Ximodo gánnanu tuu nga runi adorar Dios jneza
STALE religión nacaʼ guiráʼ ni rusiidicaʼ zeeda cani de Dios. Nga runi, naquiiñeʼ guiene chaahuinu ca diidxaʼ bicaa apóstol Juan: «Hermanu ni nadxiee caʼ, cadi tutiica na cusiníʼ Dios laa maca ziguni cre tu, sínuque laguuya chaahui pa dxandí napa be Espíritu sti Dios. Purti ma canazá stale ni cananíʼ zacá» (1 Juan 4:1). Ximodo zanda gánnanu pa de Dios zeeda xiixa ni gábicabe laanu yaʼ.
Guiráʼ ni zeeda de Dios rusihuinni cani modo laabe, ne ni jma rusihuínnibe nga guendarannaxhii stibe. Guidúʼyanu ximodo rusihuínnibe ni. Bizaʼbe laanu ti ganda chuʼ xiinu ca guieʼ ni rindáʼ naxhi, chuʼ xiinu modo rindáʼ naxhi pan ora maʼ caree ndaaniʼ horno. Modo bizaʼbe laanu ca rusihuínnicani nabé nadxii Dios laanu. Laaca bidiibe laanu guiélunu para ganda guidúʼyanu ora maʼ ziyaaziʼ gubidxa, ti mariposa ne ora maʼ cuxidxi ti baʼduhuiiniʼ. Laaca riéchenu ora gunadiáganu ti canción sicarú, ora maʼ cayuundaʼ ca manihuiiniʼ ni ripapa ca ne ora gunadiáganu ridxi stiʼ tuuxa binni ni nadxiinu. Modo bizáʼ Dios laanu, neca gulenenu donda, rusihuínnicani nadxiibe laanu. Nga runi, dxandíʼ nga ca diidxaʼ guníʼ Jesús: «Jma nayeche ni rudii que ni ricaa» (Hechos 20:35). Ora rannaxhiinu riuʼnuʼ nayecheʼ, purtiʼ bizáʼ Dios laanu cásipeʼ modo laa (Génesis 1:27). Neca napa Jiobá stale guenda, peru ni jma rihuinni de laabe nga guendarannaxhii stibe.
Nga runi guiráʼ guiʼchiʼ zeeda de Dios caquiiñeʼ gusihuínnicani dxandipeʼ nadxiibe laanu. Ca religión ni nuu lu guidxilayú riʼ nápacaʼ stale guiʼchiʼ ni cusiidiʼ de Dios, peru ñee dxandíʼ rusihuínnicani nadxii Dios laanu la?
Ni dxandíʼ nga stale de cani bicaa ca religión ca huaxiéʼ riníʼ cani ximodo rihuinni nadxii Dios laanu ne ximodo zanda gannaxhiinu laabe. Nga runi, stale binni ora gúʼyacaʼ pabiáʼ nadxii Dios laanu pur guiráʼ ni bizáʼ la? riniʼcaʼ xiñee nuu yuubaʼ ne guendaquéiquiiñeʼ. Peru Biblia si nga ti libru ni jma maʼ xadxí nuu ne cusiene chaahuiʼ ni laanu pabiáʼ nadxii Dios laanu ne rusiidini ximodo zanda gannaxhiinu laabe.
Ti libru ni caníʼ nadxii Dios laanu
Stiidxaʼ Dios, Biblia, caniʼni nabé nadxii Jiobá laanu (2 Corintios 13:11). Ne cumu nadxii Jiobá binni la? nga runi bizaʼbe primé bixhózenu ne jñaanu para guibánicaʼ sin gaca huaracaʼ ne sin gáticaʼ, peru ca guendananá ni nápanu riʼ bizulúcani ora bicaalú Adán ne Eva Dios (Deuteronomio 32:4, 5; Romanos 5:12). Laaca cayábini laanu xi biʼniʼ Dios para gudxiguetaʼ ni biniti Adán ne Eva que, casi rihuinni lu ca diidxaʼ riʼ: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Biblia cayábiruʼ laanu jma de guendarannaxhii stiʼ Dios. Cuzeeteni de ti gobiernu ni zuni ni jneza, ne Jesús nga zuni mandar lu gobiernu ca. Ora maʼ gaca nga, zabani binni ni guzuubaʼ stiidxabe nayecheʼ casi bibani Adán ne Eva (Daniel 7:13, 14; 2 Pedro 3:13).
