Stiidxaʼ Jiobá nabani

Cani naquiiñeʼ gánnanu de libru stiʼ Isaías (guiropa ndaa)

ISAÍAS bíʼniruʼ dxiiñaʼ ni gudxi Dios laa guni de quixhená binni. Guiráʼ ni guniʼbe chiguizaaca reinu stiʼ chii tribu stiʼ Israel que maʼ guca cani. De raqué guniʼbe xi chiguizaaca Jerusalén.

Zanitilú guidxi Jerusalén, ne ca binni ni nabeza ndaaniʼ ni ziecaʼ de esclavu sti guidxi. Neca guizaaca guiráʼ nga la? Jerusalén qué ziaana sin cueza binni ndaaniʼ, purtiʼ zabiguetaʼ ca binni que sti biaje para guni adorarcaʼ Jiobá jneza. Ca diidxaʼ ca nga ni jma risaca cá lu Isaías 36:1–66:24.a Guiráʼ cani cayeeteʼ lu ca capítulo riʼ zanda gacané cani laanu, purtiʼ stale de laacani maʼ cayácacani yanna o maʼ qué zandaa zácacani. Ca diidxaʼ ni zeeda lu guiropa ndaa stiʼ Isaías riʼ laaca caníʼ cani de Mesías.

«¡BIIYAʼ! ZADXIÑA DXI»

(Isaías 36:1–39:8)

Dxi maʼ ziné Ezequías trece iza de cayuni mandar (732 ante gueeda Jesús), gucuaa ca asiriu guidxi Judá. Peru Jiobá gucané guidxi Jerusalén casi guníʼ que, purtiʼ biseendabe ti ángel stibe para biiti 185,000 soldadu stiʼ guidxi Asiria ne zaqué maʼ qué nucaalúcabe Jerusalén.

Qué nindaa de ngue guca huará Ezequías. Jiobá bicabi oración stibe ne bisianda laabe ne bidii lugar guibánibe sti quince iza. Dxi biseendaʼ rey stiʼ Babilonia caadxi hombre para guiechené Ezequías purtiʼ maʼ bianda la? qué niníʼ íquebe ne biluiʼbe laacaʼ guiráʼ ca cosa risaca nápabe. Ngue runi, Isaías gudxi laabe xi guníʼ Jiobá chiguizaacabe: «¡Biiyaʼ! Zadxiña dxi guiráʼ cani bitopalú ca bixhoze gólaluʼ ne guiráʼ ni nápaluʼ yanna, zinécabe cani Babilonia» (Isaías 39:5, 6). Ca diidxaʼ riʼ gúcacani gudiʼdiʼ si jma de ti gayuaa iza de guníʼ Isaías cani.

Chigusiénenu caadxi textu zeeda lu Biblia:

38:8. Ximodo gunna binni dxiqué bidxiguetaʼ Jiobá bandáʼ stiʼ gubidxa que atrá. Lu siglu xhono ante gueeda Jesús, ca binni de Egipto ne Babilonia biquiiñecaʼ reloj ni riguiñe gubidxa lú ne riguuni ti bandáʼ para gánnacabe pora nuucabe. Ne zándaca Acaz, bixhoze Ezequías, gupa ti reloj casi nga ni bedané de Babilonia. O zándaca guyuu ti escalera ndaaniʼ palaciu que ne guyuu ti pilar cueʼni. Ora ricá gubidxa lu pilar que la? riguuni ti bandáʼ lu ca escalón stiʼ escalera que. Ngue nga biquiiñecabe para gúnnacabe hora.

Xi rusiidiʼ cani laanu:

36:2, 3, 22. Neca guleecabe Sebná de mayordomo ndaaniʼ lidxi rey Ezequías, gúcarube secretariu stiʼ ni beeda gaca mayordomo stiʼ rey que (Isaías 22:15, 19). Pa chuʼ dxi guiaaxhanu xiixa dxiiñaʼ ni nápanu ndaaniʼ xquidxi Jiobá, ñee cadi naquiiñeʼ gúnirunu ni na Jiobá lu intiica dxiiñaʼ guicaanu la?

