Jiobá nga rulá laanu
«Jiobá zacané laacabe ne zulá laacabe.» (SAL. 37:40.)
1, 2. Xii nga ni nabé risaca guníʼ Santiagu ni rudii stipa laanu.
L AGA cayeeque Guidxilayú ca la? bandáʼ stiʼ ca cosa ca ruchaa ora maʼ cuzaaniʼ Gubidxa. Peru, Dios ni bizáʼ Gubidxa ne Guidxilayú ca qué ziuu dxi guchaa (Mal. 3:6). Biblia na: «Qué ziuu dxi uchaa be tu naca be, nin ti guisi» (Sant. 1:17). Nabé risaca ni cuzeeteʼ textu ca ne nga racané laanu ne rudii stipa laanu ora gápanu xiixa guendanagana. Chiguidúʼyanu xiñee.
2 Casi maʼ bidúʼndanu lu tema gudídinu ca, Jiobá bilá ca xpinni dxiqué (Sal. 70:5). Cumu qué ruchaa Jiobá ne runi ni riníʼ la? rucaa nga laanu ganna dxíchinu laaca zacanebe laanu ne zápabe laanu (Sal. 37:40). Yanna, ximodo cayapa Jiobá xquidxi ca dxi stinu riʼ yaʼ. Ne ximodo zápabe cada tobi de laanu yaʼ.
Jiobá rulá laanu de ca xhenemígunu
3. Xiñee zanda guni crenu qué zucueeza cani cucaalú ca xpinni Dios ca de guireecheʼ diidxaʼ.
3 Neca nabé gucaalú Binidxabaʼ laanu la? qué ziuu dxi gucueezabe ca testigu stiʼ Jiobá de guni adorarcaʼ Dios sticaʼ modo riuulaʼdxiʼ. Stiidxaʼ Dios na: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ, ne intiica guiníʼcabe para gucaalúcabe lii ora gaca juzgarluʼ la? zudxiibaluʼ donda íquecabe» (Isa. 54:17). Stale de cani maʼ huacaalú ca xpinni Jiobá huayacaláʼdxicaʼ gucueezacaʼ laacabe para cadi gucheechecabe diidxaʼ, peru qué huabeendúcabe gastiʼ.
4, 5. Xi guendanagana bidxagalú ca xpinni Jiobá lu iza 1918, ne xi guleendúcabe yaʼ.
4 Lu iza 1918 guzananda ca xaíque yuʼduʼ ca xpinni Jiobá para cadi nucheecherucaʼ diidxaʼ. Lu 7 stiʼ mayo que biʼniʼ mandar gobiernu stiʼ Estados Unidos guideguyoo J. F. Rutherford, ni cusániruʼ dxiiñaʼ ni cayuni ca Testigu, ne xcaadxi de cani cayuninebe dxiiñaʼ. Nin chupa beeu de ni guca que maʼ guníʼcabe naquiiñeʼ guideguyoo Rutherford xadxí ne cani cayuniné dxiiñaʼ, purtiʼ nacaʼ cucaalucabe gobiernu sticaʼ. Yanna, ñee bicueeza ca xhenemígucabe ca laacabe de nucheechecabe diidxaʼ la? Coʼ, qué nucueezadicaʼ.
5 Guietenaláʼdxinu ni guníʼ Jiobá: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ». Gaʼ beeu despué, maʼ lu 26 stiʼ marzo iza 1919 que Rutherford ne cani runiné dxiiñaʼ bireecaʼ de ndaaniʼ lidxi guiibaʼ purtiʼ gudíxecaʼ ti multa. Ne lu 5 stiʼ mayo iza 1920 que maʼ guníʼ juez qué gápacabe donda. Qué nindaa bizulú ca xpinni Cristu ca bicheechecaʼ stiidxaʼ Reinu. Xi guleendúcabe pur ni bíʼnicabe ca yaʼ. Nabé cadale binni ni caziidiʼ de Dios dede dxiqué hasta nagasi. Peru, tupeʼ nga gucané laacabe yaʼ. Jiobá, Dios ni rulá laanu ca (1 Cor. 3:7).
