Mayaca gulá reinu stiʼ Dios laanu
«Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú.» (MAT. 6:10, NM.)
1. Xii nga ni jma bisiidiʼ Jesús.
LU LIBANA ni bidii Jesús ni maʼ bizéʼtenu que guniʼbe ximodo naquiiñeʼ guni orar ca discípulo stibe ne de ni guniʼbe lu oración que nga ni jma bisiidibe. Laabe guniʼbe: «Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mat. 6:9-13, NM). Jesús guyé «guidxi roʼ ne guidxi huiiniʼ, canayuíʼ né binni modo runi mandar Dios» (Luc. 8:1). Ne gúdxibe ca discípulo stibe: «Nirudó laguyubi [Reinu stiʼ Dios] ne sa tu modo na» (Mat. 6:33). Ora maʼ ziyuundaluʼ tema riʼ la? biyubi ximodo iquiiñeluʼ cani guiziidiluʼ luni ora maʼ zigucheecheluʼ diidxaʼ. Guníʼ ique ximodo nicábiluʼ ca ndiʼ: Pabiáʼ risaca stiidxaʼ Reinu. Xiñee caquiiñeʼ gulá Reinu stiʼ Dios binni. Ne ximodo chigulá Reinu ca laanu.
2. Pabiáʼ risaca stiidxaʼ Reinu.
2 Jesús maca guníʼ: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mat. 24:14). Stiidxaʼ Reinu stiʼ Dios nga ni jma risaca que sti cosa. Nga runi, biaʼ gadxe millón de testigu stiʼ Jiobá ni rié lade jma de ti gayuaa mil neza binni ridagulisaa rucheechecaʼ diidxaʼ lu guidubi naca Guidxilayú, ne riníʼcabe maʼ nuu Reinu stiʼ Dios guibáʼ. Nabé galán nga ni riníʼcabe ca, purtiʼ Reinu ca nga chiguiquiiñeʼ Dios para guni ni na lu Guidxilayú riʼ cásica rácani ni nabe guibáʼ.
3, 4. Ximodo zabani binni ora gaca ni na Dios lu Guidxilayú riʼ.
3 Xi zuni Jiobá para binni ora gaca ni nabe lu Guidxilayú riʼ yaʼ. «Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ.» (Apo. 21:4.) Guirutiʼ tu zaca huará ne qué zati pur pecadu ni gulené. Ca binni maʼ guti ni nuu lu xquendabiaaniʼ Dios la? zanda guibánicaʼ sti biaje ne maʼ qué ziuuruʼ dxi gáticaʼ. Lu Biblia maca gucuá: «Zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ» (Hech. 24:15). Maʼ qué zadinde ca guidxi roʼ ca, guirutiʼ zaca huará, maʼ qué ziaadxaʼ ni gó binni ne zaca Guidxilayú riʼ ti paraísu, dede ca maniʼ duxhuʼ ca zácacaʼ nadóʼ ne qué zuninacaʼ binni (Sal. 46:9; 72:16; Isa. 11:6-9; 33:24; Luc. 23:43).
4 Pur guiráʼ ndaayaʼ sicarú ca la? qué ridxagayaadinu maca gucuá lu Biblia guizáʼ nayecheʼ zabani ca binni ni nadóʼ ca ra chiguni mandar Reinu stiʼ Dios. Biblia na: «Peru cani nadóʼ ca zacaacaʼ guidxilayú ne dxandipeʼ zadxélacabe guendanayecheʼ purtiʼ ziuu stale guendariuudxi». Peru, xi zaca ne cani runi cosa malu yaʼ. Stiidxaʼ Dios na: «Maʼ xcaadxi si tiempu cayaadxaʼ, ne binni malu maʼ qué ziuu». Nga runi cani runi cré si Jiobá nga zabani lu Guidxilayú riʼ (Sal. 37:9-11).
