Nadxii Jiobá cani cadi cusaana de guni predicar neca cayaca ni nagana para laacaʼ

1, 2. a) Ora ridúʼyanu ejemplu stiʼ ca hermanu ni runi predicar lu ti territorio ra huaxiéʼ tu rucaadiaga, ¿ximodo racané ni laanu, ne xiñee? (Biiyaʼ foto ni zeeda ra ruzulú tema riʼ). b) ¿Xi bizeeteʼ Jesús rizaaca ora runi predicar tuuxa «ndaani xquidxi»? (Biiyaʼ xiná nota).

SERGIO NE OLINDA nga ti guendaxheelaʼ ni napa jma de 80 iza, nácacaʼ precursor ne nabézacaʼ Estados Unidos. Cumu maʼ riuubaʼ ñeecabe la? maʼ nanene rizácabe. Neca zacá, a las siete de la mañana riécabe ra ti plaza ni nuu ndaaniʼ xquídxicabe, ruzuhuaacabe gaxha de ti parada de autobús ne runi ofrecércabe publicación ca binni ni ridiʼdiʼ raqué. Maʼ napa stale iza de cayúnicabe dxiiñaʼ riʼ. Neca qué rulabi stale binni laacabe, qué rireecabe gana ne guiráʼ binni guyadxí laacabe ruxidxinécabe laacaʼ. Ora rudii a las doce ribiguétacabe ra lídxicabe chaahuidugá. Ne sti dxi la? a las siete de la mañana maʼ nuucabe raqué sti biaje. Ca hermanu riʼ runi predicarcaʼ mensaje stiʼ Reinu xhoopaʼ dxi lu ti semana guidubi ti iza.

² Cásica Sergio ne Olinda, nuu stale xpinni Cristu lu guidubi Guidxilayú ni maʼ napa stale iza de nabézacaʼ ti lugar ra huaxiéʼ rucaadiaga binni stiidxaʼ Reinu. Pa laaca nabézaluʼ lu ti territorio sicaríʼ la? runi felicitardu lii pur cayuni huantarluʼ.a Ejemplu stiluʼ riguu ni gana xcaadxi xpinni Dios, dede ca hermanu ni jma napa experiencia que lii. Guzéʼtenu ni guníʼ caadxi superintendente de circuito: «Ora runeʼ predicar né ca hermanu ni cadi cusaana de guni ni ná Jiobá la? riguu ni gana naa», «ora ruuyaʼ cadi caree ca hermanu riʼ gana de gúnicaʼ ni ná Dios la? racané ni naa cadi gusaana de guneʼ predicar ne gacaʼ nadxibalú», «ejemplu stícabe rucaa ni naa guneʼ casi cayúnicabe».

3. ¿Xi chonna pregunta zacábinu lu tema riʼ, ne xiñee?

³ Lu tema riʼ zacábinu chonna pregunta: ¿Xi zándaca cuee gana laanu? ¿Ximodo zanda cueendunu ni galán ora guni predicarnu yaʼ? ¿Xi zacané laanu cadi gusaana de guni predicarnu neca cayaca ni nagana para laanu? Respuesta stiʼ ca pregunta riʼ zacané cani laanu cadi gusaana de gúninu dxiiñaʼ ni bisaanané Jesús laanu.

XI ZÁNDACA CUEE GANA LAANU

4. a) ¿Ximodo biʼniʼ sentir Pablo ora biʼyaʼ qué niná stale judíu ñaca xpinni Cristu? b) ¿Xiñee biʼniʼ sentirbe zacá yaʼ?

⁴ Ora runi predicar tuuxa lu ti territorio ra huaxiéʼ tu rucaadiaga stiidxaʼ Reinu la? zándaca guiree gana. ¿Ñee huayuni sentirluʼ zacá la? Pa zacá ni, nuudu seguru riéneluʼ ximodo biʼniʼ sentir apóstol Pablo. Biʼniʼ predicarbe biaʼ treinta iza, ne biaʼ tiempu bíʼnibe ni gucanebe stale binni gaca xpinni Cristu (Hech. 14:21; 2 Cor. 3:2, 3). Peru qué ñanda ñacané Pablo stale judíu para ñácacaʼ xpinni Cristu, purtiʼ stale de laacaʼ qué ninacaʼ nucaadiágacaʼ laabe ne dede guzanándacaʼ laabe (Hech. 14:19; 17:1, 4, 5, 13). Guyuube triste purtiʼ qué niná ca judíu nucaadiágacaʼ laabe. Ngue runi, Pablo peʼ guníʼ: «Nuaa triste ne qué ganda iree yuuba ndaani ladxiduáʼ» (Rom. 9:1-3). ¿Xiñee biʼniʼ sentirbe zacá yaʼ? Purtiʼ riuuláʼdxibe guni predicarbe ne naxhiibe ca binni que. Bizaaláʼdxibe ca judíu, ngue runi ora bíʼyabe qué nacaʼ gucaadiágacaʼ stiidxaʼ Dios la? gucaná ladxidoʼbe.

