«Dios nga rusiniisi ni»
«Nin ni rudxiibaʼ, nin ni ruzee, iruti naca, purti Dios nga rusiniisi ni.» (1 COR. 3:7.)
1. Ximodo nga runinenu «Dios dxiiñaʼ».
APÓSTOL Pablu bizeeteʼ ti ndaayaʼ naroʼbaʼ ni zanda gapa ca xpinni Cristu, ne laani nga guninecaʼ «Dios dxiiñaʼ» (biindaʼ 1 Corintios 3:5-9). Ximodo nga rúninu xhiiñabe yaʼ. Rúninu ni ora gacanenu binni gaca xpínnibe. Pablu bichaaga dxiiñaʼ ca casi ora rudxiibaʼ binni xiixa biidxiʼ ne ruzee ni, ne rusietenaláʼdxibe laanu Dios nga rusiniisi ni. Nga runi, para ganda gacanenu binni la? caquiiñenu gacané Jiobá laanu.
2. Ximodo zadúʼyanu dxiiñaʼ stinu pa guietenaláʼdxinu Dios nga racané binni guiniisi lu stiidxaʼ yaʼ.
2 Pa guietenaláʼdxinu zaquiiñenu gacané Jiobá laanu para gacanenu binni la? qué zudxíʼbadinu laca laanu ne zánnanu xiñee nga rucheechenu diidxaʼ. Neca laanu nga rucheechenu diidxaʼ ne rusiidinu binni la? Jiobá nga naquiiñeʼ gusisácanu ora guiniisi tuuxa lu stiidxabe. Xiñee naquiiñeʼ guisaca Jiobá yaʼ. Purtiʼ nécapeʼ gacaláʼdxinu guiénenu ximodo nga málasi guiniisi ti binni lu stiidxaʼ Dios ne gaca xpínnibe la? nin tobi de laanu gastiʼ zanda guni para guiniisibe lu stiidxaʼ Dios modo racalaʼdxiʼ. Nga runi, jneza ni guníʼ rey Salomón riʼ: «Qué runibiaʼ[nu] cani maʼ biʼniʼ Dios ni dxandíʼ ca, purtiʼ laa runi guiráʼ xixé cosa» (Ecl. 11:5).
3. Ximodo nga zeeda gaca dxiiñaʼ ni rúninu ora racanenu binni ca casi ora rudxíʼbacabe biidxiʼ yaʼ.
3 Peru, ñee zareʼnu gana purtiʼ qué riénenu ximodo nga málasi guiniisi ti binni lu stiidxaʼ Dios ne gaca xpínnibe la? Coʼ, purtiʼ nga rusihuinni risaca dxiiñaʼ stinu. Salomón guníʼ ca diidxaʼ riʼ: «Bidxiibaʼ biidxiʼ stiluʼ siadóʼ, ne cadi guiaanadxí naluʼ dede ora gaca huadxí; purtiʼ qué gánnadiluʼ paraa zandánini, pa raríʼ o pa raricaʼ, o guiropaʼ lugar ca» (Ecl. 11:6). Ora ti binni rudxiibaʼ xiixa biidxiʼ la? qué gánnadibe pa zandánini ne paraa gachenduni, purtiʼ nuu stale cosa ni qué gánnabe. Zacaca nga raca ne dxiiñaʼ rúninu ora racanenu binni gaca xpinni Cristu, ne lu capítulo 4 stiʼ Evangeliu stiʼ Marcos ruzeeteʼ chupa ejemplu ni culuíʼ zacaca nga dxiiñaʼ cayúninu ca. Guidúʼyanu xi zanda guizíʼdinu lúcani.
Nuu gadxé gadxé layú
4, 5. Guníʼ xii nga bizeeteʼ Jesús lu ejemplu stiʼ hombre ni bisaba biidxiʼ lu layú que.
