Ximodo racané Jehová laanu guni huantarnu

1. ¿Xiñee nagana nga guni huantarnu, peru tu zanda gacané laanu? (1 Pedro 5:10).

NABÁNINU ti tiempu nabé nagana ne guiranu nápanu guendanagana. Nuu binni napa ti guendahuará malu, xcaadxi maʼ gutiʼ ti binni ni nadxii, nuu tu laa rucaalú familia stiʼ laa o rucaalú gobiernu laa (Mat. 10:18, 36, 37). Guiranu caquiiñeʼ guni huantarnu ne zanda chuʼluʼ seguru zacané Jehová lii cásica racanebe cada tobi de ca xpínnibe (biindaʼ 1 Pedro 5:10).

2. Laanu, ca xpinni Cristu, ¿xiñee randa runi huantarnu?

² Guni huantarnu riniʼni cadi guixélenu de Jehová neca chuʼ xiixa ni gucueeza laanu, sanándacabe laanu, guidxaagalunu guendanagana o gudxiilunu xiixa tentación. Peru laanu, ca xpinni Cristu, ¿xiñee randa runi huantarnu yaʼ? Runi huantarnu purtiʼ rudii Jehová laanu stipa stiʼ ne jma nadípani que stipa stinu (2 Cor. 4:7). Lu artículo riʼ, zadúʼyanu tapa cosa ni maʼ bidii Jehová laanu para guni huantarnu ne ximodo zanda iquíʼñenu cada tobi de laacani.

ORACIÓN

3. ¿Xiñee ti milagru nga randa runi orarnu Jehová?

³ Guizáʼ ridxagayaanu purtiʼ maʼ biʼniʼ Jehová xiixa para guni huantarnu. Neca nácanu binni ruchee maʼ bíʼnibe xiixa para ganda guinínenu laabe ne gucaadiágabe laanu (Heb. 4:16). Pur ni maʼ biʼniʼ Jehová zanda guinínenu laabe ora tiica si, ne de intiica si cosa, lu intiica si diidxaʼ ne ra tiica si nuunu, dede ne ora nuunu stúbinu o deguyoono (Jon. 2:1, 2; Hech. 16:25, 26). Riénebe laanu dede ora qué ganda guininu ni peʼ cayuni sentirnu purtiʼ cayuniná ansiedad laanu (Rom. 8:26, 27). ¿Cadi dxandíʼ ti milagru nga randa runi orarnu Jehová la?

4. ¿Xiñee jneza nga guinábanu Jehová gacané laanu guni huantarnu?

⁴ Lu Biblia cayabi Jehová laanu «zanda guinábanu laa intiica cosa, peru gaca ni ni racalaʼdxiʼ, ne zucaadiaga laanu» (1 Juan 5:14). Yanna, ¿ñee jneza nga guinábanu Jehová gacané laanu guni huantarnu la? Jneza pue, purtiʼ nga nga ni racaláʼdxibe. ¿Ximodo nánnanu ni yaʼ? Purtiʼ lu Biblia ná, ora runi huantarnu racaneni para ganda guicabi Jehová Binidxabaʼ, ni cucaalú laa (Prov. 27:11). Ne laaca nani racaláʼdxibe «iquiiñebe stipa stibe para gacanebe ca ni runi ni nabe de guidubi ladxidóʼ» (2 Crón. 16:9). Nga runi, zanda chuʼnu seguru racalaʼdxiʼ Jehová gacané laanu ne zanda gacanebe laanu para guni huantarnu (Is. 30:18; 41:10; Luc. 11:13).

5. ¿Ximodo racané oración laanu gatadxí xquendabiaaninu? (Isaías 26:3).

