Qué gánnadinu paraa zandánini

«Bidxiibaʼ biidxiʼ stiluʼ siadóʼ, ne cadi guiaanadxí naluʼ dede ora gaca huadxí; purtiʼ qué gánnadiluʼ paraa zandánini, pa raríʼ o pa raricaʼ, o guiropaʼ lugar ca.» (ECL. 11:6.)

1. Xiñee ridxagayaanu modo riniisi ti yaga huiiniʼ ne xiñee rizíʼdinu cadi gudxíʼbanu laca laanu lu ejemplu ca.

BINNI ni runi dxiiñaʼ lu layú la? napa xidé cueza dede dxi gudii ni bidxiibaʼ (Sant. 5:7). Gusábasibe biidxiʼ stibe la? nápabe xidé cuézabe gachenduni ne gácani yaga huiiniʼ. Ne ora maʼ galán nuu tiempu la? chaahuidugá maʼ ziniisini lu layú. Ne despué maʼ cueeni vaina stini. Ne ora maʼ dxaʼ vaina ca la? maʼ zanda guiasa cosecha ca. Ora guidúʼyanu modo riniisi biidxiʼ ca nabé ridxagayaanu. Peru laaca rusiidini laanu cadi gudxíʼbanu laca laanu. Zacá ni, laanu zanda gudxíʼbanu biidxiʼ ne guzéʼnuni, peru Dios nga chigusiniisini (laaca zanda gúʼndaluʼ 1 Corintios 3:6).

2. Xi rizíʼdinu lu guiropaʼ ejemplu ni guníʼ Jesús ra rieeteʼ ximodo riniisi ti binni lu stiidxaʼ Dios ni bidúʼyanu lu tema gudídinu ca.

² Casi maʼ bidúʼyanu lu tema gudídinu ca, Jesús bichaaga dxiiñaʼ stinu ora rucheechenu stiidxaʼ Reinu ca ne dxiiñaʼ runi ti binni lu layú. Lu ejemplu ra bieeteʼ de ca gadxé layú que bihuinni nécapeʼ biidxiʼ que nabé galán ni la? ni chigacané guiniisini nga modo nuu ladxidóʼ binni (Mar. 4:3-9). Lu ejemplu stiʼ hombre rudxiibaʼ biidxiʼ ne rasi que la? bihuinni laabe qué ñénedibe ximodo riniisi ti biidxiʼ. Casi bidúʼyanu que, Dios nga rusiniisi ni ne poder stiʼ ne cadi pur stipa stiʼ binni (Mar. 4:26-29). Yanna, guidúʼyanu xhonna ejemplu guníʼ Jesús: primé la? de biidxiʼ mostaza, de levadura ne de tarraya ni rinaazenécabe benda.a

Ejemplu stiʼ biidxiʼ mostaza

3, 4. Xi rizíʼdinu de modo careeche stiidxaʼ Reinu lu ejemplu stiʼ biidxiʼ mostaza que.

³ Ejemplu ra rieeteʼ de biidxiʼ stiʼ mostaza ca, laaca zeedani lu capítulo 4 stiʼ Marcos, ne racá ruzeeteni chupa cosa nabé risaca. Primé la? caniʼni pabiáʼ stale binni maʼ cayuni ni na stiidxaʼ Reinu, ne guiropa ca la? caníʼ ximodo cayápacabe ca binni ca. Jesús guníʼ: «Xi zanda usaca nu enda runi mandar sti Dios, ne xi ejemplu zanda quixhe nu de modo chi dale xpinni be. Zeda gaca ni casi ti biidxi mostaza ni rudxiiba cabe. Jma nahuiini ni que irá biidxi ni nuu ndaani guidxilayú. Peru ora ma udxiʼba ni la? rirooba ni, dede raca ni yaga roʼ. Ribee ni stale rama dede reeda mani huiini ruzáʼ lidxi lu rama stini ne riziilaʼdxi lu xpandá ni» (Mar. 4:30-32).

