Ñee runi creluʼ dxandíʼ zusibani Dios gueʼtuʼ la?
«Zusibani Dios gueʼtuʼ.» (HECHOS 24:15.)
1. Xiñee ruluíʼ guirutiʼ qué zanda guilá de guendaguti.
SICARÍʼ guníʼ Benjamín Franklin, ti políticu de Estados Unidos: «Ndaaniʼ Guidxilayú riʼ la? qué randa rilá binni de guendaguti nin de quixe impuestu». Ca diidxaʼ ca guniʼbe cani lu iza 1789, ne stale binni ridxagayaa ni guniʼbe ca purtiʼ dxandíʼ ni. Neca naquiiñeʼ guiaxa impuestu la? stale binni ruyubi xi guni para cadi quixe ni. Peru lu naʼ guendaguti ca huaxa guirutiʼ rilá; purtiʼ stubi si binni qué zanda guni xiixa para cadi gati. Seol nga ra rigaachiʼ guiráʼ gueʼtuʼ, laani zeeda gácani ti lugar ni qué ridxá, purtiʼ casi ñaca ñábini ca binni ni nadxiinu ora maʼ gúticaʼ (Proverbios 27:20). Peru laacabe zabánicabe sti biaje.
2, 3. 1) Xiñee zanda guininu qué zati diʼ guiráʼ binni neca nuu tu gadxé ni runi cré. 2) Xi chonna cosa chigusiene tema riʼ.
2 Stiidxaʼ Dios cayabi laanu dxandíʼ zabani binni ni maʼ guti sti biaje. Cadi ti bacaandaʼ diʼ ni, purtiʼ guirutiʼ ne gastiʼ nin ti cosa guibáʼ ne ndaaniʼ Guidxilayú ni ganda gucueeza Jiobá de guni ni. Neca nuu stale binni ni runi cré zadxiña dxi gati guiráʼ binni la? cadi zacá diʼ ni para xcaadxi binni, purtiʼ laacaʼ qué zadxiña dxi gáticaʼ. Xiñee yaʼ. Purtiʼ ziuu «jma binni» ni zalá lu ca dxi «jma nagana» ni zeeda guidxiña ca (Apocalipsis 7:9, 10, 14). Tiidiʼ si nga la? dede zanda guibánicabe sin qué chuʼ gáticabe. Nga nga ca binni ni zanda guininu qué zugaanda diʼ guendaguti laacaʼ. Ne Biblia na: «Ni unitilú [Dios] últimu nga enda guti» (1 Corintios 15:26).
3 Yanna riʼ laaca riquiiñeʼ guni crenu de guidubi ladxidoʼno dxandíʼ zusibani Dios gueʼtuʼ cásica biʼniʼ cré apóstol Pablu ni, laa guníʼ: «Naa rune cre zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ» (Hechos 24:15). Guidúʼyanu chonna cosa ni rinabadiidxaʼ binni ora rieeteʼ ziasa ca gueʼtuʼ ca. Primé, xi rucaa laanu guni crenu dxandíʼ zácani. Guiropa, ximodo ratadxí ladxidoʼno ora gánnanu de laani. Guionna, xi riquiiñeʼ gúninu yanna purtiʼ maʼ nánnanu zusibani Dios gueʼtuʼ.
Dxandíʼ zusibani Dios gueʼtuʼ
4. Xiñee naquiiñepeʼ guiasa ca gueʼtuʼ ca para gaca ni maʼ guníʼ Jiobá.
4 Nuu stale razón para guni crenu dxandíʼ zabani ca gueʼtuʼ ca. Ndiʼ nga ti razón ni jma risaca: naquiiñepeʼ guiásacabe para gaca ni maʼ gudixhe ique Jiobá guni. Cadi guiaandaʼ laanu Binidxabaʼ nga bicaa binni gucheené Dios, ne pur nga rati binni yanna. Ngue runi Jesús guníʼ de Binidxabaʼ sicaríʼ: «Dede dxi bizulú guidxilayú huayuuti be binni» (Juan 8:44). Peru Jiobá guníʼ zapa «gunaa» stiʼ, o guiráʼ ca ángel chaʼhuiʼ stiʼ ni nuu guibáʼ ni zeeda gaca casi xheelaʼ, ti xiiñiʼ ni zutuñee ique «beenda yooxho» que, ne zacá nga zanitilú Binidxabaʼ (Génesis 3:1-6, 15; Apocalipsis 12:9, 10; 20:10). Ra zigusiene Jiobá xi guiráʼ chiguni xiiñiʼ gunaa que ora gueeda la? bihuinni cadi chigunitilú si Jesús Binidxabaʼ. Sicaríʼ na Biblia: «Nga runi beeda Xiiñi Dios, beda uchiá xhiiña binidxabaʼ» (1 Juan 3:8). Stale binni cayati pur pecadu stiʼ Adán, ne laani nga primé de cani racalaʼdxiʼ Jiobá guchiá Jesús. Nga runi, para ganda guibiá xhiiñaʼ Binidxabaʼ la? gupa xidé guti Jesús ne biasa lade gueʼtuʼ (Hechos 2:22-24; Romanos 6:23).