5. a) ¿Xi rucaa laanu guni predicarnu? b) ¿Xiñee nuu biaje zándaca guireʼnu gana ora guni predicarnu yaʼ?

⁵ Cásica Pablo, laanu laaca runi predicarnu purtiʼ dxandíʼ rizaaláʼdxinu binni (Mat. 22:39; 1 Cor. 11:1). Nánnanu ni jma risaca gúninu lu xquendanabáninu nga guni servirnu Jiobá. Ne pur nga ñuuláʼdxinu nudii guiráʼ binni ni nuu lu territorio stinu cuenta pabiáʼ risaca ca diidxaʼ ni runi predicarnu. Nga runi, qué rusaana de guinínenu laacabe de Jiobá ne de ni naguixhe ique guni para binni. Zeeda gaca stiidxaʼ Dios casi ti regalu ni rinenu ra nuu binni ne rábinu laacabe guicaacabe ni. Nga runi, ora qué rucaadiágacabe laanu riuʼnu triste cásica guyuu Pablo. ¿Xiñee runi sentirnu zacá yaʼ? Cadi purtiʼ qué gápanu fe, sínuque runi sentirnu zacá purtiʼ risaca para laanu guni predicarnu ne purtiʼ nadxiinu binni. Ne pur nga qué rusaana de guni predicarnu neca nuu biaje rireʼnu gana. Ti hermana láʼ Elena, ni maʼ ziné veinticinco iza de precursora guníʼ: «Raca nagana para naa guneʼ predicar, peru nannadxicheʼ ndiʼ nga dxiiñaʼ ni jma galán zanda guneʼ». ¿Cadi dxandíʼ stale de laanu riníʼ íquenu zacá la?

XIMODO ZANDA CUEENDUNU NI GALÁN ORA GUNI PREDICARNU

6. ¿Xi pregunta zacábinu lu tema riʼ?

⁶ ¿Xiñee nuunu seguru zanda cueendunu ni galán modo tiica si territorio ra runi predicarnu yaʼ? Para guicábinu pregunta riʼ, zadúʼyanu chupa relatu ra guníʼ Jesús xiñee risaca cueendunu ni galán ora guni predicarnu (Mat. 13:23). Primé, guininu de ti lubáʼ uvas.

7. a) ¿Tuu nga zeeda gaca hombre «ni rapa lubáʼ uvas», tuu nga zeeda gaca «lubáʼ uvas» ca ne tuu nga zeeda gaca ca «rama» stini? b) ¿Xi pregunta risaca caquiiñeʼ guicábinu?

⁷ (Biindaʼ Juan 15:1-5, 8). Jesús peʼ bisiene laa nga zeeda gaca casi «ti lubáʼ uvas», bixhózebe nga zeeda gaca casi «ni rapa lubáʼ» que ne ca discípulo stibe nga zeeda gácacaʼ «rama» stini. Ne gúdxibe ca discípulo stibe: «Zusisaca tu Bixhoze pa iree ndu ni cayuni tu lu xhiiñaʼ, ne zacá zahuinni xpinne laatu».b ¿Xii nga nuu Jesús gusiene né ca diidxaʼ «pa iree ndu ni cayuni tu lu xhiiñaʼ» yaʼ? Qué nusiene Jesús xipeʼ nga cueendú cani cayuni xhiiñabe, peru guniʼbe xiixa nabé risaca ni zacané laanu guiénenu ni.

8. a) ¿Xiñee cadi caníʼ diʼ Jesús dede ora maʼ gacanenu tuuxa gaca discípulo nga casi ñaca nudiʼnu cuananaxhi yaʼ? b) ¿Xi ti cosa qué rinabaʼ Jiobá laanu gúninu?

