Padxí gueeda Reinu stiʼ Dios
«SEÑOR, ñee yanna nga quixhu guni mandar ca binni Israel sti tiru la?» (Hechos 1:6.) Ne ni gunabadiidxaʼ ca discípulo riʼ, bisihuínnicaʼ nuucaʼ gánnacaʼ padxí nga guni mandar Jesús lu Reinu stiʼ Dios. Nécapeʼ maʼ gudiʼdiʼ chupa mil iza de gunabadiidxacabe ngue Jesús, peru ca dxi stinu riʼ stale binni rinabadiidxaruʼ, padxí gueeda Reinu stiʼ Dios.
Cumu ni jma bisiidiʼ Jesús nga de Reinu stiʼ Dios la? ngue runi nánnanu bicábibe ni rinabadiidxaʼ binni. Ne zacá ni purtiʼ ndaaniʼ Biblia cayeeteʼ de «dxi ibigueta[be]», o ca dxi chuʼbe lade binni (Mateo 24:37). Peru xi riníʼ ca diidxaʼ «dxi ibigueta[be]» ca lu textu riʼ yaʼ. Guidúʼyanu tapa cosa ni rusiidiʼ Biblia ni zacané laanu gánnanu ximodo nga maʼ nuu Cristu lade binni.
◼ 1. Dxi maʼ chuʼ Cristu lade binni ca zácani despué de gátibe. Lu tobi de ca ejemplu ni biquiiñeʼ Jesús, guniʼbe zeeda gácabe casi ti hombre ni guyé «ti guidxi zitu zicaa guiʼchi sti para ibigueta cui de rey ndaani xquidxi» (Lucas 19:12). Ximodo guca ejemplu riʼ yaʼ. Dxi guti Jesús ne biasa de lade gueʼtuʼ la? guyebe «ti guidxi zitu» nga nga zeeda gaca guibáʼ. Ne casi rieeteʼ lu sti ejemplu casi ni maʼ bizéʼtenu ca, gudiʼdiʼ si stale dxi bibiguétabe ne gúcabe Rey (Mateo 25:19)
Gudiʼdiʼ si caadxi iza de zeʼ Jesús guibáʼ la? apóstol Pablu bicaa ca diidxaʼ riʼ: «Jesús la? ti tiru si bixhii rini stiʼ, ne ngue si para biaxa irá ni. Oraque ze be ibáʼ ne ma zuba be cueʼ Dios. Ne raqué cabeza be dede dxi ma guta dxí irá ni rucaa lú laabe xa ñee be» (Hebreos 10:12, 13). Ngue runi, dxi yendá Jesús guibáʼ la? gulézabe stale iza dede ora bicuí Jiobá laabe lu trono casi Rey. Dxi ca nga guca Cristu Rey ne bizulú guyuu lade binni. Peru, ñee zuuyaʼ binni ora chuʼbe ládecaʼ la?
◼ 2. Qué zuuyaʼ diʼ binni Cristu ora maʼ nuu ládecaʼ. Jesús guníʼ zahuinni caadxi señal ora maʼ nuube lade binni (Mateo 24:3). Guiníʼ íquesinu ni chiguininu riʼ: pa ñaca ñuuyaʼ binni ora maʼ nuu Cristu ládenu, cadi dxandíʼ qué niquiiñeʼ diʼ ti señal la? Quíxhenu ti ejemplu. Guníʼ ique cheluʼ ti lugar para gúʼyaluʼ nisadóʼ. Zándaca neza zeluʼ zuuyaluʼ stale letreru ra gabi lii ximodo chindaluʼ, peru ora maʼ yendaluʼ guriá nisadóʼ ne gúʼyaluʼ guiráʼ nisa ca, ñee zabezuʼ guʼyuʼ ti letreru ni gabi lii: «Ndiʼ nga nisadóʼ» ca la? ¡Coʼ njaʼ! Xi para gucaacabe ti letreru para gúʼyaluʼ ti cosa ni cahuinni dxichi ca yaʼ.
Pa guníʼ Jeśus de ti señal ni gusihuinni maʼ nuube lade binni la? bíʼnibe ni purtiʼ qué zuuyaʼ diʼ binni laabe. Ni dxandíʼ nga señal ca zacaneni laanu gudiʼnu cuenta de xiixa ni bizaaca guibáʼ. Nga runi, guníʼ Jesús: «Dxi uzulú guni mandar [Reinu stiʼ] Dios nga cadi ni ihuinni» (Lucas 17:20). Yanna, xii nga gusihuinni maʼ nuu Cristu lade binni yaʼ.
◼ 3. Zahuinni maʼ nuu Jesús lade binni purtiʼ ziuu stale guendanagana lu Guidxilayú. Jesús guníʼ dxi gaca Rey guibáʼ ne chuʼ lade binni la? ziuu guendaridinde, guendarindaana, zaca stale xu roʼ, ziuu guendahuará ne guendarucheené ley lu Guidxilayú (Mateo 24:7-12; Lucas 21:10, 11). Xiñee zahuinni ca guendananá riʼ yaʼ. Biblia na nabé cadxiichi Binidxabaʼ, «ni runi mandar ndaani» guidxilayú, purtiʼ nanna maʼ huaxiéʼ dxi napa dede dxi bizulú Cristu cayuni mandar casi Rey ne nuu lade binni (Juan 12:31; Apocalipsis 12:9, 12). Ne ca dxi nabáninu riʼ stale señal nga cusihuinni nabé cadxiichi Binidxabaʼ ne maʼ nuu Cristu lade binni. Ne cahuinni cayaca cani lu guidubi Guidxilayú dede lu iza 1914, ne iza ca na cani ruundaʼ de historia bichaa modo nabani binni guidxilayú.