5. Tu guiráʼ chiguiree lu Guidxilayú riʼ.
5 Yanna, para ganda gaca guiráʼ nga la? naquiiñeʼ guiree ca políticu ca, ca religión ni cadi dxandíʼ ca ne ca binni runi negocio ni ruyubi puru si para laa. Ne Reinu stiʼ Dios nga chindee guirácani. Dios biquiiñeʼ Daniel, hombre riguixhená que para gucaa ca diidxaʼ riʼ: «Ne dxi stiʼ ca rey que la? [ca gobiernu ni nuu yanna] Dios ni nuu guibáʼ zucuí ti reinu [guibáʼ] ni qué ziuu dxi guinitilú. Ne reinu riʼ qué zadíʼdini lu náʼ nin sti guidxi. Zunideni ne zunduuxeni guiráʼ ca reinu riʼ, ne laani ziaanani ne qué ziuu dxi guilúxeni» (Dan. 2:44). De racá maʼ ziuu «ti ibáʼ cubi» (gobiernu stiʼ Dios ni nuu guibáʼ) ni chiguni mandar lu «ti guidxilayú cubi» (guiráʼ ca binni ni guni ni jneza) ne luni maʼ qué ziuu «enda nadxabaʼ» (2 Ped. 3:13).
Yánnapeʼ nga jma caquiiñeʼ guilanu
6. Xi caníʼ Biblia de guendaquéiquiiñeʼ ni cahuinni lu guidxilayú riʼ.
6 Dxi bicaalú Binidxabaʼ, Adán ne Eva Dios la? bisihuínnicaʼ laasicaʼ racaláʼdxicaʼ quíxhecaʼ gánnacaʼ xii nga jneza ne ni cadi jneza. Pur nga guizáʼ naná modo nabani guiráʼ ca binni nuu lu Guidxilayú riʼ. Gudiʼdiʼ si jma de ti mil xhoopaʼ gayuaa iza de ni guca ca «bidale guendaquéiquiiñeʼ ni cayuni binni ndaaniʼ guidxilayú, ne guiráʼ ni rucaa ladxidóʼcabe laacabe guiníʼ íquecabe, puru cosa malu cani guiráʼ ora» (Gén. 6:5). Qué nindaa biaba Nisaguié Naroʼbaʼ ni binitilú ca binni que. Ti mil chonna gayuaa iza despué jma nagana bibani binni dede guníʼ Salomón: «Jma galán nuu ca gueʼtuʼ ca, que cani nabániruʼ. Nga runi, ni caʼruʼ gale ne caʼruʼ guuyaʼ guendananá lu guidxilayú riʼ la? jma galán nuu que laacabe» (Ecl. 4:2, 3). Dede dxiqué maʼ gudiʼdiʼ chonna mil iza, ne dede yanna cadáleruʼ guendaquéiquiiñeʼ.
7. Xiñee yánnapeʼ nga jma caquiiñeʼ cuee Reinu stiʼ Dios ca guendaquéiquiiñeʼ ca.
7 Nécapeʼ maʼ raca stale iza nga de nuu guendaquéiquiiñeʼ lu Guidxilayú riʼ la? yánnapeʼ nga jma caquiiñeʼ cuee Reinu stiʼ Dios cani. Biaʼ dxi huabani binni qué liica huahuinni guendaquéiquiiñeʼ biaʼ cahuínnini dede maʼ raca ti gayuaa iza, ne zeʼ dxi jma cahuinni ni yanna. Instituto Worldwatch na: «Lu ca guerra ni guca [lu siglu XX] que guti jma binni, chonna biaje jma que cani guti lu ca guerra ni guca lu primé siglu despué de ca dxi stiʼ Jesús hasta 1899». Dede 1914 maʼ huayati jma de ti gayuaa millón binni lu ca guerra ni huayaca ora ridinde ca guidxi ca. Lu ti enciclopedia na guti biaʼ sesenta millón de binni lu guiropa guerra ni guca lu guidubi naca Guidxilayú. Yanna riʼ nuu stale guidxi roʼ ni napa bomba para gunitilú stale guidxi, dede zanda guuticaʼ stale binni ni nuu lu Guidxilayú riʼ. Neca cayuni cani ruundaʼ de ciencia ca jma cosa ne caree jma remediu cubi la? guiráʼ iza rati jma de gaayuʼ millón baʼduhuiiniʼ purtiʼ gastiʼ ni gocaʼ (biiyaʼ lu capítulo 9 stiʼ libru Xipeʼ ndiʼ cusiidiʼ Biblia).
