Jiobá racané ne riguixhedxí ladxidóʼ binni

RACA biaʼ chupa mil iza, Pablu, tobi de ca hombre bicaa Biblia bizeeteʼ Jiobá nga ti Dios ni racané ne riguixhedxí ladxidóʼ binni (Romanos 15:5). Biblia cayabi laanu qué ziuu dxi guchaa Jiobá modo laa, neca tiidiʼ stale iza. Nga runi, nanna dxíchinu zanda gacanebe cani cayuni ni nabe (Santiago 1:17). Stiidxaʼ Dios laaca cayabi laanu riguixhedxí Jiobá ladxidóʼ binni de stale modo. Gunáʼ nga chupa chonna modo rúnibe ni yaʼ. Rudiibe stipa cani rinabaʼ ni laabe ora runi orarcaʼ, rucaabe ca xpinni Cristu chigacanecaʼ ca bíʼchicaʼ ne ca bizáʼnacaʼ ne laaca riquiiñebe ca historia ni zeeda lu Biblia para gacané ca binni ni maʼ guti xiiñiʼ. Guidúʼyanu guionnaʼ cosa ni cayeeteʼ raríʼ tobi pur tobi.

«Jiobá peʼ bicaadiaga»

Sicaríʼ bicaa rey David de Jiobá, Dios ni bizáʼ laanu: «Laguni cré zanda gacanebe laatu binni xquídxecaʼ. Laguxheleʼ ladxidoʼto nezalube. Dios si zanda gulá laanu» (Salmo 62:8). Xiñee nanna David zanda gacané Jiobá laanu. Gudiʼnu lugar laca laabe guicábibe. Bicaabe ni bizaacabe: «Ni cayacaná riʼ bicaa ridxi, ne Jiobá peʼ bicaadiaga. Ne lu guiráʼ guendananá stiʼ bilabe laa» (Salmo 34:6). Guiráʼ ca yuubaʼ ni gúpabe gunábabe Jiobá lu oración gacané laabe ne Jiobá gucané laabe. Cumu maʼ huayacané Jiobá laabe ante la? nga runi nánnabe zudii Dios stipa ne zacané laabe para guni huantarbe.

Ora gati tuuxa, bixhoze ne jñaa ni guti ca naquiiñeʼ guietenaláʼdxicaʼ zacané Jiobá laacaʼ lu yuubaʼ ni cadíʼdicaʼ, cásica gucanebe David. Laaca naquiiñeʼ gánnacabe zanda guiníʼnecabe «Ni rucaadiaga oración» ne laa zacané laacabe (Salmo 65:2). Guidúʼyanu ni guníʼ William, hombre ni bizéʼtenu lu tema ni gudídinu ca: «Cumu stale biaje runeʼ sentir maʼ qué zanda diʼ guibaneʼ purtiʼ biniteʼ xiiñeʼ la? rinabaʼ Jiobá gacané naa. Laabe racanebe ne rudiibe stipa naa para gudxieeluaʼ yuubaʼ stinneʼ». Pa gápaluʼ fe ora guni orarluʼ Jiobá, Dios ni Jma Dxiʼbaʼ lu guidubi naca guibáʼ ne Guidxilayú la? zacanebe lii, purtiʼ laabe maʼ guniʼbe: «Naa, Jiobá Dios stiluʼ, naazeʼ dxiicheʼ naluʼ ladu derechu, Ni cayabi lii: “Cadi guidxíbiluʼ. Naa dxandipeʼ zacaniáʼ lii”» (Isaías 41:13).

Cani dxandíʼ xhamígunu zacanecaʼ laanu

Dxandíʼ, ora gueeda gati xiiñiʼ binni rinabaʼ chuʼ stubi lucha para guʼnaʼ ne cuaquiʼ chaahuiʼ xi guni, peru cadi galán diʼ guiaanabe zacá xadxí. Proverbios 18:1 na pa guixeleʼ tuuxa la? zanda gacaná. Nga runi, pa nuu tuuxa triste naquiiñeʼ gapa laa para cadi guixeleʼ de guiráʼ xixé binni.