⁵ Cayabi Biblia ca xpinni Cristu galán gábicaʼ Dios xi naguu xizaa laacaʼ, ne zacá zudii Dios laacaʼ paz stiʼ dede guirutiʼ zanda guiene ximodo ni, ne zápani ladxidoʼcaʼ ne xquendabiaanicaʼ (Filip. 4:7). ¡Guizáʼ riéchenu pur laani! Ca binni ni qué runi ni ná Jehová rúnicaʼ intiica si cosa para ganda gusiaandacaʼ ca guendanagana ni nápacaʼ ne zacá ganda gatadxí ladxidoʼcaʼ ne xquendabiaanicaʼ. Guzéʼtenu ti ejemplu, nuu binni rucaa xquendabiaaniʼ gusaana de guiníʼ ique guiráʼ xixé cosa dede né ca cosa ni naguu xizaa laa. Peru ni rúnicabe riʼ zanda gudiini lugar quiteʼ ca demonio xquendabiaanicabe (bichaaga ni né Mateo 12:43-45). Neca randa ratadxí xquendabiaanicabe peru nin ti guisi que zanda diʼ guchaaganu ni né paz ni rudii Dios laanu ora runi orarnu laa. Peru laanu nápanu confianza Jehová, laabe rápabe xquendabiaaninu ne ladxidoʼno ne qué rusaana de gudiibe «paz stibe laanu» (biindaʼ Isaías 26:3). ¿Ximodo rúnibe ni yaʼ? Ti modo nga ra gacanebe laanu guietenaláʼdxinu textu ni rusihuinni pabiáʼ nadxiibe ne racaláʼdxibe gacanebe laanu (Sal. 62:1, 2).

6. ¿Xi zanda gúniluʼ para gacané oración lii? (Laaca zanda gúʼyaluʼ imagen ca).

⁶ Ni zanda gúninu. Ora ridxaagalunu xiixa guendanagana, galán guni orarnu Jehová para gulaʼnu guiráʼ ni nuanu ra nuu ne guinábanu laa paz ne zaqueca guinábanu gudii laanu guendanuuxpiaaniʼ para gánnanu xi gúninu (Sal. 55:22; Prov. 2:10, 11). Laaca guinábanu gacané Jehová laanu guni huantarnu ne cadi gusiaandanu gudiʼnu xquixe peʼ laa (Filip. 4:6). Ne chuʼnu listu para guidúʼyanu ximodo cayacané Jehová laanu ora cudxíʼlunu guendanagana ca ne gudiʼnu xquixe peʼ laabe pur cayacanebe laanu. Cadi gudiʼnu lugar gucueeza ca guendanagana ca laanu para guidúʼyanu ca ndaayaʼ ni cudii Jehová laanu (Sal. 16:5, 6).

BIBLIA

7. Guni estudiarnu Biblia, ¿ximodo racaneni laanu guni huantarnu?

⁷ Maʼ bidii Jehová laanu Stiidxaʼ para gacané laanu guni huantarnu. Luni zeeda stale relatu ni rusihuinni zanda gacané Jehová laanu. Guidúʼyanu ti ejemplu. Mateo 6:8 ná: «Maʼ nanna bixhózetu xi caquiiñetu dede ante guinábatu ni laa». Jesús nga guníʼ ca diidxaʼ riʼ ne laabe nga binni ni jma runibiáʼ Jehová. Nga runi, ora cayuni sufrirnu zanda chuʼnu seguru nanna Jehová xi caquíʼñenu ne zacané laanu. Lu Biblia ridxélanu stale promesa sicarú ni rudii stipa laanu para guni huantarnu (Sal. 94:19).

8. a) Bizeeteʼ ti principiu ni zeeda lu Biblia ni zanda gacané laanu. b) ¿Xi zacané laanu guietenaláʼdxinu xiixa principiu ni zeeda lu Biblia ora peʼ caquíʼñenu ni?

