ xquidxi Dios». Laaca guca nagana para laabe chebe ca guendaridagulisaa ca, peru bíʼnibe stipa pur chebe cani purtiʼ nanna dxíchibe pabiáʼ riquiiñeʼ nga guidxaagabe xcaadxi bíʼchibe ne bizáʼnabe ni ridagulisaanebe (Hebreos 10:24, 25).
7. Xiñee naca ca bíʼchinu ne ca bizáʼnanu ti ejemplu para laanu neca ridxíbicaʼ guiniʼcaʼ nezalú binni o checaʼ ca guendaridagulisaa ca.
7 Xcaadxi de ca xpinni Cristu nabé ridxíbicaʼ xiixa cosa o xiixa ni gaca, nga laaca sti guendahuará laa. Zándaca ridxíbicabe guiníʼcabe nezalú binni o chécabe ti guendaridagulisaa. Guiníʼ íquenu pabiáʼ nagana raca para laacabe guicábicabe lu ca guendaridagulisaa ca o tiidicabe lu Scuela stiʼ cani Rucheeche Diidxaʼ. Neca zacá runi huantárcabe, ne riguucabe gana laanu ora guidúʼyanu ricábicabe lu ca guendaridagulisaa ca ne qué riaadxacabe.
8. Xii nga ni jma galán guni tuuxa para cadi chuʼ xhaataʼ triste.
8 Ni zanda gacané ti binni para cadi chuʼ xhaataʼ triste nga guiziilaʼdxiʼ ne gasi biaʼ caquiiñeʼ. Laaca galán chiguuyabe ti doctor ti gabi laabe xiruʼ zanda gúnibe. Peru ni jma galán nga guni crebe de guidubi ladxidoʼbe zacané Jiobá laabe ne cadi gusaanabe de guni orarbe. Salmo 55:22 na: «Bilaa guiráʼ ni nualuʼ luguiáʼ Jiobá, ne laapebe zacanebe lii. Qué ziuu dxi gudiibe lugar guitende ñee cani runi ni jneza». Nga runi, naquiiñeʼ guni crenu de ladxidoʼno zacané Jiobá laanu (Proverbios 3:5, 6).
Ora gati ti binnilídxinu
9-11. 1) Xi zacané laanu guni huantarnu yuubaʼ ni gápanu ora gati ti binnilídxinu. 2) Ximodo racané ejemplu stiʼ Ana laanu.
9 Ora gati ti binnilídxinu la? guizáʼ riuubaʼ ladxidoʼno. Abrahán biinaʼ ora guti Sara, xheelabe (Génesis 23:2). Dede Jesús, hombre ni qué ñalené donda que, biinaʼ ora guti Lázaro, xhamígube que (Juan 11:35). Nga runi gastiʼ naca nga chuʼnu triste ora gati ti binnilídxinu ni nadxiinu. Peru laanu ca xpinni Cristu nánnanu ziuu dxi guiasa ca gueʼtuʼ ca (Hechos 24:15). Nga runi, qué riuu xhaatanu triste casi ca binni ni cadi cabeza guiasa ca gueʼtuʼ ca (1 Tesalonicenses 4:13).
10 Xi zanda gacané laanu pa gati ti binnilídxinu yaʼ. Zándaca gacané ejemplu riʼ laanu. Ora ti xhamígunu cheʼ de biaje la? qué rúʼnanu guiráʼ ora purtiʼ nánnanu zadúʼyanu laabe sti biaje. Zacaca zanda guiníʼ íquenu para cadi chúʼpenu triste ora gati ti xpinni Cristu ni ruzuubaʼ diidxaʼ, purtiʼ nánnanu ziuu dxi ziásabe lade ca gueʼtuʼ ca (Eclesiastés 7:1).
11 Guni crenu de guidubi ladxidoʼno zacané Dios laanu la? laaca zacané nga laanu ora gati ti binnilídxinu purtiʼ Dios «Bixhoze nu laa ne riá laanu» (2 Corintios 1:3, 4). Sti cosa ni zacané laanu nga guiníʼ íquenu ejemplu stiʼ Ana, ti viuda ni bibani dxiqué. Ana guti xheelaʼ dxi deruʼ napa gadxe iza de bichaganáʼ. Peru, neca maʼ nápabe 84 iza riérube ra yuʼduʼ stiʼ Jiobá para guni adorarbe laa raqué (Lucas 2:36-38). Cumu qué ñaadxabe ra yuʼduʼ que para guni adorarbe Jiobá la? gucané ngue laabe para cadi guni sentirbe stúbibe ne cadi chúʼpebe triste. Zacaca nga ora cayúninu xhiiñaʼ Jiobá ne rucheechenu stiidxaʼ Reinu guiráʼ ora, laaca zacaneni laanu para guni huantarnu yuubaʼ ni gápanu ora gati ti binnilídxinu.
