¡Zanda gúniluʼ ni jneza!: Ni ná Biblia nga ni jma jneza gúninu

Pa gúninu ni ná conciencia stinu ora guicaanu xiixa decisión o guicaanu ni pur modo riníʼ ique xcaadxi, qué zanda chuʼnu seguru pa jneza zieni laanu pur decisión ni gucuaanu ca. Biblia rabi laanu xiñee risaca ni bizéʼtenu riʼ ne rusiidini laanu ximodo zanda guibáninu nayecheʼ. Ne zudiiluʼ cuenta ni ná Biblia nga ni jma jneza gúninu.

CAQUÍʼÑENU GABI DIOS LAANU XI GÚNINU

Lu Biblia, rusiidiʼ Jehováa Dios laanu caquíʼñenu de laa: purtiʼ stúbinu que zanda (Jeremías 10:23). Nga runi bidiibe laanu Biblia ni zanda gacané laanu guicaanu decisión risaca lu xquendanabáninu. Guizáʼ nadxiibe laanu ne qué racaláʼdxibe guicaanu xiixa decisión ni guniná laanu ne pur laani gápanu guendanagana lu xquendanabáninu (Deuteronomio 5:29; 1 Juan 4:8). Dios nga ni bizáʼ laanu laabe nga ni jma nuu xpiaanibe ne runibiáʼ chaahuibe laanu ne zanda gudiibe laanu conseju ni jma zacané laanu (Salmo 100:3; 104:24). Neca laabe nga bizaʼbe laanu, peru qué rucaabe laanu guibáninu modo ná ca ley stibe.

Bidii Jehová Adán ne Eva, primé hombre ne primé gunaa ni bizaʼbe que guiráʼ ni caquiiñecaʼ para guibánicaʼ nayecheʼ (Génesis 1:28, 29; 2:8, 15). Ne bidiibe laacaʼ caadxi instrucción ni cadi nagana ne gulézabe ninándacaʼ ni, peru bidiibe lugar laacaʼ cuicaʼ pa zúnicaʼ ni (Génesis 2:9, 16, 17). Triste guininu ni peru Adán ne Eva gulicaʼ gúnicaʼ ni nacaʼ ne cadi ni ná Jehová (Génesis 3:6). ¿Ximodo huayeni laanu dede dxi maʼ riguíxhenu xii nga ni jneza para laanu yaʼ? ¿Huayeni laanu galán la? Coʼ. Dede dxiqué hasta tiempu riʼ maʼ bihuinni ora qué rinanda binni ca ley stiʼ Dios qué rápacaʼ paz ne qué ribánicaʼ nayecheʼ (Eclesiastés 8:9).

Racané Biblia laanu gánnanu xii nga ni jneza gúninu, gastiʼ naca paraa nabézanu o padé laanu (2 Timoteo 3:16, 17; biiyaʼ cuadru ni láʼ «Ti libru para guiráʼ binni»). Guidúʼyanu ximodo riquiiñeʼ Dios Biblia para gabi laanu xi gúninu.

Biiyaʼ xiñee biaʼsi nga rininu naca Biblia Stiidxaʼ Dios (1 Tesalonicenses 2:13). Guyé lu jw.org ne biiyaʼ videu ni láʼ Tu guníʼ xi guicá lu Biblia.

XIÑEE NUU BINNI QUÉ RINÁ CHINANDA NI NÁ BIBLIA

Nuu binni riníʼ qué zanda gacané Biblia laanu guibáninu jneza ca dxi riʼ. Guidúʼyanu ni riníʼ ique chupa chonna binni:

Ni riníʼ binni: «Gadxé gadxé ni riníʼ Biblia».

Ni dxandíʼ: Ora caʼruʼ guundaʼ chaahuiʼ binni ni la? ruluíʼ gadxé gadxé ni riníʼ ca relatu stini. Peru, pa guidúʼyanu xi cazaaca tiempu gucuani, costumbre stiʼ binni, ni riníʼ ique ca hombre ni bicaani ne xcaadxi cosa la? zadúʼyanu tobi si ni caníʼ guiráʼ ni.

Pa racaláʼdxiluʼ gúʼyaluʼ caadxi ejemplu la? guyé lu jw.org ne biindaʼ artículo ni láʼ «¿Ñee gadxé gadxé ni rusiidiʼ Biblia la?».

Ni riníʼ binni: «Stale binni ni runi cré ni ná Biblia laaca rúnicaʼ cosa ni cadi jneza. Yanna, ximodo nga guininu nácani ti libru ni racané binni guibani jneza yaʼ».

Ni dxandíʼ: Qué gapa diʼ Biblia donda pur ca cosa malu ni runi ca binni ni qué naʼ chinanda ca conseju stiʼ. Purtiʼ Biblia peʼ rabi laanu ziuu stale binni —casi ca líder stiʼ ca religión— qué zúnicaʼ ni caziidicaʼ. Ne laaca ruzeeteʼ ni pur laacabe «zaníʼ binni mal de neza stiʼ Dios» (2 Pedro 2:1, 2).

