Ni gusiiditu ca xiiñitu

Ti dxaapahuiiniʼ ni guyuulaʼdxiʼ gacané

ÑEE huayunibiaʼluʼ tuuxa binni ni napa xiixa guendahuará malu la?... Ñuuláʼdxiluʼ ñúniluʼ xiixa para ñacaneluʼ laabe la?... Yanna pa ñácabe de sti guidxi o de sti religión yaʼ. Ñee laaca ñuuláʼdxiluʼ ñacaneluʼ laabe la?... Raca biaʼ chonna mil iza bibani ti dxaapahuiiniʼ ndaaniʼ guidxi Israel, laabe guyuuláʼdxibe gacanebe ti binni. Guidúʼyanu xi guca.

Dxaapahuiiniʼ ca bibani ndaaniʼ guidxi Israel ni guyuu dxiqué. Nabé gudinde guidxi riʼ ne Siria, ti guidxi guyuu gaxha de laacabe (1 Reyes 22:1). Ti biaje biuu ca binni de Siria ndaaniʼ guidxi Israel ne gunaazecaʼ dxaapahuiiniʼ que. Laabe beeda gácabe criada stiʼ xheelaʼ Naamán, xaíque stiʼ ca soldadu de Siria. Hombre riʼ napa ti guendahuará malu láʼ lepra, laani rusábani beela ladi binni.

Gudxi dxaapahuiiniʼ que xheelaʼ Naamán ximodo zanda guianda hombre que. Sicaríʼ gúdxibe laa: Pa cheʼ Naamán Samaria, ra nuu Eliseo, ni riguixhená stiʼ Jiobá la? laa zanda gusianda lepra stibe. Modo guníʼ dxaapahuiiniʼ que de Eliseo bicaani Naamán guni cré zanda gusianda ni riguixhená que laa. Ben-hadad, rey stiʼ Siria, bidii permisu Naamán para cheʼ, ngue runi guyebe ne xcaadxi xpínnibe ra nuu Eliseo, guzácabe biaʼ 150 kilómetru para yendácabe raqué.

Primé gudíʼdicabe ra nuu Jehoram, rey stiʼ Israel, ne biluíʼcabe laa carta bidii Ben-hadad ra canabaʼ gacanécabe Naamán. Peru Jehoram, qué ñuni cré diʼ Jiobá ne qué ñuni crebe Eliseo. Laabe guníʼ íquebe cuyubi Ben-hadad tindené xquídxicabe. Ora gunna Eliseo de laani la? gúdxibe rey Jehoram: Bidii lugar gueeda Naamán ra nuaa. Eliseo racalaʼdxiʼ gusihuinni napa Jiobá poder para gusianda guendahuará malu napa Naamán que (2 Reyes 5:1-8)

Ora yendá Naamán ralidxi Eliseo ne ca carru ne ca caballu stiʼ la? ni riguixhená que biseendaʼ ti mozo stiʼ para gabi laabe sicaríʼ: Napa xidé gázeluʼ ndaaniʼ guiiguʼ Jordán ca gadxe biaje, ti guiándaluʼ. Bidxiichi Naamán óraque, purtiʼ laa guleza niree Eliseo para nidxaagalú laabe ne nuniibináʼ nezalube para nusianda lepra nápabe que. Peru laga mozo stiʼ Eliseo que bidxaagalú laabe. Ngue runi, gucalaʼdxiʼ Naamán nibiguetaʼ xquidxi purtiʼ guizáʼ cadxiichi (2 Reyes 5:9-12).

Xi ñúniluʼ pa ñácaluʼ tobi de ca mozo stiʼ Naamán yaʼ... Ca mozo stibe que gúdxicaʼ laabe: Pa ninabaʼ Eliseo lii ñuʼnuʼ xiixa ni jma nagana, ñee qué ñuʼnuʼ ni la? Yanna, xiñee qué guʼnuʼ ni nabe ca yaʼ, gázesiluʼ ti guiándaluʼ, ngasi. Naamán bicaadiaga laacabe. Biuube ndaaniʼ guiiguʼ Jordán que gadxe biaje, ne guca ládibe casi ladi ti hombrehuiiniʼ.

Bibiguetaʼ Naamán ra nuu Eliseo ne na: Maʼ bidiéʼ cuenta gastiʼ Dios ndaaniʼ ca guidxi ca, sínuque ndaaniʼ guidxi Israel si. Laaca guniʼbe maʼ qué zuutirube tuuxa maniʼ para sti Dios, sínuque para Jiobá si (2 Reyes 5:13-17).

Ñuuláʼdxiluʼ ñacaneluʼ tuuxa para guiziidiʼ de Jiobá ne de cani chigúnibe, casi biʼniʼ dxaapahuiiniʼ ca la?... Dxi guyuu Jesús ndaaniʼ Guidxilayú riʼ la? biʼniʼ cré ti hombre napa lepra laabe ne gudxi laabe: «Nanna zanda gusianda lu naa pa na luʼ». Nannuʼ xi bicabi Jesús laabe óraque la?... «Zusianda lii.» Ne bisiándabe laa, cásica bisianda Jiobá Naamán (Mateo 8:2, 3).

Ñee maʼ nannuʼ xiixa de guidxilayú cubi ni chiguni Jiobá, ra zabani binni sin gaca huará ne qué ziuu dxi gati la?... (2 Pedro 3:13; Apocalipsis 21:3, 4.) Pa zacá ni la? nanna dxíchidu ziuuláʼdxiluʼ gábiluʼ binni ca cosa sicarú ni maʼ nannuʼ ca.

[Ni caníʼ yaza 25]

Guendarinabadiidxaʼ:

❍ Ximodo gucané ti dxaapahuiiniʼ Naamán, hombre ni guca xaíque stiʼ ca soldadu ni gunaazecaʼ laabe que.

❍ Xiñee qué niná Naamán nuzuubaʼ diidxaʼ primé. Xi bicaa laabe guchaabe modo guníʼ íquebe.

❍ Xi naquiiñeʼ guʼnuʼ pa racaláʼdxiluʼ gácaluʼ casi dxaapahuiiniʼ que.

❍ Xi biʼniʼ Jesús ti biaje, ne xiñee galán zabani binni lu guidxilayú cubi stiʼ Dios.