Ni zacané laanu gudxíʼlunu xcaadxi cosa ni runiná laanu
12. Xi guendanagana huadxiilú caadxi de ca xpinni Cristu ni maʼ bichaganáʼ.
12 Xcaadxi xpinni Cristu nápacaʼ xidé gudxiilucaʼ ca guendanagana roʼ ni rápacaʼ ra lídxicaʼ. Cásixa ora tuuxa ni maʼ bichaganáʼ gapa jnadxii la? zándaca guizáʼ guniná binnilidxi. Xheelabe qué zusaana de guʼnaʼ ne zándaca dede qué zasi pur bicheenebe laa neca qué gapa donda. Dede zaca nagana para binni ni qué gapa donda ca guni xiixa dxiiñaʼ huiiniʼ, zándaca cadi jneza guni ni o gueeda guizaaca xiixa desgracia pur laani. Zándaca dede maʼ qué go, guilaseʼ ne gaca huará purtiʼ nisi cá ique ni biʼniʼ xheelaʼ laa. Ne laaca zándaca gaca nagana para laabe gúnibe xhiiñaʼ Jiobá. ¡Ne nanna pabiáʼ zuninani xiiñicabe yaʼ!
13, 14. 1) Ximodo racané oración ni biʼniʼ Salomón ora biluxe yuʼduʼ que laanu. 2) Xiñee naquiiñeʼ guinábanu espíritu santu.
13 Ora tiidinu xiixa guendanagana casi ni maʼ guninu ca la? Jiobá racané laanu para gudxíʼlunu cani (Salmo 94:19). Laabe rucaadiágabe ca oración stiʼ ca xpínnibe, casi rihuínnini lu oración ni biʼniʼ Salomón ora biluxe yuʼduʼ stiʼ Jiobá que. Rey que guníʼ: «Intiica oración ni gaca, intiica si cosa guinabaʼ tuuxa hombre ndaaniʼ yuʼduʼ riʼ o ni guinabaʼ guidubi guidxi Israel, purtiʼ laacaʼ nánnacaʼ xi yuubaʼ cayuniná ladxidoʼcaʼ, ne ora dxandipeʼ gusigaanacaʼ neza ra nuu yoo riʼ, bicaadiaga laacaʼ dede guibáʼ ra nuuluʼ, lugar ra nabézaluʼ, ne napa xidé gutiidiláʼdxiluʼ donda sticaʼ, ne gudiiluʼ cada tobi ni naquiiñeʼ guicaa, purtiʼ lii runibiaʼluʼ ladxidoʼcaʼ (purtiʼ lii si runibiáʼ chaahuiluʼ ladxidóʼ guiráʼ binni); para guidxíbicaʼ lii biaʼ dxi guibánicaʼ lu layú ni bidiiluʼ ca bixhoze góladu» (1 Reyes 8:38-40).
14 Guizáʼ risaca nga cadi gusaana de guinábanu espíritu santu stiʼ Dios (Mateo 7:7-11). Espíritu santu ca racané laanu chuʼnu nayecheʼ ne gatadxí ladxidoʼno (Gálatas 5:22, 23). Nga runi, ora guicabi Jiobá ca oración stinu ne gudii laanu espíritu santu la? guizáʼ galán runi sentirnu purtiʼ racanebe laanu chuʼnu nayecheʼ lugar de chuʼnu naná, ne riguixhedxibe ladxidoʼno lugar de chuʼnu xizaa.
15. Gunáʼ nga ca textu ni zaguixhedxí ladxidoʼno para cadi chúʼpenu xizaa.
15 Ora nápanu xiixa guendanagana la? nabé riuʼnu xizaa. Peru zanda chuʼdxí ladxidoʼno pa guiníʼ íquenu ca diidxaʼ ni guníʼ Jesús riʼ: «Cadi cuʼ xa ique tu ximodo ibani tu, xi go to o xi gue tu, nin cuʼ xa ique tu xi cuaqui tu. [...] Peru nirudó laguyubi [reinu stiʼ Dios] ne sa tu modo na, ne óraque zudii laatu cani riuu tu xizaa pur laa» (Mateo 6:25, 33, 34). Apóstol Pedru cayabi laanu ca diidxaʼ riʼ: «Cadi chuʼ tu xizaa, sínuque laquixhe irá ni lu ná be, purti laabe cayapa be laatu» (1 Pedro 5:6, 7). Dxandíʼ, laanu rúninu stipa pur guni chaahuinu ca guendanagana ni rápanu. Pa nabé chuʼnu xizaa pur ca guendanagana ca gastiʼ zabeendunu, peru pa gábinu Jiobá ni cayácanu la? zacanebe laanu. Sicaríʼ biindaʼ ti salmista: «Gunabaʼ Jiobá gabi lii modo saluʼ neza stiluʼ, ne gudixhe ladxidoʼloʼ ndaaniʼ nabe, ne laabe zacanebe lii» (Salmo 37:5).
