Cayúniruʼ ca binni huaniisi ca xhiiñaʼ Jiobá
«Ca binni ni zuhuaa ndaaniʼ lidxi Jiobá [...] zaguichebiiturucaʼ casi ti yaga neca maʼ natoope íquecaʼ.» (SALMO 92:13, 14.)
1, 2. 1) Xi redandá ndaaniʼ ique binni ora gunadiaga diidxaʼ guendayooxhoʼ. 2) Xiná Stiidxaʼ Dios zaca ne guiráʼ guendananá ni bisaanané donda stiʼ Adán laanu.
XI REDANDÁ ndaaniʼ íqueluʼ ora gunadiágaluʼ diidxaʼ guendayooxhoʼ. Ti binni ni maʼ nacuuxhuʼ ladi la? Tobi ni maʼ qué runadiaga ne maʼ cadi naguidxi la? O redandá ndaaniʼ íqueluʼ tobi de cani rieeteʼ lu Eclesiastés 12:1-7 ra caníʼ de «ca dxi nagana» ni rapa binni ora maʼ huaniisi. Pa zacá ni la? cadi guiníʼ íqueluʼ casi cá lu Eclesiastés 12 ca nga gucalaʼdxiʼ Jiobá ñaca binni, sínuque rácanu zacá purtiʼ ralenenu donda ni bisaanané Adán laanu (Romanos 5:12).
2 Cadi galán diʼ guininu feu nga guioʼxhoʼ binni, purtiʼ guiranu riuuláʼdxinu guiniisinu ne guizíʼdinu, peru para gaca nga riquiiñeʼ tiidiʼ stale tiempu. Maʼ qué zandaa diʼ zaree guiráʼ guendananá ni huayapa binni dede maʼ raca xhoopaʼ mil iza. Guiráʼ ca binni ni guzuubaʼ stiidxaʼ Dios la? zabánicaʼ modo gucaláʼdxibe dede primé que, ne maʼ qué zuniná guendayooxhoʼ ca laacaʼ nin guendaguti (Génesis 1:28; Apocalipsis 21:4, 5). Óraca maʼ guirutiʼ tu zaníʼ: «Huaraʼyaʼ» (Isaías 33:24). Ca binnigola ca zápacaʼ stipa ni gúpacaʼ dxi nahuiinicaʼ, ne beela ládicaʼ zaca «jma nazaaca que dxi gúcacaʼ nahuiiniʼ» (Job 33:25). Peru laga guedandá dxi ca la? guiranu zadxaagalúrunu ca guendananá ni bisaanané Adán laanu. Neca zacá ni la? ca xpinni Jiobá cacaacaʼ stale ndaayaʼ neca maʼ bióʼxhocaʼ.
3. Xi culuíʼ ca diidxaʼ ra na «ca binni ni zuhuaa ndaaniʼ lidxi Jiobá [...] zaguichebiiturucaʼ casi ti yaga neca maʼ natoope íquecaʼ».
3 Stiidxaʼ Dios na: «Ca binni ni zuhuaa ndaaniʼ lidxi Jiobá [...] zaguichebiiturucaʼ casi ti yaga neca maʼ natoope íquecaʼ» (Salmo 92:13, 14). Ra bichaaga hombre ni bicaa salmo riʼ ca binni huaniisi ca casi ti yaga ni caguichebiituruʼ la? cusihuínnibe dxandíʼ zándaruʼ gúnicabe ni na Jiobá casi runi ti nahuiiniʼ neca maʼ cará stipa stícabe. Stale ejemplu ni zeeda lu Biblia ne ca ejemplu de yanna riʼ cusihuínnicani zacá cayúnicabe.