Ne ca diidxaʼ riʼ cayabi Biblia laanu guiráʼ ni naquiiñeʼ gúninu: «“Gunnaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ”. Nga nga primé mandamientu ne ni jma risaca. Ne rairopa ri zeda gaca casi primé ca: “Gunnaxhii stobi cásica nadxii lu lii”. Iropa ca mandamientu ca nga xcu idubi naca ley» (Mateo 22:37-40). Cumu rusihuinni Biblia pabiáʼ nadxii Dios laanu ne rusihuinni ni xcaadxi guenda ni nápabe la? racaneni laanu gánnanu laani nga «Xquiʼchiʼ Dios», Dios ni nadxii laanu (2 Timoteo 3:16).
Para guni crenu xiixa ni gucuá dxiqué la? naquiiñeʼ guihuinni zeedani de Dios. Cumu ca xpinni Dios nadxiicaʼ binni cásica rúnibe la? xcaadxi binni ruuyacaʼ dxandipeʼ runi adorárcabe laa jneza.
Ximodo gunibiaʼnu cani nadxii Dios
Ca binni ni dxandíʼ nadxii Dios la? gadxé modo nabánicaʼ de xcaadxi binni ni nabani lu ca últimu dxi riʼ. Biblia na stale binni guidxilayú zuyubi puru «para laa si, ne nisi bidxichi zacá ique caʼ [...] [ne] zuyubi cabe ni chuʼlaʼdxi cabe lugar de nuyubi cabe Dios» (2 Timoteo 3:1-4).
Ximodo zanda gunibiaʼnu cani nadxii Dios yaʼ. Biblia cayabi laanu ximodo: «Sicarí nga ganaxhii nu Dios: guni nu ni na» (1 Juan 5:3). Ora nadxii binni Dios, rucaani laa guzuubaʼ Stiidxabe ne guni ni cá lu Biblia. Pa laanu dxandipeʼ nadxiinu Dios zúninu ni jneza. Casi na Biblia, ti hombre zanda gatané ti gunaa pa maʼ bichaganáʼ. Laaca ruzeeteni qué chuʼ dxi gusaana binni xheelaʼ (Mateo 19:9; Hebreos 13:4). Ti baʼdudxaapaʼ de España ni cayuundaʼ Teología guyé ti guendaridagulisaa stiʼ ca testigu stiʼ Jiobá. Raqué biziibibe naquiiñeʼ guibani binni jneza ti chuulaʼdxiʼ Dios ni cayuni. Baʼdudxaapaʼ que guníʼ: «Nayecheʼ biree raqué, purtiʼ biziideʼ stale de ni bieeteʼ raqué, ne laaca biiyaʼ rihuinni cayúnicabe ni na ley stiʼ Dios ne nabánicabe modo na cani».
Laaca zanda gánnanu tuu nga cani dxandíʼ naca xpinni Cristu purtiʼ nadxiicaʼ Dios ne nadxiicaʼ binni. Ne rihuinni zacá ni ora riníʼnecabe binni Reinu si stiʼ Dios nga zabee guiráʼ yuubaʼ ni napa binni guidxilayú (Mateo 24:14). Dxiiñaʼ si ni rúninu ca nga zanda gacané binni gunibiáʼ Dios, ne guibánicaʼ sin qué chuʼ dxi gáticaʼ (Juan 17:3). Peru cani dxandíʼ xpinni Dios qué riníʼsicaʼ nadxiicaʼ binni, sínuque rusihuínnicaʼ ni ora rúnicaʼ xiixa para gacanecaʼ binni. Casi dxi guca ti xu roʼ ndaaniʼ guidxi Italia, ti periódicu guníʼ ximodo racané ca testigu stiʼ Jiobá xcaadxi binni: «Laacabe nagueendaca racanécabe binni ni cayacaná, ne qué ruuyacabe xi religión laacaʼ».
