Ximodo runi Grupu ni Zaniruʼ dxiiñaʼ

CA HOMBRE nuu lu Grupu ni Zaniruʼ stiʼ ca Testigu stiʼ Jiobá la? nácacabe binni ni maʼ bidiicaʼ laacaʼ Dios ne maʼ gulibe laacaʼ ne espíritu santu stibe. Laacabe nga riníʼcabe pur mozo ni nuu xpiaaniʼ ne ni runi jneza, purtiʼ dxiiñaʼ stiʼ mozo riʼ nga gudii guiráʼ ni iquiiñeʼ ca testigu stiʼ Jiobá para guiziidicaʼ jma ne laaca racanécabe ne ruuyacabe guireeche stiidxaʼ Reinu lu guidubi naca Guidxilayú (Mat. 24:14, 45-47).

Guiráʼ semana ridagulisaa Grupu ni Zaniruʼ ca, ne jma nga rúnicabe ni ca miércoles, ti ganda guni guiráʼ cani nuu lu grupu ca dxiiñaʼ tobi si (Sal. 133:1). Ca hombre ni naca de Grupu ni Zaniruʼ ca laaca rúnicaʼ dxiiñaʼ lu xcaadxi grupu para gápacaʼ guiráʼ ni napa Reinu. Cada tobi de ca grupu riʼ maca nexheʼ xipeʼ dxiiñaʼ naquiiñeʼ gúnicaʼ, guidúʼyanu xi laacani.

◼ GRUPU DE CANI RUUYAʼ DXIIÑAʼ RUNI XCAADXI GRUPU. Lu grupu ca nuu cani ruuyaʼ dxiiñaʼ ni naquiiñeʼ guni cada tobi de ca grupu stiʼ Grupu ni Zaniruʼ ca, laaca nápacabe ti secretariu, laabe laaca nácabe de Grupu ni Zaniruʼ. Dxiiñaʼ stícabe nga gúʼyacabe guni cada tobi de ca grupu riʼ dxiiñaʼ jneza ne gúʼyacabe gaca ni maʼ gudixhe ca grupu ca. Laaca racanécabe ra málasi guizaaca xiixa, ora sanándacabe ca xpinni Dios, ra guizaaca xiixa desgracia ne ra guizaaca xcaadxi cosa ni guniná ca testigu stiʼ Jiobá ni nabeza lu guidubi naca Guidxilayú.

◼ GRUPU NI RUUYAʼ CA BINNI NI RUNI DXIIÑAʼ BETEL. Ca hombre nuu lu grupu riʼ la? rápacabe cada tobi de cani runi dxiiñaʼ ndaaniʼ ca yoo Betel ni nuu lu guidubi naca Guidxilayú para chuʼcaʼ nazaaca ne chuʼcaʼ galán nezalú Dios. Laaca ribícabe ne ruseendacaacabe binni para guni dxiiñaʼ ndaaniʼ gadxé gadxé yoo Betel, zaqueca rusiénecabe cani nacubi yendá Betel ximodo gúnicaʼ dxiiñaʼ sticaʼ.

◼ GRUPU NI RUUYAʼ GACA CA GUIʼCHIʼ NI RIQUIIÑENU. Lu guidubi naca Guidxilayú ruuyaʼ grupu ca gaca guiráʼ ni rusiidiʼ de Biblia ne ruuyacabe chécani para guʼndaʼ binni cani. Laaca ruuyacabe iquiiñeʼ ca máquina ra raca ca guiʼchiʼ ca jneza, zaqueca modo iquiiñeʼ xcaadxi cosa ni napa ca yoo Betel. Ruuyacabe iquiiñeʼ ca bueltu ni rudii binni de guidubi ladxidóʼ para gaca xhiiñaʼ Reinu jneza.

◼ GRUPU NI RUUYAʼ GUIREECHE DIIDXAʼ. Cani nuu lu grupu ca riguíxhecabe modo naquiiñeʼ guireeche diidxaʼ ne laaca riguixhe chaahuicabe guirá ni naquiiñeʼ guni ca neza binni ridagulisaa, ca precursor, ca binnigola ni nuu lade binni ridagulisaa ne ca binnigola ni riganna ca binni ridagulisaa. Ruuyacabe modo gaca Xhiiñaʼ Reinu ni Rúninu, ruseendacaacabe binni para cheʼ Scuela stiʼ Galaad ne Scuela ra Riziidicabe Gúnicabe Xhiiñaʼ Dios, ne guiluxe si ca clase ca ruseendacabe laacaʼ xcaadxi lugar para gúnicaʼ xhiiñaʼ Dios.

◼ GRUPU NI RUUYAʼ XI GUIZÍʼDINU. Laacabe ruuyacabe xi guirá chitiidiʼ lu ca guendaridagulisaa rápanu ne zaqueca lu ca guendaridagulisaa roʼ. Riguixhe chaahuicabe xi guiráʼ guiziidiʼ cani nuu Betel ne ruuyacabe modo gaca xcaadxi scuela, casi Scuela stiʼ Galaad ne Scuela stiʼ ca Precursor Regular. Ne laaca riguíxhecabe xi gaca grabar lu videu ne lu discu.

◼ GRUPU NI RUUYAʼ XI GUICÁ LU CA GUIʼCHIʼ RICAANU. Dxiiñaʼ stícabe nga quixhe chaahuicabe xi naquiiñeʼ guicá lu ca guiʼchiʼ ni rusiidiʼ de Biblia para guireechecani ne chindácani ra nuu ca xpinni Cristu ne xcaadxi binni. Ricábicabe ni rinabadiidxaʼ binni de Biblia ne riníʼcabe pa zaa guiree xiixa guiʼchiʼ, casi ca guiʼchiʼ ra cá modo tiidiʼ ti drama ne ca guiʼchiʼ ra cá ca libana ca. Laaca ruuyacabe dxiiñaʼ ni cayuni cani rutiixhi diidxaʼ ni nuu lu guidubi naca Guidxilayú.

Apóstol Pablu bichaaga ca xpinni Cristu ni bibí casi ti cuerpu ne biluiʼbe pabiáʼ risaca dxiiñaʼ ni runi cada tobi de laacaʼ, laaca guniʼbe racanésaacaʼ, nadxiicaʼ ne nuucaʼ tobi si para gúnicaʼ dxiiñaʼ ni bisaanané Dios laacaʼ (Rom. 12:4, 5; 1 Cor. 12:12-31). Yanna, cumu Cristu nga xaíque stiʼ cuerpu ni zeeda gaca ca xpinni Cristu ca la? laabe nga rudiibe ni caquiiñeʼ cada tobi de laacaʼ para gacanésaacaʼ ne quixhe chaahuicaʼ cani naquiiñeʼ gaca para gusiidicaʼ ni cá lu Stiidxaʼ Dios (Efe. 4:15, 16; Col. 2:19). Zacá nga runi Grupu ni Zaniruʼ ca para guʼyaʼ dxiiñaʼ ni raca lu guidubi naca Guidxilayú, ne riquiiñeʼ Jiobá espíritu stiʼ para gabi laacabe modo gúnicabe cani.