Caquiiñenu gabi Dios laanu ximodo gúninu guiráʼ cosa
«Laabe nga Dios stinu ne qué ziuu dxi gusaana de gácabe ni. Laabe nga gábibe laanu xi naquiiñeʼ gúninu dede ora gátinu.» (SAL. 48:14.)
1, 2. Xiñee riquiiñeʼ gudiʼnu lugar gabi Jiobá laanu xi naquiiñeʼ gúninu ne cadi guiníʼ íquenu zanda gúninu xiixa laasinu, ne xi chiguicábinu lu tema riʼ.
¡QUÉ raca nagana para laanu guidúʼyanu ca cosa malu ca casi xiixa ni risaca o galán! (Pro. 12:11.) Ora dxandíʼ racaláʼdxinu gúninu xiixa ni cadi jneza la? ladxidoʼno qué ziaanadxí dede que gucaa laanu gúninu ni (Jer. 17:5, 9). Ngue runi, biáʼsipeʼ nga gunabaʼ salmista que Jiobá gacané laa: «Biseendaʼ biaaniʼ stiluʼ ne bisiidiʼ naa ni naquiiñeʼ gannaʼ. Laacani gábicani naa xi naquiiñeʼ guneʼ» (Sal. 43:3). Biʼniʼ cré hombre riʼ zanda gacané Jiobá laa, lugar de niníʼ ique zanda guni ca cosa ca laasi, ne jneza nga bíʼnibe zacá purtiʼ Jiobá nga ni jma nanna. Laaca galán nga guinábanu Dios gabi laanu xi naquiiñeʼ gúninu para sanu jneza.
2 Yanna, xiñee naquiiñeʼ guni crenu ni gabi Jiobá laanu que ni gabi sti binni laanu yaʼ. Pora ndiʼ riquiiñeʼ guyúbinu gusiidiʼ Dios laanu yaʼ. Gunáʼ ca guenda ni riquiiñeʼ gápanu para ganda gusiidiʼ Jiobá laanu ne ximodo rúnibe ni yanna yaʼ. Tema ni cadúʼndanu riʼ zacabi cani gunabadiidxanu ca, ne risaca nga gánnanu cani.
Xiñee zanda guni crenu ni riníʼ Jiobá
3-5. Xiñee runi crenu de guidubi ladxidoʼno guiráʼ ni rusiidiʼ Jiobá laanu.
3 Jiobá nga Bixhózenu ni nuu guibáʼ (1 Cor. 8:6). Laabe runibiáʼ chaahuibe laanu ne dede zanda gánnabe xi nuu ndaaniʼ ladxidoʼno (1 Sam. 16:7; Pro. 21:2). Rey David guníʼ sicaríʼ: «Lii nannuʼ guiráʼ ni runeʼ, nannuʼ pora ribiéʼ ne pora riasaʼ. Neca zitu nuuluʼ nannuʼ xi caníʼ iqueʼ. Dede ante guiree ti diidxaʼ ruaa, Jiobá, lii mápeca nannuʼ guiráʼ cani» (Sal. 139:2, 4). Cumu runibiáʼ chaahuiʼ Dios laanu la? nga runi nánnabe xii nga ni jma galán para laanu. Laasibe nga Dios ni jma nuu xpiaaniʼ. Cayuuyabe guiráʼ xixé ni cayaca. Qué zanda diʼ guchaaganu modo riénebe guiráʼ cosa ne biaʼ riene binni cani. Ne nánnabe ximodo guiluxe xiixa ni deruʼ bizulú (Isa. 46:9-11; Rom. 11:33). Jiobá si nga «tobi lucha Dios [ni] riene irá cosa» (Rom. 16:27).
4 Cumu nadxii Jiobá laanu la? racaláʼdxibe ni jma galán para laanu (Juan 3:16; 1 Juan 4:8). Ne laaca pur nadxiibe laanu nga rudiibe laanu stale cosa. Discípulo Santiagu bicaa: «Irá ni nachaʼhui ne irá ni dxandí reeda de ibáʼ. Zeeda ni de Dios ni bizáʼ ca biaani sti ibáʼ» (Sant. 1:17). Guiráʼ cani rudii lugar gusiidibe laacaʼ la? ribeenducaʼ stale cosa purtiʼ nacháʼhuibe ne laacaʼ.
