Cadi guiaandaʼ laanu Jehová nga «Dios ni nabani»

1. ¿Xi zacané laanu cadi gusaana de guni adorarnu Jehová neca cadxaagalunu stale guendanagana?

BIBLIA ná jma nagana zaca tiempu nabáninu ne «nadipaʼ zaca para binni guni huantar ni» (2 Tim. 3:1). Tiempu riʼ, guiráʼ binni nga napa guendanagana, peru laanu, ca xpinni Dios, nápanu xcaadxi guendanagana aparte de ca ni maʼ nápanu, rizananda binni laanu ne rucaalucaʼ laanu. ¿Xi zacané laanu cadi gusaana de guni adorarnu Jehová neca cadídinu lu ca guendanagana ca yaʼ? Tobi de ca cosa ni zacané laanu nga cadi guiaandaʼ laanu naca Jehová ti «Dios ni nabani» (Jer. 10:10; 2 Tim. 1:12).

2. ¿Ximodo rusihuinni Jehová naca ti «Dios ni nabani»?

² Dxandíʼ nabani Jehová, ruuyabe laanu ora cadxaagalunu guendanagana ne ruyúbibe modo gacanebe laanu (2 Crón. 16:9; Sal. 23:4). Pa guidúʼyanu Jehová casi ti Dios ni nabani zudiini stipa laanu para gudxíʼlunu intiica guendanagana. Nga peʼ nga ni bizaaca rey David, guidúʼyanu ni.

3. ¿Xiñee guníʼ David: «¡Nabani Jehová!»?

³ Binibiáʼ David Jehová ne gupa confianza laabe. Ne gunábabe Jehová gacané laabe dxi canazananda rey Saúl ne xcaadxi binni laabe (Sal. 18:6). Ora bíʼyabe bicabi Jehová oración stibe ne bilá laabe, bicaabe ridxi ne guniʼbe: «¡Nabani Jehová!» (Sal. 18:46). Né ca diidxaʼ riʼ, cadi caníʼsibe nuu Dios. Ti libru ná caníʼ David zaqué purtiʼ napa confianza Jehová «casi ti Dios ni nabani ne racané xquidxi stale biaje». Biiyaʼ David modo gucané Jehová laa lu xquendanabani, ne nga gucané laabe chuʼbe seguru nabani Jehová ne bidiini stipa laabe para gúnibe ni ná Jehová ne gusisácabe laa (Sal. 18:​28, 29, 49).

4. Pa ridúʼyanu Jehová casi ti Dios ni nabani, ¿ximodo zacaneni laanu?

⁴ Pa nuunu seguru naca Jehová ti Dios ni nabani, zacaneni laanu gúninu ni nabe né stale gana. Zudiini stipa laanu para guni huantarnu intiica guendanagana ne zacaneni laanu gúninu xhiiñabe né guiráʼ stipa stinu. Peru cadi ngasi, laaca zacaneni laanu quixhe íquenu cadi guixélenu de laabe.

ZUDII DIOS NI NABANI STIPA LII

5. ¿Xi zacané laanu gudxíʼlunu ca guendanagana stinu sin guidxíbinu? (Filipenses 4:13).

⁵ Zanda guni huantarnu intiica guendanagana neca gácani naroʼbaʼ pa guietenaláʼdxinu dxandíʼ nabani Jehová ne nuu listu para gacané laanu. Zanda gacanebe laanu lu intiica guendanagana purtiʼ gastiʼ ni nagana para laabe. Laabe nga Dios ni jma napa poder ne zanda gudiibe laanu stipa para guni huantarnu intiica si ni guidxaagalunu (biindaʼ Filipenses 4:13). Nga runi, racané ca ni bizéʼtenu ca laanu gudxíʼlunu ca guendanagana stinu sin guidxíbinu. Ora guidúʼyanu racané Jehová laanu gudxíʼlunu ca guendanagana nahuiiniʼ ni cadxaagalunu, racaneni laanu chuʼnu seguru zacanebe laanu ora guidxaagalunu guendanagana jma naroʼbaʼ.

6. ¿Xi bizaaca David ni bicaa laa gapa jma confianza Jehová?

⁶ Guidúʼyanu chupa cosa ni bizaaca David ne xi gucané laabe gápabe jma confianza Jehová. Dxi joven David ne rapa dendxuʼ, ziné ti lión tobi de ca dendxuʼ stiʼ bixhózebe, ne sti biaje la? ti oso ziné tobi de laacame. Guiropaʼ biaje riʼ, guca David nadxibalú ne guzanándabe ca maniʼ que ne gúxhabe laacame ca dendxuʼ que. Nánnabe Jehová ngue bidii laabe stipa para gulabe ca manihuiiniʼ que, ngue runi qué niniʼbe stúbisibe bíʼnibe ni (1 Sam. 17:​34-37). Qué ñuu dxi nusiaandaʼ David ni bizaaca que. Guníʼ íquebe ca cosa ni bizaacabe que ne gucaneni laabe guni crebe zacané Dios laabe despué.