5. Ximodo ndiʼ zusisaca Jiobá lá ora gusibani gueʼtuʼ.
5 Jiobá maʼ guníʼ zusisaca lá. Pur guiráʼ guendarusiguii stiʼ Binidxabaʼ nga riníʼ binni mal de Dios. Bisiguii Binidxabaʼ ora guníʼ qué liica zati Adán ne Eva pa gocaʼ cuananaxhi gudxi Dios laacaʼ cadi gocaʼ (Génesis 2:16, 17; 3:4). Ne dede yanna rusiguiirube binni purtiʼ rucaabe laacaʼ guni crecaʼ qué rati alma ca ora gati binni. Peru ora maʼ gusibani Jiobá ca gueʼtuʼ ca zusihuinni cadi dxandíʼ guiráʼ ni riníʼ Binidxabaʼ. Zusihuinni Jiobá laasi nga napa poder para gapa binni ti cadi gati ne para gusibani cani maʼ guti.
6, 7. Xi racalaʼdxiʼ Jiobá guni ne cani maʼ guti, ne ximodo nánnanu ni.
6 Jiobá guizáʼ racalaʼdxiʼ gusibani ca gueʼtuʼ ca. Biblia culuíʼ laanu dxandíʼ nga racalaʼdxiʼ Dios guni ni. Guidúʼyanu xi guníʼ Job, ti hombre chaʼhuiʼ ni bibani dxiqué, nabe: «Pa ti hombre ni nadipaʼ gati, zanda guibiguetaʼ guibánibe la? Zabezaʼ biaʼ ca dxi caquiiñeʼ guneʼ dxiiñaʼ, dede ora maʼ guiree. Lii zucaa riʼdxuʼ, ne naapeʼ zacabeʼ lii. Zacaláʼdxiluʼ cani huayuni naluʼ» (Job 14:14, 15). Xi rusihuinni ca diidxaʼ ca yaʼ.
7 Job na ora gati nanna naquiiñeʼ cueza biaʼ ti tiempu; para laabe zeeda gácani casi ti dxiiñaʼ ni nápabe xidé gúnibe, purtiʼ naquiiñepeʼ cuézabe dede ora gusibani Dios laabe. Job dxandíʼ biʼniʼ cré zadxiña dxi guibani sti biaje. Xiñee biʼniʼ crebe dxandíʼ ni yaʼ. Purtiʼ nánnabe xi runi sentir Jiobá; nánnabe dxandíʼ racalaʼdxiʼ Jiobá guʼyaʼ maʼ nabánibe sti biaje purtiʼ bíʼnibe ni jneza. Nga nga laani, Dios nabé racalaʼdxiʼ gusibani guiráʼ ca binni ni biʼniʼ ni jneza. Laaca nuuruʼ xcaadxi binni ni racalaʼdxiʼ Dios guibánicaʼ sin gáticaʼ ora maʼ gaca Guidxilayú riʼ ti paraísu (Lucas 23:43; Juan 5:28, 29). Yanna, pa Dios racalaʼdxiʼ guni nga, ñee nuu tuuxa ni zanda gucueeza laabe para cadi gúnibe ni la?
