Guiéchenu pur ni cabeendunu lu dxiiñaʼ nadipaʼ cayúninu
1. Xi zándaca cuee gana laanu gucheechenu diidxaʼ.
1 Dxi bizáʼ Dios hombre, bíʼnibe laa para ganda «guʼyaʼ ni galán guleendú dxiiñaʼ nadipaʼ biʼniʼ» (Ecl. 2:24). Nga runi, zándaca zareʼnu gana ne maʼ qué ziuuláʼdxinu gucheechenu diidxaʼ pa guidúʼyanu cadi cabeendunu gastiʼ. Xi zacané laanu para cadi gusaana de chuʼnu nayecheʼ neca ruluíʼ cadi cabeendunu gastiʼ yaʼ.
2. Xiñee naquiiñeʼ quixhe íquenu gúninu ni zanda ugaandanu.
2 Quixhe íquenu gúninu ni zanda ugaandanu. Neca huaxiéʼ binni bicaadiaga Jesús, peru cadi caníʼ diʼ nga qué nibeendube gastiʼ ra bicheechebe diidxaʼ (Juan 17:4). Lu ejemplu ni guníʼ Jesús de hombre ni zinduu biní que guníʼ qué zaniisi stiidxaʼ Reinu ndaaniʼ ladxidóʼ stale binni (Mat. 13:3-8, 18-22). Peru yanna, guidúʼyanu xi guiráʼ ribeendunu pur stipa rúninu.
3. Ximodo nga rireendú dxiiñaʼ cayúninu neca qué gucaadiaga binni laanu.
3 Ximodo nga zareendú dxiiñaʼ ni gúninu. Ni cusiene ejemplu stiʼ hombre ni zinduu biní que nga ora chindá stiidxaʼ Reinu ndaaniʼ ladxidóʼ binni la? qué rusaana de guni xhiiñaʼ Jiobá, o «riree ndu caʼ» (Mat. 13:23). Ora guindani duuzaʼ ne guiroobani la? qué ribeedini jma rama, sínuque rudiini xubaʼ. Zacaca nga rizaaca né ti xpinni Cristu, cadi ora si gacanebe tuuxa gaca xpinni Cristu nga careendú dxiiñaʼ ni cayúnibe, sínuque laaca rireendú xhiiñabe ora qué rusaana de guiniʼbe de Reinu stiʼ Dios. Guiráʼ ca cosa galán ribeendunu ora gúninu zacá nabé rusiecheʼ cani laanu neca cadi guiráʼ binni gucaadiaga laanu. Ora rucheechenu diidxaʼ racanenu guisaca lá Jiobá (Is. 43:10-12; Mat. 6:9). Ti ndaayaʼ naroʼbaʼ nga guninenu Dios dxiiñaʼ (1 Cor. 3:9). Ne laaca riuulaʼdxiʼ Jiobá «cadi guiaana dxí nu de usisaca nu» laa (Heb. 13:15, 16).
4. Xi zándaca cueendunu lu dxiiñaʼ riʼ sin gánnanu yaʼ.
4 Naquiiñeʼ gánnanu, cadi guiráʼ diʼ biaje nga zadúʼyanu guireendú dxiiñaʼ cayúninu. Zándaca guyuu binni ni bicaadiaga Jesús qué ñácacaʼ discípulo stibe dxi bibánibe lu Guidxilayú. Cásica nuu yagahuiiniʼ rindaa para guicaa xcu, zacaca nga nuu biaje rindaa para guicaa xcu stiidxaʼ Reinu ndaaniʼ ladxidóʼ tuuxa binni, ne zándaca despué gueeda gaca binni ca ti Testigu sin gánnanu. Rihuínnica stale cosa sicarú nga ribeendunu ora rucheechenu diidxaʼ. Nga runi, cadi gusaana de gúninu xhiiñaʼ Jiobá ne gusihuínninu nácanu xpinni Jesús (Juan 15:8).