⁸ Lu Biblia laaca zeeda principiu ni zanda gacané laanu guni huantarnu. Rusiidiʼ ca principiu riʼ laanu, ganda guicaanu decisión jneza (Prov. 2:6, 7). Guzéʼtenu ti ejemplu, cayabi Biblia laanu cadi galán diʼ guicá ique xhaatanu xi zanda gueeda guizaaca de laanu huidxe si, sínuque guidúʼyanu ca guendanagana si stiʼ cada dxi (Mat. 6:34). Pa guidúʼndanu Biblia ne guiníʼ íquenu ni cayúʼndanu qué zaca nagana para laanu guietenaláʼdxinu ca principiu ni zanda gacané laanu ora cadxaagalunu xiixa guendanagana.

9. Guiníʼ íquenu lu ca relatu ni zeeda lu Biblia, ¿ximodo racaneni laanu?

⁹ Laaca ruzeeteʼ Biblia de binni ni gupa confianza Jehová ne modo gucané Jehová laacaʼ (Heb. 11:32-34; Sant. 5:17). Ora riníʼ íquenu lu ca relatu riʼ, jma riroobaʼ confianza ni nápanu Jehová ne riuʼnu seguru nácabe «ti lugar ra zanda guilanu ne laabe nga stipa stinu, zanda gacanebe laanu nagueendaca ora cadídinu lu xiixa guendanagana» (Sal. 46:1). Pa guiníʼ íquenu pabiáʼ fe gupa ca xpinni Dios de dxiqué ne modo biʼniʼ huantarcaʼ, zaguuni gana laanu chinándanu ejemplu sticaʼ (Sant. 5:10, 11).

10. ¿Xi zanda gúninu para ganda gacané Biblia laanu?

¹⁰ Ni zanda gúninu. Guidúʼndanu Biblia guiráʼ dxi ne gúninu ti lista de textu ni riuuláʼdxinu ne rábinu zanda gacané laanu. Laaca ruundaʼ stale hermanu guiráʼ siadóʼ textu ni riaba dxi ca purtiʼ runi sentircaʼ riguuni gana laacaʼ. Ne nga peʼ nga ni bizaaca ti hermana láʼ Marie.a Gupaʼ bixhózebe ne jñaabe cáncer, ne laabe biiyabe de laacaʼ dede ora beeda gáticaʼ. Marie guníʼ xi gucané laa gapa stipa para guni huantar, laabe guniʼbe: «Guiráʼ dxi ruundaʼ folletu Guidúʼndanu Stiidxaʼ Dios ne riníʼ iqueʼ ni cayuundaʼ. Ngue racané naa guiníʼ iqueʼ lu ca cosa galán rusiidiʼ Stiidxaʼ Dios ne cadi guiníʼ iqueʼ lu guendanagana ni cadideʼ que» (Sal. 61:2).

CA HERMANU STINU

11. Ora guiníʼ íquenu laaca ridiʼdiʼ ca hermanu stinu lu guendanagana, ¿ximodo racaneni laanu?

¹¹ Riquiiñeʼ Jehová ca hermanu ni nuu lu guidubi naca guidxilayú para gacanecaʼ laanu guni huantarnu. Ora guiníʼ íquenu «laaca cayuni sufrir guiráʼ ca hermanu» cásica cayuni sufrirnu, guizáʼ riguixhedxini ladxidoʼno (1 Ped. 5:9). ¿Xiñee yaʼ? Purtiʼ ora guiníʼ íquenu laaca cudxiilúcabe xiixa guendanagana cásica ni rudxiilunu ne randa runi huantárcabe, racaneni laanu chuʼnu seguru laaca zanda guni huantarnu intiica si guendanagana guidxaagalunu (Hech. 14:22).

12. ¿Xi runi ca hermanu pur laanu ne xi zanda gúninu pur laacaʼ? (2 Corintios 1:3, 4).