8. Xi biʼniʼ Jiobá ni rusihuinni dxandíʼ ziasa ca gueʼtuʼ ca.
8 Ra biasa Jesús lade gueʼtuʼ bisihuinni dxandíʼ ziasa ca gueʼtuʼ ca. Dxi bidii Pablu ti libana ndaaniʼ guidxi Atenas la? guníʼ xi chiguni Dios, nabe: «Ma gudixhe be ti dxi cuidxi be cuenta laacaʼ. Ma ulí be tobi hombre guni ni, ne zuni ni jneza. Bisihuinni be ulí be laa ra undisa be laa de lade gueʼtuʼ» (Hechos 17:31). Guyuu tu biʼniʼ burla Pablu ora guníʼ ziasa gueʼtuʼ, peru guyuu xcaadxi ni biʼniʼ cré, zándaca purtiʼ gúnnacaʼ biasa Cristu lade gueʼtuʼ. Milagru ni jma naroʼbaʼ biʼniʼ Jiobá dede biaʼ dxi nabani binni ndaaniʼ Guidxilayú riʼ nga ora gundísabe Jesús lade gueʼtuʼ: bilabe Jesús de lu naʼ guendaguti ne bisibánibe laa casi ti espíritu ni napa stale poder (1 Pedro 3:18). Biasa si Jesús lade gueʼtuʼ la? gucuaa ti puestu jma risaca que ni gupa ante gueeda lu Guidxilayú riʼ. Cumu maʼ qué zátibe ne laasibe nga sti binni ni jma napa poder despué de Jiobá la? zanda gúnibe ne stale derechu intiica dxiiñaʼ gudii Bixhózebe laabe. Jesús nga chiguiquiiñeʼ Jiobá para gusibani xcaadxi gueʼtuʼ, cásica ni chiguibani guibáʼ zaqueca cani chiguibani ndaaniʼ Guidxilayú riʼ. Jesús peʼ guníʼ ca diidxaʼ riʼ: «Naa nga rusibane gueʼtuʼ, ne naa nga rudiee enda nabani» (Juan 5:25; 11:25). Ra bisibani Jiobá Xiiñiʼ la? bisihuinni zanda gusibani guiráʼ ca binni nachaʼhuiʼ ni biʼniʼ ni nabe.
9. Xi ejemplu zeeda lu Biblia ni rusihuinni dxandíʼ zabani ca gueʼtuʼ ca.
9 Guyuu binni ni biʼyaʼ maruʼ bisibani Dios gueʼtuʼ ne laaca cá ni lu Stiidxaʼ Dios. Biblia ruzeeteʼ biasa xhono binni lade gueʼtuʼ para bibánicaʼ sti biaje ndaaniʼ Guidxilayú riʼ. Ca milagru riʼ qué ñaca diʼ cani nagaʼchiʼ, sínuque gunna binni de laacani, dede guyuu binni biʼyaʼ ora gúcacani. Jesús bisibani Lázaro dxi maʼ napa tapa gubidxa de guti, ne bíʼnibe ni nezalú stale binni ni cayuunaʼ, lade ca binni que nuu ca binnilidxi Lázaro, ca xhamigu ne ca xpesinu. Ni biʼniʼ Jesús riʼ biiyaʼ stale binni ni ne bisihuínnini laabe nga biseendaʼ Dios. Ngue runi nin ca xhenemígube qué ñanda niniʼcaʼ cadi dxandíʼ ni, sínuque gucaláʼdxicaʼ ñuuticaʼ Jesús ne Lázaro (Juan 11:17-44, 53; 12:9-11). Nga runi, zanda guni crenu dxandíʼ zabani ca gueʼtuʼ ca. Dios nga guníʼ guicá lu Stiidxaʼ guyuu binni biasa lade gueʼtuʼ ti quixhedxícani ladxidoʼno ne guquídxicani fe stinu ora guidúʼndanu de laacani.
Ratadxí ladxidoʼno purtiʼ nánnanu zusibani Dios gueʼtuʼ
10. Xi riquiiñeʼ gúninu ti jmaruʼ si guni crenu dxandíʼ zabani ca gueʼtuʼ ca ti gatadxí ladxidoʼno.
10 Ora nánnanu mayaca gátinu la? riuuláʼdxinu nga chuʼ tu gabi laanu xiixa ni quixhedxí ladxidoʼno. Ni zanda gacané laanu nga ca historia ni cá lu Biblia ra rieeteʼ biasa ca gueʼtuʼ ca sti biaje. Pa guidúʼndanu cani, guiníʼ íquenu de laacani ne guxuíʼlunu ximodo gúcacani la? zacané ca nga laanu para jmaruʼ si guni crenu dxandíʼ zusibani Dios gueʼtuʼ (Romanos 15:4). Cadi cuentu diʼ cani. Ca binni ni guti ne bibani ca laaca gúcacabe binni casi laanu ne gulézacabe ndaaniʼ xiixa guidxi dxiqué. Guzéʼtenu tobi de ca historia ca: primé gueʼtuʼ ni bibani sti biaje ni ruzeeteʼ Biblia.