⁸ Sicaríʼ guníʼ Jesús runi Bixhoze: «Irá rama stinne ni qué icá lú maca ziugá be». Ni ná ca diidxaʼ riʼ nga para ganda guʼyaʼ Jiobá laanu casi ti xpinni la? naquiiñeʼ gácanu casi ti yaga ni rudii cuananaxhi (Mat. 13:23; 21:43). Peru ora guniʼbe gácanu casi ti yaga ni rudii cuananaxhi la? cadi caníʼdibe dede ora maʼ gacanenu tuuxa gaca discípulo nga casi ñaca nudiʼnu cuananaxhi (Mat. 28:19). ¿Xiñee coʼ yaʼ? Purtiʼ nuu hermanu runi predicar lu ti territorio ra qué riná binni gucaadiaga, ne neca runi predicárcabe guiráʼ dxi la? qué huayanda gacanécabe ti binni gaca discípulo. Yanna yaʼ, zaninu zeeda gaca ca hermanu riʼ casi ti rama ni qué rudii cuananaxhi la? coʼ njaʼ, purtiʼ qué zanda guni obligarnu tuuxa gucaadiaga pa qué naʼ. Nadxii Jiobá laanu ne qué zúnibe menu laanu purtiʼ si qué ganda gacanenu tuuxa gaca xpínnibe. Qué rinábabe laanu gúninu xiixa ni qué zanda gúninu (Deut. 30:11-14).

9. a) ¿Xi dxiiñaʼ caquiiñeʼ gúninu para gueeda gácanu casi ti yaga ni rudii cuananaxhi? b) ¿Xi parábola chiguzéʼtenu ne xiñee?

⁹ Yanna, ¿ximodo nga zanda gácanu casi ti yaga ni rudii cuananaxhi yaʼ? Ra gúninu dxiiñaʼ ni maʼ bidii Jiobá laanu. ¿Xi dxiiñaʼ ca yaʼ? Guni predicarnu mensaje stiʼ Reinu (Mat. 24:14).c Guidúʼyanu ximodo zanda guiénenu ni bizéʼtenu riʼ ora guidúʼndanu parábola ra guníʼ Jesús de ti hombre ni riguu biní.

10. a) ¿Xii nga zeeda gaca xubaʼ ne layú ni riete lu parábola stiʼ hombre ni riguu biní? b) ¿Xi rudii ti guela yaʼ?

¹⁰ (Biindaʼ Lucas 8:5-8, 11-14). Lucas 8:15 ná: «Peru cani biaba lu layú galán que la? ngue nga cani ricaa diidxaʼ que de guidubi ladxidóʼ ne qué rundaa ni, ne rudii neca cayuni huantar guendanagana», Traducción del Nuevo Mundo. Lu parábola stiʼ hombre ni riguu biní, xubaʼ ni rusábabe que nga zeeda gaca «stiidxa Dios» o mensaje stiʼ Reinu. Layú ca nga zeeda gaca ladxidóʼ binni. Xubaʼ ni biaba lu layú galán que gundani ni ne guca ni ti guela. Ne despué bidii ni ti gayuaa biaje jma. ¿Peru xi rudii ti guela yaʼ? Rudii ni niza ni reeda gaca xubaʼ despué. Lu parábola ni guníʼ Jesús riʼ, ti xubaʼ ni gudxiibacabe rudii ni ti gayuaa xubaʼ jma. ¿Xiñee zanda guchaaganu parábola ni guníʼ Jesús riʼ né dxiiñaʼ ni rúninu ora runi predicarnu yaʼ?

11. a) ¿Xiñee zanda guchaaganu parábola stiʼ hombre ni riguu biní que né dxiiñaʼ ni rúninu ora runi predicarnu? b) ¿Ximodo nga zeeda gácanu casi ti guela ni rudii niza yaʼ?