¹² Laaca zanda guni ca hermanu stinu xiixa para cuʼcaʼ gana laanu. Ne nga peʼ nga ni biʼyaʼ apóstol Pablo biʼniʼ ca hermanu pur laa. Laga deguyoobe gucané ca hermanu que laabe de gadxé gadxé modo, ne lu ca carta bicaabe bizeetebe lá cada tobi de laacaʼ ne bidiibe xquixe peʼ laacaʼ purtiʼ gudixhedxicaʼ ladxidoʼbe ne guluucaʼ gana laabe (Filip. 2:25, 29, 30; Col. 4:10, 11). Ca dxi stinu riʼ, nuu ca hermanu stinu para gacanecaʼ laanu guni huantarnu, ne laanu laacaʼ zanda gúninu xiixa pur laacabe ora peʼ caquiiñecabe ni (biindaʼ 2 Corintios 1:3, 4).

13. ¿Xi gucané Maya guni huantar?

¹³ Guidúʼyanu ni bizaaca Maya ti hermana de guidxi Rusia. Lu iza 2020, bidxieenáʼ policía ra lídxibe. Despué yenécabe laabe nezalú ti juez purtiʼ riníʼnebe xcaadxi binni de ni runi crebe. ¿Ximodo gucané ca hermanu laabe yaʼ? Laabe guniʼbe: «Ti biaje ra maʼ qué gapaʼ stipa ne guníʼ iqueʼ maʼ qué zanda guneʼ huantar, dxi que guniʼné ca hermanu ne ca hermana naa, bicaacabe ra nuaaʼ ne gúdxicabe naa pabiáʼ nadxiicabe naa». Ne guníʼrube: «Maca nannaʼ nuaaʼ ndaaniʼ ti familia ra nuu guendarannaxhii, peru lu iza 2020 biiyaʼ dxicheʼ dxandíʼ peʼ nadxii ca hermanu naa».

14. ¿Xi zanda gúninu para cueendunu ni galán ora gacané ca hermanu laanu? (Laaca zanda gúʼyaluʼ imagen ca).

¹⁴ Ni zanda gúninu. Ora guidxaagalunu xiixa guendanagana, galán cadi guixélenu de ca hermanu stinu. Cadi guiaandaʼ laanu zanda guinábanu gacané ca ancianu laanu, purtiʼ laacaʼ «zeeda gácacaʼ casi ti lugar ra zanda chuʼ binni ora cundubi bi ne ra gucaachilú binni ora cayaba dxacha nisaguié» (Is. 32:2). Ne laaca cadi guiaandaʼ laanu, laaca cadiʼdiʼ ca hermanu stinu lu guendanagana. Pa gúninu ti cosa galán para tuuxa ni caquiiñeʼ peʼ ni, qué zaca nagana para laanu guni huantarnu ne gudxiilunu ca guendanagana stinu sin guireʼnu gana (Hech. 20:35).

ESPERANZA NI NÁPANU

15. ¿Ximodo gucané esperanza ni gupa Jesús laa, ne ximodo racaneni laanu? (Hebreos 12:2).

¹⁵ Maʼ bidii Jehová laanu ti esperanza naguidxi para gacané laanu guni huantarnu (Rom. 15:13). Cadi guiaandaʼ laanu pur esperanza ni gupa Jesús gucaneni laa guni huantar guiráʼ yuubaʼ gudiʼdiʼ dxi biiticabe laa (biindaʼ Hebreos 12:2). Nanna Jesús pa guzuubaʼ stiidxaʼ Bixhoze, zacaneni guisaca lá Jehová ne guiani. Laaca racaláʼdxibe guibiguetaʼ gúʼyabe Bixhózebe guibáʼ ne guedandá dxi guni mandarnebe ca bíʼchibe ni maʼ bibí. Zacaca rizaaca né esperanza ni cudii Dios laanu para guibáninu sin qué chuʼ dxi gátinu lu guidxilayú cubi, racaneni laanu guni huantarnu intiica guendanagana ni guidxaagalunu lu guidxilayú stiʼ Binidxabaʼ riʼ.

16. ¿Ximodo gucané esperanza ni nápanu ti hermana, ne xi rusiidiʼ ni bizaacabe laanu?

