Ñee nápanu stale cosa risaca nezalú Dios la?
«Zacá nga cani rutopa lú para laca laa, peru qué gapa gasti ni risaca nezalú Dios.» (LUCAS 12:21.)
1, 2. 1) Xiñee runi binni stale cosa ra ruxooñeʼ riesgu guizaacalú xiixa guendananá. 2) Xi guendanagana ridxaagalú ca xpinni Cristu, ne xi zándaca guizaacacaʼ.
ORA maʼ caguite ca baʼduhuiiniʼ ca riuuláʼdxicaʼ guidxélacaʼ xiixa ni risaca, peru cadi laasicaʼ riuuláʼdxicaʼ guidxélacaʼ cosa ni risaca. Dede biaʼ dxi huabani binni ndaaniʼ Guidxilayú riʼ huayúbicaʼ cosa ni risaca. Casi dxi gunna binni nuu oro guidxi Australia, Canadá, Estados Unidos ne Sudáfrica lu siglu XIX la? guizáʼ stale binni yeyubi ni. Pur gapa ca binni ca stale bidxichi dede bisaanacaʼ lídxicaʼ ne ca binnilídxicaʼ para guyecaʼ xcaadxi guidxi zitu ra qué runibiaʼcaʼ ne nuu tiru ra qué ridxagalú binni laacaʼ galán. Dxandíʼ, nuu stale binni neca nanna ruxooñeʼ riesgu guizaacalú xiixa guendananá la? runi stipa pur guyubi gapa stale cosa risaca.
2 Stale de ca binni ni nuu yanna riʼ maʼ qué ruyúbicaʼ cosa ni risaca casi oro ca, peru rúnicaʼ stale cosa ra ruxooñeʼ riesgu guizaacacaʼ xiixa guendananá para guidxélasicaʼ ni guibaninecaʼ. Guizáʼ nagana nga para guidxela binni ni guibaniné yanna riʼ, naquiiñeʼ guni binni dxiiñaʼ nadipaʼ ne nuu tiru runi dxiiñaʼ ni nabé rusidxaga laa. Yanna riʼ jma nga riuu binni xizaa pur ni go, ni cuaquiʼ ne pur gapa ra cueza que guiníʼ ique ca cosa ni jma risaca (Romanos 14:17). Jesús guníʼ ti ejemplu ni bisihuinni zacá nga naca binni guidxilayú. Zeedani lu Lucas 12:16-21.
3. Guníʼ ejemplu ni bizeeteʼ Jesús lu Lucas 12:16-21.
3 Ante guiníʼ Jesús de ejemplu ca la? caniʼbe cadi jneza diʼ gachelú binni gapa ni napa stobi, tema gudiʼdiʼ ca bisiene chaahuiʼ ni. Lu ejemplu guníʼ Jesús ca bizeeteʼ de ti hombre ricu ni qué nidxá ne guiráʼ ni gupa. Bixhá hombre que ca troja ra dxaʼ stale ni go ne biʼniʼ xcaadxi jma naroʼbaʼ para ganda gutáleruʼ xcaadxi cosa ni risaca. Ora guníʼ íquebe maʼ chiguiziiláʼdxibe purtiʼ maʼ nápabe stale ni gobe la? gudxi Dios laabe zátibe ne guiráʼ ni maʼ bitálebe que zacaa sti binni ni. Jesús biluxe ejemplu stiʼ ne ca diidxaʼ riʼ: «Zacá nga cani rutopa lú para laca laa, peru qué gapa gasti ni risaca nezalú Dios» (Lucas 12:21). Xi rizíʼdinu de ejemplu riʼ, ne ximodo gúninu ni lu xquendanabáninu yaʼ.