Cani maʼ guti xiiñiʼ zanda gacané ca bíʼchicaʼ ne ca bizáʼnacaʼ ni zinanda Cristu laacaʼ. Proverbios 17:17 na: «Ni dxandíʼ xhamígunu la? guiráʼ hora nadxii laanu, ne zeeda gácabe casi ti bíchinu o ti bizánanu ni nuuca para gacané laanu ora nápanu xiixa guendananá». Lucy, gunaa ni bizéʼtenu lu tema gudídinu ca, biiyaʼ dxandíʼ ni na ca diidxaʼ ca, purtiʼ dxi guti xiiñibe gucané stale xhamígube laabe. Laabe nabe: «Nabé gucané ca xpinni Cristu laadu, neca nuu tiru qué riniʼnépecabe laadu diidxaʼ. Ti xhamigaʼ nabé beeda ganna naa ora maʼ nuaa stubeʼ, purtiʼ nánnabe cayuunaʼ, ne ruunanebe naa. Sti xhamigaʼ guiráʼ dxi riníʼ pur teléfono para cuʼ gana naa. Laaca guyuu familia ni biʼniʼ invitar laadu ra lidxi para guidoʼdo gueta, ne dede yanna runi rúcabe ni».

Riquiiñeʼ guietenaláʼdxinu qué ridiʼdiʼ ga diʼ yuubaʼ stiʼ binni ora gati ti xiiñiʼ. Peru pa guni orárcabe Dios ne cadi guixélecabe de ca xpinni Cristu la? zanda gatadxí ladxidóʼcabe. Stale binni ni maʼ guti xiiñiʼ runi sentircaʼ nuu Jiobá gaxha de laacaʼ. Ya, Jiobá «cusianda cani cayuubaʼ ladxidóʼ, ne cuchéndabe benda [ra gucanacaʼ]» (Salmo 147:3).

Historia ni zeeda lu Biblia ni riguixhedxí ladxidóʼ binni

Maʼ nánnanu caquiiñeʼ guni orar binni Dios para gatadxí ladxidóʼ, caquiiñeʼ de ca xhamigu ne laaca caquiiñeʼ guʼndaʼ Stiidxaʼ Dios. Luni zeeda historia ni culuíʼ riuulaʼdxiʼ Jesús gacané binni ne nápabe poder para cueebe yuubaʼ stiʼ binni dxi guindísabe xiiñicaʼ lade gueʼtuʼ. Ca historia ca riguixhedxícani ladxidóʼ binni. Guidúʼyanu chupa de ca historia riʼ.

Lu capítulo 7 stiʼ Lucas, cuzeeteni xi bizaaca ora bidxagalú Jesús caadxi binni ni zeeda guiree ndaaniʼ guidxi Naín ne zigucaachicaʼ ti hombrehuiiniʼ, tobi lucha xiiñiʼ ti viuda. Versículo 13 ca na: «Ora biʼya be gunaa que biá be laa ne rabi be laa: “Cadi guʼna luʼ”».

Xiñee gudxi Jesús gunaa que maʼ cadi guʼnaʼ yaʼ. Purtiʼ nánnabe maʼ qué ziuubaruʼ ladxidóʼ gunaa riʼ. Historia riʼ cuzeeteruni xi biʼniʼ Jesús: «Bidxiña be udaʼna be cajón que, para biaana dxí cani nua ni que. Oraque rabi be gueʼtu que: “Biasa, xiiñeʼ. Canié nia lii”. Oraque biasa hombre huiini que ne bizulú caníʼ. Para bidii be laa jñaa» (Lucas 7:14, 15). Zándaca jñaa hombrehuiiniʼ que bizulú biinaʼ sti biaje peru purtiʼ cayecheʼ.

Sti biaje, ti hombre láʼ Jairo bidxiña ra nuu Jesús ne gunábabe laa gacané xiiñidxaapabe de 12 iza purtiʼ nabé huará. Qué nindaa de ngue, gunna Jairo maʼ guti xiiñiʼ, ne ora gúnnabe ni gulaa ladxidoʼbe. Peru Jesús gudxi laabe: «Cadi idxibi luʼ, bini cre si naa». Ora yendabe ra lidxi ca binni que, guyuube ra nexheʼ dxaapahuiiniʼ que. Gunaazebe náʼ ne gúdxibe laa: «Biasa, badu dxapa huiiniʼ». Xi guca óraque yaʼ. «Oraqueca biasa badu dxapa huiini que ne gunda uzá.» Xi biʼniʼ sentir bixhoze ne jñaa dxaapahuiiniʼ que yaʼ. Guizáʼ biéchecabe. Ora gudiidxi Jairo ne xheelaʼ xiiñicaʼ que guizáʼ biéchecaʼ. Casi ñaca caníʼ xcaandacabe pur ni guca que (Marcos 5:22-24, 35-43).

