Guibáninu modo riuulaʼdxiʼ Dios
«Cristu guti pur irá nu ti biaʼ dxi ibani nu ma cadi ibani nu para laanu.» (2 CORINTIOS 5:15.)
1. Xi bizaaca ti misioneru ra yegucheeche diidxaʼ.
SICARÍʼ guníʼ ti misioneru láʼ Aaróna: «Xcárrudu nga primé ni guyuu ndaaniʼ ti guidxihuiiniʼ ni nuu zitu de guidxi Africa biluxe si ti guendaridinde guca raqué. Maʼ qué ñánnadidu gastiʼ de ca xpinni Cristu de guidxihuinniʼ que, ne guníʼ íquedu xi caquiiñecabe. Ngue runi yenedu guendaró, lari, libru ne revista, laaca yenedu videu ni láʼ Los testigos de Jehová... la organización tras el nombre.b Bitiididu ni lugar ra rié binni cine guidxihuiiniʼ que, ne stale binni yeguuya ni dede gúpadu xidé bitiididu ni chupa biaje. Lu guiropaʼ biaje bidúʼyadu videu que, stale tu biaananedu chigusíʼdidu laa de Biblia. Bihuinni dxichi bisaca stipa bínidu que».
2. 1) Xiñee riguixhe ique ca xpinni Cristu iquiiñecaʼ xquendanabánicaʼ para gúnicaʼ ni na Dios. 2) Xii nga cani chiguicábinu lu xcaadxi párrafo ca.
2 Xiñee gudixhe ique Aarón ne ca xcompañeru gúnicaʼ dxiiñaʼ que yaʼ. Purtiʼ zaqué nga bidiicabe xquíxepeʼ Jesús pur ni biʼniʼ pur laacabe, ngue runi bidiicabe laacabe Dios ne gudixhe íquecabe guibánicabe modo na. Zaqueca laanu, cani maʼ bidiʼnu laanu Dios la? maʼ gudixhe íquenu cadi guibáninu para laanu, sínuque para gacanenu «guni cre binni stiidxa Cristu» (2 Corintios 5:15; 1 Corintios 9:23). Nánnanu ora guinitilú guiráʼ cosa nuu ndaaniʼ guidxilayú riʼ, qué zulá diʼ bidxichi stiʼ binni laa neca naca tuuxa binni risaca. Nga runi, laga nazaacanu la? racaláʼdxinu guibáninu modo riuulaʼdxiʼ Dios (Eclesiastés 12:1). Ximodo zanda gúninu ni yaʼ. Tu gudii laanu stipa ne ximodo gácanu binni nadxibalú para gúninu ni na Dios yaʼ. Xi dxiiñaʼ zanda gúninu ndaaniʼ xquidxi Dios.
Naquiiñeʼ gúninu caadxi cosa
3. Bizeeteʼ chupa chonna cosa ni naquiiñeʼ guni tuuxa para guni ni na Dios.
3 Cani dxandíʼ xpinni Cristu riguixhe íquecaʼ gúnicaʼ ni na Dios biaʼ dxi guibánicaʼ. Ne ni rúnicabe primé nga ruundacabe Biblia guiráʼ dxi, ridíʼdicabe lu Scuela stiʼ cani Rucheeche Diidxaʼ, rucheechecabe diidxaʼ ne rúnicabe ni na Stiidxaʼ Dios para ganda chuʼnísacabe. Ora maʼ ziniisinu lu stiidxaʼ Dios la? qué riaandaʼ diʼ laanu ca diidxaʼ ni bicaa apóstol Pablu ra guníʼ: «Bicaalaʼdxi guʼnu irá ni cayabe lii riʼ, de idubi ladxidóʼ loʼ, ti guʼya cabe ze dxi ziyene lu jma» (1 Timoteo 4:15). Ora gúninu stipa pur guiniisinu lu stiidxaʼ Dios la? qué zúnidinu ni para gudxíʼbanu laca laanu, sínuque para gusihuínninu maʼ gudixhe íquenu gúninu ni na Dios neca gusaananu de gúninu xiixa ni riuuláʼdxinu. Ora maʼ ziniisinu lu stiidxaʼ Dios rusihuínninu rudiʼnu lugar gabi Dios laanu xi gúninu lu xquendanabáninu. Ne guirutiʼ zanda guiníʼ cadi jneza modo rabi Dios laanu guibáninu (Salmo 32:8).