4 Lu Marcos 4:1-9, Jesús guníʼ de ti hombre ni bisaba biidxiʼ, ne biábacani gadxé gadxé lugar. Lu textu ca na sicaríʼ: «Ti hombre biree zinduu biní. Ra caguu be biní que biaba caadxi ni uriá neza ne beeda mani huiini gudó cani. Xcaadxi de ca xuba que biaba lade guie ne undani cani nagueenda purti luguiá si napa ni caadxi yu. Peru casi biree gubidxa bizaaqui cani ne bibidxi cani purti qué gapa cani xcu cani gueteʼ. Xcaadxi de laacani biaba lade guichi ne laca undani caʼ, peru jma bisoo guichi que para laacani ne biiti guichi que cani ne qué nudii cani gastiʼ. Nuu xcaadxi de laacani biaba lu layú ra nayá, ne ca ngue huaxa gundani ne bisoo. Nuu layú ra bidii treinta carreta niza ne nuu ra bidii sesenta ne nuu ra bidii dede ti gayuaa».
5 Dxiqué ora chigudxiibaʼ tuuxa xiixa biidxiʼ la? ndaaniʼ lari ni nacu nga maʼ ziné cani o ndaaniʼ ti bolsa, de raqué rucheeche cani lu layú que. Ngue runi, pa lu ejemplu ni guninu luguiáʼ que biaba ca biidxiʼ stiʼ hombre que gadxé gadxé lugar la? cadi purtiʼ zacá nga gucaláʼdxibe, sínuque purtiʼ ora bicheechebe cani biábacani gadxé gadxé lugar.
6. Ximodo bisiene Jesús ejemplu stiʼ hombre ni rusaba biidxiʼ que.
6 Cadi caquiiñeʼ diʼ guiníʼ íquenu stale para guiénenu ejemplu ni guníʼ Jesús ca, purtiʼ laca laabe bisiénebe ni riniʼni lu Marcos 4:14-20, nani: «Ni guluu biní que la? ngue nga zeda gaca casi ni ruiʼ stiidxa Dios. Ne xuba ni bisaba be que nga zeda gaca casi binni ni runa diaga stiidxa Dios. Nuu de laaca zeda gaca casi xuba ni biaba uriá neza que, purti nécati guna diaga ca stiidxa Dios, reeda binidxaba raxha ni de ndaani ladxidóʼ caʼ. Ne nuu xcaadxi binni zeda gaca casi xuba ni biaba lade guie que. Purti casi guna diaga ca stiidxa Dios, ricaa ca ni ne enda nayecheʼ. Peru qué riaazi pe ni ndaani ladxidóʼ caʼ, sínuque luguiá si. Ngue runi casi pe gueeda xiixa ni naná, o iladxi cabe laaca pur stiidxa Dios que, maca zixale ca de laani. Ne nuu xcaadxi zeda gaca casi xuba ni biaba lade guichi que. Runa diaga ca stiidxa Dios, peru jma rucaa ique ca irá ni nuu ndaani guidxilayú, ne rudii ca lugar quite bidxichi ique ca ne riulaʼdxi ca gapa ca stale cosa. Irá nga ruuti stiidxa Dios ni nuu ndaani ladxidóʼ cabe que. Nga runi qué zanda iquiiñe cabe para Dios. Peru nuu xcaadxi binni zeda gaca casi xuba ni biaba ra nayá que, purti runa diaga ca stiidxa Dios ne ricaa ca ni, ne rudii ca lugar iniisi ni ndaani ladxidóʼ caʼ, ne óraque zanda iquiiñe ca para Dios. Nuu de laaca zeda gaca casi ni bidii treinta carreta niza que, ne nuu de laaca casi ni bidii sesenta que, ne nuu de laaca casi ni bidii dede ti gayuaa que».
7. Xii nga zeeda gaca biidxiʼ ca ne ca layú ca yaʼ.
7 Lu ejemplu ni guníʼ Jesús ca qué niníʼdibe biquiiñeʼ hombre ca gadxé gadxé biidxiʼ. Ni guniʼbe nga biábani lu gadxé gadxé layú; ne pur nga cadi biaʼ queca diʼ bidiini. Primé clase layú que nabé naguidxi. Guiropa ca huaxiéʼ gueteʼ ni ne guionna ca napa stale guichi. Guidapa ca ti layú chaʼhuiʼ ni purtiʼ rudiini (Luc. 8:8). Xii nga zeeda gaca biidxiʼ ca yaʼ. Laani nga stiidxaʼ Reinu ni cá lu Stiidxaʼ Dios (Mat. 13:19). Yanna, xii nga zeeda gaca ca layú ca yaʼ. Laacani nga modo ladxidóʼ binni (biindaʼ Lucas 8:12, 15).
