Ximodo guibáninu pa zeʼ dxi cuchaa modo riníʼ ique binni

TAPA gayuaa iza despué de bibani Jesús lu Guidxilayú, bibani ti filósofo láʼ Diógenes ndaaniʼ guidxi Atenas. Hombre riʼ guzané ti linterna neca ridxí, purtiʼ gucalaʼdxiʼ nidxela ti hombre ni runi ni jneza.

Nanna pa dxandíʼ historia ca yaʼ, peru ni nánnanu nga pa nibani Diógenes yanna, jmaruʼ si qué nusaana de nuyúbibe ti hombre ni runi ni jneza. Yanna riʼ, stale binni qué riuuláʼdxicaʼ chuʼ tu gabi laacaʼ modo naquiiñeʼ guibánicaʼ. Lu periódicu, lu tele ne lu radiu cayeeteʼ maʼ qué runi binni ni jneza yanna riʼ ne rihuinni ni lu política, ndaaniʼ lidxi binni, ra runi binni dxiiñaʼ, lu ca negocio ca, cani riguite xiixa rúnicaʼ trampa para guni ganarcaʼ ne nuuruʼ xcaadxi modo rusihuinni binni maʼ qué runi ni jneza. Ca binni ni bibani dxiqué yenándacaʼ stale conseju ni maca nexheʼ para guibánicaʼ galán, peru yanna stale binni maʼ qué rinándacaʼ cani. Stale binni maʼ qué riná chinanda ca conseju ni maca nexheʼ. Ne neca nuu conseju ni riuulaʼdxiʼ stale binni purtiʼ jneza cani, peru nuu tu qué riná guni cani.

Alan Wolfe, ti hombre ni nanna stale de sociología religiosa guníʼ: «Guiráʼ ni jneza biʼniʼ binni dxiqué, yanna riʼ stale binni maʼ qué runi cani». Ne laaca guniʼbe: «Ca dxi stinu riʼ stale binni riníʼ ique maʼ cadi naquiiñeʼ chinándacaʼ ni biziidicaʼ dxi nahuiinicaʼ ne qué rinacaʼ chinándacaʼ modo riguixhe gobiernu guibani binni». Ti periódicu láʼ Los Angeles Times bizeeteʼ ni guníʼ ti filósofo ni láʼ Jonathan Glover. Laabe nabe lu siglu XX stale binni maʼ qué ñúnicaʼ ni biziidicaʼ ndaaniʼ religión sticaʼ ne guiráʼ binni maʼ qué ñuni ni jneza, nga runi guyuu stale guendaridinde lu Guidxilayú riʼ.

Neca nuu stale binni maʼ qué ganna xipeʼ conseju zanda chinanda, nuuruʼ stale cuyubi modo guibani galán. Raca chupa chonna iza guníʼ Federico Mayor, ti hombre ni guca director stiʼ UNESCO. Laabe guniʼbe sicaríʼ: «Ni jma caquiiñeʼ guizaalaʼdxiʼ binni yanna nga guni ni jneza lu xquendanabani». Peru neca qué naʼ binni guni ni na ca conseju ni maca nexheʼ para guibani galán la? qué rusihuinni diʼ nga qué zanda guidxélanu conseju ni zanda gacané laanu lu xquendanabáninu.

Yanna, ñee zanda guidaaguʼ binni tobi si ne guiniʼcaʼ xi conseju zanda chinándacaʼ lu xquendanabánicaʼ la? Nanna dxíchinu qué zanda gaca nga. Pa cadi ngueca riníʼ ique binni, ximodo zanda gánnacaʼ xii nga ni jneza ne ni cadi jneza yaʼ. Nécapeʼ nagasi jma maʼ rihuinni binni ni na cadi guiráʼ diʼ cosa malu nga malu ne cadi guiráʼ diʼ ni jneza nga jneza, rihuinni dxíchica qué racané diʼ modo riníʼ íquecabe ca laacabe gúnicabe ni jneza.

Paul Johnson, ti hombre de Gran Bretaña ni bicaa historia guníʼ: cumu riníʼ ique binni cadi guiráʼ diʼ cosa malu nga malu ne cadi guiráʼ diʼ ni jneza nga jneza la? nga runi «maʼ qué rucaa íquecabe gúnicabe ni jneza cásica biʼniʼ binni ni dxiqué, ne stale tu laa maʼ qué riná chinanda ca conseju ni yenanda binni ante guzulú siglu XX que ne neca jneza cani peru laacaʼ rúnicaʼ ni racaláʼdxisicaʼ».

Yanna, ñee zanda guidxela binni xiixa conseju ne ley ni dxandíʼ zacané laa, ne gacané guiráʼ binni guidxilayú la? Ñee nuu tuuxa ni dxandipeʼ zanda gudii laanu xiixa conseju ni zanda gacané laanu lu xquendanabáninu la? Lu sti tema ca zadúʼndanu ca guendarinabadiidxaʼ riʼ.