37:1, 14, 15; 38:1, 2. Ora nuunu xizaa pur xiixa la? naquiiñeʼ guni orarnu Jiobá ne guni crenu dxandíʼ zacanebe laanu.

37:15-20; 38:2, 3. Cumu ca asiriu que guniʼcaʼ zunitilucaʼ guidxi Jerusalén la? ni jma guluu xizaa rey Ezequías nga guiníʼcabe mal de lá Jiobá ora guinitilú guidxi que. Ne ora gúnnabe zátibe pur guendahuará nápabe que la? guyuube xizaa purtiʼ maʼ qué ziuu tuuxa de cani zá de David para cuiʼ lu trono ti gaca rey. Ne laaca guyuube xizaa tuu nga sániruʼ lade guidxi que para gudxiilú ca asiriu. Cásica Ezequías, ni jma risaca para laanu nga guisaca lá Jiobá que guendanabani stinu ne gaca guiráʼ ni maʼ naguíxhebe gúnibe.

38:9-20. Diidxaʼ riuundaʼ ni bicaa Ezequías riʼ racaneni laanu gánnanu gástiruʼ stiʼ cosa jma risaca que gusisácanu Jiobá.

ZUCUÍCABE NI STI BIAJE

(Isaías 40:1–59:21)

Qué nindaa de guníʼ Isaías zanitilú Jerusalén ne zié ca binni que de esclavu ndaaniʼ guidxi Babilonia la? guniʼbe zabiguetaʼ caadxi de laacabe Jerusalén sti biaje (Isaías 40:1, 2). Isaías 44:28 na: «Zabí guidxi [Jerusalén] sti biaje». Ca bidóʼ stiʼ ca binni de Babilonia zinécabe cani casi riné binni ca cosa stiʼ ora maʼ zeʼ biaje (Isaías 46:1). Isaías guníʼ zanitilú Babilonia, ne guca cani gudiʼdiʼ si chupa gayuaa iza de guniʼbe ca diidxaʼ ca.

Jiobá zudii ti xpinni casi «biaaniʼ para ca guidxi roʼ ca» (Isaías 49:6). Ne ca binni ni runi mandar guidxi Babilonia, zanitilúcabe ne zácani casi ora riá guʼxhuʼ lu bi, ne guiráʼ xpínnicabe záticaʼ casi rati ti biuxiʼ. Peru xiiñidxaapaʼ Sión ca zabeecabe guiráʼ guiibaʼ ni nuu yanni (Isaías 51:6; 52:2). Cani cheʼ ra nuu Jiobá ne gucaadiágacaʼ laabe la? rábibe laacaʼ ca diidxaʼ riʼ: «Pur nadxiee David la? chiguneniáʼ laatu ti pactu ni qué ziuu dxi guiluxe» (Isaías 55:3). Ora guibani binni casi modo na Jiobá la? racanécani laa chuʼ nayecheʼ (Isaías 58:14). Peru Israel qué nuzuubaʼ diidxaʼ, ngue runi bixélecabe de Dios ne laa bixeleʼ de laacabe (Isaías 59:2).

Chigusiénenu caadxi textu zeeda lu Biblia:

40:27, 28. Xiñee guníʼ Israel: «Qué ruuyaʼ diʼ Jiobá ni runeʼ ne qué rizaaláʼdxibe guiráʼ guendaquéiquiiñeʼ ni cazaacaʼ». Zándaca pur guiráʼ guendaquéiquiiñeʼ ni cazaacacabe ndaaniʼ guidxi Babilonia que bicaani laacabe guiníʼcabe cadi cayuuyaʼ Jiobá guiráʼ ni cayácacabe. Isaías bisietenalaʼdxiʼ laacabe zanda gunitilú Jiobá guidxi Babilonia, purtiʼ laabe qué ridxágadibe ne qué rirá stipa stibe.

