Gunna nuu cosa ni qué zanda gánnaluʼ

1. ¿Ximodo bizáʼ Jehová laanu, ne xiñee?

GUIZÁʼ galán modo bizáʼ Jehová laanu. Bizaʼbe laanu para ganda guiníʼ íquenu, guizíʼdinu ne gánnanu ximodo gúninu ni cazíʼdinu. ¿Xiñee bizaʼbe laanu zacá yaʼ? Purtiʼ racaláʼdxibe gunibiáʼ chaahuinu laabe ne iquíʼñenu xquendabiaaninu para guicaanu decisión jneza ora gúninu ni nabe (Prov. 2:​1-5; Rom. 12:1).

2. a) ¿Xi caquiiñeʼ guiénenu? (Job 37:​23, 24; laaca zanda gúʼyaluʼ imagen ca). b) ¿Xiñee galán gácanu humilde ne gudiʼnu cuenta nuu cosa ni qué gánnanu?

² Neca bizáʼ Jehová laanu para ganda guizíʼdinu stale cosa, peru caquiiñeʼ guiénenu nuu stale cosa ni qué gánnanu (biindaʼ Job 37:​23, 24). Guiníʼ íquenu ni gudxi Jehová Job. Biʼniʼ Jehová laabe caadxi pregunta para gudiibe cuenta nuu stale cosa ni qué gánnabe. Ngue gucané laabe guchaabe modo riníʼ íquebe ne guiénebe caquiiñeʼ gácabe humilde (Job 42:​3-6). Laanu laaca galán gácanu humilde ne gudiʼnu cuenta nuu cosa ni qué gánnanu. Pa gácanu humilde zacaneni laanu gápanu confianza siempre zusiidiʼ Jehová laanu ni peʼ caquiiñeʼ gánnanu para guicaanu decisión jneza (Prov. 2:6).

3. ¿Xi zazíʼdinu lu artículo riʼ?

³ Lu artículo riʼ zadúʼyanu caadxi cosa ni qué gánnanu ne xiñee nuu biaje reeda gácani ti guendanagana para laanu. Laaca zadúʼyanu xiñee nuu cosa ni cadi caquiiñeʼ peʼ gánnanu. Ni zazíʼdinu riʼ zacaneni laanu gápanu jma confianza zabi Jehová laanu ni peʼ caquiiñeʼ gánnanu purtiʼ laasibe nga ni nanna guiráʼ xixé cosa (Job 37:16).

QUÉ GÁNNANU PADXÍ GUEEDA FIN

4. Casi riete lu Mateo 24:​36, ¿xi qué gánnanu?

⁴ (Biindaʼ Mateo 24:36). Qué gánnanu padxí gueeda fin stiʼ guidxilayú malu riʼ. Nin Jesús dxi guyuu lu guidxilayú riʼ qué ñanna «padxí ne pora» gueedani.a Despué gúdxibe ca apóstol stibe nuu cosa Jehová si riguixhe padxí ne pora guizaaca cani purtiʼ laasi nga «napa autoridad» para guni ni (Hech. 1:​6, 7). Maʼ naguixhe Jehová xi dxi guedané fin stiʼ guidxilayú malu riʼ, peru laanu qué zanda gánnanu padxí peʼ gueedani.

5. ¿Xi zándaca guizaacanu purtiʼ qué gánnanu padxí peʼ gueeda fin?

⁵ Pur ni guníʼ Jesús ca, qué gánnanu pabiáʼ tiempu caquiiñeʼ cuézanu para gueeda fin. Nga runi, zándaca guirá paciencia stinu o guireʼnu gana, jmaruʼ si pa maʼ xadxí cayúninu ni ná Jehová. O zándaca gaca nagana para laanu guni huantarnu ora guni burla binni laanu o familia stinu ne gábicaʼ laanu xiñee caʼruʼ gueeda fin (2 Ped. 3:​3, 4). Dede zándaca guiníʼ íquenu: «Pa ñannaʼ padxí peʼ gueeda fin qué ñaca nagana para naa ñapaʼ paciencia ne ñuneʼ huantar ca burla ca».