4. Xi zanda gúninu ti cadi guidxíbinu ora chigacanenu sti lugar.
4 Yanna, pa chuʼnu xizaa pur xiixa o qué gánnanu xi gúninu la? zucueeza nga laanu de guiniisinu lu stiidxaʼ Dios (Eclesiastés 11:4). Nga runi, para ganda guiéchenu ora gúninu ni na Dios ne ora gacanenu binni la? cadi guidxíbinu. Guidúʼyanu xi bizaaca Erik. Bíʼchinu riʼ gudixhe ique chigacané lade ti neza binni ridagulisaa ra riníʼcabe sti diidxaʼ. Peru guníʼ íquebe sicaríʼ: «Ñee zanda guiaaʼ ra chigacaniáʼ riʼ la? Ñee ziuuladxeʼ modo naca ca bicheʼ ne bizanaʼ ni nuu racá la? Ñee ziuuláʼdxicabe modo nacaʼ la?». Despué guniʼbe sicaríʼ: «Bidiéʼ cuenta cadi naquiiñeʼ diʼ guiníʼ iqueʼ puru de naa si, sínuque guiníʼ iqueʼ ximodo gacaniáʼ ca bicheʼ ne ca bizanaʼ. Ngue runi, bineʼ orar Dios gacané naa para ugaandaʼ cani maʼ gudixhe iqueʼ guneʼ. Jnézapeʼ ngue ni gudixhe iqueʼ guneʼ que, purtiʼ yanna nabé nayecheʼ nuaaʼ pur cayacaniáʼ lugar que» (Romanos 4:20). Zacá ni, pa cadi gusaananu de gúninu ni na Dios ne gacanenu sti binni sin guicálunu guicaanu xiixa la? jma nayecheʼ ziuʼnu.
5. Xiñee naquiiñeʼ guiníʼ ique chaahuinu ni chigúninu pa racaláʼdxinu guibáninu casi riuulaʼdxiʼ Dios. Bidii ti ejemplu.
5 Para ganda guibáninu casi riuulaʼdxiʼ Dios la? laaca naquiiñeʼ guiníʼ ique chaahuinu ni chigúninu. Jma jneza nga pa cadi guzáʼbinu binni, purtiʼ zucueezacani laanu de gúninu ni na Dios biaʼ naquiiñeʼ gúninu. Stiidxaʼ Dios riguixhená laanu ne ca diidxaʼ riʼ: «Ni riguiiñeʼ raca esclavu stiʼ hombre ni rutiiñeʼ laa» (Proverbios 22:7). Ni zanda gacané laanu guibáninu casi riuulaʼdxiʼ Jiobá nga guni crenu de guidubi ladxidoʼno zacanebe laanu, ne gúninu xhiiñabe primeru lu xquendanabáninu. Guidúʼyanu ni bizaaca Guoming. Laabe ne jñaabe ne guiropaʼ bizáʼnabe nabezacabe ti lugar ra nabé caru riguixe binni yoo cueza ne gástipeʼ dxiiñaʼ guni binni. Nécapeʼ guyuu ora nin tobi de laacabe qué ñapa dxiiñaʼ la? gunda gudíʼdicabe dxi, purtiʼ gúnnacabe iquiiñecabe cani nápacabe ne gucanésaacabe para guiaxa guiráʼ ni biquiiñecabe. Sicaríʼ guníʼ Guoming: «Nuu biaje huaxiéʼ bueltu riúʼnedu yoo, peru neca zaqué qué huasaanadidu de gácadu precursor ne de gápadu jñaadu. Ne laabe qué rinábadibe laadu gúnidu jma dxiiñaʼ para gápabe luju purtiʼ qué racaláʼdxibe gusaanadu de gúnidu jma lu xhiiñaʼ Dios pur laacani, ne nga nabé rusiecheʼ laadu» (2 Corintios 12:14; Hebreos 13:5).