43:18-21. Xiñee gudxi Isaías ca esclavu ni nuu Babilonia que cadi guietenaláʼdxicaʼ guiráʼ ni bizaacacaʼ ora guibiguétacaʼ xquídxicaʼ. Cadi gúdxibe laacaʼ zacá para gusiaandacaʼ guiráʼ ni biʼniʼ Jiobá dxiqué para bilá xquidxi, sínuque ni gucalaʼdxiʼ Jiobá nga gusisácacabe lá pur modo chigulá laacabe. Casi modo gapa Jiobá laacabe ora tiidicabe lu desiertu ne chindácabe jma nagueenda Jerusalén. Zacaca nga zaca ne guiráʼ ca binni ni tiidiʼ nabani lu ca dxi nagana ni zeeda ca, ziuuruʼ stale cosa ni zucaa laacabe gusisácacabe Jiobá (Apocalipsis 7:9, 14).

49:6. Ximodo beeda gaca Mesías que casi «ti biaaniʼ para ca guidxi roʼ», pa ra nuu si ca binni de Israel que bicheechebe diidxaʼ. Ca diidxaʼ riʼ guca cani guti si Jesús. Biblia na laaca beeda gaca ca discípulo stiʼ Jesús casi «ti biaaniʼ para ca guidxi roʼ», casi na Isaías 49:6 (Hechos 13:46, 47). Ca dxi stinu riʼ, ca binni ni gulí Dios pur espíritu santu, ne guiráʼ binni ni racané laacabe, zeeda gácacaʼ casi «ti biaaniʼ para ca guidxi roʼ» ca ne cuzaanicabe guiráʼ xixé guidxi nuu ndaaniʼ guidxilayú (Mateo 24:14; 28:19, 20).

53:10. Ximodo nga biecheʼ Jiobá ora bixhatañeecabe Xiiñiʼ. Cumu Jiobá naca ti Dios ni rilaselaʼdxiʼ binni ne riénebe laacaʼ la? nánnanu biuubaʼ ladxidoʼbe ora bíʼyabe cayacaná Xiiñibe. Neca biiyabe ngue la? biéchebe purtiʼ de ndaaniʼ ladxidóʼ Jesús nga biale guzuubaʼ Stiidxabe. Ne laaca biéchebe purtiʼ ra gucaná Xiiñibe ne guti la? zanda guicaa binni guidxilayú stale ndaayaʼ (Proverbios 27:11; Isaías 63:9).

53:11. Xi biziidiʼ Jesús dxi guyuu lu Guidxilayú riʼ ne pur nga stale binni zanda «chuʼ nayá nezalú Dios». Jesús biziidiʼ guibani lu guidxilayú casi ti hombre, gucaná ne guti neca qué nuzaabi gastiʼ (Hebreos 4:15). Ne pur rini ni bixhiibe ca bilabe binni purtiʼ zacá si nga zanda chuʼ cani bibí para cheʼ guibáʼ ne zaqueca guiráʼ binni ni chiguibani ndaaniʼ Guidxilayú riʼ nayá nezalú Dios (Romanos 5:19; Santiago 2:23, 25).

56:6. Tuu nga ca «binni de sti guidxi» ne ximodo qué rusaanacabe pactu stiʼ Jiobá. Ca binni de sti guidxi ca nga «xcaadxi dendxu» stiʼ Jesús (Juan 10:16). Laacabe rusihuínnicabe qué rusaanacabe pactu stiʼ Jiobá ora rúnicabe ni na ca ley zeeda lu pactu ca. Ne ni riziidiʼ cani cheʼ guibáʼ ngaca riziidicabe, racanécabe laacaʼ guireecheʼ diidxaʼ ne racanécabe xcaadxi binni gaca xpinni Cristu.

Xi rusiidiʼ cani laanu:

40:10-14, 26, 28. Jiobá nadipaʼ, nachaʼhuiʼ, nandxóʼ, naca ti Dios ni nanna guirani ne riénebe guirani jma que laanu.

40:17, 23; 41:29; 44:9; 59:4. Qué zanda diʼ gacané ca bidóʼ ca laanu, nin ca gobiernu stiʼ guidxilayú riʼ. Qué zanda diʼ cuézanu gacanécabe laanu.