⁴ Lu ejemplu riʼ cayeeteʼ ximodo cadale ca xpinni Cristu, ne rihuinni zacá ni purtiʼ nabé stale guidxi careeche stiidxaʼ Reinu ne guizáʼ cadale ca xpinni Cristu dede lu Pentecostés stiʼ iza 33 que. Biidxiʼ mostaza ca nuu biaje riquiiñeʼ ni para guchaagacabe ni xiixa cosa nahuiiniʼ (zanda gúʼndaluʼ Lucas 17:6). Peru nécapeʼ nabé nahuiiniʼ ni la? rácani ti yaga naroʼbaʼ ne risooni biaʼ chonna o gaayuʼ metru, ne nabé naguidxi raca ca rama stini, nga runi, zanda guininu ti yágapeʼ ni (Mat. 13:31, 32).

5. Ximodo bidale ca xpinni Cristu lu primé siglu.

⁵ Lu iza 33 bizulú primé neza binni ridagulisaa, dxi biaba espíritu santu luguiáʼ 120 xpinni Cristu que. Nécapeʼ huaxiéʼcabe la? qué nindaa de ngue stale mil binni bidaaguʼ laacabe (biindaʼ Hechos 2:41; 4:4; 5:28; 6:7; 12:24; 19:20). Nin caʼruʼ guizaa treinta iza de ngue mápeca bidale ca xpinni Cristu, ne pur ngue gunda gudxi apóstol Pablu ca xpinni Cristu ni guyuu Colosas que maʼ bireeche ca diidxaʼ nacubi ne galán que lu «idubi naca guidxilayú» (Col. 1:23). ¡Aque nagueenda modo bidale xpinni Cristu xa!

6, 7. 1) Ximodo cadale ca xpinni Cristu dede lu iza 1914. 2) Dede pabiáʼ nga chiguidale ca xpinni Cristu yaʼ.

⁶ Dede dxi bizulú Reinu stiʼ Dios cayuni mandar lu iza 1914 la? ni zeeda gaca rama stiʼ yaga mostaza ca nabé maʼ biniisini. Xquidxi Dios maʼ biiyaʼ ximodo cayaca ca diidxaʼ guníʼ Isaías riʼ: «Guidxi huiiniʼ riʼ zácani ti mil, ne zácani ti guidxi guizáʼ nadipaʼ» (Isa. 60:22). Qué ñuu dxi niníʼ ique grupu huiiniʼ de xpinni Cristu ni bibí para cheʼ guibáʼ, ni cucheeche diidxaʼ ra bizulú siglu XX que, pa ñuu biaʼ gadxe millón de testigu stiʼ Jiobá nucheeche diidxaʼ lu jma de chupa gayuaa treinta guidxi lu iza 2008. Nabé caniisi xquidxi Dios, cásica biidxiʼ mostaza ni bizeeteʼ Jesús lu ejemplu stiʼ que.

⁷ Peru cadi ne ngasi nga zanda guininu maʼ qué zadáleruʼ ca xpinni Cristu. Zadxiña ti dxi guiráʼ binni ni guibani lu Guidxilayú riʼ zácacaʼ xpinni Cristu ne zuzuubacaʼ stiidxaʼ Reinu stiʼ Dios. Para dxi ca la? maʼ biree guiráʼ binni malu. Ne Jiobá peʼ, Señor Ni Jma Nandxóʼ ca nga chiguni ni, cadi binni diʼ (biindaʼ Daniel 2:34, 35). Dxi ca nga zadúʼyanu guiluxe gaca ni na xcaadxi diidxaʼ riguixhená guníʼ Isaías, ra na: «Guidxilayú riʼ zadxá típani de guiráʼ ni rusiidiʼ Jiobá cásica dxaʼ tipa nisadóʼ de nisa» (Isa. 11:9).

