Ti yuubaʼ roʼ ni qué ridiʼdiʼ ga

CADI tan xadxí, guyuu tu gucalaʼdxiʼ ñanna pa riuubaruʼ ladxidóʼ binni, neca maʼ xadxí guti binnilidxi. Nga runi, ca binni ni maʼ napa chupa chonna iza de guti xiiñicaʼ gucuaacaʼ caadxi guiʼchiʼ para gucaacaʼ ximodo runi sentircaʼ. Peru cadi guirácabe bidxiguétacabe guiʼchiʼ que. Vladimir, ti hombre ni guti xiiñiʼ raca gaayuʼ iza, guníʼ raca nagana para laa guzeeteʼ de xiiñiʼ ni guti que.a

Cadi guendaridxagayaa diʼ nga gánnanu riuubaruʼ ladxidóʼ cani maʼ guti xiiñiʼ, neca maʼ xadxí de guti xiiñicaʼ. Guininu de William, raca chii iza de guti xiiñibe guiiguʼ, ti hombrehuiiniʼ de 18 iza. William na: «Runinaruʼ yuubaʼ riʼ naa ne qué ziuu dxi gusiaandaʼ ni». Lucy laaca riuubaruʼ ladxidóʼ, purtiʼ laaca guti ti hombrehuiiniʼ stibe de ti guendahuará ni málasi gunaazeʼ laa, gudiʼdiʼ si gaayuʼ iza de guti xiiñibe que nabe: «Ca primé dxi que rabeʼ: “cadi dxandíʼ diʼ gútibe”. Guníʼ iqueʼ canié xcaandaʼ ne qué zandaa zabaneʼ. Gudiʼdiʼ si ti tiempu, bidiéʼ cuenta dxandíʼ guti xiiñeʼ ne maʼ qué zabiguétadibe. Neca maʼ raca gaayuʼ iza de gútibe, nuu tiru ora maʼ nuaa stubeʼ la? ruunaruáʼ pur laabe».

Xiñee napa Vladimir, William, Lucy ne xcaadxi binni ni maʼ guti xiiñiʼ ti yuubaʼ roʼ ni qué ridiʼdiʼ ga yaʼ. Chiguidúʼyanu caadxi razón.

Xiñee nabé riuubaʼ ladxidóʼ binni ora gati ti xiiñiʼ

Ora rale ti baʼduhuiiniʼ nabé riecheʼ bixhoze ne jñaa ne gástiruʼ sti cosa ni jma rusiecheʼ laacaʼ. Ne cúʼsicabe baʼduhuiiniʼ ca ndaaniʼ nácabe, gúʼyacabe gasi o gúʼyacabe modo ruxidxi la? ruchátipa ni ladxidóʼcabe ne nabé riéchecabe. Ca binni ni nadxii xiiñiʼ, rúnicaʼ stipa pur gápacaʼ laacabe. Ne rusiidicaʼ laacabe gácacabe nachaʼhuiʼ ne gaca xpiáʼcabe galán (1 Tesalonicenses 2:7, 11). Ne ora gúʼyacabe ruzuubaʼ xiiñicabe diidxaʼ la? nabé riéchecabe ne ribézacabe gácacaʼ tuuxa lu xquendanabánicaʼ.

Ca binni ni nadxii xiiñiʼ, rúnicaʼ dxiiñaʼ nadipaʼ para gusiniisicaʼ laacabe. Zándaca riguu chaahuicaʼ bueltu para ganda gacanecaʼ laacabe guichaganásicabe (2 Corintios 12:14). Ora guiníʼ ique binni pabiáʼ gulee xcaandaʼ, gulee tiempu ne biniti bueltu para biniisicabe la? rusihuínnicani rusiniisi binni xiiñiʼ cadi para gati diʼ, sínuque para guibani. Peru ora gati ti xiiñiʼ binni, guiráʼ ni gudixhe íquecabe maʼ qué raca diʼ cani. Maʼ qué randa diʼ rusihuínnicabe nadxiicabe xiiñicabe, purtiʼ guendaguti ca reeda gácani casi ti pilar de guié ni guyuu ládecabe. Zaqueca rusaanani ti yuubaʼ roʼ ndaaniʼ ladxidóʼcabe, ti yuubaʼ ni qué riaandaʼ.

Biblia na rapa cani maʼ guti xiiñiʼ ti yuubaʼ roʼ ni qué ridiʼdiʼ ga. Guininu xi biʼniʼ Jacob ora gunna biiticabe xiiñiʼ, José. Biblia na: «Jacob gucheza xhaba ne guláʼquibe sacu lu dxitaxaanabe ne guyuube triste pur xiiñibe stale dxi. Ne guiráʼ xiiñibe yeguizaacacaʼ laabe, peru qué ninabe, ne guniʼbe: ¡Ziuaa triste pur xiiñeʼ riʼ dede dxi gateʼ!». Gudiʼdiʼ iza biinaruʼ Jacob pur xiiñiʼ ni para laa maʼ guti que (Gén. 37:34, 35; 42:36-38). Sti ejemplu ni nápanu ndaaniʼ Biblia nga stiʼ Noemí, ti gunaa ni biʼniʼ ni na Jiobá. Cumu guiropaʼ xiiñiʼ gunaa riʼ guti la? nabé guyuube triste dede gucaláʼdxibe nuchaabe labe Noemí pur Mará. Noemí riniʼni «Ni nabé riuu nayecheʼ», ne Mará riniʼni «Yuubaʼ» (Rut 1:3-5, 20, 21, laguuyaʼ ñee yaza stiʼ Biblia).

Biblia riníʼ de ca yuubaʼ ni runi sentir cani maʼ guti xiiñiʼ. Peru laaca ruzeeteni Jiobá rudii stipa ne riguixhedxí ladxidóʼ cani maʼ guti xiiñiʼ. Lu sti tema ca zadúʼyanu xi riquiiñebe para gúnibe ni.

[Cani cá ñee yaza]