Ñee jneza nga gánnanu xiná Biblia la?

«Dxi napaʼ chii iza maʼ rireeniáʼ jma hombrehuiiniʼ. Primegá que rinaazesidu nadu ne rudiʼdu bixidu laadu, peru qué nindaa maʼ riganasaadu laadu. Dxi maʼ napaʼ 15 iza maʼ bizuluáʼ bineʼ dxiiñaʼ, ne ca hombre ni riuu raqué rábicaʼ naa pa zataniáʼ laacaʼ. Gucalaʼdxeʼ nusihuinneʼ qué raxha iqueʼ para guneʼ xiixa ne guneʼ intiica cosa ni runi ca xcompañeruaʼ. Ngue runi, biraruʼ ni bineniáʼ ca hombre que para gunda guluucaʼ naa ládecaʼ.» (SARA, AUSTRALIA)a

CADI dxandíʼ nidxagayaaluʼ pa ñábicabe lii biniisi Sara ndaaniʼ ti familia ni napa religión la? Neca biyubi bixhózebe ne jñaabe modo nusiidicaʼ laabe ca conseju ni zeeda lu Biblia para ñúnibe ni jneza, laga gadxé ni gucuá íquebe gúnibe.

Zándaca stale binni naʼ jneza ngue ni biʼniʼ Sara, purtiʼ riníʼ íquecaʼ maʼ qué liica zanda iquiiñeʼ ca conseju ni rudii Biblia de ora ratané ti hombre ti gunaa ca dxi stinu riʼ. Xcaadxi binni riníʼ ique zanda gapa religión stiʼ ne gatané tutiica gacalaʼdxiʼ.

Yanna, ñee jneza nga guyúbinu gánnanu xiná Biblia de ora ratané ti hombre ti gunaa ne chinándanu ca conseju ni rudiini la? Laca laani cusiéneni «Espíritu Santu uníʼ xi icá [luni], ne nuu ni para usiidi ni laanu ne para ulidxe ni laanu» (2 Timoteo 3:16). Nga runi, pa runi creluʼ Dios nga bizáʼ guiráʼ cosa ne laa nga guníʼ xi guicá lu Biblia la? naquiiñeʼ gánnaluʼ xiná ni.

Triste guininu ni, peru stale binni qué ganna chaahuiʼ xi rusiidiʼ Biblia de ora ratané ti hombre ti gunaa. Dede ca xaíque stiʼ ca religión ni nacaʼ rinándacaʼ ni na Biblia gadxé gadxé ni rusiidicaʼ de laani. Ne pur nga qué riuu ca religión ni jma napa binni ca tobi si.

Peru lugar de guni crenu ni gabi sti binni laanu, ñee cadi jma galán laapenu guyúbinu gánnanu de laani la? Lu sti tema ca zeeda chii cosa ni nabé rinabadiidxaʼ binni de ora ratané ti hombre ti gunaa. Ne laaca cusiéneni modo cacabi Biblia ca guendarinabadiidxaʼ ca. Lu guionna tema ni caníʼ de ora ratané ti hombre ti gunaa zieeteʼ xiñee nabé risaca ganna cada tobi de laanu xi naquiiñeʼ guni.

[Nota]