Ca conseju ni ruluíʼ laanu modo guibáninu galán
GUIRÁʼ binni riguixhe modo guibani. Ñee cadi dxandíʼ rusisácanu ti binni ne riuuláʼdxinu guidxaaganu laa ora qué ribaʼnaʼ, nachaʼhuiʼ, nadóʼ ne riuulaʼdxiʼ gacané binni la?
Tuu nga naquiiñeʼ quixhe modo guibani binni
Lu primé siglu, ti hombre láʼ Saulo bibani lade chonna clase binni: ca judíu, ca griegu ne ca romanu ne gadxé gadxé costumbre gúpacabe. Bidiibe cuenta nagana chinanda binni ca conseju ne ca ley stiʼ ca binni que, peru laaca biiyabe nuu sti cosa ni ralené binni ni rucaa laa quixhe modo guibani ne laani nga guendabiaaniʼ. Dxi beeda gácabe apóstol Pablu, bicaabe: «Laguuya cani cadi judíu. Qué gapa di cabe libru sti ley, peru pa guni cabe jneza casi na ley la? ngue ma de laasi cabe napa cabe ley neca iruti nudii ni laacabe. Zacá rihuinni ma napa cabe ley ndaani ladxidóʼ cabe. Stubi stubi cabe ranna cabe uná nga jneza ne uná nga ni cadi jneza» (Romanos 2:14, 15).
Peru, ñee caquiiñeʼ chuʼ tu gabi laanu xii nga ni jneza ne ni cadi jneza la? o «laasi[nu]» zanda gúʼyanu ni. Zándaca maʼ huadiiluʼ cuenta, biaʼ dxi huabani binni lu Guidxilayú riʼ, nin ti binni o grupu de binni qué huayanda guibani galán. Nga runi, stale binni na para ganda guibáninu galán la? caquiiñeʼ chuʼ tuuxa ni jma nanna para quixhe xiixa ley ni gacané laanu. Stale tu riníʼ Dios si ni bizáʼ binni guidxilayú nga zanda gabi laanu gunáʼ nga ca conseju ni cadi naquiiñeʼ gusaana de gúninu. Lu libru stiʼ doctor Carl Jung ni láʼ Presente y futuro bicaabe: «Pa ti binni cadi nuu gaxha de Dios la? qué zanda diʼ gucaanaʼ cani uquiinde binni guidxilayú laa guni».
Zacaca guníʼ ti ni riguixhená ni bibani dxiqué, laabe bicaabe: «Nannaʼ dxicheʼ Jiobá, binni guidxilayú cadi lu náʼ diʼ nuu neza stiʼ. Cadi lu náʼ diʼ binni nuu guni mandar ra guzuhuaa ñee» (Jeremías 10:23). Dios ni bizáʼ guiráʼ xixé ni nuu cayabi laanu: «Naa, Jiobá, nacaʼ Dios stiluʼ, Ni cusiidiʼ lii para cueenduluʼ ni galán para lii, Ni cayabi lii pa ladu saluʼ» (Isaías 48:17).
Ni zanda gusiidiʼ laanu gúninu ni jneza
Ca diidxaʼ ni bidúʼndanu ca zeeda cani ndaaniʼ ti libru ni nabé runibiáʼ stale binni ne ni zanda gusiidiʼ laanu gúninu ni jneza: Stiidxaʼ Dios. Millón de binni ni nabani lu Guidxilayú huayuundacaʼ Biblia. Lade ca binni riʼ nuu tu qué gapa nin ti religión ne nuu xcaadxi cadi zinándacaʼ Cristu peru ruundacaʼ Biblia para guiziidicaʼ guibánicaʼ jma galán. Guidúʼyanu ni bicaa poeta alemán Johann Wolfgang von Goethe: «Nabé gunnaxhiee ne bisisacaʼ [Biblia], purtiʼ pur laani biziideʼ guneʼ ni jneza lu xquendanabaneʼ». Ne laaca rieeteʼ de Gandhi, ti xaíque hindú ni runibiáʼ stale binni laa, guníʼ de cani bisiidiʼ Jesús lu ti libana stiʼ. Nabe: «Laguiziidiʼ guiráʼ ni bieeteʼ lu Libana de lu Dani [...]. Purtiʼ guiráʼ ni bisiidibe lu libana que para guiranu cani, ne para cada tobi de laanu».
Apóstol Pablu, ni maca bizéʼtenu que, guníʼ pabiáʼ racané Stiidxaʼ Dios binni para guni ni jneza, laabe guniʼbe: «Irá Xquiʼchi Dios, Espíritu Santu uníʼ xi icá, ne nuu ni para usiidi ni laanu» (2 Timoteo 3:16). Ñee dxandíʼ ni na ca diidxaʼ riʼ la?