8. 1) Tuu nga zeeda gaca ca maniʼ ripapa ni rieeteʼ lu ejemplu stiʼ biidxiʼ mostaza que. 2) Xi maʼ qué zúninu pa guyúbinu chuʼnu lade ca binni ridagulisaa.

⁸ Jesús guníʼ zuyubi ca maniʼ ripapa ca bacaʼndaʼ xaʼnaʼ yaga ni zeeda gaca Reinu stiʼ Dios que. Ca maniʼ ripapa ca cadi zeeda gacadícame ca xhenemigu Reinu, cani racalaʼdxiʼ gó ca biidxiʼ stini, casi biʼniʼ ca maniʼ ripapa ni bieeteʼ lu ejemplu stiʼ hombre ni bicheeche biidxiʼ lu gadxé gadxé layú que (Mar. 4:4). Lu ejemplu stiʼ biidxiʼ mostaza que la? ca maniʼ ripapa ca nga zeeda gaca binni ni nayá ladxidóʼ ni ruyubi guiziidiʼ xii nga ni jneza lade ca binni ridagulisaa. Ca binni ca maʼ nánnacaʼ cadi jneza gúnicaʼ cosa malu ni zuxheleʼ laacaʼ de Dios (zanda gúʼndaluʼ Isaías 32:1, 2). Jiobá bichaaga Reinu stiʼ Cristu ne ti yaga ora guníʼ ca diidxaʼ riʼ: «Lu dani nasoo stiʼ Israel zuzuhuaani, ne zabeeni rama naroʼbaʼ ne zudiini cuananaxhi ne zácani ti cedru naroʼbaʼ. Ne xáʼnani zabeza guiráʼ ca maniʼ ripapa; xaʼnaʼ bacaʼndaʼ stiʼ ca bandaga stini zabézacame» (Eze. 17:23).

Ejemplu stiʼ levadura

9, 10. 1) Xii nga ni na Jesús zaca ndaaniʼ xquidxi Dios ora bizeetebe de levadura que. 2) Xii nga ni nabé ruchaaga Biblia levadura ca, ne xii nga ni chiguicábinu.

⁹ Cadi guiráʼ diʼ biaje nga ridúʼyanu ximodo reeda gaca tuuxa ti xpinni Cristu. Ne zacá bisihuinni Jesús ni ora bizeeteʼ ejemplu riʼ, laabe guniʼbe: «Modo idale ca xpinni Dios zeda gaca casi guca levadura ni gucuaa ti gunaa ne biguucha chonna kilu harina, ne irá ni biasa ni» (Mat. 13:33). Xii nga levadura ca, ne xiñee zanda guchaaganu ni ne modo cadale ca xpinni Cristu yaʼ.

¹⁰ Biblia nabé riquiiñeʼ diidxaʼ levadura para guiníʼ de pecadu stiʼ binni. Casi apóstol Pablu la? biquiiñebe diidxaʼ ca para guniʼbe modo cacá cosa malu ni cayuni ti hombre xcaadxi xpinni Cristu ni nuu lade ca binni ridagulisaa de Corinto que (1 Cor. 5:6-8). Yanna, ñee riníʼ nga biquiiñeʼ Jesús diidxaʼ levadura ca para guluiʼbe zadale cosa malu ndaaniʼ xquidxi Dios la?

11. Xi para biquiiñeʼ ca israelita levadura dxiqué.

¹¹ Ante guicábinu guendarinabadiidxaʼ ca la? naquiiñeʼ guietenaláʼdxinu chonna cosa nabé risaca. Primé la? nécapeʼ Jiobá qué nudii diʼ lugar niquiiñeʼ ca xpinni levadura lu Pascua que la? guyuu ora biquiiñecabe ni. Ca israelita que biquiiñecabe levadura ora bidiicabe ofrenda Dios ti chúʼcabe galán ne laa ne bíʼnicabe ni para gudiicabe xquíxepeʼ laabe pur ca ndaayaʼ cudiibe laacaʼ. Ne dxi ca nabé nayecheʼ riuucabe ora gócabe de ca ofrenda bidiicabe (Lev. 7:11-15).

