¡Zanda gúniluʼ ni jneza!: Ti decisión ni nuu lu naluʼ
Pa guibáninu según guiráʼ ni maʼ bizíʼdinu lu xquendanabáninu la? zuchaa ni modo nabáninu. Nanna Jehová ni, nga runi racaláʼdxibe guibáninu modo nabe gúninu ni.
Racalaʼdxiʼ Jehová guibáninu nayecheʼ ne qué chuʼ ni guchiiñaʼ laanu.
«Naa, Jehová, naa nga Dios stiluʼ, ni cusiidiʼ lii para cheʼ ni lii galán, ni cayabi lii gunáʼ nga neza ra naquiiñeʼ saluʼ. ¡Pa lii dxandíʼ nucaadiaʼguʼ ca mandamientu stinneʼ! Óraque ñeeda gaca guendariuudxi stiluʼ casi peʼ ti guiiguʼ, ne guendaruni jneza stiluʼ casi ola nisadóʼ» (Isaías 48:17, 18).
Zanda guibani binni modo racalaʼdxiʼ. Peru cumu Jehová nga Dios ni bizáʼ laanu la? nánnabe xii nga ni jma galán para laanu. Pa guzúʼbanu stiidxaʼ Dios la? zieni laanu jneza lu guiráʼ ni gúninu. Guiráʼ decisión guicaanu zácacani jneza, zacané ca ni laanu guibáninu nayecheʼ ne gastiʼ ni zuchiiñaʼ laanu.
Qué rinabaʼ Jehová laanu xiixa ni qué zanda gúninu.
«Ca mandamientu cudieeʼ lii yannadxí cadi nagana ca ni para lii ne cadi nuucani zitu de lii» (Deuteronomio 30:11).
Para guibáninu modo ná ca conseju stiʼ Dios ti ganda chuʼnu nayá nezalube, caquiiñeʼ guchaʼnu modo riníʼ íquenu ne ni rúninu. Peru qué rinabaʼ diʼ Jehová laanu xiixa nabé nagana, purtiʼ cumu laabe nga Dios ni bizáʼ laanu la? laabe nga nánnabe xii nga ni zanda gúninu ne xii nga coʼ. Ora maʼ binibiáʼ chaahuinu laabe zadúʼyanu «cadi nagana ca mandamientu» stibe (1 Juan 5:3).
Cayabi Jehová laanu zacanebe ca ni racalaʼdxiʼ guibani modo ná ca ley stibe.
«Naa, Jehová Dios stiluʼ, naazeʼ dxiicheʼ naluʼ ladu derechu; naa nga cayabeʼ lii: “Cadi guidxíbiluʼ. Naa zacaniaʼ lii”» (Isaías 41:13).
Zanda guibáninu modo ná ca conseju stiʼ Dios ti gaca guendanabani stinu nayá nezalube, purtiʼ laapebe cayabibe laanu. Biquiiñebe Stiidxabe, Biblia, para gacanebe laanu, para cuʼbe gana laanu ne para gábibe laanu zaca chaahuiʼ modo nabáninu.
Stale binni ni nabani lu guidubi guidxilayú riʼ maʼ biiyacaʼ guizáʼ galán nabánicaʼ ra zinándacaʼ guiráʼ conseju stiʼ Dios ni zeeda lu Biblia. ¿Ñuuláʼdxiluʼ ñacané Biblia lii la? ¿Ñuuláʼdxiluʼ ñunibiaʼluʼ guiráʼ conseju stini la? Zanda guzululuʼ gúʼndaluʼ folletu ¡Zanda guibániluʼ nayecheʼ! Qué ridoo ni ne nuu ni lu jw.org. Neni chonna ndaa:
«¿Ximodo zanda gacané Biblia lii?».
«Esperanza ni rudii Biblia laanu».
«¿Ñee zanda guni crenu ni ná Biblia la?».
Ra jma guiziidiluʼ ni cá lu Stiidxaʼ Dios zacané ca ni lii gudiiluʼ cuenta caʼruʼ tidiʼ ca ni de moda ne «zanda gápanu confianza ca ni yanna ne para siempre» (Salmo 111:8). Pa chinándanu ca conseju ni zeeda lu Biblia ni cayabi laanu ximodo chuʼnu nayá nezalú Dios la? zabáninu nayecheʼ. Peru Dios qué rucaa laanu chinándanu ca ni (Deuteronomio 30:19, 20; Josué 24:15). Nácani ti decisión ni cada tobi naquiiñeʼ guicaa.