Cani ruundaʼ revista riʼ racaláʼdxicaʼ gánnacaʼ

Xiñee riquiiñenu lá Dios pa qué gánnanu ximódopeʼ nga jma jneza guininu ni

Ca dxi stinu riʼ guirutiʼ ganna ximódopeʼ nga guníʼcabe lá Dios lu diidxaʼ hebreu. Peru zeeda labe lu Biblia biaʼ gadxe mil biaje. Dxi guyuu Jesús ndaaniʼ Guidxilayú riʼ bisiidibe binni tu lá Dios, ne gúdxibe ca discípulo stibe gusisácacaʼ lá Dios ora guni orarcaʼ (Mateo 6:9; Juan 17:6). Nga runi, nabé risaca nga iquiiñeʼ guiráʼ ca xpinni Cristu lá Dios. Yanna, pa nabé risaca labe, xiñee qué ganna binni ximodo nga jma jneza guníʼcabe ni dxiqué yaʼ. Nuu chupa razón.

Primé la? purtiʼ raca chupa mil iza bizulú biʼniʼ cré ca judíu cadi jneza guiníʼ binni lá Dios. Ngue runi, ora maʼ cayuundaʼ binni Stiidxaʼ Dios ne chindá ra cá labe la? riníʼ Señor. Cumu stale iza bíʼnicabe zaqué la? dede biaandaʼ binni ximodo guiníʼ lá Dios.

Guiropa razón nga purtiʼ hebreu guníʼcabe dxiqué qué ricádini ne vocal. Yanna, ximodo biindaʼ ca binni que ni yaʼ. Bietenaláʼdxicabe xi vocal riné cada diidxaʼ, cásica raca lu diidxastiá ora riquiiñeni chupa si letra para guiníʼcabe xiixa cosa, maʼ binni nga ruzaa ca letra ni cayaadxaʼ ora maʼ cayuundaʼ ni. Maʼ despué nga gudíxhecabe guicá vocal para guizaa ca diidxaʼ ca ti cadi guiaandaʼ binni ximodo naquiiñeʼ guiníʼ, ne zacaca bíʼnicabe ne Stiidxaʼ Dios ni gucuá hebreu. Peru xi bizaaca ne lá Dios yaʼ. Bisaanécabe ni ca vocal ni riquiiñeʼ para guiníʼ binni Señor ne zacá maʼ guiniʼcaʼ Señor lugar de iquiiñecaʼ lá Dios, peru laaca guyuu lugar ra qué nucaacabe nin ti vocal.

Yanna, ni dxandíʼ nánnanu nga lá Dios ca ricáneni tapa consonante, rábicabe ni Tetragrámaton. Casi na Gran Enciclopedia Espasa, ca letra stiʼ Tetragrámaton ca nga «lá Dios», ne lu diidxaʼ hebreu la? [...] nápani tapa letra (YHVH)», ne laaca zanda guicá ni YHWH ne JHVH. Yanna ra guluucabe ca vocal ca lu ca letra JHVH ca zacá nga biree lá «Jehováh», ne lu diidxazá rininu ni «Jiobá».

Dxandíʼ nga stale de ca hombre ni riene ca diidxaʼ riʼ nacaʼ jma jneza iquiiñeʼ binni Yavé. Ne nuu de laacaʼ na cadi jneza iquiiñeʼ binni ni. Peru guirutiʼ zanda ganna ximódopeʼ nga jma jneza guníʼcabe lá Dios dxiqué. Zaqueca stale de ca lá ni rieeteʼ lu Biblia rininu ni lu diidxaʼ stinu neca qué gánnanu ximódopeʼ guníʼcabe ni dxiqué lu hebreu, ne huaxiéʼ si tu rinabadiidxaʼ de laacani. Xiñee yaʼ. Purtiʼ ca lá riʼ maʼ biaa binni guiníʼcani lu stiidxaʼ, ne qué raca nagana para laacabe guiénecabe ni. Ne zacaca nga zanda guininu de lá Jiobá.

Biblia cuzeeteʼ gulí Dios ca xpinni de primé siglu para gácacaʼ ti guidxi ni chiné labe. Dxiiñaʼ gucuaacabe nga gusiidicabe binni lá Dios ne iquiiñeni (Hechos 2:21; 15:14; Romanos 10:13-15). Ca dxi stinu riʼ Dios laaca racalaʼdxiʼ iquiiñeʼ guiráʼ xpinni Cristu lá riʼ, neca riniʼcaʼ intiica diidxaʼ. Nga runi, galán gánnanu xi riníʼ labe ne gusisácanu ni pur modo guibáninu.

[Ni caníʼ yaza 23]

Risácapeʼ nga gánnanu zeeda lá Dios biaʼ gadxe mil biaje lu Biblia