Xi naquiiñeʼ guni ti hombre para gusiniisi xiiñiʼ jneza

«Hermanu caʼ, cadi uyubi tu uchiichi tu xiiñi tu, ti cadi iree ca gana.» (Colosenses 3:21)

NIN ti hombre nga qué racalaʼdxiʼ guchiichi ca xiiñiʼ. Peru xi zanda gúnibe para cadi guchiichibe laacaʼ yaʼ. Primeru naquiiñeʼ gudiibe cuenta risácapeʼ nga dxiiñaʼ ni cayúnibe. Ti revista ni rudii conseju galán na: «Pur modo huabani binni rihuinni nabé riquiiñeʼ bixhoze binni para guiniisi xiiñiʼ, purtiʼ racaneni ca baʼduʼ ca guiníʼ íquecaʼ jneza ne chuʼcaʼ nazaaca».

Yanna, xii nga dxiiñaʼ stiʼ hombre ca yaʼ. Ndaaniʼ stale yoo la? riníʼ íquecabe laabe nga jma nápabe derechu uguu jnézabe ca xiiñibe. Nga runi stale gunaa rabi xiiñiʼ sicaríʼ ora guchee: «¡Gupagá si lii ora gueeda bixhoʼzoʼ!». Para guni ca baʼduʼ ca ni jneza ora guiniisicaʼ la? caquiiñeʼ uguu jneza bixhózecaʼ laacaʼ modo naquiiñeʼ gácani ne gúʼyacaʼ gúnicabe ni gudíxhecaʼ. Peru para gusiniisi ti hombre xiiñiʼ jneza la? caquiiñeʼ guni xcaadxi cosa.

Triste nga guininu nuu stale hombre qué rudii ti ejemplu galán xiiñiʼ. Stale de laacaʼ qué nusiniisi bixhózecaʼ laacaʼ. Xcaadxi de laacaʼ qué rulábicaʼ ca xiiñicaʼ ne nadúxhucaʼ ne laacabe purtiʼ zacá bisiniisicabe laacaʼ. Yanna, xi zanda guni ca hombre ca para cadi gúnicaʼ zacaca ne gusiniisicaʼ xiiñicaʼ jneza yaʼ.

Lu Biblia zeeda stale conseju ni jma jneza guni binni ne ni jma zacané binnilidxi. Ne cadi guiníʼ íquenu zuninácani laanu. Purtiʼ cadi zacá diʼ ni, ca conseju zeeda luni rusihuínnicani ni na Jiobá, Dios ni gulaquistí chuʼ familia (Efesios 3:14, 15). Nga runi, guiráʼ hombre ni napa xiiñiʼ naquiiñeʼ gucaadiaga chaahuiʼ ni cá lu Biblia.a

Naquiiñeʼ gusiniisi binni xiiñiʼ jneza purtiʼ zacá zácacabe nazaaca, zuni sentírcabe nuu tu nadxii laacabe ne laaca ziuucabe gaxha de Dios. Pa ti baʼduhuiiniʼ riuulaʼdxiʼ chuʼ gaxha de bixhoze la? jma nagueenda zaca para laabe chuʼbe gaxha de Dios. Purtiʼ casi na Biblia, Jiobá nga bizáʼ laanu, ne zanda guininu laabe nga Bixhoze guiráʼ binni (Isaías 64:8). Yanna chiguzéʼtenu xhoopaʼ cosa ni naquiiñeʼ gudii ti hombre ca xiiñiʼ, ne caadxi conseju stiʼ Biblia ni zacané laabe gúnibe ni.

1 Gunnaxhii ca xiiñiluʼ

Jiobá nga ti ejemplu ni jma galán ni naquiiñeʼ chinanda ca hombre ca, purtiʼ laabe nadxiibe guiráʼ binni. Sicaríʼ na Biblia runi sentir Dios pur Jesús, primé xiiñiʼ: «Nadxii Dios Xiiñi» (Juan 3:35; Colosenses 1:15). Stale biaje bisihuinni Dios nadxii laabe ne guyuulaʼdxiʼ ni bíʼnibe. Casi dxi guyuunisa Jesús que la? Jiobá guníʼ sicaríʼ dede guibáʼ: «Lii nga Xiiñe ni nadxieeʼ ne ni rusieche naa» (Lucas 3:22). Nga runi qué liica nidiʼdiʼ ndaaniʼ ique Jesús cadi nadxii Bixhoze laa. Xi zanda guiziidiʼ ca hombre ca de ejemplu stiʼ Dios yaʼ.