Ca historia riʼ zanda gacané cani binni ni maʼ guti xiiñiʼ guni cré zanda guʼyaʼ xiiñiʼ sti biaje ora guiasa lade gueʼtuʼ. Jesús guníʼ: «Zadxiña dxi guna diaga irá cani nuu ndaani baʼ stidxi Xiiñi be, ne zaree caʼ» (Juan 5:28, 29). Jiobá maʼ gudixhe ique gudxiguetaʼ Jesucristu xquendanabani ca binni ni maʼ guti. Millón de hombrehuiiniʼ ne dxaapahuiiniʼ zunadiágacaʼ «stidxi» Jesús ora guiníʼ: «Biasa», ne zabaninecaʼ binnilídxicaʼ sti biaje. Óraque, cásica Jairo ne xheelaʼ, guizáʼ ziecheʼ binni ora gúʼyacaʼ guibani xiiñicaʼ sti biaje.

Pa maʼ guti ti xiiñiluʼ, bietenalaʼdxiʼ zanda cuee Jiobá yuubaʼ stiluʼ ne chuʼluʼ nayecheʼ sti biaje ra guiasa xiiñiluʼ lade gueʼtuʼ. Para guicaaluʼ ndaayaʼ ni chigudii Jiobá riʼ, naquiiñeʼ gúniluʼ ni guníʼ hombre ni bicaa salmo riʼ: «Laguyubi Jiobá para gudiibe stipa laatu. Guiráʼ ora laguyubi laabe. Laguietenalaʼdxiʼ guiráʼ ca cosa ni maʼ bíʼnibe, ca milagru stibe» (Salmo 105:4, 5). Ni caníʼ textu riʼ nga naquiiñeʼ gúniluʼ ni na Jiobá, Dios ni dxandíʼ, ne guni adorarluʼ laabe modo racaláʼdxibe.ʼ

Xi ndaayaʼ zacaaluʼ pa guyúbiluʼ Jiobá yaʼ. Pa gúniluʼ ni yanna riʼ la? zaguixhedxibe ladxidoʼloʼ ora guni orarluʼ laabe, ca xpinni Cristu zacanecaʼ lii ne cani gúʼndaluʼ de stiidxaʼ Dios zaguucani gana lii. Peru nuuruʼ xcaadxi ndaayaʼ. Xcaadxi huiiniʼ si, zanda gúʼyaluʼ guiráʼ ca cosa sicarú ne ca milagru ni zuni Jiobá para lii ne para xiiñiluʼ ni maʼ guti.

[Cuadru ni zeeda lu yaza 5]

«Dané gunaa ni guti guiropaʼ xiiñiʼ ca ra nuaa»

[Cuadru ni zeeda lu yaza 5]

Kehinde ne Bintu nga ti guendaxheelaʼ de Nigeria ne testigu stiʼ Jiobá laacabe. Guti chupa xiiñicabe ora bidxelasaa carru sticaʼ. Riuubaruʼ ladxidóʼ ca binni riʼ dede yanna. Peru cumu nánnacabe ziuu dxi guindisaʼ Jiobá xiiñicabe la? nga racané laacabe, ne qué rusaanacabe de guiníʼnecabe ca xpesínucabe cani caníʼ Biblia chigaca xcaadxi huiiniʼ si.

Stale binni huadii cuenta nexhedxí ladxidóʼ guendaxheelaʼ riʼ ne cadi cusaanacabe de gúnicabe xhiiñaʼ Jiobá. Ti biaje, ti gunaa de xquídxicabe ni láʼ Ukoli, gúdxibe tobi de ca xhamiga Bintu: «Dané gunaa ni guti guiropaʼ xiiñiʼ ca ra nuaa ni cadi cusaana de gucheeche stiidxaʼ Dios ca. Racalaʼdxeʼ gannaʼ xii nga cudii stipa laabe para guni huantarbe yuubaʼ ca». Ora yendá Bintu ra lidxi Ukoli la? Ukoli gunabadiidxaʼ laabe: «Racalaʼdxeʼ gannaʼ xiñee caʼruʼ gusaanaluʼ de gucheecheluʼ stiidxaʼ Dios pa laabe biitibe ca xiiñiluʼ. Laabe zinebe tobi lucha xiiñedxaapaʼ, ne dede dxi zinebe laa qué racalaʼdxeʼ gannaʼ de laabe». Bintu biquiiñeʼ Biblia para bisiene laabe xiñee rati binni ne xiñee runi crenu ziuu dxi ziasa ca binni ni maʼ guti (Hechos 24:15; Romanos 5:12).