8. 1) Tuu nga zeeda gaca hombre ni rudxiibaʼ biidxiʼ que. 2) Xiñee cadi guiráʼ diʼ binni raca xpinni Cristu.
8 Tuu nga zeeda gaca binni ni rudxiibaʼ biidxiʼ ca. Nga nga ca binni ni runi xhiiñaʼ Dios, ne rucheechecaʼ stiidxaʼ Reinu. Cásica biʼniʼ Pablu ne Apolos, laacabe bidxiibacabe ne bizeecabe ni; peru neca bínicabe stipa, cadi guiráʼ diʼ binni nga bicaadiaga stiidxaʼ Dios. Xiñee yaʼ. Purtiʼ gadxé gadxé nga ladxidóʼ binni. Cadi guiaandaʼ laanu hombre ni bizeeteʼ Jesús lu ejemplu que, gastiʼ ñanda ñúnibe para nudii biidxiʼ que biaʼ gucaláʼdxibe. Ca xpinni Cristu ratadxí ladxidoʼcaʼ ora gánnacaʼ zacá ni, ne jmaruʼ si cani maʼ xadxí de cucheechecaʼ diidxaʼ ne ruluíʼ guirutiʼ tu náʼ gacanécabe laacaʼ gácacaʼ xpinni Dios.a Xiñee riguixhedxí nga ladxidóʼcabe yaʼ.
9. Xii nga ni bisiidiʼ Pablu ne Jesús ni nabé riguixhedxí ladxidoʼno.
9 Cadi pur guiráʼ ni ribeendú tuuxa ni runi dxiiñaʼ lu layú nga zahuinni dxandíʼ cayuni dxiiñaʼ. Zacá bizeeteʼ Pablu ora guníʼ ca diidxaʼ riʼ: «Cada tobi ziaxa biaʼ dxiiña biʼniʼ» (1 Cor. 3:8). Biaʼ dxiiñaʼ biʼniʼ binni ca nga chiguiaxa ne cadi biaʼ bidii layú que. Ne zacá bisiene Jesús ni ca discípulo stiʼ ora bibiguétacaʼ de yegucheechecaʼ diidxaʼ xcaadxi lugar. Ca discípulo que biquiiñecaʼ lá Jesús para guleecaʼ demonio luguiáʼ binni ne nabé biéchecaʼ purtiʼ ca demonio que bizuubacaʼ stiidxacabe. Neca galán nga biéchecabe pur ngue la? Jesús gudxi laacabe: «Cadi guieche tu purti ruzuuba binidxaba stiidxa tu, sínuque laguieche purti cá lá tu lu guiʼchi ni napa Dios ibáʼ» (Luc. 10:17-20). Zándaca qué zadxela ti xpinni Cristu binni ni náʼ guiziidiʼ de Dios, peru cadi pur nga zanda guininu qué rúnibe xhiiñabe casi runi xcaadxi. Xiñee yaʼ. Purtiʼ pa naguudxi ladxidóʼ ca binni ca la? zúnicaʼ ni gucaadiágacaʼ. Ne ni cadi naquiiñeʼ guiaandaʼ laanu nga, Dios nga rusiniisi binni lu stiidxaʼ.
Ni caquiiñeʼ guni cani rucaadiaga stiidxaʼ Dios
10. Xii nga chigusihuinni pa zaca ni gucaadiaga stiidxaʼ Dios ca casi ti layú chaahuiʼ o coʼ yaʼ.
10 Xi zanda guininu de ca binni ni rucaadiaga stiidxaʼ Dios yaʼ. Ñee maca nexheʼ tuu nga zucaadiaga stiidxaʼ Dios ne zuni ni nabe la? Coʼ, cadi zacá diʼ ni. Cada binni nga zanda cuí pa zaca casi layú chaʼhuiʼ ni guníʼ Jesús que o coʼ. Ti binni zanda guchaa ladxidóʼ para guni ni jneza o ni cadi jneza (Rom. 6:17). Lu ejemplu ni bizeeteʼ Jesús que na ora gucaadiaga tuuxa de stiidxaʼ Dios la? «reeda binidxaba raxha ni» laa. Peru qué zanda guni Binidxabaʼ zacá pa gúninu ni na Santiago 4:7, luni na cadi gulabi ca xpinni Cristu Binidxabaʼ, purtiʼ óraca zaxélebe de laacaʼ. Jesús laaca guníʼ nuu tu laa nayecheʼ ricaa stiidxaʼ Dios peru qué rindaa rixélecaʼ de laabe purtiʼ «qué riaazi pe ni ndaani ladxidóʼ caʼ». Peru Stiidxaʼ Dios cayabi cani racalaʼdxiʼ guni ni na Dios guzuhuaa dxiichicaʼ lu ni runi crecaʼ para ganda gánnacaʼ «pabiáʼ naroʼba amor ni napa Cristu para laanu» (Efe. 3:17-19; Col. 2:6, 7).
