Tuu nga Grupu ni Zaniruʼ stiʼ ca Testigu stiʼ Jehová

Laacabe nga ti grupuhuiiniʼ de xpinni Cristu ni maʼ xadxí naca Testigu. Grupu riʼ nga zaniruʼ ndaaniʼ organización stiʼ ca testigu stiʼ Jehová lu guidubi Guidxilayú. Chupa dxiiñaʼ nga runi grupu riʼ:

• Ruuyaʼ xi tema stiʼ Biblia naquiiñeʼ guiree lu ca publicación stidu, xi guiuundaʼ lu ca guendaridagulisaa ne lu ca scuela rapa ca testigu stiʼ Jehová (Lucas 12:42).

• Riguixhe ximodo gaca dxiiñaʼ runi ca testigu stiʼ Jehová. Tobi de laacani nga guʼyaʼ guireeche diidxaʼ, guʼyaʼ ximodo iquiiñeʼ guiráʼ ni rudii binni de guidubi ladxidóʼ ne cuí hermanu napa guenda galán para guni xiixa dxiiñaʼ lade ca Testigu.

Runi Grupu ni Zaniruʼ casi biʼniʼ «ca apóstol ne ca hermanu gola» de Jerusalén ni bibani lu primé siglu. Laacabe nga gudíxhecabe ximodo guni guiráʼ xpinni Cristu dxiiñaʼ, zaqué nga casi ñaca niníʼcabe pur laacaʼ (Hechos 15:2). Cani nuu lu Grupu ni Zaniruʼ cadi nácacaʼ xaíque stiʼ organización stidu cásica qué ñaca «ca apóstol ne ca hermanu gola» que ni. Laacabe ruuyacabe xiná Biblia ante quixhe íquecabe gúnicabe xiixa ne nanna dxíchicabe maʼ gulí Jehová Jesucristu para gaca Xaíque stiʼ ca xpinni (1 Corintios 11:3; Efesios 5:23).

Tuu nga nuu lu Grupu ni Zaniruʼ yanna

Dede lu beeu abril 2015, ndiʼ ca binni nuu lu Grupu ni Zaniruʼ: Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane ne Jeffrey Winder. Guirácabe rúnicabe dxiiñaʼ ndaaniʼ sede mundial stidu ni nuu Warwick (Nueva York).

Ximodo runi Grupu ni Zaniruʼ dxiiñaʼ

Maʼ gudixhe Grupu ni Zaniruʼ chuʼ xhoopaʼ comité para guʼyaʼ gaca dxiiñaʼ rúnidu. Cada tobi de laacabe ruuyaʼ dxiiñaʼ raca lu ti comité o chupa chonna comité.

• Comité stiʼ ca Coordinador. Ruuyaʼ xi naquiiñeʼ guni organización stidu ora chuʼ ti ley ni gacalaʼdxiʼ gucueeza dxiiñaʼ rúnidu, ruuyaʼ chuʼ tu gacané ca hermanu ora gaca ti desastre, ora guizaaca xcaadxi cosa ni guniná ca testigu stiʼ Jehová ne ora chuʼ tu sánanda laacaʼ.

• Comité de Personal. Ruuyaʼ xi guiráʼ caquiiñeʼ ca binni runi dxiiñaʼ ndaaniʼ ca yoo Betel o cani runi dxiiñaʼ ndaaniʼ sucursal stiʼ ca Testigu.

• Comité de Publicación. Ruuyaʼ gaca imprimir guiráʼ publicación ni rusiidiʼ de Biblia ne chindá cani ra nuu guiráʼ hermanu, laaca ruuyaʼ cuí Yoo stiʼ Reinu, oficina de traducción ne sucursal.

• Comité de Serviciu. Riguixhe ximodo naquiiñeʼ guireeche ca diidxaʼ nacubi ne galán stiʼ Reinu (Mateo 24:14).

• Comité de Enseñanza. Riguixhe xi guiráʼ naquiiñeʼ guizíʼdidu lu ca guendaridagulisaa stidu, lu ca scuela nápadu ne ruuyaʼ xi grabación de audio ne videu naquiiñeʼ gaca.

• Comité de Redacción. Rucaa guiráʼ ni chiguiree lu ca publicación ni rusiidiʼ de Biblia, guiráʼ ni chuʼ lu sitiu nápadu lu Internet ne runi supervisar dxiiñaʼ runi guiráʼ traductor.

Aparte de dxiiñaʼ rúnicabe lu ca comité riʼ, guiráʼ semana ridagulisaa cani nuu lu Grupu ni Zaniruʼ para gúʼyacaʼ xi caquiiñeʼ organización stidu. Lu ca guendaridagulisaa riʼ, ruuyacabe xiná Biblia ne rudiicabe lugar gabi espíritu santu stiʼ Dios laacabe xi gúnicabe. Guiráʼ biaje rúnicabe stipa chúʼcabe tobi si lu cani cá íquecabe gúnicabe (Hechos 15:25).

Cani racané Grupu ni Zaniruʼ

Cada comité stiʼ Grupu ni Zaniruʼ napa chupa chonna xpinni Cristu de confianza ni racané laa (1 Corintios 4:2). Ca hombre racané laacabe riʼ nánnacaʼ ne nápacaʼ experiencia para gúnicaʼ dxiiñaʼ lu comité ni raca caber laacaʼ ne guiráʼ semana riuucaʼ lu ca guendaridagulisaa rapa Grupu ni Zaniruʼ. Neca cadi laacabe nga riguíxhecabe xi gaca, peru riníʼcabe ximodo ñuuláʼdxicabe ñaca xiixa cosa, riníʼcabe xi guiráʼ maʼ biindacabe de dxiiñaʼ chigaca, rúnicabe ni quixhe ique comité riʼ ne ruuyacabe ximodo zeʼ dxiiñaʼ cayaca. Laaca zanda guinabaʼ Grupu ni Zaniruʼ laacabe chigánnacabe xcaadxi Testigu de sti guidxi o gudiicabe libana lu ca guendaridagulisaa raca guiráʼ iza o ra raca graduar cani rié Scuela stiʼ Galaad.