Guidxíñanu Dios
Ti bixhózenu ni qué zanda guchaaganu ne guirutiʼ
«BIXHOZEʼ.» Cadi dxandíʼ huaxiéʼ si nga diidxaʼ casi ni maʼ bizéʼtenu ca ni rucaa laanu gusihuínninu ni runi sentirnu la? Dxandíʼ, purtiʼ ora nadxii bixhoze binni xiiñiʼ la? racané laacabe guiniisicabe. Nga runi, nuu stale razón para guzeeteʼ Biblia Jiobá nga «Bixhoze[n]u» (Mateo 6:9). Peru, ximodo nga laabe ne ca xiiñibe yaʼ. Para guicábinu guendarinabadiidxaʼ riʼ la? guidúʼyanu xi gudxi Jiobá Jesús dxi guyuunisa. Pur modo riníʼnebe ca xiiñibe nga zánnanu ximodo laabe.
Lu beeu octubre stiʼ iza 29, guyuunisa Jesús ndaaniʼ guiiguʼ Jordán. Biblia ruzeeteʼ ni bizaaca dxi que: «Ne casi biluxe uyuu nisa be, biree be de ndaani nisa que, ne mala bixale ibáʼ ne biiya be zeeda yete Espíritu Santu de ibáʼ, casi ti paloma, biaana dxí luguiá be. Oraque ucuá ti ridxi de ibáʼ: Ndi nga Xiiñe ni nadxiee ne ni rusieche naa» (Mateo 3:16, 17).a Jiobá peʼ ngue guníʼ ca diidxaʼ ca, ne nga ruluíʼ laanu ximodo laabe ne ca xiiñibe. Yanna, guidúʼyanu chonna cosa ni gudxi Jiobá Xiiñiʼ.
Ni gúdxibe xiiñibe prime nga: «Ndi nga Xiiñe», ne ora guniʼbe ca diidxaʼ riʼ casi ñaca ñábibe xiiñibe: «Nabé ridxá tipa ladxiduáʼ nga guiniéʼ lii nga xiiñeʼ». Zacá ni, cani napa xiiñiʼ naquiiñeʼ uguucabe naróʼ stiʼ xiiñicabe, cueecabe tiempu para laacaʼ ti gánnacaʼ nadxiicabe laacaʼ. Nga runi, cani nanna caquiiñeʼ gábicaʼ xiiñicaʼ sicaríʼ la? rúnicaʼ stipa pur gúnicaʼ ni maʼ bizéʼtenu ca. Ñee riníʼ íqueluʼ pabiáʼ nayecheʼ guyuu Jesús neca maʼ huaniisi, ora guluu Bixhózebe naróʼ stiʼ la?
Guiropa ni gúdxibe xiiñibe nga: «Ni nadxiee». Ora guníʼ Jiobá zacá la? bisihuínnibe pabiáʼ nadxiibe xiiñibe. Nga runi, ora bixhoze binni gabi xiiñiʼ guizáʼ nadxii laacabe ne gusihuinni ni pur ni guni la? racané ni guiniisi ca xiiñibe galán. Rihuinni dxíchica nabé nayecheʼ guyuu Jesús ora binadiaga guníʼ Bixhoze nadxii laa.
Ne maʼ para guilúxebe gúdxibe xiiñibe ca diidxaʼ riʼ: «Ni rusieche naa». Ne ca diidxaʼ riʼ Jiobá bisihuinni nayecheʼ nuu pur ni bíʼnibe. Ora guníʼ Jiobá ca diidxaʼ riʼ la? casi ora niniʼbe: «Xiiñehuiineʼ, nabé nayecheʼ nuaa pur ni bíʼniluʼ». Zacaca, cani nadxii xiiñiʼ la? riéchecaʼ ora guiníʼ o guni xiiñicaʼ xiixa ni jneza. Ora guiníʼcabe zacá riguucabe gana xiiñicabe. Ne nanna dxíchinu ora binadiaga Jesús nayecheʼ nuu Bixhoze ne laa la? laaca guluuni gana laabe.
Dxandíʼ peʼ, Jiobá nga Bixhózenu ni qué zanda guchaaganu ne guirutiʼ. Ñee riuulaʼdxuʼ gapuʼ ti bixhoʼzoʼ casi laabe la? Ziécheluʼ gánnaluʼ zanda guidxíñaluʼ gaxha de Dios. Pa guiziidiluʼ de Jiobá, guni creluʼ laabe ne quixhe íqueluʼ guʼnuʼ ni nabe de guidubi ladxidoʼloʼ la? zacanebe lii. Stiidxaʼ Dios na: «Laidxiña gaxha de Dios, ne laa zadxiña gaxha de laatu» (Santiago 4:8). Gástiruʼ sti cosa ni nuu lu guidxilayú riʼ zucaa lii guni sentirluʼ nuu tu cayapa lii, purtiʼ ora chuʼluʼ gaxha de Jiobá nga zuni sentirluʼ zacá, ne laabe nga ni jma galán gaca Bixhózenu ne guirútiruʼ.
[Cani cá ñee yaza]
a Historia riʼ laaca cuzeeteʼ libru stiʼ Lucas ni, raríʼ caníʼ biquiiñeʼ Jiobá diidxaʼ «lii» ora guníʼ: «Lii nga Xiiñe ni nadxieeʼ ne ni rusieche naa» (Lucas 3:22).