7. ¿Ximodo biiyaʼ David guendanagana gupa, ne ximodo gucané ngue laabe gudxiilube Goliat?

⁷ Despué, dxi zándaca nácaruʼ David joven, guyebe ra nuu campamentu stiʼ ejércitu stiʼ guidxi Israel. Biiyabe guizáʼ cadxibi ca soldadu stiʼ Israel ti gigante filisteu ni láʼ Goliat purtiʼ caníʼ: «¡Yannadxí, naa piaʼ cucaaluáʼ ejércitu stiʼ guidxi Israel!» (1 Sam. 17:​10, 11). Bidxibi ca soldadu que purtiʼ jma cayuuyacaʼ pabiáʼ naroʼbaʼ Goliat ne ni caniʼbe que (1 Sam. 17:​24, 25). Peru biiyaʼ David sti cosa. Biiyabe pur guiráʼ ni caníʼ Goliat, cadi ejércitu si stiʼ guidxi Israel nga cucaalú, sínuque laaca cucaalú ejércitu stiʼ «Dios ni nabani» (1 Sam. 17:26). Guníʼ ique David zacané Jehová laa. Gúpabe confianza cásica gucané Dios laabe gulabe ca dendxuhuiiniʼ que laaca zacané laabe lu guendanagana riʼ. Cumu gucané Jehová laabe la? bidxiilube Goliat, ne casi maʼ nánnanu, ¡biʼniʼ ganarbe filisteu que! (1 Sam. 17:​45-51).

8. ¿Xi zacané laanu chuʼnu jma seguru zacané Jehová laanu ora tídinu lu guendanagana? (Biiyaʼ imagen ca).

⁸ Cásica David, laaca zanda gudxíʼlunu ca guendanagana gápanu pa que guiaandaʼ laanu nuuca Dios ni nabani listu para gacané laanu (Sal. 118:6). Jma zuni crenu zanda gacané Dios laanu pa guiníʼ íquenu ca cosa ni bíʼnibe dxiqué. Ti cosa ni zanda gúninu nga, guidúʼndanu ca relatu ni zeeda lu Biblia ni gusietenalaʼdxiʼ laanu ximodo gucané Jehová ca xpinni dxiqué (Is. 37:​17, 33-37). Ne laaca zanda gúʼndaluʼ lu jw.org información ni cuzeeteʼ ximodo huayacané Jehová ca hermanu stinu tiempu riʼ. Ne bietenalaʼdxiʼ ximodo huayacané Jehová lii lu xquendanabániluʼ. Peru cadi chuʼluʼ xizaa pa qué huayuutiluʼ ti oso o ti lión cásica David. Ni dxandíʼ nga maʼ stale cosa maʼ biʼniʼ Jehová pur lii. Tobi de laani nga bichíñabe lii ra nuube para gácaluʼ xhamígube (Juan 6:44). Ne cumu cayacanebe lii la? cayanda cayúniluʼ ni nabe. Xiñee qué guinábaluʼ Jehová gacané lii guietenaláʼdxiluʼ: ximodo huacábibe ca oración stiluʼ, ximodo gucanebe lii ora jma peʼ caquiiñeluʼ ni o ximodo huayápabe lii ora cadíʼdiluʼ lu guendanagana. Pa guiníʼ íqueluʼ guiráʼ ni huayuni Jehová pur lii la? ziuuluʼ jma seguru qué zusaanabe de gacanebe lii.

9. ¿Ximodo naquiiñeʼ guidúʼyanu ca guendanagana stinu? (Proverbios 27:11).

⁹ Ra gánnanu naca Jehová ti Dios ni nabani la? zacaneni laanu guiénenu xiñee ridídinu lu guendanagana. Naca ca guendanagana ca parte de ti guendanagana jma naroʼbaʼ ni nuu entre Jehová ne Binidxabaʼ. Binidxabaʼ ná ora cadídinu lu guendanagana la? zaxélenu de Jehová (Job 1:​10, 11; biindaʼ Proverbios 27:11). Nga runi, pa qué guixélenu de Jehová ora nápanu guendanagana, zusihuínninu nadxiinu laabe ne rusiguii Binidxabaʼ. ¿Ñee cucaalú Gobiernu lii, huaxiéʼ bueltu nápaluʼ, qué rucaadiaga binni lii lu predicación o nápaluʼ sti guendanagana la? Pa zacani, cadi guiaandaʼ lii: pur ni cazaacaluʼ ca zanda gusihuínniluʼ rusiécheluʼ Jehová. Bietenalaʼdxiʼ, qué zudii Jehová lugar gaca guendanagana ca jma naroʼbaʼ de biaʼ qué zanda guni huantarluʼ (1 Cor. 10:13). Zudiibe lii stipa para guni huantarluʼ.