8. Xi huayaca lu ca mil iza huadiʼdiʼ de cayuni mandar binni Guidxilayú riʼ.
8 Binni guidxilayú qué ganda gucueeza guiráʼ guendaquéiquiiñeʼ ca. Ca políticu ca, ca religión ni cadi dxandíʼ ca ne cani runi negocio ca qué ganda gacanecaʼ binni guibani nayecheʼ, gápacaʼ ni iquiiñecaʼ ne chuʼcaʼ nazaaca. Lugar de ñuni chaahuicabe ca guendanagana ni nápanu la? laga jma cutálecabe cani. Stale nga binni huayuni mandar lu Guidxilayú riʼ lu ca mil iza ni maʼ gudiʼdiʼ ca, peru cusihuínnicabe dxandíʼ nga ni na ca diidxaʼ riʼ: «Binni guidxilayú cadi lu náʼ diʼ nuu neza stiʼ. Cadi lu náʼ diʼ binni nuu guni mandar ra guzuhuaa ñee» (Jer. 10:23). Dxandíʼ, «binni runi mandar binni para gacanacaʼ» (Ecl. 8:9). Nga runi, guidxilayú riʼ «nuu né ni ti yuuba roʼ, casi ti gunaa ora chi xhana, ruuna dede ricaalaʼdxiʼ» (Rom. 8:22).
9. Xi maca gucuá lu Biblia zahuinni «ora mayaca izaa xhi guidxilayú».
9 Lu Biblia maca cá ximodo zabani binni ca dxi stinu riʼ: «Jma nagana zaca ni ora mayaca izaa xhi guidxilayú». Ne bizeeteʼ si ni ximodo zabani binni yanna laga cayuni mandar ca gobiernu ca la? laaca cayábini laanu xcaadxi diidxaʼ riʼ: «Cani canauchee ne canausiguii la? ze dxi jma rusi zinitilú ca» (biindaʼ 2 Timoteo 3:1-5, 13). Laanu, ca xpinni Cristu, qué ridxagayaadinu guidúʼyanu cayaca guiráʼ nga, purtiʼ nánnanu «naaze dxiichi binidxaba idubi guidxilayú» (1 Juan 5:19). Peru guizáʼ galán nga gánnanu qué zandaa zabee Dios cani cayaca lu guidxilayú riʼ ti chuʼ ca xpínnibe galán, purtiʼ laani zeʼ dxi jma zinitilú ni.
Jiobá si nga zanda gulá laanu
10. Xiñee runi crenu Jiobá si nga zanda gulá laanu.
10 Ora maʼ zigucheecheluʼ diidxaʼ la? zanda gusiéneluʼ binni Jiobá si nga zanda cuee ca guendanagana nápanu. Laasibe nga jma racaláʼdxibe cueebe cani lade ca xpínnibe ne nápabe poder para gúnibe ni (Hech. 4:24, 31; Apo. 4:11). Runi crenu zanda gulá Jiobá ca xpinni ne laaca zuni guiráʼ ni maʼ guníʼ, purtiʼ maca guniʼbe: «Cásipeʼ modo guniéʼ, zacá zácani». Ni maʼ guniʼbe «qué zabiguetaʼ ni [ra nuube] sin gácani» (biindaʼ Isaías 14:24, 25; 55:10, 11).
11, 12. Xi maʼ guníʼ Jiobá zuni pur ca xpinni.
11 Jiobá cayabi ca xpinni dxandíʼ zulabe laacaʼ ora cuídxibe cuenta ca binni malu ca. Dxi biseendaʼ Jiobá Jeremías, hombre riguixhená que, chitidxi ca binni malu que chigunitilube laacaʼ la? laabe gúdxibe laa ca diidxaʼ riʼ: «Cadi guidxíbiluʼ. Naa nuaaniáʼ lii para gulaʼyaʼ lii» (Jer. 1:8). Ne ante gunitilú Jiobá ca binni malu ni bibani Sodoma ne Gomorra que la? biseendabe chupa ángel para chindee Lot ne binnilidxi de raqué. «Óraque bisaba Jiobá azufre ne guí» para binduuxeʼ ca guidxi que (Gén. 19:15, 24, 25).
12 Jiobá zanda gulá cani ruzuubaʼ stiidxaʼ ni nuu guidubi naca Guidxilayú ora gueeda dxi stibe ca. Dxi bisábabe Nisaguié Naroʼbaʼ ni binitilú ca binni malu que la? «bilá be Noé ni gudxi laaca nusaana ca irá enda ruchee sticaʼ, laasi ne xcadxe binni» (2 Ped. 2:5). Dxi gunduuxeʼ Jiobá guiráʼ binni malu nuu yanna riʼ la? laaca zulabe cani runi ni jneza. Nga runi cayabi Stiidxaʼ Dios laanu: «Laguyubi Jiobá, guiráʼ cani nachaʼhuiʼ ni nuu lu guidxilayú riʼ [...]. Laguyubi gúnitu ni jneza, laguyubi gácatu nachaʼhuiʼ. Zándaca guilatu dxi guidxiichi Jiobá» (Sof. 2:3). Guiráʼ ca binni malu ca zabee Jiobá laacaʼ lu guidubi naca Guidxilayú riʼ ora gueedanebe dxi stibe. Peru cani guni ni jneza ca zabánicaʼ luni (Pro. 2:21, 22).