6. ¿Xiñee galán nga qué gánnanu padxí gueeda fin?

⁶ Cumu cadi cayabi Jehová laanu padxí peʼ gueeda fin ca la? cudiibe lugar gusihuínninu rúninu ni nabe purtiʼ nadxiinu ne nápanu confianza laabe. Qué racaláʼdxinu gúninu ni ná Jehová ti tiempu si, casi xa ñaca maʼ nexheʼ padxí gusaana de gápanu fe, sínuque ni racaláʼdxinu nga qué chuʼ dxi gusaana de gúninu ni nabe. Nga runi lugar de guiníʼ íquenu padxí peʼ gueeda dxi stiʼ Jehová ni jma galán gúninu nga guiníʼ íquenu lu ca cosa galán ni chiguizaaca despué de gueeda dxi ca. Ora guiníʼ íquenu guiráʼ ni chiguni Jehová pur laanu zacaneni laanu chuʼnu jma gaxha de laabe ne gúninu stipa gúninu biaʼ gándatiʼ para gusiéchenu laabe (2 Ped. 3:​11, 12).

7. ¿Xi maʼ nánnanu?

⁷ Galán guiníʼ íquenu lu ca cosa ni maʼ nánnanu. ¿Xi maʼ nánnanu yaʼ? Maʼ nánnanu dede lu iza 1914 maʼ nabáninu lu ca últimu dxi. Ne maʼ bidii Jehová laanu profecía ni zeeda lu Biblia ni rusihuinni iza ca nga bizulú ca últimu dxi ne laaca rábicani laanu ximodo zabani binni tiempu ca. Nga runi maʼ nánnanu «maʼ gaxha nuu dxi roʼ stiʼ Jehová» (Sof. 1:14). Ne laaca nánnanu racalaʼdxiʼ Jehová guni predicarnu «ca noticia galán stiʼ Reinu» ra nuu binni biaʼ gándatiʼ (Mat. 24:14). Ne cayuni predicarnu ndaaniʼ biaʼ 240 guidxi ne lu jma de ti mil idioma. ¿Cadi dxandíʼ cadi caquiiñeʼ peʼ gánnanu «padxí ne pora» gueeda fin para gúninu dxiiñaʼ risaca riʼ né stale gana la?

QUÉ GÁNNANU XI PEʼ ZUNI JEHOVÁ PARA GACANÉ LAANU

8. ¿Xii nga ca ni runi Dios ni dxandíʼ? (Eclesiastés 11:5).

⁸ Qué gánnanu guiráʼ ni runi Dios ni dxandíʼ (biindaʼ Eclesiastés 11:5). ¿Xii nga ca ni rúnibe ya? Laani nga guiráʼ ni runi Jehová —o ca ni rudiibe lugar guizaaca— para gacaʼ ni racaláʼdxibe. Qué gánnanu xiñee peʼ rudii Jehová lugar guizaaca xiixa cosa ne laaca qué gánnanu xi zúnibe para gacanebe laanu (Sal. 37:5). Biblia ná qué lica zanda guiénenu ni, cásica qué randa riénenu ximodo riniisi ti baʼduhuiiniʼ ndaaniʼ jñaa, ti cosa ni dede ca científicu ca dede yanna qué ganda guiene chaahuicaʼ.

9. ¿Xi zándaca guizaacanu pur qué gánnanu xi peʼ zuni Jehová para gacané laanu?