Primé la? naquiiñeʼ gábitu xiiñitu pabiáʼ nadxiitu laacaʼ neca gácani nagana para laatu. Sicaríʼ guníʼ Kelvin, ti hombre napa gaayuʼ xiiñiʼ: «Nabé ruyubeʼ modo gabeʼ ca xiiñeʼ nadxiee laacaʼ ne gusihuinneʼ pabiáʼ rizaaladxeʼ cada tobi de laacaʼ. Dxi gúcacabe jma nahuiiniʼ la? laaca bichaa pañal stícabe ne bigazeʼ laacabe». Laaca naquiiñeʼ ganna ca xiiñitu riéchetu ora gúnicabe xiixa cosa jneza. Nga runi, lugar de guinábatu laacabe gúnicabe guiráʼ cosa jneza ne tindenetu laacabe cada biaje gucheecabe la? jma galán gusisácatu ni rúnicabe. Donizete, ti hombre ni napa chupa baʼdudxaapaʼ guníʼ sicaríʼ: «Naquiiñeʼ guyubi hombre ca pora gabi ca xiiñiʼ galán ni rúnicaʼ». Ora guʼyaʼ ca baʼduhuiiniʼ ca riuulaʼdxiʼ bixhózecaʼ ni rúnicaʼ la? runi sentircaʼ risácacaʼ para laacabe ne racaneni para chúʼcabe jma gaxha de Dios.

2 Bidii ti ejemplu galán laacabe

Sicaríʼ caníʼ Juan 5:19 de Jesús: «Qué zanda di guni Xiiñi Dios gasti de laa si, pa qué guʼya guni Bixhoze ni». Xiiñiʼ binni laaca runi zacaca. Casi pa ruuyabe runi respetar bixhózebe jñaabe ne rusisácabe laa la? ora maʼ guiniisibe laaca zúnibe zacaca. Cadi ca hombrehuiiniʼ casi nga rúnicaʼ ni gúʼyacaʼ de bixhózecaʼ, sínuque ca dxaapahuiiniʼ ca laaca maʼ gadxé si zaníʼ íquecaʼ de ca hombre ca pur ni gúʼyacaʼ.

Guzéʼtenu sti ejemplu. Guníʼ ique raca nagana para ca xiiñiluʼ guiniʼcaʼ gutiidilaʼdxiʼ binni stóndacaʼ ora gucheecaʼ. Lii nga chigusiidiluʼ laacabe xi naquiiñeʼ gúnicabe. Kelvin guníʼ xi biʼniʼ ora gundaa chupa xiiñibe ti cámara guizáʼ caru. Guizáʼ bidxiichibe óraque, gudápabe lu mexaʼ nuu raqué dede gúcani chupa ndaa. Despué nabé feu modo biʼniʼ sentirbe ne gúdxibe xheelabe ne ca xiiñibe gutiidiláʼdxicaʼ stóndabe. Yanna riʼ qué raca nagana para ca xiiñibe guiniʼcaʼ gutiidiláʼdxicabe stóndacaʼ, ne riniʼbe rúnicabe ni purtiʼ bíʼyacabe bíʼnibe zacaca.

3 Biyubi chuʼtu nayecheʼ

Jiobá nga ti «Dios nayecheʼ» (1 Timoteo 1:11, NM). Nga runi nabé riuulaʼdxiʼ Xiiñibe chuʼ gaxha de laabe. Ca diidxaʼ ni cá lu Proverbios 8:30 rusihuinni xi runi sentir Jesús pur Jiobá: «Guyuaa gaxha de laabe casi tobi ni runi xhiiñabe jnézapeʼ, [...] guyuaa nayecheʼ nezalube guiráʼ dxi». Cadi dxandíʼ rihuinni nabé xhamígucabe la?

Ca xiiñitu caquiiñeʼ chuʼcaʼ nayecheʼ. Ne para ganda gácani zacá napa xidé cuee hombre ca tiempu para quitené ca xiiñiʼ. Ora guninebe ca xiiñibe xiixa para chúʼcabe nayecheʼ la? racaneni laabe para gaca xhamígube ca xiiñibe jma. Felix, ti hombre napa ti xiiñiʼ ni maʼ caniisi na jneza nga guni binni zacá. Laabe guniʼbe: «Jma xhamígudu yanna purtiʼ ribee tiempu para laabe. Riguítedu juntu, rizanedu ca xhamígudu ne riuudu caadxi lugar ra riuuláʼdxidu. Guiráʼ ca ndiʼ cayané laadu para chuʼ binnilídxidu tobi si».

