Ñee zazárunu «modo rusiidi Espíritu Santu» laanu la?
«Lasá modo rusiidi Espíritu Santu laatu, ne óraque ma qué zinanda tu ni na ique tu.» (GÁLATAS 5:16.)
1. Xi zanda guni tuuxa pa riníʼ ique zucheené espíritu santu.
PA RIDXÍBINU purtiʼ riníʼ íquenu zuchéʼnenu espíritu santu stiʼ Jiobá la? nuu ti cosa ni zanda gacané laanu. Xi laani yaʼ. Gúninu ni na apóstol Pablu riʼ: «Lasá modo rusiidi Espíritu Santu laatu, ne óraque ma qué zinanda tu ni na ique tu» (Gálatas 5:16). Pa chinándanu ni gusiene espíritu stiʼ Dios laanu la? qué zúninu cosa malu (Romanos 8:2-10).
2, 3. Xi zabeendunu pa qué gusaananu de sanu modo rusiidiʼ espíritu.
2 Ora canazanu «modo rusiidi espíritu santu» la? stipa stiʼ Dios rucaa laanu guzúʼbanu stiidxaʼ Jiobá. Rusihuínninu nápanu ca guenda stiʼ Dios ora nuunu ndaaniʼ lídxinu, ora maʼ canagucheechenu diidxaʼ, ora nuunu lade ca binni ridagulisaa ne ratiica chuunu. Zahuinni nápanu ca guenda ni rudii espíritu santu laanu pur modo rinínenu xheelanu, ca xiiñinu, ca bíʼchinu ne ca bizáʼnanu ne xcaadxi binni.
3 Cumu nabáninu modo na Dios la? racané nga laanu para cadi gucheʼnu (1 Pedro 4:1-6, NM). Ne pa gudiʼnu lugar gacané espíritu santu laanu para guibáninu modo na Dios la? qué ziuu dxi gucheʼnu dede qué gutiidilaʼdxiʼ Dios donda stinu. Peru, xiruʼ zabeendunu pa qué gusaananu de sanu modo rusiidiʼ espíritu laanu yaʼ.
Qué chuʼ dxi guixélenu de Dios ne de Cristu
4, 5. Xi zuni crenu de Jesús pa dxandíʼ canazanu modo na espíritu santu.
4 Cumu canazanu modo na espíritu la? zanda chuʼnu gaxha de Dios ne gaxha de Xiiñiʼ. Lu cani guníʼ Apóstol Pablu ora bicaa ti carta ra nuu ca xpinni Cristu de Corinto, cani nabé biʼniʼ adorar bidóʼ dxiqué la? bizeetebe xi runi binni ora napa espíritu santu, nabe: «Racaladxe usiene laatu ndiʼ: iruti zanda cuʼ dí Jesús pa cusiníʼ Espíritu sti Dios laa. Zaqueca iruti zanda iníʼ Jesús nga Señor pa cadi Espíritu Santu cusiníʼ laa» (1 Corintios 12:1-3). Intiica espíritu o sti cosa ni gucaa tuuxa guiníʼ mal de Jesús la? zeeda de Binidxabaʼ. Peru cumu laanu, ca xpinni Cristu, canazanu modo na espíritu santu la? runi crenu dxandíʼ bisibani Jiobá Jesús lade gueʼtuʼ ne bíʼnibe laa ti binni ni jma risaca guibáʼ ne lu guidubi naca Guidxilayú (Filipenses 2:5-11). Nápanu fe zalanu purtiʼ guti Cristu pur laanu ne nánnanu Jesús nga Señor ni gulí Dios para guni mandar laanu.