Óraque guníʼ Ukoli: «Naa rabeʼ Dios nga raxha xiiñiʼ binni ora rati, peru yanna maʼ nannaʼ xiñee rati binni». Cumu racaláʼdxibe guiziidibe xiruʼ chiguni Dios xcaadxi huiiniʼ si la? gunabe guʼndané ca testigu stiʼ Jiobá laabe.

[Cuadru ni zeeda lu yaza 6]

«Racalaʼdxeʼ gacaniáʼ peru qué gannaʼ ximodo»

Ora gati ti baʼduhuiiniʼ la? naroʼbaʼ yuubaʼ riaanané bixhoze ne jñaa ne ca binnilidxi. Cani racalaʼdxiʼ ca xhamígucabe nga uguucaʼ gana laacabe. Peru zándaca qué rinácabe gúnicabe ni purtiʼ ridxíbicabe guiníʼcabe o gúnicabe xiixa ni jma guniná ca binni ca. Guidúʼyanu caadxi cosa ni zanda gacané ca binni ni riníʼ ique: «Racalaʼdxeʼ gacaniáʼ peru qué gannaʼ ximodo».

❖ Cadi guixeluʼ de ca binnilidxi ca binni ni guti xiiñiʼ ca purtiʼ si qué gannuʼ xi guiniʼluʼ o xi gúniluʼ. Chúʼsiluʼ raqué zacaneni laacabe stale. Ñee qué gánnaluʼ xi guiniʼluʼ para ganda gatadxí ladxidóʼcabe la? Zanda gusihuínniluʼ laaca cayuubaʼ ladxidoʼloʼ ra quiidxiluʼ laacabe ne gábiluʼ laacabe «laaca cayuubaʼ ladxiduáʼ». Ñee ridxíbiluʼ gúʼnaluʼ purtiʼ riníʼ íqueluʼ jma zaguuluʼ laacabe triste la? Biblia na «laguuna né cani cayuunaʼ» (Romanos 12:15). Ora gúʼyacabe cayuunaluʼ la? zudiicabe cuenta laaca naná nuuluʼ, nga zacané gatadxí ladxidóʼcabe.

❖ Bizulú biʼniʼ xiixa neca qué gábicabe lii. Ñee zanda guʼnuʼ xiixa guendaró go ca binni ni guti xiiñiʼ ca, quíʼbiluʼ ca traste ni biquiiñecabe, o gúniluʼ sti cosa ni guinábacabe lii la? Cadi gábiluʼ laacabe: «Pa iquiiñetu xiixa gábitu naa», purtiʼ nécapeʼ de ladxidoʼloʼ nga cayábiluʼ ni laacabe, peru pa guiniʼluʼ zacá casi ñaca niniʼluʼ nabé nuu xhiiñaluʼ para gacaneluʼ laacabe. Jma jneza nga guinabadiidxaluʼ laacabe: «Ñee nuu xiixa gacaniáʼ laatu la?» ne biʼniʼ ni gábicabe lii. Cadi chichuuluʼ ndaaniʼ lídxicabe ra qué rudiicabe lugar chuʼ binni ne cadi gacaláʼdxiluʼ gánnaluʼ de xquendanabánicabe.

❖ Cadi guiniʼluʼ: «Nannaʼ ximodo cayuni sentirtu». Gadxé gadxé modo runi sentir binni ora gati tuuxa binnilidxi. Ne neca laaca maʼ guti xiiñiluʼ, qué gánnaluʼ ximódopeʼ nuu ca binni ni guti xiiñiʼ ca.

❖ Cumu zandaa para tiidiʼ yuubaʼ stiʼ ca binni ca la? nga runi biyúbiruʼ modo ganda gacaneluʼ laacabe. Ora nacubi gati tuuxa binnilidxi binni, stale tu ziuunu laacabe para gacané, peru cadi gusaana de gacaneluʼ laacabe. Ni jma galán gúniluʼ nga gúʼyaluʼ pa caquiiñecabe xiixa ca semana ne ca beeu zeeda ca.a

[Cani cá ñee yaza]