4 Bisiidiʼ laacabe de Dios

Bixhoze Jesús nga bisiidiʼ laa guiráʼ ni nanna. Nga runi guniʼbe: «Rue nia binni ni gudxi si [Bixhozeʼ] naa iniéʼ» (Juan 8:26). Dios na naquiiñeʼ gusiidiʼ guiráʼ hombre ca xiiñiʼ guibani jneza ne gusiidiʼ laacabe de laa. Tobi de laacani nga gacanebe ca xiiñibe gannaxhii ca conseju stiʼ Dios. Ne naquiiñeʼ guzulube dede ora nahuiiniruʼ ca baʼduʼ ca (2 Timoteo 3:14, 15). Nahuiiniruʼ xiiñiʼ Felix que dxi bizulú biindanebe laa Libru stinneʼ de ca historia stiʼ Biblia.b Dxi jma maʼ ziniisi xiiñibe la? biindanebe laa xcaadxi libru ra zeeda ca cosa ni maʼ zanda guiziidibe biaʼ iza stibe.

Donizete guníʼ: «Nagana nga para gacané binni ca xiiñiʼ chuuláʼdxicaʼ guʼndanécabe laacaʼ Biblia. Neca zacá, bixhózecabe naquiiñeʼ gusihuinni risaca para laa guiziidiʼ de Dios; purtiʼ pa qué gúnibe ni la? zudii ca xiiñicabe cuenta laaca qué risaca ni para laabe». Carlos, ti hombre ni napa chonna hombrehuiiniʼ, guníʼ sicaríʼ: «Riuʼdu tobi si guiráʼ semana para guinidu xi caquiiñeʼ ca binnilídxidu. Guiradu zanda cuidu xidé racaláʼdxidu guinidu». Kelvin, guniʼné ca xiiñiʼ de Dios guiráʼ ora ne ratiica. Ni bíʼnibe ca rusietenaláʼdxini laanu ni guníʼ Moisés riʼ: «Ca diidxaʼ cayabeʼ lii yannadxí riʼ naquiiñeʼ gapuʼ ni ndaaniʼ ladxidoʼloʼ; ne naquiiñeʼ gusiidiluʼ ni xiiñiluʼ ne gábiluʼ ni laabe ora maʼ nuutu ra lídxitu, ne ora maʼ zetu paxaraa ne ora gátatu ne ora guiásatu» (Deuteronomio 6:6, 7).

5 Caquiiñeʼ gulídxeluʼ laacabe

Riquiiñeʼ gulídxetu ca xiiñitu para ganda guiniisicaʼ jneza. Nuu hombre riníʼ ique culidxe ca xiiñiʼ nga ora riguiñe laacabe, ora guiniʼné laacabe naduxhuʼ ne ora rusituí lúcabe. Peru Biblia na cadi jneza diʼ nga guniná bixhoze binni xiiñiʼ ora gulidxe laacabe. Laani riniʼni naquiiñeʼ gusihuinni ca hombre ca nadxiicaʼ xiiñicaʼ ora gulídxecaʼ laacabe, cásica runi Jiobá ni (Hebreos 12:4-11). Biblia na: «Cadi guni tu xiixa para uchiichi si tu xiiñi tu, sínuque lausiidi laacabe ne laulidxe laacabe. Lausiniisi laacabe modo na [Jiobá]» (Efesios 6:4).

Ziuu ora zaguíxhebe ti castigu para laacaʼ. Peru naquiiñeʼ gusiénebe xiiñibe xiñee chigúnibe ni. Cadi galán diʼ guni bixhózecabe xiixa ni gucaa laacabe guiníʼ íquecabe qué risaca ni rúnicabe o ni riníʼcabe. Biblia na cadi jneza diʼ nga guniná binni xiiñiʼ (Proverbios 16:32). Kelvin guníʼ: «Ca biaje gudixheʼ xiixa castigu para laacabe pur qué ñúnicabe xiixa cosa jneza la? bisieneʼ laacabe cayuneʼ ni purtiʼ nadxiee laacabe».