5 Lu primé siglu que guyuu caadxi binni ni guníʼ xpinni Cristu laacaʼ peru qué ñuni crecaʼ «dxandí beda aca Cristu binni guidxilayú» (2 Juan 7-11). Guyuu tu biʼniʼ cré ni bisiidicabe que, ne pur ngue maʼ qué ninacaʼ ñánnacaʼ ni dxandíʼ de Jesús, Mesías que (Marcos 1:9-11; Juan 1:1, 14). Pa canazanu modo rusiidiʼ espíritu santu la? qué ziuu dxi gúninu ni biʼniʼ ca binni ca. Ne pa guyúbinu gánnanu xipeʼ nga rusiidiʼ Stiidxaʼ Dios la? Jiobá qué zusaana de gaca nachaʼhuiʼ ne laanu ne qué zusaananu «ni dxandíʼ» ca (3 Juan 3, 4). Nga runi, qué riquiiñeʼ diʼ gucaadiáganu ni guiníʼ tuuxa ni cusiidiʼ gadxé de ni na Stiidxaʼ Dios, ti ganda chuʼnu jma gaxha de Bixhózenu ni nuu guibáʼ.
6. Xi guiráʼ runi binni ora nabani casi na espíritu stiʼ Dios.
6 Pablu guníʼ lade ca binni ni runi ni na ique nga nuu cani runi adorar bidóʼ ne cani riuulaʼdxiʼ chinanda ti grupu ni maʼ bixeleʼ de cani dxandíʼ xpinni Cristu, ne laaca lade ca binni ca zeeda cani «riuu né ni cadi xheelaʼ, [ne cani] ricá ique ni nadxabaʼ». Peru guniʼbe: «Ora ma xpinni Cristu laanu la? ma qué rinanda nu irá ni uyulaʼdxi nu chiqué, purti ma guti irá nga para laanu, ma cadi nabani nu modo na ique nu. Yáquexa ma napa nu enda nabani ni rudii Espíritu Santu la? chi nanda nu Espíritu que» (Gálatas 5:19-21, 24, 25). Xi guiráʼ runi binni ora nabani casi na espíritu stiʼ Dios ne ora rudii lugar gábini laa xi naquiiñeʼ guni yaʼ. Apóstol Pablu guníʼ: «Peru cani zinanda ni na Espíritu Santu la? nadxii binni ne nayeche nuu, ne nuu dxí ladxidóʼ. Qué rixhacalaʼdxi stobi, ne qué runiná binni, ne nachaʼhuiʼ. Qué zaree chu de neza sti Dios, ne nadóʼ, ne rapa xpiaʼ» (Gálatas 5:22, 23). Yanna chigusiénenu cani bizeeteʼ Pablu ca tobi pur tobi.
Gannaxhiisaanu
7. Ximodo rusihuínninu dxandíʼ nadxiinu sti binni.
7 Espíritu ca racané binni gannaxhii, ne rihuinni nadxii binni tuuxa ora rizaalaʼdxiʼ gacané de guidubi ladxidóʼ. Stiidxaʼ Dios cayabi laanu: «De Dios nga reeda enda ranaxhii», ne zacá ni purtiʼ laabe nga jma rusihuínnibe ni. Ra bihuinni pabiáʼ nadxii Dios guiráʼ binni ne pabiáʼ nadxii Xiiñibe laacaʼ nga dxi beeda gati Jesucristu para gulá binni (1 Juan 4:8; Juan 3:16; 15:13; Romanos 5:8). Nanna binni dxandíʼ discípulo stiʼ Jesús laanu purtiʼ nadxiisaanu (Juan 13:34, 35). Dede Biblia cayuni mandar laanu gannaxhiisaanu (1 Juan 3:23). Pablu caníʼ xi guiráʼ zuni tuuxa ora nadxii sti binni, nabe: «Pa nadxii lu stobi la? qué zadxiichi né gá lu laa, ne ziá lu laa. Pa nadxii lu stobi la? qué zuyubu tidu lú, ne qué zuchá lu enda naróʼ stiuʼ lú, ne qué zuʼnu lii nandxóʼ, ne qué zaníuʼ xiixa diidxa para guniná lu laa, qué zuyubu para lii siouʼ. Cadi neca gasti si guni lii maca cadxiichi neu laa, ne qué ziuu neu laa xiana. Pa nadxii lu stobi la? qué zieche lu ora uchee, sínuque ora guni jneza. Ne pa nadxii lu laabe la? zuni huantar lu laabe ne zuni cre lu laabe. Intiica gueeda, nuu neu laabe tobi si ne qué zaree lu gana», ne qué ziuu dxi gusaana de gannaxhiiluʼ laabe (1 Corintios 13:4-8).