«Qué riree be ndaani yuʼduʼ roʼ»
4. Ximodo bisihuinni Ana qué nusaana de ñuni ni na Jiobá, ne ximodo guluu ndaayaʼ Jiobá laabe.
4 Guníʼ ique de Ana, ti ni riguixhená stiʼ Dios. Neca maʼ 84 iza laabe la? «qué [n]iree be ndaani yuʼdu roʼ. Rusisaca be Dios ridxí ne huaxhinni [raqué], ne stale tiru riaana be sin go be para iníʼ né be Dios». Cumu laabe zeedabe de tribu stiʼ Aser ne cadi de tribu stiʼ Leví la? qué ñanda diʼ nibézapebe ndaaniʼ yuʼduʼ que. Bixuiʼlú pabiáʼ nadipaʼ ngue chuʼbe raqué guiráʼ dxi dede ora rudiicabe ofrenda siadó hasta ora rudiicabe ofrenda huadxí. Peru cumu qué nusaana Ana de ñuni ni na Jiobá la? gucuaa stale ndaayaʼ, purtiʼ nuube raqué ora yené José ne María Jesús dxi nariʼniʼ para guluiʼcaʼ laabe Jiobá casi na ley que naquiiñeʼ gúnicaʼ. Ora biiyaʼ Ana Jesús la? «bidii be diuxquixe Dios, ne dede óraque bizulú cayabi be binni badu huiini que nga ni cabeza ca gueda ulá Jerusalén» (Lucas 2:22-24, 36-38; Números 18:6, 7).
5, 6. Ximodo rusihuinni stale binnigola nácacaʼ casi Ana yanna riʼ.
5 Yanna riʼ laaca nuu stale de ca bíʼchinu ne ca bizáʼnanu ni maʼ nagola ni zeeda gácacaʼ casi Ana. Ximodo yaʼ. Purtiʼ laaca qué riaadxacabe ca guendaridagulisaa ca, riniʼnécabe Dios de guidubi ladxidóʼcabe ti gacanebe xcaadxi binni para guni adorarcaʼ laabe jneza ne nabé riuuláʼdxicabe chigucheechecabe diidxaʼ. Ti Testigu ni napa jma de ochenta iza ni riné xheelaʼ guiráʼ ca guendaridagulisaa ca guníʼ: «Maʼ biaʼdu chuudu ca guendaridagulisaa ca ne qué racaláʼdxidu chuʼdu sti lugar. Racaláʼdxinu chuʼdu ra nuu cani cayuni ni na Jiobá. Racá nga runi sentirdu galán».¡Guizáʼ racané ejemplu stícabe laanu, njaʼ! (Hebreos 10:24, 25.)
6 Sicaríʼ guníʼ Jean, ti viuda Testigu ni napa jma de 80 iza: «Ora tiica gaca xiixa ra guni adorarnu Jiobá la? naa qué ziaadxaʼ pa zanda chaa». Ne laaca guniʼbe ca diidxaʼ riʼ: «Dxandíʼ, nuu tiru riuaa triste, peru xiñee chuʼ xcaadxi triste ora maʼ nuaa zacá yaʼ». Óraque bisihuínnibe pabiáʼ nayecheʼ riuube ora chigánnabe xcaadxi guidxi para guidagulisaanebe xcaadxi ni runi adorar Jiobá. Lu últimu biaje ra guyebe que gúdxibe cani ziné laabe: «Maʼ qué racalaʼdxeʼ chaa ra rié xcaadxi binni para gunibiáʼ. ¡Ni racalaʼdxeʼ nga chigucheecheʼ diidxaʼ!». Neca qué riene Jean diidxaʼ riníʼ ca binni de guidxi ra nuube que la? gunda gucanebe xcaadxi binni chuulaʼdxiʼ gunadiaga stiidxaʼ Dios. Ne biaʼ chupa chonna iza gucanebe lade ti neza binni ridagulisaa, peru para nga gúpabe xidé biziidibe sti diidxaʼ. Ne para chindabe ra ridagulisaacabe que la? rindaabe biaʼ ti hora para chebe ne biaʼ sti hora para guibiguétabe.