¹¹ Guxuíʼlunu raca caadxi iza bisiidiʼ bixhózenu o ca Testigu laanu ni dxandíʼ. Nanna pabiáʼ biéchecabe ora bíʼyacabe guyuuláʼdxinu guizíʼdinu stiidxaʼ Reinu yaʼ. Zanda guininu casi ñaca bidxiibacabe ti xubaʼ lu ti layú galán. Gundani xubaʼ riʼ, guca ni ti guela ne bidii ni niza. ¿Xii nga zeeda gaca xubaʼ ni bidxiibacabe ndaaniʼ ladxidoʼno ca yaʼ? Stiidxaʼ Reinu. Cásica ti guela, niza o xubaʼ nga rudii ni ne cadi sti guela, zacaca laanu ora rusíʼdinu binni de stiidxaʼ Reinu la? casi ñaca ñuni producirnu niza o xubaʼ ne cadi discípulo.d ¿Ximodo nga zeeda gácanu casi ti guela ni rudii niza yaʼ? Ora runi predicarnu mensaje stiʼ Reinu. Nga runi, cada biaje guininu de mensaje riʼ la? casi ñaca nucheechenu xubaʼ ni bidxiibacabe ndaaniʼ ladxidoʼno (Luc. 6:45; 8:1). Ni rusiidiʼ parábola riʼ laanu nga pa qué gusaana de guni predicarnu la? zabeendunu ni galán neca gaca ni nagana para laanu.

12. a) ¿Xi rizíʼdinu de parábola stiʼ lubáʼ uvas ne hombre ni riguu biní? b) ¿Xi rucaa ni lii gúniluʼ?

¹² ¿Xi rizíʼdinu de parábola stiʼ lubáʼ uvas ne hombre ni riguu biní? Rizíʼdinu zanda cueendunu ni galán pa qué gusaana de guni predicarnu neca qué gucaadiaga binni laanu. Pablo guníʼ ca diidxaʼ riʼ: «Cada tobi ziaxa biaʼ dxiiña biʼniʼ» (1 Cor. 3:8). Casi bizeeteʼ Pablo, riguu Dios ndaayaʼ laanu pur dxiiñaʼ ni rúninu, cadi pur ni ribeendunu. Matilda, ti hermana ni napa gande iza de precursora guníʼ: «Riecheʼ purtiʼ rusisaca Jiobá stipa ni rúninu».

XI ZANDA GÚNINU PARA CADI GUSAANA DE GUNI PREDICARNU

13, 14. Casi ná Romanos 10:1, 2, ¿xiñee qué nusaana Pablo de ñuni predicar mensaje stiʼ Reinu neca qué nucaadiágacabe laa yaʼ?

¹³ ¿Xi zacané laanu para cadi gusaana de guni predicarnu yaʼ? Maʼ bidúʼyanu ximodo biʼniʼ sentir Pablo ora qué nucaadiaga stale de ca judíu mensaje stiʼ Reinu. Peru qué nireebe gana. Gudiʼdiʼ si ti tiempu, bicaabe ti carta ra nuu ca hermanu de Roma ne bisiénebe laacaʼ ni runi sentirbe pur ca judíu, laabe guniʼbe: «De guidubi ladxiduáʼ runeʼ desear guilá ca binni Israel ne rinabaʼ Dios guni ni. Purtiʼ ruuyaʼ cayúnicabe xhiiñaʼ Dios né stale gana, peru cadi cásipeʼ modo biziidicabe ni» (Rom. 10:1, 2, TNM). ¿Xiñee qué nusaana de ñuni predicarbe ca judíu que yaʼ?

¹⁴ Primé, guniʼbe bíʼnibe ni de guidubi ladxidoʼbe purtiʼ dxandipeʼ biʼniʼ desearbe nilá neca caadxi de ca judíu (Rom. 11:13, 14). Guiropa, purtiʼ gunábabe Dios gacané xcaadxi judíu guicaa mensaje stiʼ Reinu. Ne guionna, purtiʼ bíʼnicabe xhiiñaʼ Dios né stale gana. Biiyaʼ Pablo ca cosa galán napa cada binni. Laapebe biénebe ora ricá ique tobi guni xhiiñaʼ Dios de guidubi ladxidóʼ la? zucaa ni laa guni xhiiñaʼ Dios né stale gana.

15. ¿Ximodo zanda chinándanu ejemplu stiʼ apóstol Pablo? Bizeeteʼ xi runi caadxi hermanu.

