Ni rinabadiidxaʼ ca ni ruundaʼ

¿Ñee lista si de ca cualidad ni riete lu Gálatas 5:22, 23 nga «ca cualidad stiʼ espíritu» la?

Lu ca versículo riʼ riete ti lista de gaʼ cualidad ni naquiiñeʼ guni cultivar ca xpinni Cristu. Sicaríʼ ná ni: «Binni ni napa ca cualidad stiʼ espíritu la? rannaxhii, nuu nayecheʼ, nexhedxí ladxidóʼ, napa paciencia, amable laa, nachaʼhuiʼ, napa fe, nadóʼ, rucueeza laca laa». Peru cadi ca ndiʼ si nga ca cualidad ni zanda gacané espíritu stiʼ Dios laanu gusihuínninu.

Guidúʼyanu ni bicaa apóstol Pablo lu caadxi versículo ni zeeda ante: «Rihuinni dxíchica gunáʼ ca deseu stiʼ xcuerpu binni: Guni cometer pecadu sexual, guni cosa yuudxuʼ, guni cosa malu sin guituí lú, guni adorar bidóʼ, guni practicar espiritismo, gaca nanalaʼdxiʼ stobi, guyubi pleitu, guidaa xiana, guidxiichi nagueenda, guni discutir, uguu división, guindisaʼ secta, gapa envidia, xhudxi, chuʼ lu ca saa ra runi binni ni cadi jneza ne guni xcaadxi cosa casi laacani» (Gál. 5:19-21). Lu ca versículo riʼ ñándaca nuzeeteʼ Pablo xcaadxi «deseu stiʼ xcuerpu binni», casi ni bizeetebe lu Colosenses 3:5. Ngaca nga rizaaca né gaʼ de ca cualidad ni bizeetebe lu Gálatas 5:22, 23. Lu lista riʼ qué ñúnibe pur niguube guiráʼ ca cualidad ni racané espíritu santu laanu gusihuínninu.

Ne zanda guininu zacá ni ora guchaaganu lista de ca cualidad ni riete lu Gálatas né ni bicaa Pablo ra nuu ca hermanu de Éfeso: «Zanda gacané biaaniʼ ca laanu lu guiráʼ cosa para gácanu nachaʼhuiʼ, gúninu ni jneza ne guininu ni dxandíʼ» (Efes. 5:8, 9). «Gácanu nachaʼhuiʼ, gúninu ni jneza ne guininu ni dxandíʼ» naca cani parte de ca cualidad stiʼ «biaaniʼ», peru laaca naca cani ti «cualidad stiʼ espíritu». Nga runi, neca qué nuzeete Pablo ca cualidad riʼ lu Gálatas 5:22, 23 la? ñanda ñúnibe ni.

Zaqueca laaca guluu apóstol Pablo gana Timoteo guni cultivar ti lista de xhoopaʼ cualidad ora gúdxibe laa: «Bicaa ique guʼnuʼ ni jneza, guni adorarluʼ Dios, gupa fe, gunnaxhii, biʼniʼ huantar ne guca nadóʼ» (1 Tim. 6:11). Chonna si de ca cualidad riʼ —fe, guendarannaxhii ne guendanadóʼ— nuucani lu lista de «ca cualidad stiʼ espíritu». Peru laaca caquiiñeʼ gacané espíritu santu Timoteo para gusihuinni xcaadxi cualidad ni bizeeteʼ Pablo: casi guni ni jneza, guni adorar Dios ne guni huantar (bichaaga ni né Colosenses 3:12; 2 Pedro 1:5-7).

Nga runi, lu Gálatas 5:22, 23 qué riete diʼ guiráʼ ca cualidad ni caquiiñeʼ guni cultivar ca xpinni Cristu. Racané espíritu stiʼ Dios laanu guni cultivarnu gaʼ «cualidad stiʼ espíritu». Peru nuuruʼ xcaadxi cualidad ni zanda guni cultivarnu para ganda gácanu ti xpinni Cristu maduru o tobi ni maʼ huaniisi lu stiidxaʼ Dios, ne zacá casi xa ñaca ñácunu ti «lari nacubi, ni bizaʼbe según ni jneza ne ni dxandíʼ» (Efes. 4:24).