Cani dxandíʼ xpinni Cristu nadxiicaʼ Dios ne laaca nadxiicaʼ binni, ne nadxiisaacaʼ, casi modo guníʼ Jesús gúnicaʼ: «Chi tixhe caʼ xiixa nacubi guni tu, ganaxhii saa tu cásica huayanaxhiee laatu. Zacá laganaxhii saa. Pa ganaxhii saa tu zacá la? zanna binni xpinne laatu» (Juan 13:34, 35).
Ñee rihuinni nadxiisaa cani dxandíʼ naca xpinni Cristu la? Ema nga ti baʼdudxaapaʼ ni nabeza ndaaniʼ guidxi La Paz (Bolivia), rúnibe dxiiñaʼ ndaaniʼ lidxi binni. Ndaaniʼ guidxi ca qué liica rieegu ca ricu ne ca pobre, peru laabe biiyabe nadxiisaa ca xpinni Dios ne guniʼbe: «Primé guyaa ti guendaridagulisaa stiʼ ca testigu stiʼ Jiobá, biiyaʼ zuba ti hombre ni nabé zuchaahuiʼ caniʼné ti gunaa ni riníʼ sti diidxaʼ [ti cholita]. Qué huayuu dxi guuyaʼ ngue. Dede óraque bidiéʼ cuenta laacabe nga xquidxi Dios». Laaca zacá ga guníʼ Míriam, ti baʼdudxaapaʼ de Brasil: «Qué huayuu dxi chuaa nayecheʼ, nin ne ca binnilidxeʼ. Primé biaje biiyaʼ nadxiisaa binni nga lade ca testigu stiʼ Jiobá». Ne ti hombre de Estados Unidos ni rutiidiʼ noticia lu tele bicaa sicaríʼ de ca testigu stiʼ Jiobá: «Pa guiráʼ binni ñuni ni ruziidi[cabe] la? guidxi riʼ qué ñuuni modo nuuni riʼ. Dxandíʼ nadxiisaatu ne nápatu fe [Dios] ni bizáʼ laanu».
Naquiiñeʼ guyúbinu religión ni runi adorar Dios jneza
Cani cayuni adorar Dios jneza naquiiñeʼ gusihuínnicaʼ nadxiicaʼ Dios ne nadxiicaʼ binni. Jesús bichaaga religión ni runi adorar Dios jneza ne ti neza ni ziné binni lu ti guendanabani ni qué zaluxe ne caquiiñeʼ chuunu ndaaniʼ neza ca para guibáninu. Laabe guniʼbe: «Laguiuu neza ni napa puerta nabéʼ, purti neza ni xilaga puerta sti la? nga neza ladu rinitilú binni, purti ruluíʼ jma galán neza que, ne stale tu riuu ladu que. Peru neza enda nabani la? jma nabé puerta ne nagana neza stiʼ, ne huaxiéʼ tu ridxela ni» (Mateo 7:13, 14). Ti grupu si nga xpinni Cristu ne nuucaʼ tobi si ne runi adorarcaʼ Dios jneza. Nga runi, naquiiñepeʼ nga gánnanu xi religión guyúbinu. Pa guidxeʼluʼ neza ca ne chinándaluʼ ni la? maʼ bidxélaluʼ modo guibániluʼ jma galán: neza ni chiné lii ra nuu binni ni nadxiisaa (Efesios 4:1-4).
¡Guníʼ ique pabiáʼ nayecheʼ ziuuluʼ pa cheluʼ lu neza ra cayaca adorar Dios jneza! Casi ñaca nizáneluʼ Dios. Zacanebe lii gánnaluʼ ne gápaluʼ guendarannaxhii para chúʼneluʼ sti binni galán, zaziidiluʼ xiñee nabániluʼ ne ziéneluʼ guiráʼ ni maʼ bizabiruaa Dios chiguni para laanu. Pa lii guyúbiluʼ guni adorarluʼ Dios jneza la? qué ziuu dxi gusaana de chuʼluʼ nayecheʼ.
[Dibuju/foto ni zeeda lu yaza 3]
Biblia si nga ti libru ni jma maʼ xadxí nuu ni culuíʼ pabiáʼ nadxii Dios laanu
[Ca dibuju/foto ni zeeda lu yaza 5]
Cani dxandíʼ xpinni Cristu zanda gunibiáʼ binni laacaʼ purtiʼ nadxiicaʼ binni