8. Xiñee riquiiñeʼ gannaxhiinu ca bíʼchinu ne ca bizáʼnanu ni runi adorarnecaʼ laanu Dios.
8 Pa gudiʼnu lugar gacané espíritu stiʼ Dios laanu gannaxhiinu la? zannaxhiinu Dios ne zannaxhiinu binni (Mateo 22:37-39). Apóstol Juan bicaa: «Ni cadi nadxii binni la? nuu ru lu ná enda guti. Ni nanalaʼdxi stobi la? zeda aca casi cani ruuti binni. Ne nanna tu qué gapa cani ruuti binni enda nabani ni qué zaluxe» (1 Juan 3:14, 15). Ndaaniʼ guidxi Israel guyuu caadxi guidxi ni biquiiñeʼ para guilá tuuxa ni biiti sti binni, peru zanda guilabe raqué pa qué ñacananaláʼdxibe binni biitibe ca ante (Deuteronomio 19:4, 11-13). Pa gúninu ni na espíritu santu la? cadi Dios si zannaxhiinu, sínuque laaca zannaxhiinu ca bíʼchinu ne ca bizáʼnanu ni nuu ndaaniʼ xquidxi Dios ne laaca zannaxhiinu xcaadxi binni.
Qué ridxíbinu purtiʼ rusiecheʼ Jiobá laanu
9, 10. Xii nga guendanayecheʼ, ne gunáʼ nga ca razón nápanu para guiéchenu.
9 Guendanayecheʼ nga ti cosa ni rucaa binni guni sentir galán. Jiobá nga ti Dios ni nayecheʼ (1 Timoteo 1:11, NM; Salmo 104:31). Jesús guizáʼ riuulaʼdxiʼ guni guiráʼ ni na Bixhoze (Salmo 40:8; Hebreos 10:7-9). Yanna laanu la? «rusiecheʼ Jiobá laa[n]u ne nga zeeda gaca casi ti lugar ni naguidxi para laa[n]u» (Nehemías 8:10).
10 Cumu rusiecheʼ Dios laanu la? rúninu ni nabe de guidubi ladxidoʼno neca cadxaagalunu guendanagana, neca nápanu xiixa yuubaʼ o neca nuu tu cucaalú laanu. ¡Ne guizáʼ riéchenu nga runibiaʼnu Dios! (Proverbios 2:1-5.) Laanu nuunu gaxha de Dios purtiʼ runibiaʼnu laabe, nápanu fe laabe ne runi crenu guti Jesús para gulá laanu (1 Juan 2:1, 2). Laaca riéchenu purtiʼ nuunu lade ca bíʼchinu ne bizáʼnanu ni nadxiisaacaʼ neca nabánicaʼ gadxé gadxé lugar lu guidubi naca Guidxilayú riʼ (Sofonías 3:9; Ageo 2:7). Gánnanu xi chiguni Reinu stiʼ Dios ne gucheechenu ca diidxaʼ nacubi ne galán ca laaca rusiecheʼ laanu (Mateo 6:9, 10; 24:14). Laaca riéchenu purtiʼ zadxiña dxi zanda guibáninu sin qué chuʼ dxi gátinu (Juan 17:3). Cadi dxandíʼ riéchenu gánnanu ziuu dxi gaca guiráʼ ca nga la? (Deuteronomio 16:15.)