5 Últimu la? Jiobá nga Dios ni jma napa poder. Salmista que bicaa: «Tutiica cueza lugar ra nagaʼchiʼ stiʼ Ni Nuu Jma Luguiáʼ la? qué zaca gastiʼ, purtiʼ casi ora ñuube xaʼnaʼ bandáʼ stiʼ ni jma napa poder. Dxandipeʼ zabeʼ Jiobá: “Lii nga ti lugar ra zanda guilaʼyaʼ, ti lugar ni nadipaʼ para naa, Dios stinneʼ ni runeʼ cré de guidubi ladxiduáʼ”» (Sal. 91:1, 2). Ora rúninu guiráʼ ni rusiidiʼ Jiobá la? nga nga casi ñaca ñuʼnuʼ lu bandáʼ stiʼ Dios, ni qué zusaana de gacané laanu. Nécapeʼ chuʼ tu gucaalú laanu, laabe zacanebe laanu para guzuhuaʼnu dxiichiʼ. Qué ziuu dxi gusaanabe laanu (Sal. 71:4, 5; biindaʼ Proverbios 3:19-26). Nga runi, Jiobá nga nanna xii nga ni jma galán para laanu, racaláʼdxibe ni galán para laanu ne nápabe poder para gudiibe cani laanu. ¡Cadi jneza diʼ nga gúninu pa qué guzúʼbanu stiidxabe! Yanna, guidúʼyanu pora nga caquiiñeʼ gábibe laanu xi naquiiñeʼ gúninu.
Pora nga caquiiñeʼ gabi Jiobá laanu xi gúninu
6, 7. Pora nga caquiiñenu gusiene Dios laanu ximodo gúninu xiixa.
6 Nánnanu caquiiñenu gabi Dios laanu xi naquiiñeʼ gúninu dede nácarunu baʼduhuiiniʼ ne dede ora maʼ zigólanu. Salmista que guníʼ: «Laabe nga Dios stinu ne qué ziuu dxi gusaana de gácabe ni. Laabe nga gábibe laanu xi naquiiñeʼ gúninu dede ora gátinu» (Sal. 48:14). Cásica hombre bicaa salmo riʼ la? laanu laaca nuu xpiaaninu ne qué ziuu dxi gusaana de guinábanu Jiobá gabi laanu xi naquiiñeʼ gúninu guiráʼ ora.
7 Peru nuu ora jma riquiiñenu gabi Jiobá laanu ximodo naquiiñeʼ gúninu xiixa ni cá íquenu. Zándaca cadídinu ra nagana purtiʼ nuu tu canazánanda laanu o pur xiixa guendahuará, o pur qué gápanu dxiiñaʼ (Sal. 69:16, 17). Naquiiñeʼ guinínenu Jiobá ora nuunu zacá, purtiʼ nánnanu zudiibe stipa ni caquiiñenu para guni huantarnu ne zacanebe laanu quixhe íquenu gúninu ni jneza. ¡Ratadxí ladxidoʼno nga gánnanu racané Dios laanu! (Biindaʼ Salmo 102:17.) Peru laaca ziuuruʼ xcaadxi ora zaquiiñenu gusiene Jiobá laanu ximodo gúninu xiixa. Casi ora chiguininenu ca vecinu stinu de ca diidxaʼ nacubi ne galán stiʼ Reinu stiʼ Dios, purtiʼ zacasi zanda cueendunu ni galán. Ne guiráʼ biaje quixhe íquenu gúninu xiixa, casi pa chizanu, chiguidúʼyanu xi lari gácunu, cuinu tu gaca xhamígunu, xi dxiiñaʼ gúninu, pa ziuurunu scuela o intiisi cosa gúninu la? naquiiñeʼ guietenaláʼdxinu guiráʼ ni rusiidiʼ Jiobá ti gúninu cani ne guendabiaaniʼ. Nga runi, dxandíʼ nga caquiiñenu gusiene Dios laanu ximodo gúninu ca cosa ca biaʼ dxi nabáninu.