11. Xi caquiiñeʼ guni binni ti cadi gusaana de guiniisi lu stiidxaʼ Dios pur bidxichi ne pur cani nuu lu Guidxilayú riʼ yaʼ.
11 Jesús guníʼ nuu xcaadxi binni ni rucaadiaga stiidxaʼ Dios peru «rucaa ique ca irá ni nuu ndaani guidxilayú, ne rudii ca lugar quite bidxichi ique ca» ne nga «ruuti stiidxa Dios» ni nuu ndaaniʼ ladxidoʼcaʼ (1 Tim. 6:9, 10). Xi zanda guni ti binni para cadi guizaaca nga yaʼ. Apóstol Pablu na: «Cadi ibani tu para gapa si tu bidxichi, sínuque laguieche né biaʼ tiica napa tu, purti na Dios rabi laanu: “Qué zusaana laatu ne qué ziaana dxie de acaniá laatu”» (Heb. 13:5).
12. Xiñee cadi guiráʼ diʼ binni ni zeeda gaca casi layú chaʼhuiʼ ca zanda guni biaʼca runi xcaadxi.
12 Maʼ para guiluxe Jesús ejemplu ca guníʼ de ca biidxiʼ ni biaba lu layú chaʼhuiʼ que, nabe: «Nuu de laaca zeda gaca casi ni bidii treinta carreta niza que, ne nuu de laaca casi ni bidii sesenta que, ne nuu de laaca casi ni bidii dede ti gayuaa que». Nga runi, caadxi de cani ricaa stiidxaʼ Dios nga naguudxi ladxidoʼcaʼ ne rucheechecaʼ diidxaʼ. Peru, cadi guiráʼ diʼ binni nga zanda gucheeche diidxaʼ biaʼ runi stobi, purtiʼ gadxé gadxé modo nuu cada tobi de laacaʼ. Casi nuu tu laa ñuulaʼdxiʼ ñuni jma lu xhiiñaʼ Dios peru qué zanda diʼ purtiʼ maʼ huaniisi o maʼ huará (zanda gúʼndaluʼ Marcos 12:43, 44). Nécapeʼ qué zanda gacané ca xpinni Cristu ti binni guiniisi lu stiidxaʼ Dios modo racaláʼdxicaʼ la? ora gúʼyacabe ximodo rusiniisi Jiobá binni ca lu stiidxaʼ la? riéchecabe stale (biindaʼ Salmo 126:5, 6).
Ni rudxiibaʼ biidxiʼ ne rasi
13, 14. 1) Guníʼ xii nga bizeeteʼ Jesús lu ejemplu stiʼ ca binni ni bisaba biidxiʼ ne gusi que. 2) Tuu nga zeeda gaca ca binni ni rudxiibaʼ biidxiʼ que, ne xii nga biidxiʼ ca.
13 Lu Marcos 4:26-29 zeeda ejemplu stiʼ sti hombre ni rudxiibaʼ biidxiʼ: «Enda runi mandar sti Dios zeda gaca casi ora riguu binni biní. Purti inque bisaba cabe xuba que la? ma zasi cabe huaxhinni ne ziasa cabe ridxíʼ, ne zaqué ridiʼdi dxi, ne xuba que candani ne caniisi, peru qué ganna cabe ximodo raca ni. Stubi layú que rusiniisi ni. Primeru riree bandaga, ne óraque dú, ne de raqué ma zee. Ne ora ma niza ni la? rindadi cabe ni purti ma bizaa dxi stini».