⁹ Cumu qué gánnanu xi peʼ zuni Jehová para gacané laanu la? zándaca gaca nagana para laanu guicaanu xiixa decisión, casi guchaʼnu modo nabáninu para guni predicarnu jma o chindézanu sti lugar ra jma caquiiñeʼ tu guni predicar. Ne pa qué guizaaca xiixa modo peʼ cabézanu, zándaca guiníʼ íquenu pa cayuulaʼdxiʼ Jehová ni cayúninu. Zándaca naguixhe íquenu ugaandanu xiixa meta peru qué ganda ugaandanu ni. O cayúninu stipa pur guni predicarnu biaʼ gándatiʼ, peru nin ti binni qué náʼ guicaa estudiu. O pa cayacanenu lu ti proyectu de construcción peru nuu xiixa ni cucueeza ni. Pur ca ni bizeʼtenu riʼ, zándaca guiníʼ íquenu: «¿Ñee cadi cayacané Jehová naa la?».

10. Cumu qué gánnanu xi peʼ zuni Jehová para gacané laanu, ¿xi cualidad racaneni laanu gápanu?

¹⁰ Cumu qué gánnanu xi peʼ zuni Jehová para gacané laanu la? racaneni laanu gápanu caadxi cualidad nabé risaca, casi gácanu humilde ne gánnanu nuu cosa ni qué zanda gúninu. Rusietenaláʼdxicani laanu jma luguiáʼ nuu ca neza stiʼ Jehová de ca neza stinu, ne jma luguiáʼ nuu ca ni riníʼ íquebe de ca ni riníʼ íquenu (Is. 55:​8, 9). Laaca rizíʼdinu, pa guyúbinu gacané Jehová laanu zaree guiráʼ ni gúninu jneza. Pa cheni laanu galán ora maʼ canayuni predicarnu o lu xiixa dxiiñaʼ ni cayaca ndaaniʼ xquidxi Jehová, cadi guiaandaʼ laanu gusisácanu Jehová ne cadi guiníʼ íquenu pur laanu gunda gúcani (Sal. 127:1; 1 Cor. 3:7). Peru pa qué guiree ca cosa ca modo cabézanu ratadxí ladxidoʼno gánnanu cayuuyaʼ Jehová guiráʼ ni ne laabe nánnabe xi gúnibe (Is. 26:12). Nga runi gúninu guiráʼ ni nuu lu nanu ne ni qué ganda la? gusaananu ni lu náʼ Jehová. Neca nánnanu qué zuni Jehová milagru casi biʼniʼ dxiqué, para guluíʼ laanu xi caquiiñeʼ gúninu, peru nanna dxíchinu zuluiʼbe laanu xii nga ni jma jneza gúninu (Hech. 16:​6-10).

11. ¿Xii nga ca cosa risaca nánnanu?

¹¹ Ora rietenaláʼdxinu ca cosa ni maʼ nánnanu racanécani laanu. ¿Xii nga ni maʼ nánnanu yaʼ? Maʼ nánnanu guizáʼ nadxii Jehová laanu, jneza guiráʼ ni rúnibe ne guizáʼ nuu xpiaanibe, ne nánnanu guizáʼ rusisácabe guiráʼ ni rúninu pur laabe ne ni rúninu pur ca hermanu, ne laaca nánnanu riguube ndaayaʼ ca ni qué rixeleʼ de laabe (Heb. 11:6).

QUÉ GÁNNANU XI CHIGUIZAACA GUIXÍʼ

12. Casi ná Santiago 4:​13, 14, ¿xi qué gánnanu?

¹² (Biindaʼ Santiago 4:​13, 14). Ni dxandíʼ nga qué gánnanu xi chiguizaacanu guixíʼ «purtiʼ guiranu rizaacanu cosa ni cadi caníʼ íquenu ne ora cadi cabézanu ni» (Ecl. 9:11). Nga runi qué zanda gánnanu pa biaʼsi zaree ni naguixhe íquenu gúninu ne laaca qué gánnanu pa nabánirunu para gúninu ni.

13. ¿Xiñee zándaca gaca nagana para laanu guni huantarnu purtiʼ qué gánnanu xi chiguizaaca guixíʼ?