Xi raca ora qué runi binni ni na Dios
8. Xi bisihuinni Eva ora gudó cuananaxhi gudxi Dios laa cadi gó que.
8 Cadi guiaandaʼ ndiʼ laanu: rúninu ni na Dios purtiʼ de ladxidoʼno riale gúninu ni. Laabe qué rucaadibe laanu gúninu ni nabe pa qué racaláʼdxinu. Primé binni ni guyuu lu Guidxilayú ne qué niná ñuni ni gudxi Jiobá laa nga Eva, ne ni bizaacabe rusihuinni xi guiráʼ guendanagana riuu ora qué riguixhe ique binni guni ni jneza. Guidúʼyanu xi bisihuinni Eva ne ni gudixhe ique guni. Eva gudó cuananaxhi stiʼ yaga ni gúdxicabe laa cadi gó, purtiʼ gucalaʼdxiʼ ñaca casi Dios ne ñanna xii nga jneza ne ni cadi jneza (Gén. 3:5). Ora bíʼnibe zacá la? bisihuínnibe gucuaabe derechu ni napa Dios si; laasibe gudíxhebe para laabe xii nga ni jneza ne ni cadi jneza, lugar de nibézabe ñabi Dios laabe xi naquiiñeʼ gúnibe. Bidxiidéchebe derechu ni napa Jiobá de guni mandar. Maʼ qué niná diʼ Eva ñuni mandar Dios laa, ne Adán, xheelabe, laaca biʼniʼ casi bíʼnibe que (Rom. 5:12).
9. Xi rusihuinni tuuxa ora qué ruzuubaʼ stiidxaʼ Dios, ne xiñee cadi jneza guni binni zacá.
9 Zacaca nga yanna riʼ, pa qué guzúʼbanu stiidxaʼ Jiobá la? laaca zusihuínninu cudxiʼdéchenu derechu nápabe para guni mandarbe. Guiníʼ íquenu de tuuxa ni ridagulisaané ca xpinni Cristu peru laaca ruuyaʼ película ra ridiʼdiʼ cosa dxabaʼ. Binni ca maʼ nanna cadi jneza diʼ para Dios gúʼyabe cani, ne laaca nánnabe cadi jneza diʼ guiníʼ binni de laacani. Yanna, pa maʼ nánnabe nga, xiñee ndiʼ chuuláʼdxibe gúʼyabe cani yaʼ (Efe. 5:3). Ora maʼ qué guzuubaʼ binni ca stiidxaʼ Dios la? cusihuinni maʼ cudxiideche derechu ni napa Dios para guni mandar, ne maʼ qué náʼ guni mandar Jiobá laa (1 Cor. 11:3). Ne cadi jneza diʼ nga guni binni zacá, purtiʼ Jeremías guníʼ: «Cadi lu náʼ diʼ binni nuu guni mandar ra guzuhuaa ñee» (Jer. 10:23).
10. Xiñee riquiiñeʼ gánnanu cuinu xi gúninu.
10 Guiranu zanda cuinu gúninu ni gacaláʼdxinu purtiʼ zacá nga bizáʼ Dios laanu. Nga runi nuu tu riníʼ cadi biaʼsi diʼ nga ni guníʼ Jeremías que, purtiʼ riníʼ íquecabe cadi jneza diʼ nga guni juzgar Dios laanu pur ni gúninu pa laapebe bizaʼbe laanu zacá. Peru cadi guiaandaʼ ndiʼ laanu, neca bizáʼ Dios laanu modo ganda cuinu xi gúninu la? naquiiñeʼ gánnanu xii nga jma jneza cuinu gúninu. Xiñee yaʼ. Purtiʼ zabídxibe cuenta laanu pur ni quixhe íquenu gúninu ne pur cani guininu (Rom. 14:10). Jesús guníʼ: «De ndaani ladxidoʼ [binni] nga riree diidxa ni riníʼ». Laaca guniʼbe: «De ndaani ladxidóʼ cabe reeda ni cadi jneza ni cá ique cabe guni cabe: guuti cabe binni, o chuʼ né cabe ni cadi xheela cabe, gapa cabe jnadxii cabe, cuana cabe, indisa cabe falsu luguiá stobi, cuʼ dí cabe binni» (Mat. 12:34; 15:19). Casi maʼ bidúʼyanu la? guiráʼ ni rúninu ne cani rininu rusihuínnicani xi nuu ndaaniʼ ladxidoʼno, o ximódopeʼ laanu. Nga runi, ca xpinni Cristu ni nuu xpiaaniʼ la? ruuyacaʼ primeru xiná Dios ante gúnicaʼ xiixa. Zacá nga ruuyaʼ Jiobá laacabe casi binni nayá ladxidóʼ, nga runi nacháʼhuibe ne laacaʼ (Sal. 125:4).