12. Ora riquiiñeʼ Biblia xiixa para ruchaaga ni ne ti binni o sti cosa, xi rusiidiʼ nga laanu yaʼ.

¹² Guiropa cosa ni naquiiñeʼ guietenaláʼdxinu nga, nécapeʼ nuu ra riquiiñeʼ Biblia ti cosa para guiníʼ feu xiixa la? laaca nuu ra riquiiñeni ngueca para guiniʼni galán sti cosa. Casi lu 1 Pedro 5:8 na Binidxabaʼ zeeda gaca casi ti lión, nga rusihuinni nabé malu laabe ne nuube guxuuxebe binni. Peru lu Apocalipsis 5:5 Jesús nga cayeeteʼ naca ti «lion» ni «zeeda lade xfamilia Judá». Textu ca ruchaaga Jesús casi ti lión purtiʼ nadxibalú ne runi ni jneza.

13. Ximodo racané ejemplu ra cayeeteʼ de levadura que laanu gánnanu ximodo riniisi ti binni lu stiidxaʼ Dios.

¹³ Guionna cosa ni naquiiñeʼ guietenaláʼdxinu nga, Jesús qué niníʼ diʼ runi feu levadura ca guiráʼ cuba pan ca ne maʼ qué zaquiiñeni. Ni guniʼbe nga modo raca pan. Gunaa ni bieeteʼ lu ejemplu que laapeʼ biguuchaʼ levadura cuba pan que para guiásani. Yanna, cumu qué nihuinni diʼ levadura que lu cuba pan que la? ngue runi qué ñuuyadibe ximodo biasa pan que. Nga rusietenalaʼdxiʼ laanu de hombre ni bidxiibaʼ biidxiʼ ne rasi huaxhinni que. Jesús guníʼ: «Xuba que candani ne caniisi, peru qué ganna [hombre que] ximodo raca ni» (Mar. 4:27). ¡Qué iganna diʼ nga modo bisiene Jesús que randa guidúʼyanu modo riniisi ti binni lu stiidxaʼ Dios! Ne nécapeʼ qué guidúʼyanu ximodo ruzulú ti binni gaca xpinni Cristu la? despué rihuinni dxíchini.

14. Cásica gundisaʼ levadura que cuba pan que, xi culuiʼni zaca ne dxiiñaʼ stinu ora gucheechenu diidxaʼ.

¹⁴ Neca qué ridúʼyanu ximodo riniisi ti binni lu stiidxaʼ Dios la? zacá cayácani lu guidubi naca Guidxilayú. Nga nga sti cosa ni cayeeteʼ lu ejemplu stiʼ levadura que. Laani gundísani cuba pan que, guionnaʼ «kilu harina» que (Luc. 13:21). Zacaca nga raca ora gucheechenu stiidxaʼ Reinu, ni cayané binni guiniisi lu stiidxaʼ Dios ca, ne pur laani nga careeche ca diidxaʼ nacubi ne galán ca lu «idubi naca guidxilayú» (Hech. 1:8; Mat. 24:14). ¡Ti ndaayaʼ naroʼbaʼ nga gacanenu guireeche stiidxaʼ Reinu!

Tarraya ni rinaazeʼ benda

15, 16. 1) Bizeeteʼ ejemplu stiʼ tarraya ni rutopa benda que. 2) Xii nga zeeda gaca tarraya ca, ne ximodo culuiʼni laanu zadale ca xpinni Cristu.

¹⁵ Ni jma risaca nga pa dxandíʼ naca binni xpinni Cristu ne cadi pa stálecabe. Ne de nga nga guníʼ Jesús lu sti ejemplu. Nabe: «Enda runi mandar sti Dios zeda gaca casi tarraya ni rusaba cani rie guuze ndaani nisadóʼ. Rutopa tarraya que irá clase benda» (Mat. 13:47).