42:18, 19; 43:8. Zeeda gácanu casi ti binni nacheepaʼ lú pa qué gulábinu ni cayabi Jiobá laanu lu Stiidxaʼ. Laaca zácanu diagacuaataʼ pa qué gucaadiáganu ni cayabi «mozo ni nuu xpiaaniʼ ne ni runi jneza» laanu (Mateo 24:45).

43:25. Jiobá ruxhiá donda stinu para guisaca lá. Jma risaca para laabe nga guisaca labe oracaruʼ gulabe laanu de donda gulenenu, guendaguti ne gudiibe laanu ti guendanabani ni qué zaluxe.

44:8. Jiobá racané laanu, purtiʼ guirutiʼ zuniibi laabe ne zuhuaa dxiichibe casi ti guié ngola. ¡Qué chuʼ dxi guidxíbinu gábinu binni laabe nga ti Dios ni dxandíʼ! (2 Samuel 22:31, 32.)

44:18-20. Ora tuuxa guni adorar bidóʼ rusihuinni maʼ caguite ladxidóʼ laa. Ladxidoʼno naquiiñeʼ gucaani laanu gannaxhiinu Jiobá.

46:10, 11. Ora runi Jiobá guiráʼ ni riguixhe ique, rusihuinni cani nandxoʼbe.

48:17, 18; 57:19-21. Pa guyúbinu Jiobá para gulá laanu, guidxíñanu ra nuube, ne gúninu guiráʼ ni nabe la? qué zusaana de gatadxí ladxidoʼno cásica nisa stiʼ ti guiiguʼ qué rusaana de guxooñeʼ, ne guiráʼ guendanachaʼhuiʼ stinu zaca cani stale casi ca ola stiʼ nisadóʼ. Cani qué naʼ guni ni na Stiidxaʼ Dios la? zeeda gácacaʼ casi «nisadóʼ ni maʼ zeʼ cheríʼ chericaʼ»: qué zatadxí diʼ ladxidoʼcaʼ.

52:5, 6. Ca binni de Babilonia guníʼ íquecaʼ cadi nadipaʼ Jiobá. Guníʼ íquecabe zaqué purtiʼ qué ñánnacabe pa cadxiichiné Jiobá xquidxi ngue runi bidiibe lugar guyecaʼ casi esclavu. Ora cadiʼdiʼ tuuxa lu ti guendanagana, cadi nagueendaca guininu xi pur cazaacabe ni.

52:7-9; 55:12, 13. Nápanu chonna razón para gucheechenu diidxaʼ ne stale gana ne gacanenu binni para gaca xpinni Cristu. Ca diidxaʼ ni rininu rusiécheni ladxidóʼ ca binni ni nuu guiziidiʼ de Jiobá. Riuʼnuʼ galán ne Jiobá casi ñaca nidúʼyanu laabe ne ñuuyabe laanu. Ne laaca zaguu ndaayaʼ Jiobá laanu.

52:11, 12. Para ganda chinenu «ca cosa ni riquiiñeʼ para gaca adorar Jiobá jneza» la? naquiiñeʼ gúninu ni jneza ne gaca xquendanabáninu nayá.

58:1-14. Pa nezalú si binni gusihuínninu cayuni adorarnu Jiobá ne cayúninu ni jneza, peru cadi dxandíʼ ni la? caguítenu laca laanu. Peru cani dxandíʼ cayuni ni na Jiobá rusihuínnicaʼ cayuni adorarcaʼ laabe lu xquendanabánicaʼ ne nadxiisaacaʼ bíʼchicaʼ ne bizáʼnacaʼ (Juan 13:35; 2 Pedro 3:11).

59:15b-19. Jiobá cayuuyaʼ guiráʼ ni cayuni binni guidxilayú, ne laabe maʼ nánnabe pora gunitilube laacaʼ.

«ZEEDA GÁCALUʼ CASI TI CORONA SICARÚ»

(Isaías 60:1–66:24)

Isaías 60:1 culuíʼ xi zazaaca ora guibiguetaʼ ca israelita que guni adorarcaʼ Jiobá jneza, ne culuiʼni xi zazaaca ora gaca adorar Jiobá jneza ca dxi stinu riʼ. Na ni: «Biasa, gunaa, bizaaniʼ, purtiʼ maʼ beeda biaaniʼ stiluʼ ne guendanandxóʼ stiʼ Jiobá maʼ bizaaniʼ luguialuʼ». Óraque Jiobá gudxi ca diidxaʼ riʼ Sión: «Zeeda gácaluʼ casi ti corona sicarú lu naʼ Jiobá» (Isaías 62:3).