Cadi gusaanaluʼ de guiziidiluʼ
7. Ximodo bisihuinni Moisés guyuulaʼdxiʼ chuʼ jma gaxha de Jiobá neca maʼ bioʼxhoʼ.
7 Laga ziguiniisi binni la? jma ziguiziidiʼ (Job 12:12). Peru para guizíʼdinu de Jiobá la? cadi zacá diʼ ni. Nga runi, ca xpinni Dios ni ruzuubaʼ stiidxabe la? ruyúbicaʼ guiziidirucaʼ jma de laabe ne cadi cá íquecaʼ guiaananecaʼ ni biziidisicaʼ dxiqué (Proverbios 9:9). Casi Moisés la? maʼ 80 iza nápabe dxi gudxi Jiobá laabe cueebe xquidxi de Egipto (Éxodo 7:7). Ca dxi stibe que nagabaʼ si binni ridxiña biaʼ iza stibe que, ne nánnanu zacá ni pur cani guniʼbe riʼ: «Ca dxi biaʼ ridxiña ca iza stinu nga setenta; ne [...] pa naguídxinu la? ochenta iza» (Salmo 90:10). Peru, qué ñuu ora niníʼ Moisés maʼ bioʼxhoʼ para guiziidiʼ. Despué de stale iza de cayuni adorarbe Dios ne cayúnibe stale dxiiñaʼ ni bidii laabe la? gunábabe laa: «Biluíʼ laʼ naa ca neza stiluʼ, para gunebiaʼyaʼ lii» (Éxodo 33:13). Ora tiica si biyubi Moisés modo chuʼ jma gaxha de Jiobá.
8. Ximodo bihuinni qué nusaana Daniel de niziidiʼ neca maʼ napa jma de 90 iza, ne xi guleendú.
8 Lu Biblia rieeteʼ biindaʼ chaahuiʼ Daniel Stiidxaʼ Dios gatigá neca maʼ bioʼxhoʼ. Zándaca maʼ nápabe jma de 90 iza nga dxi biindabe ca libru ra zeeda Levítico, Isaías, Jeremías, Oseas ne Amós, ne ni biziidibe lúcani nga bicaa laabe guni orarbe Jiobá de guidubi ladxidoʼbe (Daniel 9:1, 2). Ne ora bicabi Jiobá Daniel la? gúdxibe laa padxí guedandá Mesías que ne laaca gudxi Jiobá laabe ximodo guni adorárcabe laa despué (Daniel 9:20-27).
9, 10. Xi huayuni caadxi xpinni Cristu para cadi gusaana de guiziidicaʼ.
9 Cadi gusaana de guizíʼdinu de Jiobá biaʼ dxi guibáninu laga zándaruʼ, cásica biʼniʼ Moisés ne Daniel. Ne ngapeʼ nga ni runi stale de ca bíʼchinu ne ca bizáʼnanu. Guzéʼtenu de Worth, ti binnigola ni rapa guiráʼ stiʼ ca binni ridagulisaa ni napa jma de 80 iza. Laabe rúnibe stipa para guiziidirube guiráʼ ni cusiene «mozo ni nuu xpiaaniʼ ne ni runi jneza» (Mateo 24:45). Sicaríʼ guniʼbe: «Guizáʼ nga riuuladxeʼ gannaʼ xipeʼ nga na Stiidxaʼ Dios, ne riecheʼ ora guuyaʼ zeʼ dxi jma nayaʼniʼ ziyaca biaaniʼ stini» (Proverbios 4:18). Fred, sti binni huaniisi ni maʼ napa jma de sesenta iza de nuu Betel, na guizáʼ galán runi sentir ora guiniʼné binni de Biblia. Ne guníʼrube sicaríʼ: «Napaʼ xidé guietenalaʼdxeʼ ni rusiidiʼ Biblia guiráʼ dxi. Pa ti binni guiene ximodo racané Biblia laa lu xquendanabani ne guʼyaʼ ximodo racaneni laa para guiene guiráʼ ni zeeda luni la? cadi caguu si diidxaʼ ndaaniʼ ique. Coʼ, sínuque zuuyaʼ zeeda gaca cada tobi de cani rusiidiʼ Biblia casi caadxi guié chaʼhuiʼ ni raca ti bigáʼ guizáʼ sicarú ora uquiidiluʼ laacaʼ» (2 Timoteo 1:13).