6. Xi biʼniʼ ti bíʼchinu para bibani modo riuulaʼdxiʼ Dios ne ngaca nga zanda gúninu yaʼ.
6 Pa jma guicá íquenu gúninu ca cosa ni nuu ndaaniʼ guidxilayú riʼ, casi xiixa negocio o sti clase dxiiñaʼ la? zándaca gucueeza cani laanu de gúninu ni na Dios primé lu xquendanabáninu. Chaahuidugá zanda quixhe íquenu gúninu ni, ne cadi naquiiñeʼ guireʼnu gana purtiʼ cadúʼyanu cayaca nagana para laanu gúninu ni. Zacá bizaaca Koichi, ti hombre ni nabé gudxite maquinita. Nécapeʼ dede nahuiinibe biindabe Biblia la? stale iza beeda gácani ti viciu para laabe. Peru ti dxi guníʼ íquebe: «Paraa caquiiñeʼ xquendanabaneʼ pue. Napa jma de 30 iza ne qué huayunediáʼ gastiʼ ni gacané naa lu xquendanabaneʼ». Koichi bibiguetaʼ biindaʼ Biblia ne bidiibe lugar gacané ca xpinni Cristu laabe. Gudiʼdiʼ stale tiempu para bichaabe, peru qué nireedibe gana. Cumu qué nusaanabe de ñuni orarbe Dios ne gucanécabe laabe la? gunda bisaanabe viciu gúpabe que (Lucas 11:9). Yanna la? Koichi nuu nayecheʼ purtiʼ naca siervu ministerial lade ca binni ridagulisaa.
Gúninu dxiiñaʼ biaʼ laanu
7. Xiñee cadi naquiiñeʼ quixhe íquenu gúninu ni cadi canabaʼ Jiobá laanu.
7 Naquiiñeʼ gúninu stale stipa pur gúninu biaʼ gándatiʼ lu xhiiñaʼ Jiobá. Cadi guireʼnu gana o guicháʼbanu (Hebreos 6:11, 12). Neca naquiiñeʼ gúninu stale stipa la? Jiobá qué racalaʼdxiʼ diʼ guireʼnu gana ora gúninu ni na. Ora riénenu qué zanda diʼ gúninu ni nabe ne stipa si stinu la? rusihuínninu nuu ni qué zanda gúninu, ne zacá rusisácanu Jiobá (1 Pedro 4:11). Dxandíʼ nga na Jiobá zacané laanu para gúninu ni na, peru cadi naquiiñeʼ quixhe íquenu gúninu ni cadi canábabe laanu (2 Corintios 4:7). Para gúninu ni na Jiobá sin guidxáganu la? naquiiñeʼ guiníʼ ique chaahuinu paraa iquiiñenu stipa stinu.
8. Xi bizaaca ti precursora ora gucalaʼdxiʼ ñuni jma lu xhiiñaʼ Dios ne lu dxiiñaʼ stiʼ, ne despué xi bíʼnibe para gúnibe jma xhiiñaʼ Dios.
8 Guidúʼyanu xi bizaaca Ji Hye, ti precursora de Asia oriental. Precursora riʼ gupa ti dxiiñaʼ ni nabé bisidxaga laa, bíʼnibe dxiiñaʼ riʼ biaʼ chupa iza. Sicaríʼ guniʼbe: «Bineʼ stipa pur guneʼ jma lu xhiiñaʼ Jiobá ne zaqueca lu dxiiñaʼ stinneʼ, pur ngue gaayuʼ si hora raseʼ guiráʼ dxi. Peru bedandá ti dxi bidxaga xquendabiaaneʼ. Maʼ huaxiéʼ stipa gupaʼ para biʼneʼ xhiiñaʼ Dios ne maʼ qué ñéchediáʼ ora biʼneʼ ni». Para gunda biʼniʼ Ji Hye ni na Jiobá de guidubi ladxidoʼ, guidubi xhialma ne guidubi xquendabiaaniʼ la? gupa xidé biyúbibe ti dxiiñaʼ ra cadi iquiiñebe stale tiempu (Marcos 12:30). Laabe guniʼbe: «Binnilidxeʼ nabé bicaa naa gapa bidxichi, peru naa gudixhe iqueʼ guneʼ ni na Jiobá primeru lu xquendanabaneʼ. Yanna bueltu ni runeʼ ganar riʼ laaca rugaandani para guibaneʼ galán ne siéʼ lari galán gacuaʼ. ¡Aque galán nga maʼ rizaa xpacaandaʼ! Yanna jma nayecheʼ riuaaʼ ora gucheeche diidxaʼ ne jma naguidxi zuhuaa lu stiidxaʼ Dios. Ne zacá ni purtiʼ maʼ cadi nuaadiáʼ lu ca cosa ni zuxheleʼ naa de guneʼ ni na Dios» (Eclesiastés 4:6; Mateo 6:24, 28-30).