Ziuudxí ladxidoʼno ne qué zadxiichinu nagueenda
11, 12. 1) Ximodo rihuinni nuudxí ladxidóʼ ti binni. 2) Ximodo ribáninu ora maʼ gudixhedxí Dios ladxidoʼno.
11 Espíritu ca laaca racané binni para chuʼdxí ladxidóʼ, ne rihuínnini ora cadi nuu binni xizaa ne ora gastiʼ cadi cuchiichi laa. Bixhózenu ni nuu guibáʼ nga Dios ni riguixhedxí ladxidoʼno, ne cayábibe laanu zaguube ndaayaʼ xquídxibe purtiʼ zudiibe laacaʼ guendariuudxi (Salmo 29:11; 1 Corintios 14:33). Jesús gudxi ca discípulo stiʼ: «Zaguixhe dxie ladxidóʼ to casi nexhe dxí ladxiduáʼ» (Juan 14:27). Ximodo zacané nga laacabe yaʼ.
12 Ni guníʼ Jesús ca gudixhedxini ladxidóʼ ca discípulo stiʼ ne xquendabiaanicaʼ, ngue runi maʼ qué nidxíbicaʼ ora bíʼnicaʼ ni nabe. Ne dxi gucuaacabe espíritu santu ni maca guníʼ Jesús que la? jmaruʼ si gutadxí ladxidóʼcabe (Juan 14:26). Cumu racané espíritu ca laanu ne ricabi Dios ca oración stinu la? riguixhedxí nga ladxidoʼno ne xquendabiaaninu, ne qué ziuu dxi quixhedxí sti binni ladxidoʼno zacá (Filipenses 4:6, 7). Espíritu stiʼ Jiobá laaca racané laanu para cadi chuʼdíndenu ne ca bíʼchinu ne ca bizáʼnanu ni cayuni adorar Dios ne cadi chuʼdíndenu ne xcaadxi binni (Romanos 12:18; 1 Tesalonicenses 5:13).
13, 14. Ximodo zahuinni qué ridxiichinu nagueenda, ne xiñee riquiiñeʼ gúninu zacá.
13 Laaca rihuinni nuudxí ladxidóʼ tuuxa ora qué ridxiichi nagueenda. Ora zacá ti binni la? randa runi huantar xiixa guendanagana purtiʼ riníʼ ique zanda gaca chaahuiʼ ni. Dios qué ridxiichi diʼ nagueenda (Romanos 9:22-24). Jesús laaca zacá laa, ne nga racané laanu cueendunu ni galán, purtiʼ apóstol Pablu bicaa sicaríʼ: «Nga runi bilaselaʼdxi Dios naa, purti zacá jma bihuinni enda nachaʼhui sti Jesucristu, para guʼya cani ma nexhe guni cre laabe, xi biʼni be naa, ne laca gapa ca enda nabani ni qué zaluxe» (1 Timoteo 1:16).
14 Pa qué ridxiichinu nagueenda la? zacané nga laanu guni huantarnu ora guiníʼcabe o gúnicabe xiixa para guninácabe laanu. Pablu gudxi ca xpinni Cristu cadi guidxiichinecaʼ binni nagueenda (1 Tesalonicenses 5:14). Cumu guiranu gulenenu donda ne rucheʼnu la? runi sentirnu galán ora qué ridxiichiné tuuxa laanu nagueenda pa bíninu laa xiixa ni cadi jneza. Nga runi, riquiiñeʼ gúninu stipa para «guieche [n]u neca gueeda stale enda naná luguiá [n]u» (Colosenses 1:9-12).