16, 17. 1) Xiñee qué zanda gusaananu de chuʼnu xizaa. 2) Xi zuni sentirnu pa gúninu ni na Filipenses 4:6, 7.
16 Sicaríʼ bicaa Pablu: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Filipenses 4:6, 7). Cumu zanu de Adán la? laaca gulenenu donda, nga runi qué zanda diʼ gusaananu de chuʼnu xizaa (Romanos 5:12). Casi Isaac ne Rebeca la? guizáʼ biuubaʼ ladxidóʼcabe pur ca gunaa hitita ni bichaganáʼ xiiñicabe Esaú (Génesis 26:34, 35). Timoteu ne Trófimo laaca zándaca guyuucaʼ xizaa pur guendahuará ni gúpacaʼ (1 Timoteo 5:23; 2 Timoteo 4:20). Pablu laaca guyuu xizaa pur ca biʼchiʼ ne bizaʼnaʼ ni zinanda Cristu (2 Corintios 11:28). Peru Jiobá, «Ni rucaadiaga oración» stinu guiráʼ ora, nuu listu para gucaadiaga cani nadxii laa (Salmo 65:2).
17 Laga cabézanu gueeda dxi stiʼ Jiobá la? laabe zápabe laanu ne zaguixhedxibe ladxidoʼno (Filipenses 4:9). Jiobá nga «ti Dios ni riuubalaʼdxiʼ ne nachaʼhuiʼ», nuuca «listu para guni perdonar» ne «rietenaláʼdxibe de yú laanu» (Éxodo 34:6; Salmo 86:5; 103:13, 14). Nga runi, ora gábinu Jiobá cani cayácanu la? ziuudxí ladxidoʼno dede biaʼ qué riníʼ íquenu.
18. Ximodo nga ridúʼyanu Dios casi na Job 42:5.
18 Ora guicabi Dios ca oración stinu la? rudiʼnu cuenta rápabe laanu. Job guníʼ sicaríʼ gudiʼdiʼ si ca guendanagana stiʼ: «Nannaʼ tu lii [Jiobá] pur ni huayunadiaʼga, peru yanna maʼ cayuuyapeʼ guieluaʼ lii» (Job 42:5). Zanda guidúʼyanu Dios biaʼ qué huadúʼyanu laa pa guiníʼ íquenu ximodo huayápabe laanu, pa gápanu fe laabe ne pa gudiʼnu xquíxepeʼ laabe. Ora rinínenu Dios ratadxí ladxidoʼno ne galán ziuu xquendabiaaninu.
19. Xi zaca pa gábinu Jiobá guiráʼ cani riguu xizaa laanu.
19 Pa gusaananu cani riguu xizaa laanu lu naʼ Jiobá la? zanda guni huantarnu cani ne ziuudxí ladxidoʼno ne ziuu xquendabiaaninu galán. Maʼ qué zadxíbinu ninla ziuʼnu xizaa. Ne maʼ qué zaguu xaíquenu intiica si guendanagana.
20, 21. 1) Gánnanu guyuudxí ladxidóʼ Esteban ora guzanándacabe laa, xi rusiidini laanu. 2) Guníʼ ejemplu stiʼ tuuxa xpinni Cristu de yanna riʼ ni guyuudxí ladxidóʼ laga cayuni huantar ca guendanagana gupa.
20 Ti xpinni Cristu ni láʼ Esteban qué ñuupeʼ xizaa ora bihuinni pa dxandíʼ fe stiʼ pur guendanagana ni gudiʼdiʼ. Últimu biaje guníʼ Esteban de stiidxaʼ Cristu la? guiráʼ binni nuu ndaaniʼ Sanedrín que «biiya ca casi lú ángel lú be» (Hechos 6:15). Laacabe biiyacabe lube casi lu ti ángel, tobi ni rizané stiidxaʼ Dios, purtiʼ qué nihuinni diʼ pa cadxíbibe. Ora gúdxibe ca juez que nápacaʼ donda pur guti Jesús la? «gudó dí laacabe dede gudó yaa cabe guidi ruaa cabe, tantu bidxiichi né cabe Esteban». Peru «dxá ladxidóʼ Esteban de Espíritu Santu biiya dxí ibáʼ. Biiya enda nandxóʼ sti Dios ne biiya zuhuaa Jesús cueʼ Dios». Visión ni gucuaabe ca bidii stipa laabe para cadi gucheenebe Dios dede ora gútibe (Hechos 7:52-60). Yanna riʼ que rápanu visión, peru Dios zaguixhedxí ladxidoʼno ora sanándacabe laanu.