Zándaca ne guiráʼ ni maʼ guninu ca guiníʼ íqueluʼ puru cosa malu cani, peru cadi zacá diʼ ni. Ca cosa ni cahuinni yanna ca culuíʼ cani maʼ cayuni mandar Reinu stiʼ Dios guibáʼ. Ne qué zandaa diʼ zuni mandar ni lu Guidxilayú. Peru, ximodo zanda ganna binni dxandíʼ nuu Reinu ca ne xi naquiiñeʼ gúnicabe para guibánicabe dxi guni mandar Reinu ca lu Guidxilayú riʼ yaʼ.
◼ 4. Zahuinni maʼ nuu Cristu lade binni purtiʼ zareecheʼ diidxaʼ lu guidubi naca Guidxilayú. Jesús guníʼ dxi maʼ chuʼ lade binni ca zácani casi ca «dxi bibani Noé» (Mateo 24:37-39).a Noé cadi bizáʼ si ti arca, sínuque laaca gúdxibe binni gusaanacaʼ guiráʼ cosa malu bíʼnicaʼ (2 Pedro 2:5). Gúdxibe binni zusabanáʼ Dios cani cadi cayuni ni jneza. Jesús guníʼ dxi maʼ chuʼ lade binni zuni ca xpinni ti dxiiñaʼ casi biʼniʼ Noé. Laabe guniʼbe ca diidxaʼ riʼ: «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo 24:14).
Casi maʼ bidúʼyanu lu tema ni gudídinu ca, Reinu stiʼ Dios ca zunitiluni ca gobiernu nuu lu guidxilayú. Ora rucheeche ca xpinni Cristu diidxaʼ rábicaʼ binni maʼ cadi candaa diʼ zuni mandar Reinu stiʼ Dios lu Guidxilayú. Zacá la? ca binni ni gucaadiaga ca xpinni Cristu riʼ, zanda guibánicaʼ dxi maʼ guni mandar Reinu stiʼ Dios ca. Nga runi, ne cani maʼ biziidiluʼ ca, xi cá íqueluʼ gúniluʼ yaʼ.
Ñee zacaaluʼ ca ndaayaʼ stiʼ Reinu stiʼ Dios ca la?
Cani bisiidiʼ Jesús binni dxi bicheeche diidxaʼ bicaa cani binni cuézacaʼ xiixa ni galán ni qué huayuu dxi guʼyaʼ binni gaca. Maʼ raca stale mil iza dede dxi bichee Adán, Jiobá guníʼ zaguu ti gobiernu ni guni ni maca gudixhe íquebe. Xii nga ni gudixhe íquebe gúnibe yaʼ. Laabe gudixhe íquebe guibani binni ni guzuubaʼ diidxaʼ ndaaniʼ ti paraísu lu Guidxilayú sin gati. Ñee qué riéchenu gánnanu maʼ cayuni mandar gobiernu riʼ guibáʼ la? Riéchenu pue, Reinu stiʼ Dios ca dxandíʼ nuuni.
Ca dxi stinu riʼ, Rey stiʼ Dios maʼ cayuni mandar lade ca xhenemigu (Salmo 110:2). Ndaaniʼ Guidxilayú ra cadi cayuni binni ni jneza ne qué gánnacaʼ pa nuu Dios la? Mesías ca cayuni ni na Dios, cuyúbibe ca binni racalaʼdxiʼ gunibiáʼ chaahuiʼ Dios ti guni adorarcaʼ laabe de guidubi ladxidoʼcaʼ (Juan 4:24). Binni de guiráʼ raza, de gadxé gadxé iza, binni ni napa bueltu ne ni qué gapa zanda guicaa ti guendanabani ni qué zaluxe ne guibánicaʼ dxi guni mandar Reinu stiʼ Dios (Hechos 10:34, 35). Nga runi, rinábadu lii yánnaca guiziidiluʼ jma de Reinu ca, purtiʼ pa gúniluʼ ni la? zabániluʼ sin gátiluʼ ora maʼ guni mandar Reinu stiʼ Dios (1 Juan 2:17).
[Cani cá ñee yaza]
a Nuu stale Biblia cadi jneza diʼ rutiixhicaʼ diidxaʼ, dxi maʼ chuʼ Cristu lade binni, ne zacá gadxé ni rusiidicaʼ. Peru ca diidxaʼ guníʼ Jesús ca cusihuinni cadi jneza diʼ modo nácabe. Nuu Biblia rutiixhi diidxaʼ ora chuʼ Cristu lade binni ca casi, «dxi gueeda» Cristu o «dxi ibigueta», ne ca diidxaʼ ca rusihuinni nagueendaca zeedabe. Peru, biiyaʼ chaahuiʼ, Jesús qué nuchaaga diʼ dxi maʼ chuʼ lade binni ca ne Nisaguié naroʼbaʼ biaba dxi bibani Noé que, sínuque bichaagabe ni ca «dxi bibani Noé», ne ngue la? yené stale tiempu. Cásica bizaaca ca dxi stiʼ Noé que, ca dxi maʼ chuʼ Cristu ládenu ca stale binni zacá ique puru guni xhiiñaʼ, ne qué zulábicaʼ ni gabi ca xpinni Cristu laacaʼ de ni chiguizaaca.
[Ca dibuju/foto ni zeeda lu yaza 8]
Ca noticia feu ni runadiáganu guiráʼ dxi ca rusihuínnicani zeeda guidxiña caadxi dxi nabé galán
[Ra gucuaacabe dibuju o foto]
Guiibaʼ ni runidé avión: U.S. Army photo