14 Tuu nga ca binni ni rusaba biidxiʼ ca yaʼ. Caadxi binni ni ná zinanda Cristu nacaʼ laabe nga ca binni ca. Peru cadi jneza diʼ guiníʼcabe zacá purtiʼ laabe cadi nisiaasidibe ne cadi jneza diʼ guiníʼcabe qué gánnabe ximodo riniisi biidxiʼ ca, purtiʼ laabe nánnabe dxíchibe ximodo riniisini. Cani rudxiibaʼ biidxiʼ ca nga zeeda gaca cada tobi de cani rucheeche stiidxaʼ Reinu ne stale gana, cásica bidúʼyanu ni lu ejemplu gudiʼdiʼ que. Ne biidxiʼ ca nga ni rusiidicabe binni.b
15, 16. Xii nga bisiidiʼ Jesús lu ejemplu stiʼ ca binni ni rudxiibaʼ biidxiʼ que ora guníʼ modo riniisi ti yaga huiiniʼ ne modo riniisi ti xpinni Cristu lu stiidxaʼ Dios.
15 Jesús na cani rudxiibaʼ biidxiʼ ca rásicaʼ huaxhinni ne riásacaʼ ridxíʼ. Ca diidxaʼ riʼ cadi rusihuinni diʼ cani qué rizaaláʼdxicabe gúnicabe dxiiñaʼ, sínuque rúnicabe ni runi guiráʼ binni, rúnicabe dxiiñaʼ ridxíʼ ne rásicabe huaxhinni. Laga cayúnicabe ca nga la? biidxiʼ ca «candani ne caniisi». Jesús na «qué ganna cabe ximodo raca ni». Ne lu ejemplu ca na «stubi» layú que rusiniisi ni biidxiʼ ca.c
16 Xii nga bisiidiʼ Jesús ne ejemplu ca yaʼ. Luni guniʼbe ximodo chaahuidugá ziniisi yagahuiiniʼ ca. «Stubi layú que rusiniisi ni. Primeru riree bandaga, ne óraque dú, ne de raqué ma zee.» (Mar. 4:28.) Chaahuidugá nga riniisi ti yaga huiiniʼ. Guirutiʼ diʼ zanda gucaa ni guiniisini nagueenda. Zacaca nga riniisi binni lu stiidxaʼ Dios. Ti binni ni racalaʼdxiʼ guicaa guendanabani ni qué zaluxe ca la? chaahuidugá nga riniisi lu stiidxaʼ Dios, ne Jiobá nga rusiniisi stiidxaʼ ndaaniʼ ladxidoʼbe chaahuidugá (Hech. 13:48; Heb. 6:1).
17. Tuu nga cani riecheʼ ora rudii biidxiʼ ca cuananaxhi.
17 Ejemplu ca na: «Ne ora ma niza ni la? rindadi cabe ni purti ma bizaa dxi stini». Ximodo raca nga yaʼ. Casi maʼ bidúʼyanu ca, Jiobá nga rusiniisi stiidxaʼ Reinu ca ndaaniʼ ladxidóʼ ni nacubi cayaca xpinni Cristu ca. Purtiʼ ridxiña dxi gannaxhiibe Dios, ne nga rucaa laabe gudiibe laabe Jiobá ne rusihuínnibe ni ora chúʼnisabe. Ne pa hombre binni ni caninu ca la? zudiicabe laabe stale guenda ndaaniʼ xquidxi Dios ora jma maʼ ziniisibe lu stiidxaʼ. Ora tuuxa binni reeda gaca xpinni Cristu la? riecheʼ ni bisaba biidxiʼ ca ne xcaadxi xpinni Cristu ni gucané laabe (biindaʼ Juan 4:36-38). Zacá ni, nabé riecheʼ ni bisaba biidxiʼ ca ne ni gundisaʼ cosecha ca.
Ni rizíʼdinu lu ca ejemplu ca
18, 19. 1) Ximodo gucané guiropaʼ ejemplu guníʼ Jesús ca lii. 2) Xi chiguidúʼndanu lu sti tema ca.