Ti hombre ni guníʼ ique xi naquiiñeʼ guni
4. Xi zanda guininu de hombre ni guníʼ Jesús lu ejemplu que.
4 Jesús bizulú ejemplu que ne ca diidxaʼ riʼ: «Sicarí bizaaca tobi hombre ricu. Nabé [bidii] xquela». Jesús qué niníʼ diʼ pa malu hombre riʼ, pa cadi jneza ni bíʼnibe o pa bicheenebe xiixa ley para bidale ca cosa risaca stibe. Ruluíʼ si ti hombre runi dxiiñaʼ laabe, ni riníʼ ique xi zaquiiñeʼ binnilidxi para chuʼ nazaaca. Nga runi para stale binni la? ti hombre runi dxiiñaʼ, purtiʼ nánnabe naquiiñeʼ gudiibe guiráʼ ni caquiiñeʼ binnilídxibe.
5. Xi guca ora bidale cani napa hombre ricu que.
5 Neca qué gánnanu ximódopeʼ laabe la? ni dxandíʼ nánnanu nga gúcabe ricu, o gúpabe stale cosa risaca. Peru casi guníʼ Jesús que, gúpabe xidé biiyabe xi naquiiñeʼ gúnibe purtiʼ ca layú stibe bidii cani jma de ni caquiiñebe o ni zanda uguu chaahuibe. Yanna, xi bíʼnibe yaʼ.
6. Xi guiráʼ ndiʼ ridxaagalú ca xpinni Dios.
6 Stale de ca xpinni Cristu yanna riʼ ridíʼdicaʼ lu stale cosa ni rucaa laacaʼ guiníʼ íquecaʼ xi naquiiñeʼ gúnicaʼ cásica guca hombre ricu que. Cani dxandíʼ xpinni Cristu ni cayuni dxiiñaʼ stiʼ o ni cayuni xhiiñaʼ sti binni la? rúnicaʼ stipa para cadi gusiguiicaʼ, para cadi guiaadxacaʼ ne cadi gácacaʼ nachaabaʼ lu xhiiñacaʼ (Colosenses 3:22, 23). Pur nga la? ribánicabe galán ne ruuyaʼ binni nánnacabe gúnicabe dxiiñaʼ. Yanna, xi gúnicabe ora gudii tuuxa laacabe sti dxiiñaʼ jma risaca o sti negocio ni jma galán yaʼ. Ñee zacaacabe dxiiñaʼ ca para guni ganárcabe jma bidxichi la? Cani rizá scuela ca laaca rizaacacaʼ zacagá. Cumu stale de ca testigu stiʼ Jiobá ni canazacaʼ scuela nabé ricá íquecaʼ guiziidicaʼ la? nuu tiru riníʼ ca maestru ca zudiicaʼ laacabe beca o sti cosa ni zanda gacané laacabe chiguundacabe sti scuela roʼ. Yanna, ñee zacaacabe cani cudii ca maestru ca purtiʼ si stale de ca baʼduʼ scuela ca racaláʼdxicaʼ guicaacaʼ ni la?
7. Xi biʼniʼ hombre ni bizeeteʼ Jesús lu ejemplu que ora biiyaʼ maʼ qué gapa paraa cuʼ ni bidii guela stiʼ.
7 Guibiguétanu lu ejemplu ni guníʼ Jesús que, xi biʼniʼ hombre ricu que ora biiyaʼ bidii guela stiʼ stale ne maʼ qué gapa paraa uguu cani yaʼ. Bixhabe ca troja stibe ne bicuibe xcaadxi jma naroʼbaʼ para uguube guiráʼ xixé ni bidii stibe ne guiráʼ xixé ni galán ni nápabe. Ne ni bíʼnibe ca bisihuínnibe guníʼ íquebe maʼ gastiʼ ziaadxaʼ laabe ne bicaa ni laabe guiníʼ íquebe sicaríʼ: «Yanna huaxa ma chi iziiladxeʼ ne ma chi guiecheʼ, purti ma napa stale ni gahua ne ni gueeʼ, ne ma naguaa chaahue ni iquiiñe stale iza» (Lucas 12:19).