21 Guiníʼ íquenu ni biʼniʼ sentir caadxi de ca xpinni Cristu ni biiti ca soldadu de Alemania nazi que laacaʼ lu guiropa guendaridinde roʼ ni guca lu guidubi naca guidxilayú. Tobi de laacabe guníʼ ca diidxaʼ riʼ ora nuu nezalú juez: «Guníʼcabe zateʼ. Bicaadiagaʼ ni, despué de guniéʼ “Qué chi ixele [luʼ] dede dxi gati [luʼ]” ne xcaadxi ni guníʼ Señor stinu la? guirani biluxe. Peru qué rulabeʼ nga, purtiʼ ladxiduáʼ nabé nuudxí dede biaʼ que riníʼ íquetu». Guidúʼyanu xi bicaa ti baʼdunguiuu ra nuu bixhoze ne jñaa ante ugácabe yanni: «Maʼ biaʼ galaa gueelaʼ ndiʼ. Zándaruʼ guchaa ni caníʼ iqueʼ. Peru, ñee zabaneʼ nayecheʼ ndaaniʼ guidxilayú riʼ pa gudxiee decheʼ Señor stinu la? ¡Qué liica ziuaa nayecheʼ! Peru yanna maʼ nánnatu nayecheʼ nuaa cusaanaʼ guidxilayú riʼ ne nuudxí ladxiduáʼ». Ca ejemplu riʼ rusihuinni dxíchicani racané Jiobá ca xpinni ni qué rucheené laa.
Lii zanda guni huantarluʼ ca guendanagana ca
22, 23. Xi naquiiñeʼ guietenaláʼdxiluʼ laga cabézaluʼ gueeda dxi stiʼ Jiobá.
22 Zándaca lii cadi cudxiiluluʼ ca guendanagana casi ni bidxiilú ca binni guninu luguiáʼ ca. Peru dxandipeʼ nga ni guníʼ Job riʼ: «Hombre ni rale de gunaa, huaxiéʼ dxi ribani ne rixhacalaʼdxiʼ guiráʼ guendanagana ni rapa» (Job 14:1). Zándaca nápaluʼ xiiñiluʼ ne cayúniluʼ stipa pur gusiidiluʼ laacabe gúnicabe ni na Biblia. Peru laacabe nápacabe xidé guni huantárcabe guiráʼ ni ridxagalúcabe ra scuela, ne ora gúʼyaluʼ zuhuaacabe dxiichiʼ lu ni runi crécabe ne zinándacabe cani rusiidiʼ Biblia la? guizáʼ riécheluʼ. Laaca zándaca cudxiiluluʼ guendanagana ra dxiiñaʼ stiluʼ ne cani ruquiindecabe lii gúniluʼ. Intiica guizaacanu la? zanda guni huantarnu cani purtiʼ Jiobá nga nuaʼ ca guendanagana stinu, cani ridxaagalunu guiráʼ dxi (Salmo 68:19)
23 Zándaca guiníʼ íqueluʼ qué risácaluʼ, peru bietenalaʼdxiʼ Jiobá qué liica zusiaandaʼ cani gúniluʼ ne pabiáʼ nadxiiluʼ labe (Hebreos 6:10). Jiobá zacané lii guni huantarluʼ ca guendanagana ni gusihuinni pa dxandíʼ fe stiluʼ. Nga runi, gunabaʼ Dios gacané lii gúniluʼ ni na, ne cadi guiaandaʼ lii gábiluʼ laabe guiráʼ ni naguixhe íqueluʼ gúniluʼ. Pa gúniluʼ cani la? nabé zacaaluʼ ndaayaʼ ne zacané Jiobá lii guni huantarluʼ laga cabézaluʼ guedandá dxi stibe.
Xi nicábiluʼ
• Xiñee naquiiñeʼ guni huantar ca xpinni Cristu.
• Xi zacané laanu guni huantarnu ca guendahuará ni gápanu ne guni huantarnu ora gati ti binnilídxinu.
• Ximodo racané ca oración ca laanu guni huantarnu ca guendanagana ca.
• Xiñee zanda guni huantarnu laga cabézanu gueeda dxi stiʼ Jiobá.
[Dibuju/foto ni zeeda lu yaza 19]
Gápanu fe Jiobá la? racaneni laanu cadi chúʼpenu triste ora gati ti binnilídxinu