11. Xi rizíʼdinu de ni bizaaca ca israelita.
11 Guietenaláʼdxinu historia stiʼ ca israelita. Ora gudixhe íquecabe gúnicabe ni jneza ne guzuubacabe stiidxaʼ Jiobá la? laabe gúpabe laacaʼ (Jos. 24:15, 21, 31). Peru stale biaje gudixhe íquecabe gúnicabe ni gucaláʼdxicabe purtiʼ si zanda gúnicabe ni. Ca dxi bibani Jeremías que guníʼ Jiobá sicaríʼ de laacabe: «Qué nucaadiágacabe, ne qué nulábicabe ni gudxeʼ laacabe, sínuque gúcacabe binni qué riene ne bíʼnicabe guiráʼ ni na ladxidóʼcabe neca cadi jneza cani, ngue runi bidxiidéchecabe naa ne maʼ qué ninandarúcabe naa» (Jer. 7:24-26). ¡Cadi jneza diʼ nga ni bíʼnicabe ca! Cadi gácanu binni ni qué riene ne cadi gudiʼnu lugar gucaa ladxidoʼno laanu gúninu xiixa ni cadi jneza, ne maʼ cadi gúninu guiráʼ ni rusiidiʼ Jiobá laanu. Ne pa qué guzúʼbanu diidxaʼ la? qué zabeendunu ni galán, sínuque zusihuínninu cudxiʼdéchenu Dios.
Xi caquiiñeʼ para gúninu ni gabi Dios laanu
12, 13. 1) Xiñee rúninu ni rabi Jiobá laanu. 2) Xiñee nabé risaca gápanu fe.
12 Cumu nadxiinu Jiobá la? rúninu guiráʼ ni rusiidibe laanu (1 Juan 5:3). Peru, caquiiñeruʼ sti cosa aparte de gannaxhiinu laabe. Pablu guníʼ: «Rinanda nu ni runi cre nu ne cadi ni riduʼya nu» (2 Cor. 5:6, 7). Xiñee riquiiñeʼ guni crenu o gápanu fe yaʼ. Purtiʼ Jiobá nga ziné laanu lu neza stiʼ para guizíʼdinu gúninu ni jneza, peru cadi para gápanu bidxichi o sti cosa risaca (Sal. 23:3). Nga runi zacané fe ca laanu para guidúʼyanu ca ndaayaʼ ricaanu ora rúninu ni na Dios (biindaʼ 2 Corintios 4:17, 18). Laaca zacaneni laanu chuʼnu nayecheʼ neca huaxiéʼ cosa nápanu para guibáninu (1 Tim. 6:8).
13 Jesús laaca guníʼ riquiiñeʼ gapa binni fe para ganda guni adorar Dios modo maʼ gudixhe ni, purtiʼ zándaca qué zapa binni guiráʼ ni riuulaʼdxiʼ (Luc. 9:23, 24). Caadxi de ca xpinni Dios runi adorarcaʼ laabe neca cadíʼdicaʼ guendanagana, neca pobre laacaʼ, neca huaquiichinácabe laacaʼ, ne huayúnicabe menu laacaʼ, dede huazanándacabe laacaʼ (2 Cor. 11:23-27; Apo. 3:8-10). Runi huantárcabe guiráʼ nga purtiʼ naguidxi fe stícabe, ne nuucabe nayecheʼ (Sant. 1:2, 3). Ora naguidxi fe stinu la? rudiʼnu cuenta jneza nga guiráʼ ni rabi Jiobá laanu, purtiʼ para guibáninu galán nga guiráʼ ni rusiidibe laanu. Nga runi nanna dxíchinu qué zanda diʼ guchaaganu guiráʼ yuubaʼ cadídinu yanna ne ca ndaayaʼ ni chigudii Jiobá laanu pa guzúʼbanu stiidxabe neca tiidinu ra nagana (Heb. 11:6).