13. Xi chiguni Jiobá pur ca xpinni ni maʼ guti.
13 Ca dxi stinu riʼ nabé stale xpinni Cristu maʼ guti pur xiixa guendahuará, pur guzanándacabe laacaʼ o pur xcaadxi cosa (Mat. 24:9). Xi zaca de laacabe yaʼ. Casi maʼ bizéʼtenu que «zusibani Dios [...], ni nachaʼhui» (Hech. 24:15). ¡Guizáʼ ratadxí ladxidoʼno nga gánnanu gastiʼ zanda gucueeza Jiobá para gulá ca xpinni!
Ti gobiernu ni runi ni jneza
14. Xiñee nánnanu naca Reinu stiʼ Dios ti gobiernu ni runi ni jneza.
14 Ora maʼ zigucheecheluʼ diidxaʼ la? guníʼ naca Reinu stiʼ Jiobá ti gobiernu ni runi ni jneza, purtiʼ jneza runi mandar guiráʼ ca binni nuu luni ne rannaxhiicaʼ binni, cásica runi Dios (Deu. 32:4; 1 Juan 4:8). Jiobá maʼ bisaana Reinu ca lu naʼ Jesucristu, purtiʼ maʼ nuube listu para guni mandarbe lu Guidxilayú riʼ. Ne 144,000 binni ni gulí Jiobá nga chiguibani guibáʼ para guni mandarné Cristu Guidxilayú riʼ (Apo. 14:1-5).
15. Xiñee maʼ gadxé Reinu stiʼ Dios que ca gobiernu ni nuu lu Guidxilayú riʼ.
15 Ma gadxé gobiernu stiʼ Jesús ne 144,000 binni ca que ca gobiernu ni nuu yanna riʼ purtiʼ laacaʼ rucheecaʼ. Stale de ca xaíque stiʼ ca guidxi ca nabé malu laacaʼ ne ruchelatíndecaʼ xquídxicaʼ, nga runi millón de binni maʼ guti. Jneza nga cayabi Biblia laanu cadi guni crenu binni guidxilayú, «ni qué zanda gulá» binni (Sal. 146:3). Ca binni ni nuu lu gobiernu stiʼ Cristu rihuínnica nabé nadxiicaʼ binni ne nacháʼhuicaʼ. Jesús guníʼ: «Latáʼ ra nuaa irá ni ma bidxaga de cuyubi modo guía ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca» (Mat. 11:28-30).
Mayaca guiluxe ca últimu dxi riʼ
16. Ximodo chiguiluxe ca últimu dxi riʼ.
16 Dede 1914 maʼ nabani binni lu ca últimu dxi o ra mayaca «iluxe guidx[i]layú riʼ» (Mat. 24:3). Qué zandaa zeeda dxi «nabé naná» guníʼ Jesús que (biindaʼ Mateo 24:21). Nabé naná zaca dxi ca ne qué liica ziaana nin ti binni ni biʼniʼ mandar Binidxabaʼ. Peru ximodo guzulú ni ne ximodo guiluxe ni yaʼ.
17. Ximodo na Biblia chiguzulú dxi nabé naná ca.
17 Dxi «nabé naná» ca málasi guzuluni. Dxandíʼ, dxi stiʼ Jiobá ca zeedani ora guirutiʼ cabeza ni, ora «ruluíʼ gasti chi gaca, nuu dxí guidxi» (biindaʼ 1 Tesalonicenses 5:2, 3). Dxi naná ca zuzuluni ora guni cré ca binni nuu ndaaniʼ ca guidxi ca maʼ cadi candaa diʼ para guni chaahuicaʼ ca guendanagana sticaʼ. «Babilonia, guidxi roʼ que», ni zeeda gaca guiráʼ ca religión ni cadi dxandíʼ ca, málasi zanitilú ni, dede zadxagayaa binni ora gácani. Ca rey ca ne xcaadxi binni zadxagayaacaʼ ora gúʼyacaʼ ximodo guinitilú guidxi ca (Apo. 17:1-6, 18; 18:9, 10, 15, 16, 19).