Cadi guninanu binni ne gácanu nachaʼhuiʼ
15. Ximodo zahuinni nacháʼhuinu, ne tuu nga cani caguixhe ti ejemplu galán para laanu.
15 Zahuinni qué runinanu binni ne nacháʼhuinu ora guizaaláʼdxinu laacaʼ ne ora guininu o gúninu xiixa ni gacané laacaʼ. Jiobá ne Jesús binni nachaʼhuiʼ laacaʼ (Romanos 2:4; 2 Corintios 10:1). Guiráʼ ca xpinni Dios ne ca xpinni Cristu cayábicabe laacaʼ gácacaʼ binni nachaʼhuiʼ (Miqueas 6:8; Colosenses 3:12). Dede binni ni cadi nuu gaxha de Dios rusihuinni laaca «nachaʼhui» (Hechos 27:3; 28:2). Nga runi, cumu cusiidiʼ espíritu stiʼ Dios laanu modo naquiiñeʼ sanu la? nápanu xidé gácanu nachaʼhuiʼ.
16. Pora nga riquiiñeʼ gácanu nachaʼhuiʼ.
16 Caquiiñeʼ gácanu nachaʼhuiʼ ne binni neca guiniʼcaʼ xiixa ni guniná laanu dede ne ora qué guni respetarcaʼ laanu. Pablu guníʼ: «Ne pa idxiichi tu la? cadi udii tu lugar guiaazi gubidxa cadxiichi ru tu, sínuque lauyubi tidi ni nagueenda. Pacaa zuchee tu. Cadi udii tu lugar aca xcustu binidxabaʼ. [...] Lagaca nachaʼhui ne stobi, ne lailaselaʼdxi saa. Laguni perdonar saa casi bini perdonar Dios laatu ra guca né tu Cristu tobi si» (Efesios 4:26, 27, 32). Riquiiñepeʼ nga gácanu nachaʼhuiʼ ne ca binni ni cadiʼdiʼ lu xiixa guendanagana. Yanna, pa nuu tuuxa ni ruluíʼ maʼ careechú de neza stiʼ Dios yaʼ. Cadi cayaca diʼ ca binnigola ca nachaʼhuiʼ pa qué gulídxecaʼ laabe ne conseju stiʼ Biblia purtiʼ si nacaʼ ziuube triste ora gulídxecaʼ laabe (Efesios 5:9).
17, 18. Ximódoruʼ zahuinni nacháʼhuinu, ne xiñee risaca gácanu zacá.
17 Laaca rihuinni nachaʼhuiʼ tuuxa ora nabani modo riuulaʼdxiʼ Dios ne ora nayá ladxidóʼ. Dios nabé nachaʼhuiʼ lu guiráʼ xixé cosa (Salmo 25:8; Zacarías 9:17). Ne Jesús nabé runibiáʼ binni laa casi tobi ni nabani modo riuulaʼdxiʼ Dios. Peru, dxi gudxi tuuxa laabe «Ma[e]stru chaʼhuiʼ» la? qué niníʼdibe jneza ngue para si gunibiáʼ binni laabe zaqué (Marcos 10:17, 18). Bíʼnibe ni purtiʼ nánnabe Dios si nga ni jma nachaʼhuiʼ.
18 Nécapeʼ riuuláʼdxinu gácanu nachaʼhuiʼ la? rácani nagana para laanu purtiʼ gulenenu donda (Romanos 5:12). Peru zanda gusihuínninu guenda ca pa guinábanu Dios gusiidiʼ laanu gácanu nachaʼhuiʼ (Salmo 119:66). Sicaríʼ bicaa Pablu ra nuu ca xpinni Cristu de Roma: «Hermanu stinne caʼ, nanna dxiʼche nabani tu modo na Dios, [purtiʼ] ma biziidi tu stale» (Romanos 15:14). Tuuxa ni naca binnigola lade ca binni ridagulisaa riquiiñeʼ gaca «nachaʼhuiʼ» (Tito 1:7, 8). Pa gudiʼnu lugar gusiidiʼ espíritu stiʼ Dios laanu la? zunibiáʼcabe laanu casi binni ni nachaʼhuiʼ, ne Jiobá qué zusiaandaʼ laanu purtiʼ bíninu stale cosa galán (Nehemías 5:19; 13:31).