ZUDII DIOS NI NABANI PREMIU LII

10. ¿Xi zuni Dios ni nabani pur ca binni ni runi adorar laa?

¹⁰ Rudii Jehová premiu ca binni ni runi adorar laa (Heb. 11:6). Yanna riʼ, rudiibe laanu guendariuudxi ne racanebe laanu chuʼnu nayecheʼ, ne maʼ cadi candaa, zudiibe laanu guendanabani ni qué zaluxe. Nanna dxíchinu racalaʼdxiʼ Jehová gudii laanu premiu ca ne nápabe poder para gúnibe ni. Ra gánnanu nga racaneni laanu gúninu xhiiñabe né guiráʼ stipa stinu, cásica biʼniʼ ca xpinni Dios ni bibani dxiqué. Guidúʼyanu ximodo biʼniʼ Timoteo ni ná Dios (Heb. 6:​10-12).

11. ¿Xi gucané Timoteo guni dxiiñaʼ nadipaʼ ndaaniʼ congregación? (1 Timoteo 4:10).

¹¹ (Biindaʼ 1 Timoteo 4:10). Gudixhe Timoteo esperanza stiʼ lu náʼ Dios ni nabani. Gunna dxíchibe zudii Dios laabe premiu. Nga runi bíʼnibe dxiiñaʼ nadipaʼ para Jehová ne para gacanebe xcaadxi. ¿Xi bíʼnibe yaʼ? Guluu apóstol Pablo gana laabe gusiidibe jma jneza ndaaniʼ congregación ne ora guni predicarbe, ne gácabe ti ejemplu galán para ca hermanu nahuiiniʼ ne huaniisi. Bidiicabe laabe dxiiñaʼ nagana, casi gudiibe conseju ca hermanu ni caquiiñeʼ ni, peru gúnibe ni né diidxaʼ nadóʼ (1 Tim. 4:​11-16; 2 Tim. 4:​1-5). Gunna Timoteo neca guirutiʼ guʼyaʼ dxiiñaʼ ni cayuni o qué gusisácacabe ni, zudii Jehová premiu laa (Rom. 2:​6, 7).

12. ¿Xi zanda gacané ca ancianu gúnicaʼ dxiiñaʼ nadipaʼ ndaaniʼ congregación? (Biiyaʼ imagen ca).

¹² Cásica Timoteo, cadi naquiiñeʼ gusiaandaʼ ca ancianu ruuyaʼ Jehová ne rusisaca dxiiñaʼ galán ni rúnicaʼ. Aparte de gapa ca ancianu ca hermanu de congregación, gusiidicabe ne guni predicárcabe, stale de laacabe rúnicabe dxiiñaʼ lu ca proyectu de construcción ne racanécabe lu ca labor de socorro. Xcaadxi de laacabe nuu lu grupu de ancianu ni riganna ca hermanu ni nexheʼ ra hospital o nuucabe lu Comité de Enlace né ca Hospital. Nanna ca ancianu stiʼ Jehová ca congregación ca ne cadi stiʼ binni. Nga runi rúnicabe ca dxiiñaʼ stícabe de guidubi xhiálmacabe ne nanna dxíchicabe zudii Dios laacabe premiu (Col. 3:​23, 24).

13. ¿Ximodo runi sentir Jehová ora ruuyaʼ stipa ni rúninu pur gúninu ni ná?

¹³ Cadi guirádinu zanda gácanu ancianu, peru guiranu zanda gudiʼnu xiixa Jehová. Rusisácabe stipa ni rúninu para gudiʼnu laabe ni jma galán de laanu. Rusisaca Dios ca donación ni rúniluʼ para obra mundial, neca huaxiéʼ gudiiluʼ. Laaca riuube nayecheʼ ora ruuyabe rúniluʼ stipa guindisaʼ naluʼ para guni comentarluʼ neca rituí luluʼ. Ne guizáʼ riéchebe ora runi perdonarluʼ tuuxa ni bininá lii. Ne ora riníʼ íqueluʼ qué zanda gúniluʼ xhiiñaʼ Jehová biaʼ ñuuláʼdxiluʼ ñúniluʼ ni, cadi guiaandaʼ lii rusisácabe dxiiñaʼ ni randa rúniluʼ pur laabe. Nadxii Jehová lii ne zudiibe premiu lii pur ni rúniluʼ (Luc. 21:​1-4).