14. Xiñee bichaa Agar modo guníʼ ique.
14 Laaca qué riquiiñeʼ gudxíʼbanu laca laanu ti ganda gúninu ni gabi Dios laanu. Zacá rusihuinni ejemplu stiʼ Agar ni, ti gunaa ni biʼniʼ xhiiñaʼ Sara. Cumu qué ganda gapa Sara xiiñiʼ la? gunábabe xheelabe gatané Agar. Gucaxiiñiʼ Agar ti xiiñiʼ Abrahán ngue runi bizulú biʼniʼ laa tuuxa ni risaca ne biʼniʼ burla Sara. Xi biʼniʼ Sara óraque yaʼ. Bizulú gunináʼ Sara laabe, ngue runi bixooñebe de raqué. Neza zebe que bidxaagalú ti ángel stiʼ Jiobá laabe ne gudxi laabe: «Bibiguetaʼ ra nuu gunaa ni rúniluʼ xhiiñaʼ ca ne bizuubaʼ stiidxabe» (Gén. 16:2, 6, 8, 9). Zándaca gadxé nga ni ñuulaʼdxiʼ Agar ñabi ángel que laa, purtiʼ para gúnibe ni na ángel que caquiiñeʼ guchaabe modo riníʼ íquebe. Peru qué nudxiibabe laca laabe ne bíʼnibe ni gudxi ángel que laabe. Cumu bizuubabe diidxaʼ la? gule xiiñibe, Ismael, ra nabeza Abrahán bixhoze, ne raqué nga nuu guiráʼ ni iquiiñebe para gusiniisibe baʼduhuiiniʼ que.
15. Pora nga cadi naquiiñeʼ gudxíʼbanu laca laanu para ganda gúninu ni gabi Jiobá laanu.
15 Laanu laaca qué riquiiñeʼ diʼ gudxíʼbanu laca laanu ti ganda gúninu guiráʼ ni gabi Dios laanu. Guiníʼ íquenu ca ejemplu riʼ. Zándaca nuu ti xpinni Cristu ni caquiiñeʼ guiene qué riuulaʼdxiʼ diʼ Jiobá caadxi cosa ni rúnibe para chuʼbe nayecheʼ. Zándaca nuu stobi ni bichiichi tuuxa xpinni Cristu ne caquiiñeʼ guinábabe binni ca gutiidilaʼdxiʼ ni bíʼnibe laa, o bíʼnibe xiixa ne naquiiñeʼ guiniʼbe ni. Yanna, pa nuu stobi ni maʼ biʼniʼ xiixa cosa malu yaʼ. Naquiiñeʼ gábibe ca binnigola xi maʼ bíʼnibe. O xi naquiiñeʼ guni tuuxa pa biree ndaaniʼ xquidxi Dios ne maʼ rapa gana guibiguetaʼ lade ca binni ridagulisaa yaʼ. Naquiiñeʼ gusihuínnibe maʼ guca arrepentirbe ne gusaanabe de gúnibe ni cadi jneza. Ora guizaacanu xiixa casi cani guninu ca la? nabé zaguixhedxí ca diidxaʼ ni cá lu Proverbios 29:23 ladxidoʼno: «Ti hombre ni runi laa tuuxa ni risaca la? zaca biaritiʼ, peru ti hombre ni qué rudxiibaʼ laca laa la? zusisácacabe laa».
Ximodo rusiidiʼ Jiobá laanu
16, 17. Xi naquiiñeʼ gúninu para cueendunu ni galán de ni rusiidiʼ Biblia.
16 Biblia, Stiidxa Dios, nga ni jma riquiiñeʼ Jiobá para gusiidiʼ laanu (biindaʼ 2 Timoteo 3:16, 17). Pa rápanu gana cueendunu stale cosa galán de cani cá lu Biblia la? naquiiñeʼ guiaʼnu guidúʼndanu ni guiráʼ dxi. Cadi cuézanu dede óraruʼ maʼ cadídinu lu xiixa guendanagana nga para guidúʼyanu ximodo gacaneni laanu (Sal. 1:1-3). Ora guidúʼndanu ni zánnanu xi conseju nga cudii Dios laanu. Zaníʼ íquenu casi Dios ne ziuʼnu listu para gudxíʼlunu intiica guendanagana, ora tiica gueeda cani.
17 Peru laaca risaca nga guiníʼ íquenu ni ridúʼndanu lu Biblia ne guni orarnu. Ora riníʼ íquenu de ca historia stiʼ Biblia la? rizíʼdinu stale cosa ni zanda gúninu ora tiidinu lu xiixa casi ni gudiʼdiʼ ca binni cuzeeteni (1 Tim. 4:15). Pa gueeda gápanu xiixa guendanagana nabé naroʼbaʼ la? guni orarnu Jiobá para gábinu laa gusiene laanu xi naquiiñeʼ gúninu. Espíritu stibe zacané laanu guietenaláʼdxinu ca conseju stiʼ Biblia o cani zeeda lu cani rusiidiʼ laanu de Dios (biindaʼ Salmo 25:4, 5).