10 Cadi purtiʼ si maʼ bioʼxhoʼ binni nga guiníʼ qué zanda guiziidiʼ ne guiene xiixa ni nagana. Nuu binni ni napa 60, 70 dede 80 iza deruʼ biziidicaʼ gúʼndacaʼ ne gucaacaʼ. Xcaadxi de laacabe maʼ biziidiʼ sti diidxaʼ, casi huayuni caadxi testigu stiʼ Jiobá para ganda gucheechecaʼ diidxaʼ ra nuu xcaadxi binni ni zeeda de sti guidxi (Marcos 13:10). Casi ejemplu stiʼ Harry ne xheelaʼ, laacabe nápacabe biaʼ 70 iza dxi gudixhe íquecabe gacanécabe ca binni riníʼ portugués. Sicaríʼ guníʼ Harry: «Dxandíʼ, ora maʼ bioʼxhoʼ binni maʼ raca nagana para laa guni intiica dxiiñaʼ». Neca zacá ni la? guirópacabe bizulú biindanécabe binni lu diidxaʼ portugués purtiʼ bíʼnicabe stale stipa ne qué nireecabe gana. Ne Harry maʼ napa stale iza de cudii libana lu diidxaʼ portugués ora raca guendaridagulisaa de chonna gubidxa.
11. Xiñee cuzéʼtenu cani huayuni caadxi binni huaniisi.
11 Dxandíʼ nga cadi guirádicabe zanda gúnicabe zacá, purtiʼ gadxé gadxé modo nuucabe ne zándaca nuu de laacabe maʼ huará. Yanna, xiñee caninu de ni huayuni xcaadxi binni huaniisi yaʼ. Cadi para guininu naquiiñeʼ guni guirácabe casi cayuni xcaadxi. Ni cayábidu laacabe nga ni gudxi apóstol Pablu ca xpinni Cristu ni riníʼ diidxaʼ griegu, ora bizeeteʼ de ca binnigola ni rapa stiʼ ca binni ridagulisaa dxiqué: «Laguuya modo biree ndu xhiiña cabe, ne laguni cre Dios casi bini cre cabe» (Hebreos 13:7). Ora ridúʼyanu pabiáʼ riuulaʼdxiʼ ca binni huaniisi ca gúnicaʼ xhiiñaʼ Jiobá la? rucaacabe laanu gápanu fe ni rucaa laacabe gúnicabe ni nabe. Harry, binni huaniisi ni maca bizéʼtenu que la? yanna maʼ napa 87 iza ne laa caníʼ xi rucaa laa guni ni na Jiobá: «Ñuuladxeʼ niquiiñeʼ xcaadxi iza ni guibaneʼ ca para guneʼ ni na Jiobá dede biaʼ gándatiʼ». Fred, ni maca bizéʼtenu que nabé nayecheʼ nuu pur cayuni dxiiñaʼ Betel. Sicaríʼ na Fred zanda gúninu: «Naquiiñeʼ guyúbinu ximodo zanda gúninu xhiiñaʼ Jiobá jma galán ne cadi gusaana de gúninu ni neca tiidinu lu stale guendanagana».
Qué rusaanacabe Jiobá neca cuchaa modo nabánicabe
12, 13. Xi biʼniʼ Barzilai ni bisihuinni bíʼnibe xhiiñaʼ Jiobá neca maʼ bióʼxhobe.
12 Nagana nga raca para ca binnigola ca guiaacaʼ guibánicaʼ ne ca yuubaʼ stiʼ guendayooxhoʼ ca. Peru neca zacá ni la? zanda gúnicabe xhiiñaʼ Jiobá. Cásica biʼniʼ Barzilai, ti galaadita ni bibani dxiqué. Dxi nápabe 80 iza la? guizáʼ sicarú modo bidxaagalube David ne ca soldadu stiʼ, bidiibe ni gocaʼ ne ra guiaanacaʼ, bíʼnibe ni dxi bicaalú Absalón David. Dxi maʼ cheʼ David Jerusalén la? yené Barzilai laabe ne ca xpínnibe dede ruaa guiiguʼ Jordán, raqué nga gudxi rey que laabe zanda chuʼbe lade ca xpinni. Óraque bicábibe David: «Maʼ ochenta iza naa yanna riʼ. [...] Ñee raʼbuʼ zándaruʼ go esclavu stiluʼ ne gueʼ nanixe la? o raʼbuʼ zándaruʼ gunadiaʼgaʼ ridxi stiʼ ca hombre ne ca gunaa ni ruundaʼ ca la? [...] Peru raríʼ nuu esclavu stiluʼ Kimham. Laabe tiidinebe lii guiiguʼ ca Señor rey, ne biʼniʼ laabe ni gacaláʼdxiluʼ» (2 Samuel 17:27-29; 19:31-40).