¹⁶ Guidúʼyanu ximodo gucané esperanza riʼ ti hermana láʼ Alla de guidxi Rusia. Dxi gunaazecabe xheelabe ne guluucabe laa cárcel, laabe guniʼbe: «Ni gucané naa cadi chuaaʼ triste nga guneʼ orar ne guiníʼ iqueʼ lu ca promesa sicarú ni chigudii Jehová laanu huidxe si. Nannaʼ zedandá dxi zaluxe ca guendanagana riʼ. Zuni ganar Jehová ne laanu laaca zuni ganarnu».

17. ¿Ximodo rusihuínninu rusisácanu esperanza ni nápanu? (Laaca zanda gúʼyaluʼ imagen ca).

¹⁷ Ni zanda gúninu. Guiníʼ íquenu promesa sicarú ni maʼ biʼniʼ Jehová laanu. Guiníʼ íquenu maʼ nuunu lu guidxilayú cubi ca ne nayecheʼ nuunu pur guiráʼ ca ndaayaʼ ni nápanu. Ra gúninu ni zadúʼyanu ti ratu si nga ridídinu prueba ne «cadi naroʼbaʼ peʼ ni» (2 Cor. 4:17). Laaca galán gúninu biaʼ gándatiʼ para guinínenu binni de ni runi crenu. ¿Ñee riníʼ íquenu pabiáʼ nagana raca para laacabe gudxiilúcabe guidxilayú stiʼ Binidxabaʼ purtiʼ qué runi biaʼcabe ni maʼ gudixhe Dios chiguni la? Zándaca neca chupa chonna si cosa ni chiguni Reinu stiʼ Dios gábinu laacabe, zanda nga gucaa laacabe chuláʼdxicabe guiziidicabe jma.

18. ¿Xiñee zanda gápanu confianza zuni cumplir Jehová ca promesa stiʼ?

¹⁸ Despué de gudiʼdiʼ Job lu stale guendanagana, sicaríʼ gúdxibe Jehová: «Yanna maʼ nannaʼ zanda gúniluʼ guiráʼ cosa ne gastiʼ ni nagana para lii, guiráʼ ni quixhe íqueluʼ zanda gúniluʼ» (Job 42:2). Biene Job gastiʼ ni zanda gucueeza Jehová de guni ni maʼ gudixhe ique. Ra guiénenu ndiʼ rudiini stipa laanu para ganda guni huantarnu. Chiguzéʼtenu ti ejemplu, guníʼ ique ti gunaa ni napa ti guendahuará ne guizáʼ nuube triste purtiʼ maʼ guyebe ra nuu stale doctor, peru nin tobi de laacaʼ qué zanda gusiándacaʼ laabe. Peru ti dxi guyebe ra nuu ti buen Doctor ne gudxi laabe xi guendahuará nápabe ne rabi laabe xi gúnibe para guiándabe. Oraqueca guyuube gana ne neca huarabe peru yanna qué zaca nagana para laabe guni huantarbe purtiʼ nápabe ti esperanza: nánnabe ziándabe. Zacagá nga rizaacanu, nápanu stipa para cadi gusaana de guni huantarnu purtiʼ nuunu seguru maʼ cadi candaa zaca guidxilayú riʼ ti Paraísu.

19. ¿Xi caquiiñeʼ gúninu para guni huantarnu?

¹⁹ Casi maʼ bidúʼyanu para gacané Jehová laanu maʼ bidiibe laanu oración, Stiidxabe, ca hermanu ne ti esperanza. Pa gúninu stipa iquíʼñenu ca regalu riʼ, zacané Jehová laanu gudxiilunu ca guendanagana ni gápanu yanna ne laaca zacanebe laanu guni huantarnu dede ora guinitilú guidxilayú malu stiʼ Binidxabaʼ ne guiree guiráʼ guendanagana ni cayuniná laanu (Filip. 4:13).