Isaías guniʼné Jiobá pur ca israelita ni cheʼ de esclavu ndaaniʼ guidxi Babilonia, ne zabiguétacaʼ ra nuu Jiobá purtiʼ zaca arrepentircaʼ (Isaías 63:15–64:12). Bisihuinni si Isaías tuu nga cani dxandíʼ cayuni ne cani cadi cayuni ni na Jiobá la? bizeetebe zaguu ndaayaʼ Jiobá cani cayuni ni na (Isaías 65:1–66:24).

Chigusiénenu caadxi textu zeeda lu Biblia:

61:8, 9. Xii nga «pactu ni qué zaluxe», ne tuu nga ca «xiiñiʼ» binni ni cayeeteʼ lu textu riʼ. Laani nga ti pactu nacubi ni biʼniʼ Jiobá ne cani bibí para cheʼ guibáʼ. Ca «xiiñiʼ» binni ni cayeeteʼ lu textu riʼ nga «xcaadxi dendxu». Laacaʼ nga ca millón de binni ni cucaadiaga ne cuzuubacaʼ stiidxaʼ cani bibí pur espíritu santu (Juan 10:16).

63:5. Xiñee na Biblia rucaa guendaridxiichi stiʼ Jiobá laa guni ni jneza. Biblia na runi castigarbe binni ora qué runi ni jneza ne guendaridxiichi stibe ca nga rucaa laabe gúnibe ni.

Xi rusiidiʼ cani laanu:

64:6. Cumu gulenenu donda la? qué zanda diʼ gulanu laca laanu. Nga runi, neca gúninu ni jneza, guiráʼ cani zeeda gaca cani casi ti lari ni nabiidiʼ, ne pur nga qué zanda guiá guiráʼ donda stinu (Romanos 3:23, 24).

65:13, 14. Jiobá riguu ndaayaʼ ca xpinni ni ruzuubaʼ stiidxabe ne rusihuínnibe ni ora rusiidibe laacaʼ.

66:3-5. Jiobá nanalaʼdxiʼ binni ni riníʼ si cayuni ni nabe, peru gadxé ni runi.

«Laguiecheʼ»

Ca diidxaʼ ni guníʼ Isaías que, bisiecheʼ cani ca judíu que purtiʼ gúnnacaʼ zareecaʼ de esclavu ndaaniʼ guidxi Babilonia ne zabiguétacaʼ xquídxicaʼ. Jiobá gudxi laacabe: «Laguiecheʼ, ne cadi gusaana de guiéchetu pur cani chiguneʼ. Purtiʼ, ¡laguuyaʼ!, chiguneʼ Jerusalén riʼ nayecheʼ ne ca binni ni guibani ndaaniʼ ni ziuucaʼ nayecheʼ» (Isaías 65:18).

Ca dxi stinu riʼ laaca nutaagu ti gueelacahui Guidxilayú riʼ ne ca guidxi roʼ ca nacahuidóʼ nuucaʼ (Isaías 60:2). Nga runi, «jma nagana zaca ni ora mayaca izaa xhi guidxilayú» (2 Timoteo 3:1). Nga runi, ca diidxaʼ bicaa Isaías ndaaniʼ Biblia nabé rusiecheʼ cani laanu, purtiʼ caníʼ cani ziuu dxi zalanu (Hebreos 4:12).

[Cani cá ñee yaza]

[Ca dibuju/foto ni zeeda lu yaza 28]

Ñee nánnaluʼ xiñee gunabaʼ Ezequías gulá Jiobá laa de lu náʼ ca asiriu que la?

[Ca dibuju/foto ni zeeda lu yaza 31]

«¡Guizáʼ sicarú nga ñee binni ni canazá lu ca dani ca ora ziné diidxaʼ nacubi ne galán[!]»