¹⁵ ¿Ximodo zanda chinándanu ejemplu stiʼ Pablo yaʼ? Primé, gúninu stipa pur guidxélanu binni ni nuu para guicaa guendanabani ni qué zaluxe. Guiropa, guinábanu Jiobá guxheleʼ ladxidóʼ ca binni nachaʼhuiʼ (Hech. 13:48; 16:14). Silvana, ti hermana ni maʼ napa treinta iza de naca precursora, guníʼ: «Ante guxhidxenaʼyaʼ ra puertaʼ stiʼ tuuxa la? rinabaʼ Jiobá gacané naa guiníʼ iqueʼ zucaadiágacabe naa». Guinábanu Dios iquiiñeʼ ca ángel stiʼ para chiné laanu ra nuu ca binni nachaʼhuiʼ (Mat. 10:11-13; Apoc. 14:6). Robert, ti hermanu ni napa jma de treinta iza de naca precursor, guníʼ: «Guizáʼ galán gúninu dxiiñaʼ né ca ángel, purtiʼ laacaʼ nánnacaʼ xi rizaaca lu xquendanabani binni». Ne guionna, gúninu stipa gúʼyanu ca cosa galán napa cada binni. Ti ancianu láʼ Carl, ni napa jma de cincuenta iza de guyuunisa, guníʼ: «Ruuyaʼ xiixa ni gusihuinni ximódopeʼ nga ti binni, neca ti cosahuiiniʼ casi pa cuxídxibe, pa rihuinni nacháʼhuibe o pa dxandíʼ racaláʼdxibe gánnabe xiixa ni gunabadiidxabe». Pa gúninu cani bizéʼtenu riʼ la? qué zusaana de guni predicarnu, cásica biʼniʼ Pablo.

«CADI GUSAANADXILUʼ NALUʼ»

16, 17. a) ¿Xi zanda guizíʼdinu de ni ná Eclesiastés 11:6? b) ¿Bizeeteʼ xi rizaaca ora ruuyaʼ binni dxiiñaʼ ni rúninu?

¹⁶ Neca nuu biaje ruluíʼ nga qué zacaa xcu ca diidxaʼ ni runi predicarnu ndaaniʼ ladxidóʼ binni la? cadi pur nga guiníʼ íquenu qué risaca dxiiñaʼ ni cayúninu o qué zareendú ni (biindaʼ Eclesiastés 11:6). Dxandíʼ stale binni qué rucaadiaga laanu, peru ruyadxícabe laanu. Ruuyacabe jneza modo rácanu lari, runi respetarnu binni ne ruxidxinenu laacaʼ. Zándaca despué gudiicabe cuenta cadi jneza ni riníʼ íquecabe de laanu ora gúʼyacabe ximódopeʼ laanu. Ngapeʼ nga ni bizaaca Sergio ne Olinda, ca hermanu ni bizéʼtenu lu primé párrafo que.

¹⁷ Sergio guníʼ: «Cumu guca huaradu la? qué ñuudu ra plaza que ti tiempu. Ora bibiguétadu raqué sti biaje la? gunabadiidxaʼ ca binni que laadu xi gúcadu ne gúdxicaʼ laadu bibánacaʼ laadu». Dede cuxidxihuiiniʼ Olinda guníʼ: «Rugapadiuxi ca chofer stiʼ ca autobús que laadu ne nuu de laacaʼ de ra zúbacaʼ rábicaʼ laadu: “Galán dxiiñaʼ cayúnitu”. Dede rinábacabe laadu revista». Ti dxi zuhuaa Sergio ne Olinda cueʼ exhibidor, ni málasi bidxiña ti hombre ra nuucabe bisigaʼdeʼ laacabe ti ramu guieʼ ne bidii xquíxepeʼ laacabe pur dxiiñaʼ ni cayúnicabe que, guizáʼ bidxagayaacabe ni biʼniʼ hombre riʼ.

18. ¿Xiñee nuuluʼ dispuestu guni predicarluʼ neca cayaca ni nagana para lii yaʼ?

¹⁸ Biblia ná: «Cadi gusaanadxiluʼ naluʼ». Nga runi, pa qué gusaana de gudxíʼbanu biidxiʼ stiʼ Reinu la? zacanenu para «ganna irá xixé guidxi modo runi mandar» Dios (Mat. 24:14). Ne runi sentirnu nayecheʼ ra gánnanu riuulaʼdxiʼ Jiobá ni rúninu, purtiʼ nadxiibe guiráʼ cani cadi cusaana de guni predicar neca cayaca ni nagana para laacaʼ.