¹⁶ Tarraya ni rutopa benda ca nga zeeda gaca dxiiñaʼ ni rúninu ora rucheechenu stiidxaʼ Reinu, laani rutópani guiráʼ clase benda. Jesús laaca guníʼ ca diidxaʼ riʼ: «Ora ma bidxá [tarraya que], rití né cabe ni uriá para ribí cabe ique ni. Rusaʼbi cabe [ca benda ni] qué zaquiiñeʼ, ne ruchá cabe cani zaquiiñe que ndaani dxumi. Zacaca zaca ni ra gueeda iluxe guidxilayú riʼ, zeda ndee ca ángel cani qué iquiiñe lade cani nachaʼhuiʼ. Ne zundaa ca laacabe lu bele, ne raqué nga guʼna cabe dede go yaa cabe guidi ruaa cabe» (Mat. 13:48-50).

17. Padxí nga chiguireechú ca benda ni rieeteʼ lu ejemplu stiʼ tarraya ni rutopa benda ca.

¹⁷ Ñee laaca laani nga guníʼ Jesús dxi na zareechú ca dendxuʼ ca de ca chiva ca dxi gueeda guni juzgar Jesús binni guidxilayú la? (Mat. 25:31-33.) Coʼ. Purtiʼ dxi guiluxe cuídxibe cuenta binni ca zácani ora gueeda ca dxi jma nagana que, ne ora guireechú ca benda galán ni rieeteʼ lu ejemplu stiʼ tarraya que zácani ora maʼ «iluxe guidxilayú».b Ne tiempu ca nga nabáninu yanna, ne zalúxeni ora maʼ guzulú ca dxi jma nagana ca. Yanna, ximodo ndiʼ careechú ca benda ca yaʼ.

18, 19. 1) Tuu nga cani cabeechucabe ca dxi stinu riʼ. 2) Xi caquiiñeʼ guni ca binni ni nayá ladxidóʼ. (Biiyaʼ ni cá ñee yaza 21.)

¹⁸ Stale Millón de binni ni zeeda gaca casi benda ca careecaʼ de ndaaniʼ nisadóʼ ni zeeda gaca guiráʼ ca binni guidxilayú riʼ, ne cadxíñacaʼ ndaaniʼ xquidxi Jiobá ca dxi stinu riʼ. Nuu de ca binni ca riecaʼ dxi rietenaláʼdxinu guendaguti stiʼ Cristu ne xcaadxi rié ca guendaridagulisaa rápanu ne nuu tu riná guidúʼndanenu laa Biblia. Peru, ñee guirácabe rusihuínnicabe dxandíʼ nácacabe xpinni Cristu la? Dxandíʼ nga «rití né cabe [guiráʼ ca benda que] uriá» que, peru Jesús guníʼ ca benda si ni galán nga bichácabe ndaaniʼ dxumi, ne dxumi ca nga zeeda gaca ca neza binni ridagulisaa. Ca benda ni qué iquiiñeʼ ca nga ni bisáʼbicabe ne despué bilaacabe laacaʼ lu guí, nga riníʼ zanitilú ca binni ca.

¹⁹ Lade ca benda, o binni, ni qué zaquiiñeʼ ca nuu guiráʼ ca binni ni biindané ca testigu stiʼ Jiobá peru despué maʼ qué ninacaʼ ñuundacaʼ. Ládecabe laaca nuu ca hombrehuiiniʼ ni biniisi ndaaniʼ ti yoo ra nuu xpinni Cristu, peru qué ñuu dxi niguixhe íquecaʼ ninándacaʼ Cristu. Qué ninácabe ñúnicabe ni na Jiobá, ne pa bíʼnicabe ni nabe la? despué bisaanacabe de gúnicabe ni (Eze. 33:32, 33).c Nga runi, guiráʼ ca binni ni nayá ladxidóʼ naquiiñeʼ gudiicaʼ lugar uguucabe laacaʼ ndaaniʼ dxumi ni zeeda gaca ca neza binni ridagulisaa ca ante guiluxe cuidxi Dios cuenta binni ne cadi guireedicaʼ racá ti guilacaʼ.