Xiñee gudxi Dios hombre que «binni huati»
8. Xi ti cosa nabé risaca qué niníʼ ique hombre ni guníʼ Jesús lu ejemplu que.
8 Hombre ni bizeeteʼ Jesús lu ejemplu que guníʼ ique zabani galán ne gastiʼ ziaadxaʼ laa, peru cadi dxandíʼ diʼ zaqué ni. Nécapeʼ ruluíʼ biáʼsipeʼ ngue ni guníʼ íquebe la? qué niníʼ íquebe ti cosa ni nabé risaca: xiná Dios gúnibe. Jma nga guníʼ íquebe guiziiláʼdxibe, gobe, guebe ne gápabe gustu. Ruzulube purtiʼ si nápabe stale cosa galán zanda guibánibe stale iza ne iquiiñebe cani. Peru, guizáʼ triste ngue qué ñácani casi guníʼ íquebe que. Jesús maca guníʼ: «Laguuya gá laatu ne enda ruyubi gapa bidxichi, purti cadi nga si nga enda nabani sti binni» (Lucas 12:15). Gueelaʼ queca bihuinni pur gana si ca dxiiñaʼ bíʼnibe, purtiʼ «na Dios rabi laabe: “Binni huati. Yanna gueela ca zati luʼ. Ne tu guiaana né irá ni naguu chaahui lu ca yaʼ”» (Lucas 12:20).
9. Xiñee gudxi Dios hombre ricu que «binni huati».
9 Yanna guidúʼyanu xii nga ni jma risaca bisiidiʼ Jesús lu ejemplu ca. Dios guníʼ naca hombre que ti binni huati. Diidxaʼ ni biquiiñecabe lu griegu para guiníʼcabe «binni huati» la? lu Diccionario exegético del Nuevo Testamento na «caniʼni de ti binni ni qué riene». Laaca culuiʼni biquiiñeʼ Dios diidxaʼ ca lu ejemplu ca para gusiene «gastiʼ zabeendú binni ricu ne ni naguixhe ique». Peru ca diidxaʼ ca qué rabidícabe ni tuuxa ni huaxiéʼ riene, sínuque «tuuxa ni na cadi caquiiñeʼ diʼ Dios». Ni bizeeteʼ Jesús de hombre ricu ca rusietenaláʼdxini laanu ca diidxaʼ ni gudxi Jesús neza binni ridagulisaa ni guyuu Laodicea (Asia Menor): «Na tu ricu laatu, qué huazaaca tu gastiʼ, ne gasti cayaadxa laatu. Nin ganna tu pa biree uniti tu dede ñá binni laatu. Qué gapa tu gastiʼ, nin ni gacu tu, ne nacheepa lú tu» (Apocalipsis 3:17).
10. Xiñee qué zanda guininu zacané ca cosa risaca ca laanu para guibáninu stale iza.
10 Naquiiñeʼ guiníʼ íquenu de ni rusiidiʼ ejemplu ca laanu. Ñee zanda guizaacanu ni bizaaca hombre ricu que la? Ñee zaguixhe íquenu gúninu dxiiñaʼ nadipaʼ para gápanu stale cosa galán lugar de gúninu ni naquiiñeʼ si para guibáninu «stale iza» la? (Juan 3:16; 17:3.) Biblia na: «Ca cosa risaca ca qué zaquiiñeʼ cani dxi guedandá ni daʼ xiana ca», ne «tu runi cré zulá ca cosa risaca stiʼ laa la?... ziaba» (Proverbios 11:4, 28). Nga runi gulidxe Jesús laanu ne ca diidxaʼ riʼ ra biluxe guníʼ de ejemplu stiʼ hombre que: «Zacá nga cani rutopa lú para laca laa, peru qué gapa gasti ni risaca nezalú Dios» (Lucas 12:21).