Riquiiñeʼ gusihuínninu dxandíʼ fe stinu
19. Bisiene xii nga fe ni cuzeeteʼ Hebreos 11:1.
19 Espíritu stiʼ Dios ca laaca racané laanu gápanu fe, nga runi «qué zagúʼ xa ique nu de ni cabeza nu udii be laanu, ne neca caʼru ihuinni irá ni, peru casi ñaca ma caduʼya nu ni yanna, purti runi cre nu laabe» (Hebreos 11:1). Pa dxandíʼ nápanu fe la? zuni crenu zaca guiráʼ ni maʼ guníʼ Jiobá. Nga runi, na Biblia fe ca nga rusihuinni dxandíʼ zaca guiráʼ ni maʼ guníʼ Jiobá. Laanu runi crenu dxandíʼ nuu ti Dios, purtiʼ ridúʼyanu stale de ca cosa ni bizaʼbe ndaaniʼ Guidxilayú riʼ. Zacaca nga fe ni zápanu pa gudiʼnu lugar gusiidiʼ espíritu santu laanu modo naquiiñeʼ sanu.
20. Xi zucaa laanu gucheʼnu, ne xi caquiiñeʼ gúninu ti cadi gucheʼnu ne cadi gúninu xcaadxi cosa malu ni ruquiinde laanu gúninu.
20 Pa qué gápanu fe la? cucheʼnu (Hebreos 12:1). Para ganda guixélenu de ca cosa malu ni ruquiinde laanu gúninu, para cadi guicá íquenu puru si bidxichi ne ganda guixélenu de cani cadi jneza rusiidiʼ stale religión la? riquiiñeʼ gudiʼnu lugar gusiidiʼ espíritu stiʼ Dios laanu (Colosenses 2:8; 1 Timoteo 6:9, 10; 2 Timoteo 4:3-5). Espíritu ca racaneni guiráʼ ca xpinni Dios ni nabani yanna riʼ gápacaʼ fe cásica ni gupa ca xpínnibe ni bibani ante gueeda Jesús ne xcaadxi binni ni ruzeeteʼ Biblia (Hebreos 11:2-40). Ne zacanenu xcaadxi binni gaca fe sticaʼ naguidxi pa dxandíʼ runi crenu de guidubi ladxidoʼno (1 Timoteo 1:5; Hebreos 13:7).
Gácanu nadóʼ ne gucueezanu laanu
21, 22. Ximodo rihuinni nadóʼ tuuxa, ne xiñee riquiiñeʼ gusihuínninu zacá laanu.
21 Ora nadóʼ ti binni rihuínnini pur modo laa ne pur modo riniʼné xcaadxi binni. Laani nga tobi de ca guenda ni napa Dios. Nánnanu ni, purtiʼ Jesús bisihuinni ximódopeʼ nga Bixhoze ra guca nadóʼ ne binni (Mateo 11:28-30; Juan 1:18; 5:19). Yanna, xi riquiiñeʼ guni guiráʼ ca xpinni Dios yaʼ.
22 Cumu xpinni Cristu laanu la? laaca riquiiñeʼ gácanu «nadóʼ, ne gaca [nu] nachaʼhui ne irá binni» (Tito 3:2). Rihuinni nácanu binni nadóʼ ora maʼ zigucheechenu diidxaʼ. Ne «cani zinanda Espíritu Santu» la? zanda gulídxecaʼ tuuxa ni maʼ bichee peru naquiiñeʼ gúnicaʼ ni «ne diidxa nadóʼ» (Gálatas 6:1). Guiranu zanda gacanenu chuʼ guiráʼ ca xpinni Cristu tobi si ne cadi chuʼdíndecaʼ ora gácanu nadóʼ ne cadi gudxíʼbanu laca laanu (Efesios 4:1-3). Ne para gácanu nadóʼ la? riquiiñeʼ sanu casi na espíritu santu ne gápanu xpiaʼnu guiráʼ ora.