18. Xi zuni Jiobá ora gucaalú Binidxabaʼ ca xpinni.
18 Laaca «zahuinni seña ibáʼ, adxé zahuinni gubidxa ne beeu ne ca luceru» ne «zahuinni seña ibáʼ ma chi ibigueta Hombre Biseenda Dios sti tiru». Óraca maʼ zuzuhuaa chaahuinu, zandisaʼ íquenu purtiʼ maʼ bidxiña dxi guilanu (Luc. 21:25-28; Mat. 24:29, 30). Gog, o Binidxabaʼ, ne ca xpinni zucaalucaʼ xquidxi Dios. Yanna, xi zuni Jiobá óraca yaʼ. Laabe guniʼbe: «Ni cagaʼnaʼ laatu cagaʼnaʼ guié bezaluaʼ» (Zac. 2:8). Jiobá, Señor ni jma Nandxóʼ, nagueendaca zulá ca xpinni ni guzuubaʼ diidxaʼ. Ne guiráʼ ni gacalaʼdxiʼ Binidxabaʼ guni para gunduuxeʼ laacabe qué zabeendú gastiʼ (Eze. 38:9, 18).
19. Xiñee nanna dxíchinu zunduuxeʼ ca ángel stiʼ Dios xcaadxi xpinni Binidxabaʼ ni guiaana lu Guidxilayú riʼ.
19 Dxi guni juzgar Dios ca guidxi ca la? zánnacaʼ laabe nga Jiobá (Eze. 36:23). Dios zuseendaʼ millón de ángel para gunduuxecaʼ xcaadxi de ca xpinni Binidxabaʼ. Jesucristu nga xaíque stiʼ ca ángel ca (Apo. 19:11-19). Guietenaláʼdxinu biquiiñeʼ Dios ti ángel si para biiti ti gayuaa ochenta y cinco mil xhenemígube ti gueelaʼ si. Nga runi, qué zaca nagana para ca ángel stiʼ Dios gunduuxecaʼ guiráʼ ca xpinni Binidxabaʼ ni guiaana ora guiluxe ca dxi nabé naná ca lu Armagedón (2 Rey. 19:35; Apo. 16:14, 16). Binidxabaʼ ne ca demonio stiʼ zadaguyoocaʼ ti mil iza ne de racá qué zandaa zanitilucaʼ (Apo. 20:1-3).
20. Xi chiguni Reinu stiʼ Jiobá.
20 Ora maʼ guca ca nga la? maʼ qué ziuu guendaquéiquiiñeʼ, óraca maʼ qué ziuu dxi gati cani guni ni jneza. Laaca zahuinni Jiobá si nga zanda gulá binni (Sal. 145:20). Dios zaquiiñeʼ Reinu stiʼ para gusihuinni nápabe derechu guni mandarbe, ne gusisaca labe ne guni ni maca gudixhe íquebe gaca lu Guidxilayú riʼ. Guiranu naquiiñeʼ guiéchenu ora gábinu binni guiráʼ cosa sicarú ni chigaca riʼ ne gacanenu cani «maʼ nuu listu para icaa guendanabani ni qué zaluxe» ti gánnacaʼ mayaca gulá Reinu stiʼ Dios laanu (Hech. 13:48).
Rietenalaʼdxuʼ la?
• Ximodo bisihuinni Jesús pabiáʼ risaca Reinu stiʼ Dios.
• Xiñee yánnapeʼ nga caquiiñenu gulá Dios laanu.
• Xi guiráʼ nga chigaca lu ca dxi nabé naná ca.
• Ximodo zusihuinni Jiobá zanda gulá binni.
[Ca dibuju/foto ni zeeda lu yaza 12]
Lu Stiidxaʼ Dios maca gucuá jma zareeche diidxaʼ lu guidubi naca Guidxilayú ca dxi stinu riʼ
[Dibuju/foto ni zeeda lu yaza 15]
Cásica bilá Jiobá Noé ne ca binnilidxi la? zacaca zulabe laanu
[Dibuju/foto ni zeeda lu yaza 16]
Jiobá «zuchaa [...] nisa riete lú» binni ne «ma qué ziuu ru enda guti» (Apo. 21:4)