20, 21. 1) Xii nga bizíʼdinu lu guionnaʼ ejemplu ra bihuinni ximodo riniisi binni lu stiidxaʼ Dios. 2) Xi naguixhe íqueluʼ gúniluʼ yanna yaʼ.

²⁰ Xi bizíʼdinu lu guionnaʼ ejemplu ni bidúʼndanu ra ruzeeteʼ ximodo riniisi xhiiñaʼ Reinu ca yaʼ. Lu primé ejemplu que bizíʼdinu cásica riroobaʼ yaga stiʼ biidxiʼ mostaza que la? zaqueca nabé maʼ bidale guiráʼ cani napa Cristu lu Guidxilayú riʼ. Ne gastiʼ zanda gucueeza xhiiñaʼ Jiobá, laani zácaruni (Isa. 54:17). Ne cani ruyubi chuʼ xaʼnaʼ bacaʼndaʼ stiʼ yaga naroʼbaʼ ca la? zalacaʼ de lu naʼ Binidxabaʼ ne ca binni ni cayuni ni na. Lu guiropa ejemplu ca bizíʼdinu Dios nga racané binni guiniisi lu stiidxaʼ. Cásica qué rihuinni ora guindisaʼ levadura ca cuba pan la? zacaca nga nuu biaje qué rihuinni diʼ modo riniisi ti binni lu stiidxaʼ Dios, peru zacá cayácani. Ne lu guionna ejemplu ca bizíʼdinu cadi guiráʼ diʼ cani rucaadiaga stiidxaʼ Dios nga nayá ladxidoʼcaʼ. Nuu de laacabe zeeda gaca casi ca benda ni qué zaquiiñeʼ casi bizeeteʼ Jesús que.

²¹ ¡Aque riéchenu nga guidúʼyanu caguu Jiobá stale binni ni zeeda gaca casi benda ca ndaaniʼ xquidxi xa! (Juan 6:44.) Ne zacá cayácani purtiʼ cadale ca xpinni Cristu ndaaniʼ stale guidxi. Ne Jiobá nga cayuni ni. Nga runi, guiráʼ cani maʼ bidúʼyanu ca naquiiñeʼ gucaacani guiranu chinándanu conseju riʼ: «Bidxiibaʼ biidxiʼ stiluʼ siadóʼ, [...] purtiʼ qué gánnadiluʼ paraa zandánini, pa raríʼ o pa raricaʼ, o guiropaʼ lugar ca » (Ecl. 11:6).

[Cani cá ñee yaza]

Xi nicábiluʼ

• Xi rusiidiʼ ejemplu stiʼ biidxiʼ mostaza que laanu de modo caniisi stiidxaʼ Reinu ne modo rixeleʼ binni de ca cosa malu ca yaʼ.

• Xii nga zeeda gaca levadura ni rieeteʼ lu ejemplu que, ne xi bisiidiʼ Jesús zaca ne xhiiñaʼ Reinu ca ora bidii ejemplu ca.

• Xi rizíʼdinu cayuni xhiiñaʼ Reinu casi bidúʼyanu lu ejemplu stiʼ tarraya ni rutopa benda que yaʼ.

• Xi caquiiñeʼ gúninu para cadi guireʼnu lade cani zeeda gaca casi benda ni maʼ bidxá ndaaniʼ dxumi que yaʼ.

[Ca dibuju/foto ni zeeda lu yaza 18]

Xi rizíʼdinu zaca ne xhiiñaʼ Reinu lu ejemplu stiʼ biidxiʼ mostaza que

[Dibuju/foto ni zeeda lu yaza 19]

Xi rizíʼdinu lu ejemplu stiʼ levadura que

[Dibuju/foto ni zeeda lu yaza 21]

Xi riníʼ cueechúcabe ca benda ni zaquiiñeʼ de cani qué zaquiiñeʼ