9. Pa gucheechenu diidxaʼ, xi zucaani binni guni.
9 Cadi guirádinu zanda gácanu precursor. Pa maʼ huaniisiluʼ, huaraluʼ o napuʼ xiixa guendanagana ni rucueeza lii de guʼnuʼ jma lu xhiiñaʼ Dios la? cadi guireeluʼ gana. Jiobá rusisaca dxiiñaʼ ni cayúniluʼ ne ni cudiiluʼ laabe de guidubi ladxidoʼloʼ (Lucas 21:2, 3). Laaca naquiiñeʼ gánnanu neca huaxiéʼ gúninu ora maʼ zigucheechenu diidxaʼ la? zanda gucaani xcaadxi binni guni ni na Dios. Guiníʼ íquenu canagucheechenu diidxaʼ, maʼ guzanu stale ne caʼruʼ guidxélanu binni gucaadiaga laanu. Peru zándaca tiidiʼ hora o dxi ne ca binni ni bicaadiágacaʼ laanu ca guiniʼcaʼ gudídinu neza ralídxicaʼ yegucheechenu diidxaʼ dede ne cani qué nucaadiaga laanu. Dxandíʼ nga cadi guiráʼ diʼ binni zucaadiaga laanu ora maʼ zigucheechenu diidxaʼ, peru nuu tu laa ziuulaʼdxiʼ gucaadiaga laanu (Mateo 13:19-23). Xcaadxi binni zándaca despué chuláʼdxicaʼ guiziidicaʼ de Dios purtiʼ gúpacaʼ xiixa guendanagana o purtiʼ cayuuyacaʼ maʼ cuchaa modo nabani binni lu Guidxilayú. Intiica ni gucaa laacabe guyúbicabe Dios la? ora gúninu stipa pur gucheechenu diidxaʼ biaʼ gándatiʼ la? cayúninu ni na Dios. Ne ni jma rusiecheʼ laanu nga purtiʼ «tobi si runi né[n]u Dios dxiiñaʼ» (1 Corintios 3:9).
10. Xi zanda guni guiráʼ ca xpinni Cristu.
10 Guiranu zanda gacanenu binnilídxinu, ca bíʼchinu ne bizáʼnanu ni ridagulisaanenu (Gálatas 6:10). Ne pa gacanenu laacabe la? qué zusiaandacabe ni gúninu pur laacabe (Eclesiastés 11:1, 6). Yanna, ca binnigola ne ca siervu ministerial ca ora gúnicaʼ xhiiñacaʼ jneza la? ruquídxicaʼ fe stiʼ ca binni ridagulisaa ne rúnicaʼ dxiiñaʼ sticaʼ jneza. Ne ora gácani zacá la? riniisi xhiiñaʼ Dios. Stiidxaʼ Dios na ora cayúninu stale lu «xhiiña Señor» la? «cadi pur gana si» ni cayúninu (1 Corintios 15:58).
Quixhe íquenu ugaandanu ni naguixhe ique Dios guni para binni
11. Xi xcaadxi dxiiñaʼ zanda gúninu ndaaniʼ xquidxi Dios.
11 Cani dxandíʼ xpinni Cristu rusisácacaʼ xquendanabánicaʼ ne riuuláʼdxicaʼ guibánicaʼ modo na Dios (1 Corintios 10:31). Pa quixhe íquenu gucheechenu diidxaʼ ne gusíʼdinu binni guni dxiiñaʼ ni bisaana Jesús la? zaquiiñeʼ Jiobá lii para gúniluʼ xcaadxi dxiiñaʼ (Mateo 24:14; 28:19, 20). Zanda gacanenu lade ca binni ni ridagulisaanenu ra nuunu, o zanda chuunu ti lugar ra jma caquiiñeʼ chuʼ tu gacané, casi ra riníʼcabe sti diidxaʼ o ndaaniʼ sti guidxi roʼ. Ca binnigola ne ca siervu ministerial ni caʼruʼ guichaganáʼ zanda checaʼ Scuela ra Riziidicabe Gúnicabe Xhiiñaʼ Dios para chigacanecaʼ lade ca neza binni ridagulisaa ra jma caquiiñeʼ chuʼ tu gacané, zándaca ndaaniʼ xquídxicabe o ndaaniʼ sti guidxi roʼ. Ca guendaxheelaʼ ni nácacaʼ precursor zanda checaʼ Scuela stiʼ Galaad para gácacaʼ misioneru. Ne gatigá caquiiñeʼ chuʼ tu gacané gaca dxiiñaʼ ndaaniʼ Yoo Betel ne ra cabí ne cayaca chaahuiʼ Yoo Betel ne Yoo stiʼ Reinu.