6 Caquiiñeʼ gápaluʼ laacabe

Laaca naquiiñeʼ gápatu ca xiiñitu de ca cosa ni zanda guniná laacabe o de ca binni ni zándaca gucaa laacabe gúnicabe cosa malu. Ndaaniʼ guidxilayú malu riʼ nuu stale binni qué iquiiñeʼ ni racalaʼdxiʼ quite ique ca baʼduhuiiniʼ ca o guniná laacabe (2 Timoteo 3:1-5, 13). Ximodo zanda gápaluʼ ca xiiñiluʼ yaʼ. Guizáʼ galán conseju ni cudii Biblia riʼ: «Binni nuu xpiaaniʼ la? rucaachilú ora guʼyaʼ maʼ zeeda xiixa guendanagana ni zuniná laa, peru ni cadi nuu xpiaaniʼ la? runi guiráʼ ni racalaʼdxiʼ ne racaná» (Proverbios 22:3). Nga runi, pa racaláʼdxiluʼ gápaluʼ ca xiiñiluʼ de ca yuubaʼ ca la? naquiiñeʼ gatanaluʼ. Biiyaʼ xii nga ca cosa ni zándaca gueeda guniná laacabe ne gudxi laacabe xi naquiiñeʼ gúnicabe. Quíxhenu ti ejemplu. Pa riquiiñeʼ ca xiiñiluʼ Internet la? bisiene laacabe modo iquiiñecabe ni jneza. Tobi de ca cosa ni zanda gúnitu nga gápatu computadora ca ti lugar ra zanda gúʼyatu ni cayúnicabe.

Laaca naquiiñeʼ gusiidiʼ ti hombre ca xiiñiʼ xi guni ti cadi guiaba lu ca trampa ni nuu ndaaniʼ guidxilayú malu riʼ. Ñee nanna ca xiiñiluʼ xi naquiiñeʼ gúnicaʼ pa chuʼ tu gacalaʼdxiʼ guni laacabe xiixa cosa malu ora qué guínniluʼ la?c Ca baʼduhuiiniʼ ca naquiiñeʼ gánnacaʼ gápacaʼ ra nácacaʼ hombre o ra nácacaʼ gunaa ti cadi chuʼ tu guni laacabe xiixa cosa feu. Kelvin na: «Qué nudiéʼ lugar niziidicabe ca cosa riʼ de sti binni o de ca maestru stícabe. Bidiéʼ cuenta naa ngue naquiiñeʼ gusiideʼ ca xiiñeʼ ni naquiiñeʼ gánnacaʼ de ra nácacaʼ hombre o ra nácacaʼ gunaa ne de ca binni ni rilá xoo ca baʼduhuiiniʼ ca». Biniisi guiráʼ ca xiiñibe ne guirutiʼ tu ñuniná laacaʼ, yanna maʼ bichaganacaʼ ne nabánicaʼ nayecheʼ.

Gunabaʼ gacané Dios lii

Ni jma risaca guni ti hombre pur ca xiiñiʼ nga gacané laacabe chúʼcabe gaxha de Dios. Ne riquiiñepeʼ nga ejemplu stibe. Donizete guníʼ: «Naquiiñeʼ gusihuínninu pabiáʼ risaca chuʼnu gaxha de Dios, jmaruʼ si ora cadídinu lu xiixa guendanagana. Oracapeʼ nga rusihuinni ti hombre pa runi cré zacané Jiobá laa. Ora guni orartu Dios ne binnilídxitu la? naquiiñeʼ gudiitu xquíxepeʼ laabe purtiʼ nacháʼhuibe, zacá zudii ca xiiñitu cuenta pabiáʼ risaca gaca xhamígucaʼ Dios».

Yanna, xi naquiiñeʼ guni ti hombre para gusiniisi xiiñiʼ jneza yaʼ. Naquiiñeʼ gúnibe ni na ca conseju stiʼ Jiobá, purtiʼ laa si nga jma nanna ximodo guiniisi xiiñiʼ binni. Pa chinándaluʼ ca conseju zeeda lu Stiidxaʼ Dios para gusiniisiluʼ ca xiiñiluʼ la? laaca zuuyuʼ zaca ni cá lu Proverbios 22:6: «Bisiidiʼ xiiñiluʼ neza ra naquiiñeʼ saʼ; ora guióʼxhobe qué zareechube de neza ca».

[Cani cá ñee yaza]

[Dibuju/foto ni zeeda lu yaza 25]

Naquiiñeʼ quixhe hombre ti ejemplu galán para ca xiiñiʼ

[Dibuju/foto ni zeeda lu yaza 26]

Hombre ni rusiniisi xiiñiʼ jneza la? rusiidiʼ laacabe de Dios

[Dibuju/foto ni zeeda lu yaza 27]

Naquiiñeʼ gusihuinni hombre nadxii xiiñiʼ ora gulidxe laabe