Xiñee naquiiñeʼ chinándanu ca conseju stiʼ Biblia
ÑEE maʼ qué riquiiñeʼ ca conseju ni rudii Biblia de ora ratané ti hombre ti gunaa ca dxi stinu riʼ la? O nabé rucueeza cani binni de guni stale cosa. Coʼ, cadi zacá diʼ nga laani. Ca binni ni rinanda ca conseju stiʼ Biblia racanécani laacaʼ para cadi...
▪ ... guicá xiixa guendahuará malu laacaʼ pur gutanecaʼ tuuxa
▪ ... gacaxiiñiʼ tuuxa gunaa neca qué racalaʼdxiʼ
▪ ... gápacaʼ yuubaʼ ni rapa binni ora ribiá xquendaxheelaʼ
▪ ... guchiiñaʼ xquendabiaanicaʼ laacaʼ
▪ ... gúʼyacaʼ laacaʼ casi tuuxa ni qué risaca
Jiobá Diosa nga bizáʼ laanu, ne pur nga racaláʼdxibe chuʼnu nayecheʼ né guiráʼ ni maʼ bidiibe laanu. Isaías 48:17 na rusiidiʼ Dios laanu para cueendunu ni galán. Nga runi, ca binni ni rinanda ca conseju stiʼ Biblia...
▪ ... riuulaʼdxiʼ Dios ni rúnicaʼ
▪ ... qué ruchiiñaʼ xquendabiaanicaʼ laacaʼ
▪ ... jma sicarú ribaninecaʼ xheelacaʼ
▪ ... riníʼ binni galán de laacaʼ
▪ ... risácacaʼ nezalú Dios
Yanna, pa cadi zinándanu ni ná ca ley stiʼ Dios ra cusiene ximodo naquiiñeʼ guibáninu yaʼ. Ñee zanda guchaʼnu modo nabáninu la? Ñee ziuu ora guchá Dios cani maʼ bíninu lunu la?
Guiníʼ íquenu de neza binni ridagulisaa ni guyuu lu primé siglu que. Neca guyuu chupa chonna de laacaʼ guyuunecaʼ ni cadi xheelacaʼ, gúpacaʼ jnadxiicaʼ ne gúcacaʼ muxeʼ, peru bichaacaʼ ne bitiidilaʼdxiʼ Dios stóndacaʼ (1 Corintios 6:9-11). Yanna riʼ, mil de binni maʼ huayuni zacá lu guidubi naca Guidxilayú. Ca binni riʼ maʼ gudixhe íquecaʼ chinándacaʼ ca conseju stiʼ Biblia ni caníʼ de ora ratané ti hombre ti gunaa lu xquendanabánicaʼ ne maʼ bisaanacaʼ modo bibánicaʼ dxiqué. Ne guiracaʼ maʼ huabeenducaʼ ni galán, dede né Sara, baʼdudxaapaʼ ni bizéʼtenu lu primé tema que.
«Gutadxí ladxiduáʼ oraqueca»
Sara bibani modo gupa gana ne qué niná ñuu tu nucueeza laa de ñuni ni racalaʼdxiʼ, peru despué bidii cuenta cadi dxandíʼ libre laa ne qué nibani nayecheʼ casi gucalaʼdxiʼ. Sara guníʼ: «Maʼ qué nuchiiñaʼ xquendanabiaaneʼ naa. Peru nabé bituiluáʼ ne bidxibeʼ pa málasi gueeda gaca xiiñeʼ o gueeda gapaʼ xiixa guendahuará. Qué ñuu dxi nusaanaʼ de ñuneʼ cré Dios, ne nannaʼ nabé binenaʼyaʼ ladxidoʼbe pur cani bineʼ. Bineʼ sentir nabiidiʼ nuaaʼ nezalú Dios, ne nabé bininá ni ladxiduáʼ».
Despué guca Sara nadxibalú para bichaa modo nabani. Biyúbibe gacané bixhózebe ne jñaabe laabe, laacaʼ nácacaʼ testigu stiʼ Jiobá. Ne biyúbibe ca Testigu ni naca binnigola lade ca binni ridagulisaa. Sicaríʼ guníʼ Sara: «Nabé bidxagayaaʼ modo bisihuinni bixhozeʼ ne jñaaʼ nadxiicaʼ naa, ne zaqueca binnigola, neca qué nuxuiʼluáʼ ñúnicabe zaqué. Né ni bíʼnicabe riʼ gutadxí ladxiduáʼ oraqueca».
Yanna riʼ, maʼ napa Sara chupa xiiñiʼ. Laabe guniʼbe: «Naapeʼ huayabeʼ laacabe ximodo bibaneʼ dxiqué. Racalaʼdxeʼ gánnacabe xi guiráʼ guendanagana gupaʼ pur qué ninandaʼ ca conseju ni zeeda lu Biblia ra caníʼ de ora ratané ti hombre ti gunaa ne gúʼyacabe racanécani binni chuʼ nazaaca, cadi chuʼ xi guchiiñaʼ xquendabiaaniʼ ne guibani nayecheʼ. Nanna dxiicheʼ qué racalaʼdxiʼ Dios gacananu, nga runi bisaananebe laanu ca ley stibe».
Guiranu zanda cueendunu ni galán ra chinándanu ca conseju stiʼ Dios ni rusihuinni nadxiibe laanu. Biblia na: «Jneza cani gudixhe Jiobá guni binni, rusiéchecani ladxidoʼcaʼ, ne nayá mandamientu stiʼ Jiobá, rusizaanini bizalú binni». Ne laaca cayábini laanu pa guni binni ni na Dios zacaa ti «premiu» (Salmo 19:8, 11).b
[Nota]
a Biblia na Jiobá nga láʼ Dios.
b Pa racaláʼdxiluʼ gánnaluʼ jma de ca conseju stiʼ Biblia ni zanda gacané lii la? zanda guiníʼneluʼ ca testigu stiʼ Jiobá ni nuu neza ralídxiluʼ. Laaca zanda gucaaluʼ ra rúnicabe dxiiñaʼ ni zeeda lu yaza 4 stiʼ revista riʼ para guinábaluʼ cheʼ tuuxa chiganna lii o lu Internet: www.watchtower.org/zpi.
[Ni caníʼ yaza 8]
Cani qué rinanda ca conseju ni zeeda lu Biblia rápacaʼ stale yuubaʼ
[Ni caníʼ yaza 9]
Cani rinanda ca conseju stiʼ Dios qué zuchiiñaʼ xquendabiaanicaʼ laacaʼ ne jma sicarú zabaninecaʼ xheelacaʼ