Pa racaláʼdxiluʼ gúʼyaluʼ chupa chonna ejemplu ni rusihuinni ximodo maʼ cadi cusiidiʼ ca líder stiʼ ca religión ca ni ná Biblia la? guyuu lu jw.org ne biindaʼ artículo ni láʼ «¿Ñee maʼ negocio religión la?».

Ni riníʼ binni: «Rucaa Biblia laanu cadi guni respetarnu binni ni runi cré stiʼ cosa».

Ni dxandíʼ: Rusiidiʼ Biblia laanu guni respetarnu xcaadxi binni. Ne rabini laanu cadi gúninu ca cosa riʼ:

Guiníʼ íquenu jma risácanu que xcaadxi binni (Filipenses 2:3).
Gusaana de guni respetarnu binni pur ni runi cré o pur ni bisiidicabe laa (1 Pedro 2:17).
Gucaʼnu xcaadxi binni guiníʼ íquecaʼ cásica riníʼ íquenu (Mateo 10:14).

Rabi Biblia laanu nabé nachaʼhuiʼ Dios né binni ne ribézabe gácanu cásica laabe (Romanos 9:14).

Pa racaláʼdxiluʼ gánnaluʼ jma la? guyé lu jw.org ne biindaʼ artículo ni láʼ «¿Ñee racané Biblia laanu gácanu binni ni runi respetar ni runi cré xcaadxi la?».

RIQUIIÑEʼ DIOS BIBLIA PARA GABI LAANU XI GÚNINU

Rabi Biblia laanu xi huayuni Dios pur binni guidxilayú. Ora guidúʼndanu Biblia zadúʼyanu xii nga ni jneza ne ni cadi jneza para Dios, ni caninu raríʼ nga ni nánnabe zacané laanu o zuniná laanu (Salmo 19:7, 11). Zacá nga zadxélanu caadxi conseju ni zacané laanu guibáninu jneza ne qué ruchaa ca ni ra zidiʼdiʼ dxi ne laacani nga zabi ca ni laanu ximodo guibáninu cada dxi.

Guidúʼyanu tobi de ca conseju riʼ, laani nga ni ridxélanu lu Proverbios 13:20: «Tu canazané binni nuu xpiaaniʼ la? zaca binni nuu xpiaaniʼ, peru tu ridxaaga binni huati la? qué zié ni laa jneza». Cásica gucané conseju riʼ binni dxiqué zacaca cayacané ni stale binni yanna ne laani nga tobi si de ca conseju ni zeeda lu Biblia (biiyaʼ cuadru ni láʼ «Qué ruchee ca conseju ni rudii Biblia laanu»).

Zándaca guiníʼ íqueluʼ: «¿Ximodo nannaʼ dxandíʼ zacané ca conseju stiʼ Biblia ca naa ca dxi riʼ yaʼ?». Lu sti artículo ca zadúʼyanu ximodo huayacaneni binni ca dxi riʼ.

a Jehová nga lá Dios (Salmo 83:18).

QUÉ RUCHEE CA CONSEJU NI RUDII BIBLIA LAANU

Neca maʼ napa chupa mil iza de gucuá Biblia, peru zanda gacaneruʼ ni laanu tiempu riʼ. Qué huachaa binni guidxilayú. Guiranu riuuláʼdxinu guibáninu nayecheʼ ne guni sentirnu gastiʼ cadi cayaadxaʼ laanu (Eclesiastés 1:9). Ne ca conseju sicarú ni rudii Biblia, qué ridiʼdiʼ cani de moda, zanda gacanécani laanu.

Gácanu honradu

«Racaláʼdxidu gácadu honradu lu guiráʼ cosa» (Hebreos 13:18).
«Ni ribaʼnaʼ la? maʼ cadi cuanaʼ, sínuque iquiiñeʼ náʼ para guni dxiiñaʼ jneza» (Efesios 4:28).

Gaca llevarnu binni

«Cada tobi guyubi modo gacané stobi ne cadi guyubi para laasi» (1 Corintios 10:24).
«Laguni huantarsaa ne laguni perdonar de guidubi ladxidoʼto ni guni stobi laatu» (Colosenses 3:13).

Ximodo guicaanu decisión jneza

«Ni nahuati runi cré intiica ni gábicabe laa, peru ti binni nuu xpiaaniʼ la? riníʼ ique ante guni xiixa» (Proverbios 14:15).
«Binni nuu xpiaaniʼ la? rucaachilú ora guʼyaʼ zeeda xiixa guendanagana ni zuniná laa, peru ni cadi nuu xpiaaniʼ la? runi guiráʼ ni racalaʼdxiʼ ne racaná» (Proverbios 22:3).