18. Ximodo riquiiñeʼ Jiobá xquidxi para gabi laanu xi naquiiñeʼ gúninu.
18 Jiobá laaca riquiiñeʼ ca binni ridagulisaa para gusiidiʼ laanu. Lade guiráʼ ca binni ridagulisaa nuu «mozo ni nuu xpiaaniʼ ne ni runi jneza», ne ni riníʼ pur laacabe Grupu ni Zaniruʼ. Mozo ca rudii guiráʼ ni caquiiñenu para guizíʼdinu jma de Dios lu ca guendaridagulisaa nahuiiniʼ ne naroʼbaʼ ni rápanu, ne lu ca guiʼchiʼ casi libru ne revista (Mat. 24:45-47; zanda gúʼndaluʼ Hechos 15:6, 22-31). Ne lade ca binni ridagulisaa nuu xpinni Cristu ni maʼ huaniisi lu Stiidxaʼ Dios, casi cani naca binnigola ládecabe, laacaʼ racanecaʼ laanu ora rudiicaʼ conseju ni zeeda lu Stiidxaʼ Dios (Isa. 32:1). Ca hombrehuiiniʼ ne ca dxaapahuiiniʼ ni caniisi ndaaniʼ ti yoo ra runi ca binnilidxi ni na Dios la? naquiiñeʼ gánnacaʼ risaca nga nuu bixhózecaʼ ne jñaacaʼ para gusiidiʼ laacaʼ, purtiʼ Dios nga bisaana lu nácabe gúnicabe ni. Naquiiñeʼ guyúbitu laacabe para gábicabe laatu ximodo jma jneza gúnitu xiixa (Efe. 6:1-3).
19. Xi ndaayaʼ ricaanu yanna purtiʼ rudiʼnu lugar gabi Jiobá laanu xi gúninu guiráʼ ora.
19 Maʼ bidúʼyanu stale modo nga rusiidiʼ Jiobá laanu, ne naquiiñeʼ gúninu stipa para cueendunu biaʼ gándatiʼ lu guiráʼ ni rábibe laanu. Guidúʼyanu xi guníʼ rey David tiempu bizuubaʼ guidxi Israel stiidxaʼ Dios, nabe: «Biʼniʼ cré ca bixhoze góladu lii; biʼniʼ crécabe lii ne bilaluʼ laacabe. Bicaacabe ridxi lii, ne gunda bilácabe; biʼniʼ crécabe lii ne qué nusaanaluʼ laacabe» (Sal. 22:3-5). Pa guni crenu Dios ne gúninu ni gábibe laanu la? laaca qué zusaana diʼ Dios laanu; zadúʼyanu gaca ni cabézanu. Cumu rinábanu Jiobá gabi laanu ximodo sanu lu neza stinu ne qué rininu zanda gúninu ca cosa ca laasinu la? nga runi dede nagásica maʼ ricaanu stale ndaayaʼ (Sal. 37:5). Peru, pa qué gusaana de guzúʼbanu stiidxabe la? ca ndaayaʼ ca qué ziuu dxi guirácani. David bicaa: «Jiobá nadxii guendaruni jneza, ne qué zusaanabe cani qué rixeleʼ de laabe. Qué ziuu dxi gusaana de gápabe laacaʼ [...]. Cani runi jneza ca zacaacaʼ guidxilayú, ne zabánicaʼ luni guiráʼ dxi» (Sal. 37:28, 29).
Ñanda nusiéneluʼ ni la?
• Xiñee zanda guni crenu guiráʼ ni rabi Jiobá laanu.
• Xi zusihuínninu pa qué guzúʼbanu stiidxaʼ Jiobá.
• Pora nga qué riquiiñeʼ gudxiibaʼ ti xpinni Cristu laa.
• Ximodo rusiidiʼ Jiobá laanu ca dxi riʼ.
[Ca dibuju/foto ni zeeda lu yaza 8]
Ñee rudiiluʼ lugar gabi Jiobá lii ximodo gúniluʼ guiráʼ ni cá íqueluʼ la?
[Dibuju/foto ni zeeda lu yaza 9]
Eva bidxiideche derechu ni napa Jiobá para guni mandar
[Dibuju/foto ni zeeda lu yaza 10]
Xi biʼniʼ Agar para gunda biʼniʼ ni gudxi ángel que laa