12, 13. 1) Xi zanda gacané lii cuiluʼ ti dxiiñaʼ guʼnuʼ ndaaniʼ xquidxi Dios. 2) Bizeeteʼ paraa biquiiñeʼ ti guendaxheelaʼ dxiiñaʼ ni biziidicaʼ.
12 Xi dxiiñaʼ cá íqueluʼ gúniluʼ yaʼ. Cumu maʼ ti xpinni Jiobá lii ne maʼ bidiiluʼ lii laabe la? bidii lugar guluiʼbe lii xi gúniluʼ ne yenanda ni gabi xquídxibe lii. Espíritu stiʼ Dios zacané lii guiníʼ íqueluʼ xii nga jma jneza gúniluʼ (Nehemías 9:20). Ora gápaluʼ ti dxiiñaʼ ndaaniʼ xquidxi Dios zacaneni lii guicaaluʼ xcaadxi dxiiñaʼ, ne guiráʼ ni guiziidiluʼ gúniluʼ zanda iquiiñeʼ cani lii lu sti dxiiñaʼ.
13 Guidúʼyanu ejemplu stiʼ Dennis ne Jenny, ti guendaxheelaʼ ni racané ra ribí Yoo stiʼ Reinu. Gudiʼdiʼ si huracán Katrina ladu gueeteʼ stiʼ Estados Unidos, gudixhe íquecabe chigacanécabe lugar ra gucaná que. Sicaríʼ guníʼ Dennis: «Ni bizíʼdidu ora gucanedu ra cabí Yoo stiʼ Reinu que biquiiñeni laadu para gucanedu ca bíchidu ni nabeza ra bininá huracán que, ne nabé bisiecheʼ nga laadu. Ora bidiicabe xquíxepeʼ laadu pur gucanedu laacabe yendani de ladxidoʼdo. Xcaadxi grupu de binni ni cadi Testigu ni yegacané lugar que jma huaxiéʼ gucanecaʼ. Peru laadu, ca testigu stiʼ Jiobá maʼ biʼniʼ chaahuidu jma de gaayuʼ mil chonna gayuaa yoo ne stale Yoo stiʼ Reinu. Ora guʼyaʼ ca binni de lugar que ni cayúnidu la? riuuláʼdxicaʼ guiziidicaʼ jma de Dios».
14. Xi naquiiñeʼ gúniluʼ pa racaláʼdxiluʼ gácaluʼ precursor.
14 Sti modo para gúniluʼ ni na Dios nga quixhe íqueluʼ gácaluʼ precursor. Pa gúniluʼ ni zacaaluʼ stale ndaayaʼ. Pa gúʼyaluʼ qué zanda gácaluʼ precursor yanna la? zándaca caquiiñeʼ guchaaluʼ xiixa lu xquendanabániluʼ. Biʼniʼ orar Dios casi biʼniʼ Nehemías dxi gudixhe ique guni ti dxiiñaʼ nabé risaca. Laabe gúdxibe Dios: «Jiobá, rinabaʼ lii, [...] gacaneluʼ naa ti guireendú ni guʼneʼ» (Nehemías 1:11). Despué de guni orarluʼ, biʼniʼ cré zacané Dios «ni rucaadiaga oración» ca lii ne biʼniʼ ni gunabuʼ laabe lu oración stiluʼ (Salmo 65:2). Bietenalaʼdxiʼ: pa racaláʼdxiluʼ uguu ndaayaʼ Jiobá dxiiñaʼ stiluʼ la? naquiiñeʼ gusihuínniluʼ cayuʼnuʼ stipa para gúniluʼ ni nabe. Ora maʼ gudixhe íqueluʼ gácaluʼ precursor, cadi gudiiluʼ lugar chuʼ xiixa ni gucueeza lii. Tiidiʼ si dxi zaziidiluʼ guʼnuʼ ni jma jneza, ne ziuuluʼ jma nayecheʼ.
Ti guendanabani ni dxandíʼ risaca
15. 1) Ximodo racané cani bizaaca ca xpinni Cristu ni maʼ napa stale iza de cayuni ni na Dios laanu. 2) Bizeeteʼ ni bizaaca ti xpinni Cristu ni bíʼndaluʼ ndaaniʼ xiixa revista ni jma gucané lii.