23, 24. Ximodo zahuinni rucueezanu laanu, ne ximodo zacaneni laanu.
23 Pa laanu gápanu xpiaʼnu la? zanda gucueezanu laanu ti cadi guiníʼ íquenu cosa malu, cadi guininu cosa malu ne cadi gúninu xiixa ni cadi jneza. Jiobá la? bicueeza laa para cadi nusabanáʼ ca binni de Babilonia neca binitilucaʼ Jerusalén (Isaías 42:14). Jesús laaca gudixhe ti ejemplu galán para laanu, purtiʼ gunda bicueeza laa ora cayuninácabe laa. Ne apóstol Pedru bidii conseju riʼ ca xpinni Cristu ni bibani dxiqué: «Lauyubi guiene chaahui tu stiidxa Dios. Zacané ni laatu iziidi tu ucueeza tu laatu» (2 Pedro 1:5-8; 1 Pedro 2:21-23).
24 Ca binnigola ni nuu ndaaniʼ xquidxi Dios naquiiñeʼ gánnacaʼ gucueezacaʼ laacaʼ (Tito 1:7, 8). Nga runi, guiráʼ cani zinanda ni na espíritu naquiiñeʼ gánnacaʼ gucueezacaʼ laacaʼ, purtiʼ zacatiʼ nga qué zúnicaʼ cosa malu casi gápacaʼ jnadxiicaʼ, guiniʼcaʼ diidxaʼ guidxa ne gúnicaʼ sti cosa malu ni guxheleʼ laacaʼ de Dios. Pa gudiʼnu lugar gacané espíritu stiʼ Dios laanu para gánnanu gucueezanu laanu la? zuuyaʼ binni dxandíʼ cayúninu ni pur modo rininu ne pur ni rúninu.
Cadi gusaana de sanu modo rusiidiʼ espíritu
25, 26. Xi zúninu pa sanu modo na espíritu santu ne xi zabeendunu.
25 Pa canazanu modo na espíritu la? zucheechenu stiidxaʼ Reinu ne stale gana (Hechos 18:24-26). Ne laaca ziuulaʼdxiʼ stale binni chuʼ gaxha de laanu, peru cani jma ziuulaʼdxiʼ chuʼ gaxha de laanu nga ca binni ni cayuni adorar Jiobá. Ne pa sanu modo na espíritu santu la? laaca zaguʼnu gana ca bíʼchinu ne ca bizáʼnanu para gúnicaʼ jma lu xhiiñaʼ Dios (Filipenses 2:1-4). Cadi dxandíʼ racaláʼdxinu gácanu zacá la?
26 Ndaaniʼ guidxilayú ra cayuni mandar Binidxabaʼ riʼ nagana nga para sáʼ binni modo rusiidiʼ espíritu santu (1 Juan 5:19). Neca zacá, millón de binni canazá modo rusiidini. Pa guni crenu Jiobá de guidubi ladxidoʼno la? zabáninu nayecheʼ yanna ne qué zusaana de sanu lu ca neza sicarú stiʼ Bixhózenu, Dios stinu ni rudii espíritu santu laanu purtiʼ dxandíʼ nadxii laanu (Salmo 128:1; Proverbios 3:5, 6).
Xi nicábiluʼ
• Ximodo ziuʼnu ne Dios ne Xiiñiʼ pa sanu modo rusiidiʼ espíritu laanu.
• Xi guiráʼ guenda nga racané espíritu laanu gápanu.
• Ximodo zahuinni nápanu ca guenda stiʼ espíritu santu.
• Xi zúninu pa sanu modo na espíritu santu yanna ne xi zabeendunu despué.
[Dibuju/foto ni zeeda lu yaza 16]
Gusihuínninu nácanu binni nachaʼhuiʼ lu cani rininu ne lu cani rúninu