11. Xiñee cadi naquiiñeʼ guiníʼ íquenu zabáninu galán pa gápanu stale cosa risaca.
11 Ora guníʼ Jesús ca diidxaʼ «zacá nga», bisihuínnibe cásica bizaaca hombre ricu que zacaca zazaaca cani nabani puru si para gapa bidxiichi, cani nacaʼ bidxichi ca si nga ni zacané laacaʼ. Cadi malu diʼ nga gaca binni ricu, sínuque ni malu nga cadi gaca binni ricu nezalú Dios. Discípulo Santiagu laaca guníʼ caadxi diidxaʼ casigá ni guníʼ Jesús ca, nabe: «Yanna laucaa diaga ni chinié riʼ, purti nuu de laatu na: “Yanadxí o ixí ziuu nu tal guidxi, ne ziaana nu raqué tubiza. Raqué zazí nu ne zutóʼ no para cuee nu stale bidxichi”. Xiñee riníʼ tu zacá, nin qué ganna tu xi chi aca ixíʼ». Xi gúdxibe ca binni ca guni yaʼ. «Ndi nga ni niníʼ tu: “Pa na Señor la? zabani nu ne zuni nu ndi ne ndicaʼ”.» (Santiago 4:13-15.) Nin jma ricu gaca ti binni la? qué zabeendú gastiʼ pa qué gaca ricu nezalú Dios. Ximodo nga gácanu ricu nezalú Dios yaʼ.
Gácanu ricu nezalú Dios
12. Xi zacané laanu gácanu ricu nezalú Dios.
12 Ca diidxaʼ guníʼ Jesús ra bilúxebe ejemplu que la? bisihuínnibe chupa cosa: gadxé nga gaca binni ricu nezalú Dios ne gadxé nga gutale binni cosa risaca para laa. Ni guniʼbe nga cadi guicá íquenu gápanu puru si bidxichi o stale cosa risaca, sínuque nápanu xidé iquiiñenu cani nápanu para chuʼnu gaxha de Jiobá ne chuʼnu galán ne laabe. Ne ca nga nga ni zacané laanu gácanu ricu nezalú Dios. Xiñee yaʼ. Purtiʼ zacatiʼ nga zaguube stale ndaayaʼ laanu. Guietenaláʼdxinu ni na Biblia: «Ndaayaʼ stiʼ Jiobá... nga nga ni runi binni ricu, ne qué rudiidibe yuubaʼ ne laani» (Proverbios 10:22).
13. Ximodo nga raca binni ricu ne ndaayaʼ stiʼ Jiobá.
13 Ora riguu Jiobá ndaayaʼ ca xpinni la? nabé rudiibe laacaʼ ni jma galán (Santiago 1:17). Casi layú ni bidii Jiobá ca israelita que la? guyuu stale «leche ne dxiñayaga» luni. Nécapeʼ zacaca bieeteʼ guca guidxi Egipto la? layú stiʼ ca israelita que maʼ gadxé gúcani pur ti razón nabé risaca. Xi razón ca yaʼ. Moisés gudxi ca israelita que: «[Laani nga] ti layú ni cayapa Jiobá, Dios stiluʼ». Ca diidxaʼ riʼ bisihuínnicani zapa ca israelita que stale cosa risaca purtiʼ Jiobá peʼ ngue chigapa laacabe. Ne zaqué gúcani: ora ruzuubacabe stiidxaʼ Jiobá la? ricaacabe stale ndaayaʼ ne rihuínnica jma galán nabánicabe que xcaadxi guidxi ni nuu gaxha de laacabe. Dxandíʼ, ndaayaʼ stiʼ Jiobá nga «ni runi binni ricu» (Números 16:13; Deuteronomio 4:5-8; 11:8-15).