11, 12. 1) Xi bizaaca ti viuda de Sarepta, ne xi guniʼbe óraque. 2) Ximodo gucané Jiobá viuda que.
11 Guxuíʼlunu ni bizaaca riʼ. Maʼ ziné Elías ni riguixhená que chupa chonna semana de naca biuuzaʼ ra lidxi ti viuda de guidxi Sarepta, ne rásibe ndaaniʼ ti cuartu huiiniʼ nuu ique yoo que. Nabé triste tiempu nabánicabe que. Qué huayaba nisaguié neza raqué, gastiʼ ni go binni ne stale tu cayati. Viuda riʼ pobre laa peru napa fe Jiobá, ngue runi biquiiñeʼ Jiobá Elías para guni ti milagru pur laabe. Gunaa riʼ ne xiiñiʼ mayaca gáticaʼ ne maʼ para sti guendaró si nápacabe ora biʼniʼ Elías ti milagru para cadi nirá harina ne aceite stícabe. Despué la? beeda guiaba sti desgracia luguiáʼ viuda que. Málasi gudixhe ti guendahuará baʼduʼ stibe que ne qué nindaa guti. Ne ni guca últimu riʼ gucadé ladxidóʼ gunaa que. Maca nagana ngue para guidxélabe ni gobe purtiʼ maʼ guti xheelabe, yanna maʼ guti tobi lucha xiiñibe. Pur guiráʼ yuubaʼ ni cadíʼdibe riʼ la? dede bigaanibe donda Elías ne Jiobá, Dios stiʼ. Yanna, xi guni hombre riguixhená riʼ yaʼ.
12 Qué nidindené diʼ Elías laabe pur ni guniʼbe que, sínuque gudxi laabe: «Dané naa xiiñiluʼ». Yené Elías baʼduʼ que ndaaniʼ cuartu nuu ique yoo que ne stale biaje gunábabe Dios gusibani hombre huiiniʼ que. Jiobá bicaadiaga ca oración stibe. Guxuíʼlunu pabiáʼ nayecheʼ guyuu Elías ora biʼyaʼ gucuaa baʼduʼ que bi, bixeleʼ lú ne maʼ nazaaca nuu. Hombre ni riguixhená riʼ yesaana baʼduʼ que ra nuu jñaa ne gúdxibe gunaa que: «Biiyaʼ, maʼ nabani xiiñiluʼ». Guizáʼ biecheʼ gunaa riʼ pur milagru que ne guníʼ: «Yanna huaxa maʼ nanna dxandíʼ Dios biseendaʼ lii, ne guiráʼ ni guiniʼluʼ chiguni Jiobá dxandíʼ cani» (1 Reyes 17:8-24). Ne ni guca riʼ jma biguidxi fe ni nápabe Jiobá ne fe ni nápabe Elías.
13. Xiñee riguixhedxí historia stiʼ viuda de Sarepta ni bibani xiiñiʼ que ladxidoʼno.
13 Dxandíʼ nga ratadxí ladxidoʼno ora ridúʼndanu historia ca. Rihuinni dxíchica zabee Jiobá guendaguti, xhenemígunu ca. Guiníʼ íquenu dxi maʼ gúnibe ni racaláʼdxibe ne dxi guni mandarbe Xiiñibe para gusibani gueʼtuʼ lu guidubi naca Guidxilayú riʼ. Millón de binni ziuu nayecheʼ casi viuda ni bibani xiiñiʼ que, ne laaca nabé ziéchecabe guibáʼ (Juan 5:28, 29). Ñee maʼ guti tuuxa ni guizáʼ nadxiiluʼ la? ¡Guizáʼ nga ratadxí ladxidoʼno gánnanu zanda gusibani Jiobá gueʼtuʼ!