Yanna, xiñee qué gúʼyaluʼ pa dxandíʼ ni na ca diidxaʼ riʼ yaʼ. Biiyaʼ cani zeeda lu cuadru stiʼ sti yaza ca. Pa gúniluʼ cani la? nabé zacanécani lii. Guníʼ ique xi cusiidicani ne biiyaʼ ximodo zanda gacanécani lii guibániluʼ jma galán, ne ximodo cadi guninaluʼ binni ne ni gúniluʼ.
Ni zanda cueenduluʼ
Cani zeeda lu cuadru ca nga chupa chonna de ca conseju ni zeeda lu Stiidxaʼ Dios ni racané binni guni ni jneza. Lu Stiidxaʼ Dios laaca zeedaruʼ xcaadxi conseju ni caguixhená laanu para cadi guiníʼ íquenu ni cadi jneza, guininu xiixa diidxaʼ ni guniná binni o gúninu xiixa ni guniná xquendanabáninu (Proverbios 6:16-19).
Ca conseju ni zeeda lu Biblia ca nga cani caquiiñeʼ binni yanna, purtiʼ laacani cayabi cani laacaʼ ximodo zanda gúnicaʼ ni jneza. Cani guicaa ne guni cani la? ruchaacaʼ modo nabánicaʼ ne modo riníʼ íquecaʼ ne rúnicaʼ ni jneza (Efesios 4:23, 24). Ora riziidicabe ca conseju ni cá lu Biblia, ribeecabe de ndaaniʼ ladxidóʼcabe gacananaláʼdxicabe binni de sti raza, guiníʼ íquecabe mal de binni ne rannaxhiisaacabe laacaʼ (Hebreos 4:12). Ca conseju ni rusiidiʼ Biblia racané cani binni gusaana guendaridinde, intiica viciu napa ne gácacaʼ nachaʼhuiʼ.
Ca conseju ni zeeda lu Biblia maʼ huayacané cani millón de binni para cueecaʼ ndaaniʼ ladxidoʼcaʼ guiráʼ ni bíʼnicaʼ dxiqué ne ni maʼ binitilú xquendanabani stale binni (1 Corintios 6:9-11). Guiráʼ cani rusiidiʼ Biblia cadi huayacanésicani binni guchaa ca costumbre sticaʼ, sínuque laaca huayacanécani laacaʼ cueecaʼ ni nadxabaʼ nuu ndaaniʼ ladxidoʼcaʼ, guchaacaʼ guiráʼ ni naguixhe íquecaʼ gúnicaʼ ne zacá guibaninecaʼ binnilídxicaʼ galán. Neca lu Guidxilayú riʼ stale binni cadi cayuni ni jneza, peru nuu tu cuchaa modo nabani. Ne nuuruʼ tu zuchaa modo nabani. Xiñee yaʼ. Purtiʼ Biblia na: «Guixi gaʼ maʼ bibidxi, ca guieʼ ca maʼ biguunducaʼ; peru ca diidxaʼ stiʼ Dios stinu, qué ziuu dxi guiaandaʼ cani» (Isaías 40:8).
Peru, zudiiluʼ lugar guchaa Stiidxaʼ Dios modo nabániluʼ la? Ca testigu stiʼ Jiobá ziéchecaʼ gacanecaʼ lii guiziidiluʼ ca conseju ni zeeda lu Biblia ne guicaaluʼ stale ndaayaʼ. Pa lii guibániluʼ casi modo na ca conseju stini la? Zaguu ndaayaʼ Dios lii yanna ne zacaaluʼ ti guendanabani ni qué zaluxe, ra guiráʼ xixé binni zuni ni na Biblia.
[Cuadro ne dibuju/foto ni zeeda lu yaza 6]
CA CONSEJU NI CADI NAQUIIÑEʼ GUSAANA DE CHINÁNDANU
Regla de Oro. «Irá ni racalaʼdxi tu guni binni laatu la? ngue ca laguni laacaʼ, purti zacá nga na ley ne nga ca bicaa ca profeta.» (Mateo 7:12.)
Gunnaxhii binni. «Gunaxhii stobi cásica nadxii lu lii.» (Mateo 22:39.) «Pa nadxii lu stobi la? qué zuchee neu laa. Ne ra ganaxhii tu binni ma cayuni tu irá xixé ni na ley.» (Romanos 13:10.)
Bisisaca ne biʼniʼ respetar binni. «Laganaxhii saa casi enda biʼchiʼ, cada tobi usisaca stobi ne cadi laca laa.» (Romanos 12:10.)