15 Xi zacaaluʼ pa guibániluʼ modo na Dios yaʼ. Guniʼné ca xpinni Cristu ni maʼ xadxí cayuni ni na Jiobá, casi cani maʼ napa stale iza de precursor. ¡Nabé sicarú nabánicabe! (Proverbios 10:22.) Zábicabe lii ximodo huayacané Jiobá laacabe gápacabe ni caquiiñecabe, ne dede ora maʼ cadíʼdicabe lu guendanagana jma naroʼbaʼ (Filipenses 4:11-13). Dede lu iza 1955 hasta 1962, revista La Atalaya bizeeteʼ ni bizaaca caadxi xpinni Cristu ni qué nixhélecaʼ de Dios, zeeda ni lu tema ni láʼ «Ni gudixhe iqueʼ guneʼ lu xquendanabaneʼ». Dede dxiqué maʼ huareeruʼ jma tema ni caníʼ ni bizaaca ca xpinni Cristu. Lu guiráʼ ca tema riʼ rihuinni ximodo gudixhe ique ca xpinni Cristu ni na Dios ne guyuucaʼ nayecheʼ casi na lu libru stiʼ Hechos. Ni dxandíʼ nga pa gúʼndaluʼ ni bizaaca ca xpinni cristu riʼ zaníʼ íqueluʼ ndiʼ: «¡Sicaríʼ nga racalaʼdxeʼ guibaneʼ!».
16. Xi zanda guni ti xpinni Cristu para ganda guibani nayecheʼ pur ni guni yaʼ.
16 Aarón, hombre ni bizéʼtenu ra bizulú tema riʼ, guníʼ: «Ndaaniʼ guidxi África binebiaʼyaʼ jma hombrehuiiniʼ ni biyúbicaʼ gúnicaʼ xiixa ni risaca lu xquendanabánicaʼ, peru stale de laacaʼ qué nidxélacaʼ gastiʼ. Yanna laadu cumu gudixhe íquedu gucheechedu stiidxaʼ Reinu stiʼ Dios, ne bibánidu modo nabe la? ngue runi bibánidu nayecheʼ. Zanda guinidu pur ni huayúniduʼ ca «jma nayeche ni rudii que ni ricaa» (Hechos 20:35).
17. Xiñee naquiiñeʼ guibáninu casi na Dios.
17 Yanna lii, xi cá íqueluʼ gúniluʼ ne xquendanabániluʼ yaʼ. Pa cadi naguixhe íqueluʼ gúniluʼ xiixa ndaaniʼ xquidxi Dios la? jma nagueenda zúniluʼ sti cosa ni qué risácapeʼ. Cadi naquiiñeʼ diʼ gunítinu tiempu stinu para guyúbinu ca cosa ni cudii guidxilayú stiʼ Binidxabaʼ riʼ laanu. Ora maʼ guzulú ca «dxi jma nagana» ca, qué zanda diʼ gacané ca bidxichi ca laanu ne neca gácanu tuuxa binni risaca lu guidxilayú riʼ qué zalanu. Ni jma zasaca dxi ca nga pa nuunu galán ne Jiobá. Pa gúninu zacá la? ziuʼnu nayecheʼ purtiʼ nánnanu bíninu ni na Jiobá ne gucanenu binni, ne purtiʼ bibáninu casi riuulaʼdxiʼ Dios (Mateo 24:21; Apocalipsis 7:14, 15).
[Cani cá ñee yaza]
a Bidxaa lácabe.
b Ni biʼniʼ ca testigu stiʼ Jiobá.
Ñee zanda gusieʼnuʼ ca ndiʼ la?
• Ximodo ruuyaʼ Jiobá dxiiñaʼ ni rúninu.
• Pa quixhe chaahuinu ni chigúninu ne gúninu biaʼ laanu, ximodo zacanécani laanu gúninu ni na Dios ne gacanenu binni.
• Xi guiráʼ dxiiñaʼ nga zanda gúninu ndaaniʼ xquidxi Dios.
• Xi naquiiñeʼ gúninu para guibáninu nayecheʼ.
[Dibuju/foto ni zeeda lu yaza 24]
Rúninu gadxé gadxé dxiiñaʼ ndaaniʼ xquidxi Dios
[Ca dibuju/foto ni zeeda lu yaza 25]
Para gúninu ni na Jiobá de guidubi ladxidoʼno naquiiñeʼ guidúʼyanu gunáʼ nga cani jma risaca gúninu