Xi guʼnuʼ yanna ra maʼ nannuʼ zusibani Dios gueʼtuʼ
14. Xi zanda gúniluʼ purtiʼ maʼ nánnaluʼ dxandíʼ zusibani Dios gueʼtuʼ.
14 Ximodo nabániluʼ yanna purtiʼ maʼ nánnaluʼ dxandíʼ zusibani Dios gueʼtuʼ yaʼ. Cumu maʼ nánnaluʼ nga la? zacaneni lii gápaluʼ stipa para gudxiiluluʼ intiica ni uguu lii triste casi xiixa guendanagana, sanándacabe lii pur rúniluʼ ni na Dios ne ora chuʼluʼ ra naxoo. Binidxabaʼ racalaʼdxiʼ guidxíbiluʼ guendaguti ti gusaana de gúniluʼ ni na Dios pur intiisi cosa ni ruluíʼ jma galán gudii binni guidxilayú lii. Guietenaláʼdxinu xi gudxi Binidxabaʼ Jiobá: «Guiráʼ ni napa binni zudii ni pur xhialma» (Job 2:4). Ora guniʼbe zacá la? caniʼbe qué ziuu nin ti binni guni ni na Dios, dede ne lii nga guluube luni. Ñee dxandíʼ zusaana de gúniluʼ ni na Dios ora tiidiluʼ ra jma nagana la? Pa guiníʼ íqueluʼ dxandíʼ zusibani Dios gueʼtuʼ la? jmaruʼ si zaguixhe íqueluʼ gúniluʼ ni na Bixhózeluʼ ni nuu guibáʼ.
15. Ximodo zanda gacané ca diidxaʼ ni guníʼ Jesús lu Mateo 10:28 laanu pa nuu guendanabani stinu ra naxoo.
15 Jesús gudixhená laanu: «Cadi idxibi tu cani ruuti cuerpu si, purti qué zanda guuti cabe alma, sínuque laidxibi ni zanda unitilú alma ne cuerpu ndaani [Gehena] (Mateo 10:28). Qué gápadinu xidé guidxíbinu Binidxabaʼ ne ca xpinni ni nuu lu Guidxilayú riʼ. Dxandíʼ nuu binni ni zanda guniná laanu, dede zándapeca guuticaʼ laanu. Pa gúnicabe ni la? qué ziaananédinu yuubaʼ ca xadxí, purtiʼ Jiobá zanda cuee intiica guendananá gapa ca xpinni, dede zanda gusibánibe laanu pa guuticabe laanu. Laasibe nga ni naquiiñeʼ guidxíbinu guchéʼnenu ne ni naquiiñeʼ gápanu stale respetu. Laasibe nga nápabe poder para gáxhabe guendanabani stinu yanna riʼ ne laasibe nga zanda gudiibe laanu guendanabani ni qué zaluxe, ne laaca laasibe nga zanda gunitilube cuerpu ne alma stinu ndaaniʼ Gehena. Riéchenu stale nga gánnanu qué racalaʼdxiʼ diʼ Jiobá guuti laanu (2 Pedro 3:9). Cumu nanna ca xpinni Dios dxandíʼ zabani ca gueʼtuʼ ca la? nga rucaa laacaʼ guibánicaʼ sin guidxíbicaʼ intiica guendanagana. Guendanabani ni qué zaluxe ca zacaa binni ni guzuubaʼ Stiidxaʼ Dios ni, ne gastiʼ qué zanda guni Binidxabaʼ ne ca xpinni para gucueezacaʼ ni chiguni Dios (Salmo 118:6; Hebreos 13:6).
16. Laanu runi crenu dxandíʼ zusibani Dios gueʼtuʼ, yanna, ximodo racané nga laanu para gánnanu xi naquiiñeʼ quixhe íquenu gúninu.
16 Pa dxandíʼ runi crenu zusibani Dios gueʼtuʼ la? zucaa nga laanu guchaʼnu modo nabáninu yanna. Zudiʼnu cuenta dxandíʼ ni na ca diidxaʼ riʼ: «Pa ibani nu o pa gati nu, sti Señor [Jiobá] laanu» (Romanos 14:7, 8). Nga runi, zinándanu ni na conseju bidii Pablu riʼ ora maʼ chitixhe íquenu xi naquiiñeʼ gúninu: «Ma cadi chi nanda tu ni na binni guidxilayú, sínuque laudii lugar uchaa Dios laatu ne cuee irá ni ucuá ique tu chiqué. Zacá zanna tu xii nga racalaʼdxi Dios guni tu, ni nachaʼhui ne ni chuʼlaʼdxiʼ ne ni jneza pe» (Romanos 12:2). Stale binni canaguxooñecaʼ nagasi purtiʼ cá íquecaʼ gúnicaʼ guiráʼ ni racaláʼdxicaʼ, gápacaʼ guiráʼ ni gúʼyacaʼ ne gúnicaʼ guiráʼ ni guluiláʼdxicaʼ. Cumu huaxiéʼ dxi nga ribani binni la? nga runi dede maʼ qué guidxélacaʼ xi gúnicaʼ para chuʼcaʼ nayecheʼ. Ne pa riecaʼ lade ti religión la? cadi nabánicaʼ modo «racalaʼdxi Dios guni[caʼ]».