13 Neca maʼ cadi nadipaʼ Barzilai purtiʼ maʼ bioʼxhoʼ la? bíʼnibe biaʼ gunda para gucanebe rey ni gulí Jiobá que. Neca nánnabe maʼ qué robe nanixe casi dxi gúcabe nahuiiniʼ ne maʼ qué runadiaga chaahuibe la? qué ñuube triste pur ngue, sínuque gúdxibe rey que jma galán guicaa Kimham ni cudii laabe que, ne zaqué nga bisihuínnibe ximodo laabe. Yanna riʼ laaca nuu binni huaniisi ni riuulaʼdxiʼ gacané ne cadi pur racalaʼdxiʼ guicaa xiixa. Rúnicabe biaʼ ganda para guni adorárcabe Jiobá jneza, purtiʼ nánnacabe «nga nga ni riulaʼdxiʼ» Dios. ¡Guizáʼ naroʼbaʼ ndaayaʼ nga gápanu ca binni ni ruzuubaʼ stiidxaʼ Dios riʼ ládenu, njaʼ! (Hebreos 13:16.)
14. Xiñee jma risaca para laanu guníʼ David ni cá lu Salmo 37:23-25 dxi maʼ nagola.
14 Laaca nabé bichaa modo bibani David dxi maʼ zigola, peru gunna dxíchibe qué liica rusaana Jiobá de gapa ca binni ni ruzuubaʼ stiidxaʼ neca maʼ bióʼxhocaʼ. Dxi mayaca gati David la? bicaa ti canción ni cá lu Salmo 37. Bixuiʼlú laabe caníʼ íquebe, naazebe ti arpa ne cayuundabe ca diidxaʼ riʼ: «Jiobá nga racané ti hombre nadipaʼ para guzuhuaa dxiichiʼ, ne neza stibe riuulaʼdxiʼ Jiobá. Neca guiaba qué ziaana ra biaba, purtiʼ Jiobá naazeʼ nabe. Dxiqué nahuiineʼ, ne yanna maʼ biooxhuaʼ, peru qué huayuuyaʼ guirutiʼ ni runi ni jneza guiaana zacasi, ne nin qué huayuuyaʼ ca xiiñibe canayubi pan» (Salmo 37:23-25). Para Jiobá la? jneza ngue guníʼ David ca diidxaʼ riʼ dxi maʼ bioʼxhoʼ, ne pur nga jma risaca cani.
15. Xi ejemplu bidii apóstol Juan pur modo bizuubaʼ diidxaʼ neca gudiʼdiʼ lu guendanagana ne bioʼxhoʼ.
15 Apóstol Juan laaca sicarú ejemplu bidii purtiʼ bizuubaʼ diidxaʼ neca gudiʼdiʼ ra nagana ne bioʼxhoʼ. Dxi maʼ zinebe setenta iza de cayúnibe ni na Dios la? yenécabe laabe lu ti isla ni láʼ Patmos para guteguyoocabe laabe pur cusiidibe binni Stiidxaʼ Dios ne de Jesucristu (Apocalipsis 1:9). Peru bíʼnirube xhiiñaʼ Dios neca deguyoobe. Guiráʼ ni bicaabe ni zeeda lu Biblia, bicaabe cani ra mayaca gátibe. Laga nuube Patmos que nga biiyabe ca visión ni zeeda lu Apocalipsis, ne bicaa chaahuibe cani (Apocalipsis 1:1, 2). Despué la? nácabe bindaa ti emperador de Roma ni láʼ Nerva laabe. Ne lu iza 98, zándaca dxi maʼ nápabe biaʼ 90 ó 100 iza la? bicaabe ti Evangeliu ne guionnaʼ carta ni ziné labe.