14. Xi ndaayaʼ ricaa cani naca ricu nezalú Dios.
14 Stale binni ricu nabé riuucaʼ xizaa pur modo guʼyaʼ binni laacaʼ, racaláʼdxicaʼ guisácacaʼ nezalú binni, ne rusihuínnicaʼ ni pur modo nabánicaʼ. Ca binni ca ruyúbicaʼ gápacaʼ guiráʼ ni gúʼyacaʼ ti «gaca[caʼ] tuuxa nezalú ca xcaadxi» (1 Juan 2:16). Peru cani naca ricu nezalú Dios la? riuulaʼdxiʼ Dios ni rúnicaʼ, racané Dios laacaʼ, guizáʼ nachaʼhuiʼ Dios ne laacaʼ ne nuucaʼ gaxha de laabe. Pur guiráʼ ndaayaʼ ni nápacabe ca la? nánnacabe gastiʼ ziaadxaʼ laacabe ne jma galán nuucabe que binni ni na nuu nayecheʼ pur guiráʼ bidxichi ni napa (Isaías 40:11). Yanna, ni naquiiñeʼ gánnanu nga, xi naquiiñeʼ gúninu para gácanu ricu nezalú Dios.
Ca binni ni naca ricu nezalú Dios
15. Xi naquiiñeʼ gúninu para gácanu ricu nezalú Dios.
15 Hombre ni bizeeteʼ Jesús lu ejemplu que la? gudixhe ique guni dxiiñaʼ nadipaʼ para si gapa stale bidxichi, nga runi gudxi Dios laa «binni huati». Yanna, para ganda gácanu ricu nezalú Dios la? naquiiñeʼ gúninu stipa para gúninu dxiiñaʼ ni nabé risaca para laabe. Tobi de ca dxiiñaʼ ca bizeeteʼ Jesús ni lu ca diidxaʼ riʼ: «Nga runi laché irá xixé guidxi, lachiusiidi irá xixé binni sa nanda naa» (Mateo 28:19). Pa iquiiñenu tiempu stinu, stipa stinu ne cani nánnanu para gucheechenu stiidxaʼ Reinu ne gusíʼdinu binni chinanda Cristu lugar de iquiiñenu cani para gápanu bidxichi la? zacaanu stale ndaayaʼ ndaaniʼ xquidxi Dios. Ca ejemplu ni chiguininu riʼ cusihuinni zacá ni (Proverbios 19:17).
16, 17. Guníʼ ti ejemplu ni cusihuinni xi naquiiñeʼ gúninu para gácanu ricu nezalú Dios.
16 Guidúʼyanu xi bizaaca ti xpinni Cristu de ti guidxi nuu Asia. Dxiiñaʼ bíʼnibe nga guni chaahuibe computadora ne biʼniʼ ganarbe bueltu luni. Peru lu dxiiñaʼ stibe que nabé biquiiñebe stálepeʼ tiempu stibe, ngue runi biʼniʼ sentirbe maʼ qué gápabe cosa risaca nezalú Jiobá. Lugar de nuyúbibe ñápabe sti puestu jma risaca que ni nápabe que la? laga bisaanabe ni ne bizulú bíʼnibe ñebe para gutoobe lu calle. Xiñee bíʼnibe nga yaʼ. Bíʼnibe ni ti gápabe jma tiempu para gúnibe ni na Dios ne para ganda gúnibe ca dxiiñaʼ ni nápabe lade ca binni ridagulisaa. Cani bíʼninebe dxiiñaʼ que biʼniʼ búrlacaʼ laabe pur ni cayúnibe que, peru guidúʼyanu ximodo caniʼbe guyé ni laabe: «Ni dxandíʼ nga jma cayuneʼ ganar bueltu. Yanna maʼ nabaneʼ nayecheʼ purtiʼ maʼ qué riuaapiaʼ xizaa casi ante. Ne ni jma galán nga purtiʼ runeʼ sentir nuaa jma gaxha de Jiobá». Cumu bisaanabe dxiiñaʼ stibe que la? gunda gúcabe precursor ne yanna cayúnibe dxiiñaʼ ndaaniʼ yoo Betel stiʼ ca testigu stiʼ Jiobá ni nuu xquídxibe. Dxandipeʼ ndaayaʼ stiʼ Jiobá «nga ni runi binni ricu».