17, 18. 1) Ximodo cusiene Biblia huaxiéʼ dxi ribani binni, peru xi racalaʼdxiʼ Dios guni para laanu. 2) Xiñee riale de ndaaniʼ ladxidoʼno gusisácanu Jiobá guiráʼ dxi.
17 Dxandíʼ, cadi xadxí diʼ ribani binni. Nagueenda ridiʼdiʼ ni, ne maca bilúxenu. Maʼ stale nga guibáninu setenta o pacaa ochenta iza (Salmo 90:10). Laanu zeeda gácanu casi guixi gaʼ, casi ti bandáʼ ni zidiʼdiʼ: yannadxí nga nuunu raríʼ, guixíʼ maʼ qué guínninu (Salmo 103:15; 144:3, 4). Peru cadi gudixhe ique diʼ Dios guibáninu chupa chonna iza si para guiniisinu, guizíʼdinu, gápanu guendabiaaniʼ ne oracaruʼ maʼ gaca huaranu, guióxhonu ne gátinu. Jiobá bizáʼ binni para chuulaʼdxiʼ guibani sin gati. Biblia na: «Guluube ndaaniʼ ladxidoʼcaʼ tiempu ni qué gapa ra riluxe» (Eclesiastés 3:11). Yanna, ñee málupeʼ Dios para guzáʼ laanu zacá ne cadi gudii lugar guibáninu sin qué chuʼ dxi gátinu la? Coʼ, cadi zacá diʼ laabe, «purti de Dios nga reeda enda ranaxhii» (1 Juan 4:8). Laabe zandísabe ca gueʼtuʼ ca para ganda guibánicaʼ sin qué chuʼ dxi gáticaʼ.
18 Cumu nánnanu dxandíʼ zusibani Dios gueʼtuʼ la? neca gátinu zabáninu sti biaje. Qué riquiiñeʼ diʼ guibáninu casi nabani stale binni yanna, purtiʼ cá íquecaʼ gúnicaʼ guiráʼ ni gacaláʼdxicaʼ dede biaʼ gándatiʼ. Cadi caquiiñeʼ diʼ guibáninu para si iquiiñenu guidxilayú ni maʼ canitilú riʼ biaʼ gándatiʼ (1 Corintios 7:29-31; 1 Juan 2:17). Gadxé si de ca binni ni qué runi cré zandisaʼ Dios gueʼtuʼ la? laanu nánnanu sicarú nga ni cabézanu gaca: nánnanu zanda guibáninu sin qué chuʼ dxi gátinu para gusisácanu Jiobá Dios ne guibáninu nayecheʼ pa guzúʼbanu Stiidxabe. Nga runi, gusisácanu Jiobá guiráʼ dxi, Dios ni cayabi laanu dxandíʼ zusibani binni ni maʼ guti.
Xi nicábiluʼ
• Ximodo naquiiñeʼ guni sentirnu purtiʼ maʼ nánnanu dxandíʼ zanda guibani binni ni maʼ guti.
• Xii nga ca razón ni nápanu para guni crenu dxandíʼ zusibani Dios gueʼtuʼ.
• Xi riquiiñeʼ gúniluʼ para gatadxí ladxidoʼloʼ ora gúʼndaluʼ ra na zusibani Dios gueʼtuʼ.
• Ximodo naquiiñeʼ guibáninu yanna purtiʼ maʼ nánnanu zusibani Dios gueʼtuʼ.
[Dibuju/foto ni zeeda lu yaza 19]
«Biiyaʼ, maʼ nabani xiiñiluʼ»
[Dibuju/foto ni zeeda lu yaza 20]
Job gunna dxandíʼ racalaʼdxiʼ Jiobá gusibani binni ni biʼniʼ jneza