CADI GUIXÉLENU DE DIOS NI NABANI

14. Pa chuʼnu gaxha de Jehová ¿ximodo zacaneni laanu cadi gucheʼnenu laabe? (Biiyaʼ imagen ca).

¹⁴ Pa dxandíʼ runi crenu nabani Jehová, que zaca nagana para laanu guzúʼbanu stiidxabe. Nga peʼ nga ni bizaaca José, qué ninabe ñúnibe ti cosa guizáʼ malu. Purtiʼ para laabe dxandíʼ nuu Dios ne qué racaláʼdxibe guninabe laa (Gén. 39:9). Pa racaláʼdxinu guni crenu dxandíʼ nuu Jehová, naquiiñeʼ cueenu tiempu para guni orarnu laabe ne guni estudiarnu Stiidxabe. Pa gúninu nga la? jma ziuʼnu gaxha de laabe. Pa chuʼnu gaxha de Jehová cásica biʼniʼ José la? qué zuyúbinu gúninu xiixa ni qué riuuláʼdxibe (Sant. 4:8).

15. ¿Xi rizíʼdinu de ca israelita ni qué ñuni ni jneza dxi nuucaʼ lu desiertu? (Hebreos 3:12).

¹⁵ Ca ni rusiaandaʼ naca Jehová ti Dios ni nabani guizáʼ nagueenda zanda guixélecaʼ de laabe. Guzéʼtenu xi bizaaca ca israelita dxi nuucaʼ lu desiertu. Gúnnacabe dxandíʼ nuu Jehová, peru bizulú guníʼ íquecabe pa dxandíʼ zudii Jehová laacabe ni caquiiñecabe. Dede guníʼ íquecabe: «¿Ñee nuu Jehová ládenu la? o coʼ?» (Éx. 17:​2, 7). Ne pur ngue la? maʼ qué nuzuubacabe stiidxaʼ Dios. Ne laanu qué racaláʼdxinu gácanu casi laacabe (biindaʼ Hebreos 3:12).

16. ¿Xi zanda quixhe fe stinu prueba?

¹⁶ Pur modo nuu guidxilayú riʼ yanna, naquiiñeʼ gúninu stale stipa para chuʼnu gaxha de Jehová. Stale binni ná cadi dxandíʼ nuu Dios, ne ruluíʼ galán nabani ca ni qué runi ni ná Dios. Zanda quixhe ni bizéʼtenu riʼ prueba fe stinu. Neca qué zusaana de guni crenu dxandíʼ nuu Dios, peru zándaca guzulú guiníʼ íquenu pa dxandíʼ zacanebe laanu. Zacagá nga bizaaca hombre ni bicaa Salmo 73. Biiyabe galán nabani ca binni ni cadi zinanda ca ley stiʼ Dios ne cadi cazaacacaʼ gastiʼ. Ne ngue bicaa laabe guiníʼ íquebe pa risaca ngue gúnibe ni ná Jehová o pa coʼ (Sal. 73:​11-13).

17. ¿Xi zacané laanu cadi guixélenu de Jehová?

¹⁷ ¿Xi gucané hombre ni bicaa salmo que guchaa modo riníʼ ique yaʼ? Ni gucané laabe nga guníʼ íquebe xi zazaaca ca binni ni guixeleʼ de Jehová (Sal. 73:​18, 19, 27). Laaca guníʼ íquebe xi ndaayaʼ ricaa ca binni ni runi ni ná Dios (Sal. 73:24). Laanu laaca zanda guiníʼ íquenu guiráʼ ca ndaayaʼ ni maʼ bidii Jehová laanu ne guchaaganu cani ne modo nibáninu pa qué ñúninu ni nabe. Pa gúninu ni zacaneni laanu quixhe íquenu cadi guchéʼnenu Jehová ne guininu cásica guníʼ hombre ni bicaa salmo que: «Peru naa la? guizáʼ galán runeʼ sentir chuaaʼ gaxha de Dios» (Sal. 73:28).

18. ¿Xi zacané laanu cadi guidxíbinu ca cosa ni chiguizaaca despué?

¹⁸ Zanda gudxíʼlunu intiica guendanagana ni guidxaagalunu lu ca últimu dxi riʼ purtiʼ nácanu «esclavu stiʼ Dios ni dxandíʼ ne ni nabani» (1 Tes. 1:9). Dxandíʼ nabani Jehová, rizaaláʼdxibe laanu ne siempre nuube gaxha de laanu para gacanebe laanu. Ne nga peʼ nga ni bíʼnibe né ca xpínnibe ni bibani dxiqué ne qué zusaana de gúnibe ni tiempu riʼ. Maʼ cadi candaa, zabáninu ca dxi jma nagana ni qué huayuu dxi guibani binni peru ziuu tu zacané laanu (Is. 41:10). «Nga runi zanda guininu né stale confianza: “Jehová nga racané naa. Qué zadxibeʼ diaʼ”» (Heb. 13:​5, 6).