18 Xi bizíʼdinu ra bidúʼndanu guiropaʼ ejemplu ni zeeda lu capítulo tapa stiʼ Marcos yaʼ. Maʼ bidúʼyanu nápanu ti dxiiñaʼ ni naquiiñeʼ gúninu ne laani nga: gudxíʼbanu biidxiʼ stiʼ Reinu. Cadi gudiʼnu lugar intiica si gucueeza laanu de gúninu dxiiñaʼ ca o purtiʼ guiníʼ íquenu zándaca gápanu xiixa guendanagana ora gúninu ni (Ecl. 11:4). Laaca maʼ bidúʼyanu ti guenda nabé risaca nga gúninu xhiiñaʼ Dios. Jiobá nga rusiniisi binni lu stiidxaʼ ne riguube ndaayaʼ stipa rúninu ne stipa runi cani rucaadiaga stiidxabe. Maʼ biénenu qué zanda diʼ gucáʼpenu binni guiniisi lu stiidxaʼ Dios modo rábinu, ne cadi naquiiñeʼ diʼ guireʼnu gana purtiʼ si nanene caniisi tuuxa lu stiidxaʼ Dios o purtiʼ qué liica guiniisi. Ne nabé ratadxí ladxidoʼno gánnanu zabeendunu ni galán pa guzúʼbanu stiidxaʼ Jiobá sin guchéʼnenu laabe ne gucheechenu stiidxaʼ Reinu ti «ganna irá xixé guidxi» ni (Mat. 24:14).
19 Xiruʼ bisiidiʼ Jesús laanu raca ora riniisi binni lu stiidxaʼ Dios ne modo caniisi xhiiñaʼ Reinu yaʼ. Ni gunabadiidxanu ca zacábinu ni ora guidúʼndanu xhupa ejemplu zeeda lu ca Evangeliu. Lu sti tema ca zadúʼndanu cani.
[Cani cá ñee yaza]
a Biindaʼ ni bizaaca ti xpinni Cristu ni láʼ Georg Fjölnir Lindal, ni bicheeche diidxaʼ guidxi Islandia (Anuario de los testigos de Jehová 2005, yaza 210, 211), laaca zanda gúʼndaluʼ ni bizaaca xcaadxi xpinni Cristu ni qué niree gana de nucheeche diidxaʼ stale iza ndaaniʼ guidxi Irlanda, neca cadi nagueendaca guyuu tu guca xpinni Cristu (Anuario de los testigos de Jehová 1988, yaza 82-99).
b Lu revista riʼ maʼ bisiénedu ni zeeda gaca biidxiʼ ca nga ca guenda ni napa binni, ne qué randa diʼ riniisicabe lu stiidxaʼ Dios purtiʼ nuu tu ribee gana laacabe. Peru, naquiiñeʼ guietenaláʼdxinu biidxiʼ ni cayeeteʼ lu ejemplu riʼ qué riuʼdxuʼ ni ne qué rudiidini cuananaxhi ni maʼ biuʼdxuʼ, sínuque rachenduni ne riniisini dede gácani ti yaga (biiyaʼ La Atalaya 1 stiʼ noviembre 1980, yaza 17-19).
c Diidxaʼ «stubi» ca lu griegu la? lu riʼ si zeeda ni ne lu Hechos 12:10, racá na «stubi» ti puertaʼ de guiibaʼ bixeleʼ.
Rietenalaʼdxuʼ la?
• Xiñee zanda guchaaganu dxiiñaʼ ni runi binni ora gudxiibaʼ biidxiʼ ne ora gucheeche binni stiidxaʼ Reinu yaʼ.
• Xi ruuyaʼ Dios para ganna pabiáʼ rucheeche tuuxa diidxaʼ.
• Ximodo zanda guchaaganu modo riniisi ti yaga ne modo riniisi ti xpinni Cristu lu stiidxaʼ Dios, casi guníʼ Jesús que.
• Xiñee riecheʼ binni ni rudxiibaʼ biidxiʼ ca ne ni rindisaʼ cosecha ca yaʼ.
[Ca dibuju/foto ni zeeda lu yaza 13]
Xiñee bichaaga Jesús dxiiñaʼ ni runi cani rucheeche stiidxaʼ Reinu ca ne dxiiñaʼ stiʼ ca binni ni rudxiibaʼ biidxiʼ que
[Ca dibuju/foto ni zeeda lu yaza 15]
Ca binni ni zeeda gaca casi layú chaʼhuiʼ ca rucheechecaʼ stiidxaʼ Reinu ne stale gana dede biaʼ ra gándatiʼ
[Ca dibuju/foto ni zeeda lu yaza 16]
Dios nga rusiniisi ni