Cadi tíndeluʼ. «Laibani sin enda ridinde.» (Marcos 9:50.) «Laguni biaʼ ganda para cadi chuʼ dinde né tu irutiʼ. Zaa guni cabe ni laacabe peru cadi né rusi ca laatu.» (Romanos 12:18.) «Sa nanda nu ni guni laanu tobi si, ne ni acané iniisi cada tobi.» (Romanos 14:19.)
Bitiidilaʼdxiʼ donda stiʼ sti binni. «Bisiaanda ni ruchéʼ né du lii, casi rusiáʼnda du ni ruchee né cabe laadu.» (Mateo 6:12.) «Lagaca nachaʼhui ne stobi, ne lailaselaʼdxi saa. Laguni perdonar saa.» (Efesios 4:32.)
Cadi gucheeneluʼ xheelaluʼ. «Pa racaláʼdxiluʼ gannaxhiiluʼ la? gunnaxhii xheelaluʼ. ¡Gunnaxhii laasibe! ¡Cadi gannaxhiiluʼ stobi! [...] ¡Guisaca xheelaluʼ, ni guca xnóvialuʼ dxi nahuiiniluʼ! [...] Bidii lugar gannaxhiibe lii ne xhubinabe lii para cadi gusaana de chuʼluʼ nayecheʼ. [...] Cadi gudiiluʼ lugar chuʼ sti gunaa ndaaniʼ ladxidoʼloʼ ne cadi guyubuʼ ti gunaa maʼ bichaganáʼ canaʼ lii.» (Proverbios 5:15-20, Traducción en lenguaje actual.) «Ni guni jneza ne caadxi huiini la? laca zuni jneza ne stale. Ne ni qué guni jneza ne caadxi la? laca qué zuni jneza ne stale.» (Lucas 16:10.) «Ora ma biaana ti dxiiña ladxi ná tuuxa la? naquiiñe guni ni jneza ti qué uchee né xpixuaanaʼ.» (1 Corintios 4:2.)
Cadi cuánaluʼ. «Ñee zanda chuʼ xquendanabaneʼ nayá pa napaʼ ti balanza ni qué riguubiáʼ jneza o pa napaʼ pesa de guié ni qué guizáʼ ndaaniʼ bolsa stinneʼ la?» (Miqueas 6:11.) «Nanna du nayá ladxidóʼ do nezalú be, ne ni racalaʼdxi du nga irá ni guni du, guni du jneza.» (Hebreos 13:18.)
Cadi gusiguiiluʼ ne biʼniʼ ni jneza. «Lagaca nanalaʼdxiʼ ni malu, ne lagannaxhii ni nachaʼhuiʼ, lagudii lugar chuʼ guendaruni jneza ra puertaʼ xquídxitu». (Amós 5:15.) «Laguiníʼ ni dxandíʼ ládetu. Ora guni juzgartu laguiníʼ ni dxandíʼ ne lagacané binni gapa guendariuudxi.» (Zacarías 8:16.) «Lausaana de usiguii tu, ne ora güi tu diidxa lainíʼ ni dxandíʼ, purti irá nu ma naca né nu Cristu tobi si.» (Efesios 4:25.)
Biʼniʼ dxiiñaʼ ne stale gana. «Huayuuyaluʼ ti hombre ni nanna guni xhiiñaʼ jneza la? Nezalú rey nga zuzuhuaabe.» (Proverbios 22:29.) «Cadi ichaaba tu ne cadi aca tu nayanda.» (Romanos 12:11.) «Irá ni guni tu la? laguni ni de idubi ladxidó to, casi ñaca xhiiña Señor cayuni tu, cadi xhiiña binni.» (Colosenses 3:23.)
Guca nadóʼ, biá binni ne guca nachaʼhuiʼ. «Nadxii Dios laatu ne ulí laatu para laa. Nga runi laguiá binni ne lagaca nachaʼhui ne laacaʼ. Cadi udxiiba tu laca laatu, lagaca nadóʼ, cadi idxiichi tu neca uyubi cabe uchiichi cabe laatu.» (Colosenses 3:12.)
Biʼniʼ stipa guʼnuʼ ni jneza ne bicaanáʼ ni nadxabaʼ. «Laganaxhii cani nanalaʼdxi laatu, ne lainíʼ né Dios pur cani riguu dí laatu.» (Mateo 5:44.) «Cadi udiiu lugar cuaqui dxí ni nadxaba lii, sínuque gudixhe dxí ni nadxaba pur ni nachaʼhuiʼ.» (Romanos 12:21.)
Bidii Dios ni jma galán. «Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ. Nga nga primé mandamientu ne ni jma risaca.» (Mateo 22:37, 38.)
[Ca dibuju/foto ni zeeda lu yaza 7]
Ca conseju ni cá lu Biblia racanécani binni guibaniné binnilidxi nayecheʼ ne chuʼcaʼ galán ne ca binni ni guidxaagacaʼ