¹³ Zándaca gaca nagana para laanu guni huantarnu purtiʼ qué gánnanu xi chiguizaaca guixíʼ. Zándaca chuʼnu xizaa purtiʼ ridxíbinu guizaaca xiixa ne pur laani maʼ cadi guibáninu nayecheʼ. Zándaca ridxíbinu guizaacanu xiixa ni cadi cabézanu o ti desgracia ni nabé guniná laanu ne gucaani laanu chuʼnu triste. O zándaca guireʼnu gana pa qué guizaaca xiixa modo peʼ cabézanu (Prov. 13:12).

14. ¿Xii nga ni riguu laanu nayecheʼ? (Laaca zanda gúʼyaluʼ ca imagen ca).

¹⁴ Ora runi huantarnu intiica guendanagana ni guidxaagalunu, rusihuínninu zúninu ni ná Jehová intiica si guizaaca purtiʼ nadxiinu laa ne cadi pur ni cabézanu gudiibe laanu. Lu Biblia zeeda relatu ni racané laanu gánnanu cadi naquiiñeʼ cuézanu gapaʼ Jehová laanu lu guiráʼ ca guendanagana ni ridídinu, ne cadi maca naguíxhebe xi chiguizaacanu. Nanna Jehová para guibáninu nayecheʼ cadi caquiiñepeʼ gánnanu xi chiguizaacanu despué, sínuque ziuʼnu nayecheʼ pa guyúbinu gacanebe laanu ne guzúʼbanu stiidxabe (Jer. 10:23). Ora ruyúbinu gacané Jehová laanu para guicaanu decisión lu xquendanabáninu casi ñaca nininu: «Pa naʼ Jehová nabáninu la? zúninu ndiʼ ne ndicaʼ» (Sant. 4:15).

15. ¿Xii nga ni nánnanu zazaaca?

¹⁵ Neca qué gánnanu xi chiguizaaca guixíʼ, peru nánnanu cayuni prometer Jehová laanu zabáninu sin qué chuʼ dxi gátinu, guibáʼ la? o ndaaniʼ Guidxilayú. Laaca nánnanu qué rusiguii Jehová ne gastiʼ zanda gucueeza laabe de guni cumplirbe guiráʼ ni maʼ biʼniʼ prometerbe laanu (Tito 1:2). Ne Jehová si zanda guiníʼ: «Dede ti principiu rinieeʼ xi chigaca ne dede ante rinieeʼ ca cosa ni caʼruʼ gaca». Guiráʼ ni maʼ guniʼbe chigaca nuu de laacani maʼ guca cumplir ne zaca cumplir ruʼ xcaadxi de laacani (Is. 46:10). Nanna dxíchinu gastiʼ zanda gucueeza Jehová de gannaxhii laanu (Rom. 8:​35-39). Zaguixhedxibe ladxidoʼno, zudiibe laanu guendabiaaniʼ ne stipa ni caquiiñenu para guni huantarnu intiica guendanagana guidxaagalunu. Nuunu seguru zacané Jehová laanu ne zaguu ndaayaʼ laanu (Jer. 17:​7, 8).

QUÉ ZANDA GUIÉNENU PABIÁʼ RUNIBIÁʼ CHAAHUIʼ JEHOVÁ LAANU

16. ¿Xi nanna Jehová de laanu, ne xi rucaani laanu guni sentirnu? (Salmo 139:​1-6).

¹⁶ (Biindaʼ Salmo 139:​1-6). Nanna Jehová ximodo bizáʼ laanu, xi runi sentirnu ne xi riníʼ íquenu. Cayuuyaʼ Jehová laanu guiráʼ ora. Nánnabe xi rininu, xi racaláʼdxinu guininu, xi rúninu ne xiñee rúninu cani. Rey David guníʼ nuu Jehová gaxha de ca xpinni, cayápabe laanu ne nuucabe listu para gacanebe laanu. Nánnanu Jehová nga Señor ni runi mandar guiráʼ xixé ni nuu, ni bizáʼ guibáʼ ne Guidxilayú ne laabe nga Dios ni jma napa poder, nga runi guizáʼ riéchenu gánnanu rizaaláʼdxibe cada tobi de laanu. Rey David guníʼ: «Guizáʼ ridxagayaaʼ guiráʼ ni nánnaluʼ de naa. Dede qué randa rieneʼ ni» (Sal. 139:​6, nota).