17 Yanna guininu ni bizaaca ti gunaa ni biniisi lade ti familia ni jma risaca para laacaʼ cheʼ binni scuela. Gunaa riʼ biziidiʼ ndaaniʼ ca scuela roʼ ni nuu Francia, Méjicu ne Suiza, ne guizáʼ galán cayeni laa purtiʼ cayuni dxiiñaʼ de ni biziidiʼ. Gunaa riʼ guníʼ: «Guizáʼ galán cayeni naa, runibiáʼ binni naa ne guiráʼ ladu caree dxiiñaʼ para naa, peru cadi nayecheʼ diʼ nuu ladxiduáʼ». Gunaa riʼ bizulú biindaʼ Biblia, ne guníʼ: «Dxi jma maʼ ziziideʼ de Jiobá jma ziyuuladxeʼ guneʼ ni nabe ne gudiéʼ laabe caadxi de cani maʼ bidiibe naa. Oraqueruʼ bidiéʼ cuenta naquiiñeʼ gudiéʼ naa Jiobá, naquiiñeʼ guneʼ jma lu xhiiñaʼ Dios». Laabe bisaanabe xhiiñabe que ne qué nindaa guyuunísabe. Yanna riʼ maʼ zinebe gande iza de nácabe precursora, ne guizáʼ nayecheʼ nuube. Ne laaca guniʼbe xcaadxi diidxaʼ riʼ: «Nuu tu na pur gana si guzayaʼ scuela, peru ruuyacabe pabiáʼ nayecheʼ nuaa ne ridxagayaacabe galán ca conseju ni zinandaʼ. Guiráʼ dxi rinabaʼ Jiobá gacané naa para guzuubaʼ stiidxaʼ ti chuuláʼdxibe modo runeʼ adorar laabe».
18. Ximodo zanda gácanu ricu nezalú Dios cásica guca Pablu.
18 Saulo de Tarso, hombre ni beeda gaca apóstol Pablu que la? gupa ti dxiiñaʼ ni risaca. Peru dxi maʼ gúcabe xpinni Cristu la? bicaabe ca diidxaʼ riʼ: «Irá ni ma qué iquiiñe ni para naa, purti ma binebiaʼya Cristu Jesús Señor stinneʼ, ne laa si risaca para naa» (Filipenses 3:7, 8). Jma bisisaca Pablu guiráʼ ni biziidiʼ de Cristu que guiráʼ cosa ni nuu lu Guidxilayú riʼ. Pa gusaananu de gachelunu ca cosa risaca ni nuu lu Guidxilayú riʼ ne gúninu stipa pur gúninu ni na ca ley stiʼ Dios casi biʼniʼ Pablu que la? laaca zácanu ricu nezalube. Biblia cayabi laanu: «Pa qué gudxíʼbanu laca laanu ne guidxíbinu Jiobá la? zácanu ricu, zusisácabe laanu, ne zápanu guendanabani» (Proverbios 22:4).
Ñanda nusiéneluʼ ca ndiʼ la?
• Xii ngue guníʼ ique hombre ni bizeeteʼ Jesús lu ejemplu que guni.
• Xiñee gudxi Dios hombre ni bizeeteʼ Jesús lu ejemplu que «binni huati».
• Xii nga gaca binni ricu nezalú Dios.
• Ximodo zanda gácanu ricu nezalú Dios.
[Dibuju/foto ni zeeda lu yaza 28]
«Ndaayaʼ stiʼ Jiobá... nga nga ni runi binni ricu»
[Dibuju/foto ni zeeda lu yaza 30]
Xiñee zándaca gaca nagana para laanu gucáʼnanu ca dxiiñaʼ ra zanda guni ganarnu jma
[Dibuju/foto ni zeeda lu yaza 31]
Xiñee gudxi Dios hombre ni bizeeteʼ Jesús lu ejemplu stiʼ que «binni huati»