Qué zusiaandaʼ Jiobá guiráʼ ni maʼ biʼniʼ huantárcabe
16. Ximodo zanda gusihuinni cani maʼ qué riníʼ cadi cusaanacaʼ de guni adorarcaʼ Jiobá.
16 Gadxé gadxé clase yuubaʼ nga rapa binni ne cadi biaʼ queca runinácani. Casi nuu caadxi de ca bíʼchinu ne bizáʼnanu la? maʼ qué randa riniʼcaʼ, peru cadi pur nga rusiaandacabe modo maʼ bisihuinni Dios nadxii laacabe ne nachaʼhuiʼ ne laacabe. Neca qué zanda guiníʼcabe la? de ndaaniʼ ladxidóʼcabe rábicabe Jiobá ca diidxaʼ riʼ: «¡Guizáʼ nadxiee ley stiluʼ! Guidubi dxi laani maʼ caníʼ iqueʼ» (Salmo 119:97). Ne Jiobá nanna tuu nga cani dxandíʼ nanna nuube ne maʼ gadxé modo ruuyabe laacaʼ lade guiráʼ binni ni qué rizaalaʼdxiʼ chinanda ca ley stibe (Malaquías 3:16; Salmo 10:4). ¡Nabé ratadxí ladxidoʼno nga gánnanu ruuyaʼ Jiobá ne riuulaʼdxiʼ ni nuu ndaaniʼ ladxidoʼno! (1 Crónicas 28:9; Salmo 19:14.)
17. Xi ndaayaʼ napa ca binni ni cayúnicaʼ ni na Dios dede maʼ xadxí.
17 Ne cadi guiaandaʼ ndiʼ laanu, ca binni ni maʼ xadxí de cayúnicaʼ ni na Jiobá nga cani cacaa ti ndaayaʼ nabé risaca ni qué zanda guidxélacaʼ sti ladu: qué liica zusiaandaʼ Jiobá guiráʼ ni maʼ biʼniʼ huantarcaʼ. Jesús guníʼ: «Pa qué ixhacalaʼdxi tu la? zalá tu» (Lucas 21:19). Zacaatu guendanabani ni qué zaluxe ca pa qué gusaana de guni huantartu. Cani huayuni ni na Dios ne ruzuubacaʼ stiidxabe guiráʼ ora la? cabézacaʼ guicaacaʼ ni maʼ guníʼ Dios gudii laacaʼ (Hebreos 10:36).
18. 1) Xi riuulaʼdxiʼ Jiobá de ca binni ni maʼ nagola ca. 2) Xi chiguidúʼyanu lu sti tema ca.
18 Jiobá nabé rusisaca ni cayuni cani huaniisi ca de guidubi xhiálmacaʼ, neca stáleni o huaxieʼni. Stiidxaʼ Dios na: «Neca ze dxi ziyaana xcuerpu du sin stipa, peru espíritu stidu jma rusi ziyapa stipa» (2 Corintios 4:16). Nanna dxíchidu rusisaca Jiobá cani bíʼnitu dxiqué, peru laaca rihuinni rusisácabe ni rúnitu yanna para gusisácatu labe (Hebreos 6:10). Lu sti tema ca zadúʼyanu pabiáʼ racané ejemplu stitu cani nahuiiniʼ.
Xi nicábiluʼ
• Xi ejemplu bisaana Ana para ca binnigola ni nuu yanna.
• Xiñee cadi galán diʼ guininu maʼ qué zanda guni tuuxa xcaadxi cosa purtiʼ si maʼ bioʼxhoʼ.
• Ximodo zanda gusihuinni ca binni huaniisi ca cadi cusaanacaʼ de guni adorarcaʼ Jiobá.
• Ximodo ruuyaʼ Jiobá ni cayuni ca binni huaniisi ca para gusisácacaʼ laabe.
[Dibuju/foto ni zeeda lu yaza 23]
Dxi maʼ bioʼxhoʼ Daniel biindaʼ cani cá lu caadxi libru para gunna pabiáʼ zandaa ca binni de Judá para guibiguétacaʼ xquídxicaʼ
[Ca dibuju/foto ni zeeda lu yaza 25]
Stale binni huaniisi guizáʼ sicarú ejemplu sticaʼ purtiʼ qué riaadxacaʼ lu ca guendaridagulisaa ca, rucheechecaʼ diidxaʼ ne stale gana ne racaláʼdxirucaʼ guiziidicaʼ