17. ¿Xiñee zándaca gaca nagana para laanu guni crenu rizaalaʼdxiʼ Jehová laanu?

¹⁷ Zándaca pur modo biniisinu, pur lugar ra nabézanu o pur ni biʼniʼ crenu dxiqué, gaca nagana para laanu guidúʼyanu Jehová casi Bixhózenu ni nadxii laanu ne ni rizaalaʼdxiʼ laanu. O zándaca pur ca cosa feu ni bíninu dxiqué guiníʼ íquenu qué racalaʼdxiʼ Jehová ganna de laanu ne nuu zitu de laanu. Dede David guyuu biaje biʼniʼ sentir zacá (Sal. 38:​18, 21). O zándaca nuu tuuxa de guidubi ladxidóʼ cayuni stipa pur guchaa modo nabani ne guni ca cosa ca modo riuulaʼdxiʼ Dios, peru zándaca guiníʼ ique: «Pa riene Jehová naa, ¿xiñee canábabe naa gusaanaʼ de guneʼ xiixa ni para naa gastiʼ naca yaʼ?».

18. ¿Xiñee galán guiénenu Jehová si nga ni jma runibiáʼ chaahuiʼ laanu? (Laaca zanda gúʼyaluʼ ca imagen ca).

¹⁸ Zanda guizíʼdinu guiénenu Jehová si nga ni jma runibiáʼ laanu, ruuyabe ca cosa galán ni nápanu ni laanu qué ridúʼyanu. Ruuyaʼ Jehová rucheʼnu, peru neca zacá riénebe ni runi sentirnu ne ni rúninu ne racanebe laanu né stale guendarannaxhii para guchaʼnu (Rom. 7:15). Ra gánnanu ruuyaʼ Jehová xi guiráʼ cosa galán zanda gúninu, racaneni laanu gúninu ni nabe né stale guendanayecheʼ.

19. ¿Xi nánnanu de Jehová?

¹⁹ Nanna dxíchinu Jehová nga guendarannaxhii; ne guirutiʼ zanda quiñeyú ni (1 Juan 4:8). Pur guiráʼ ca ni maʼ gudíxhebe gúninu rusihuínnibe pabiáʼ nadxiibe laanu ne racaláʼdxibe guibáninu galán. Laaca nánnanu racaláʼdxibe guibáninu sin qué chuʼ dxi gátinu, nga runi bidiibe xiiñibe gatiʼ pur laanu. Pur regalu riʼ, zanda gusiéchenu Dios neca nácanu binni ruchee (Rom. 7:​24, 25). Ne laaca nánnanu «jma nandxóʼ Dios que ladxidoʼno ne nánnabe guiráʼ cosa» (1 Juan 3:​19, 20). Nanna Jehová xi nuu ndaaniʼ ladxidoʼno ne nánnabe zanda gúninu ni riuuláʼdxibe.

20. ¿Xi zacané laanu cadi chúʼpenu xizaa pur ca cosa ni qué gánnanu?

²⁰ Casi maʼ bizíʼdinu rabi Jehová laanu ni caquiiñeʼ si gánnanu. Ra gánnanu nuu cosa ni qué zanda gánnanu racaneni laanu cadi chuʼnu xizaa pur ca cosa ni qué gánnanu, sínuque guiníʼ íquenu lu ca cosa si ni jma risaca. Zacá rusihuínninu nápanu confianza Jehová, Dios ni nanna guiráʼ xixé cosa (Job 36:4). Neca yanna nuu stale cosa ni qué gánnanu peru riéchenu purtiʼ huidxegá si qué zusaana Jehová de gusiidiʼ laanu stale cosa nacubi de laa (Ecl. 3:11).