6, 7. 1) Xi biʼniʼ Adolf Hitler para nunduuxeʼ ca testigu stiʼ Jiobá, peru xi guca despué. 2) Xi huahuinni lu historia stiʼ ca testigu stiʼ Jiobá dede 1918 hasta 2008.
6 Guidúʼyanu guiropa ejemplu riʼ. Lu iza 1934 Adolf Hitler guníʼ zunduuxeʼ ca testigu stiʼ Jiobá de guidxi Alemania, ne dxandíʼ nga guniʼbe zúnibe ni. Despué de ni guniʼbe que gunaazecabe ne biteguyoocabe stale Testigu. Stale mil de ca Testigu ca bininácabe laacaʼ ne jma de chupa gayuaa cincuenta biiticabe laacaʼ dxi bideguyoocaʼ. Ñee binduuxeʼ Hitler guiráʼ ca Testigu que la? Ñee gunda bicueezabe ca Testigu que de nucheechecaʼ diidxaʼ ndaaniʼ guidxi Alemania que la? ¡Nin tobi de ca nga qué ñanda ñúnibe! Dxi canazanándacabe ca bíʼchinu ne ca bizánanu que bicheechecaʼ diidxaʼ nagaʼchiʼ. Ne ra maʼ qué ñuu gobiernu stiʼ nazi que la? maʼ biiyapeʼ binni laacabe bicheechecabe diidxaʼ. Yanna riʼ jma de ti gayuaa sesenta y cinco mil de cani rucheeche diidxaʼ nuu Alemania. Ne nga rusihuinni biʼniʼ Jiobá, Dios Ni Rulá que, ni guníʼ: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ».
7 Guiráʼ ni huazaaca ca testigu stiʼ Jiobá ca dxi stinu riʼ rusihuinni qué ziuu dxi gudii Jiobá lugar gunduuxecabe ca xpinni (Sal. 116:15). Peru, ñee rulá Dios cada tobi de ca xpinni yanna la? Ne pa zacani, ximodo rúnibe ni yaʼ.
Ñee zabézanu gapa Jiobá laanu para cadi guizaacanu xiixa la?
8, 9. 1) Ximodo nánnanu qué zulá Jiobá laanu ora guizaacanu xiixa desgracia. 2) Xi nánnanu huazaaca ca xpinni Jiobá.
8 Jiobá qué huaniidiʼ zapa laanu para cadi guizaacanu xiixa yanna. Nga runi, riníʼ íquenu cásica guionnaʼ hebreu ni qué ninacaʼ nuzuxíbicaʼ nezalú bidóʼ de oro ni biʼniʼ rey Nabucodonosor que. Laacabe qué niníʼdicabe zuni Jiobá ti milagru para gulá laacabe (biindaʼ Daniel 3:17, 18). Peru Jiobá bilá laacabe para cadi ñaaquicabe ndaaniʼ horno ni caguí que (Dan. 3:21-27). Guietenaláʼdxinu, dxiqué cadi guiráʼ diʼ ora biʼniʼ Jiobá clase milagru ca. Nanna dxíchinu stale de cani bizuubaʼ stiidxaʼ Jiobá biiti xhenemígucaʼ laacaʼ (Heb. 11:35-37).
9 Yanna riʼ yaʼ, ñee laaca rulá Jiobá ca xpinni la? Cumu Jiobá napa poder la? zanda gulabe tuuxa de xiixa desgracia. Peru, ñee zanda guininu nuu tu maʼ bilá Jiobá la? Coʼ, qué zanda diʼ. Pa nuu tuuxa guiníʼ bilá Jiobá laa lu xiixa desgracia, cadi jneza nga guinícanu cadi dxandíʼ ni. Peru ni naquiiñeʼ gánnanu nga stale de cani ruzuubaʼ stiidxaʼ Jiobá maʼ huazaaca xiixa ne huayáticaʼ lu stale desgracia o pur huazanándacabe laacaʼ casi guca ndaaniʼ guidxi Alemania nazi que (Ecl. 9:11). Ñee zaninu qué ñapa Jiobá ca xpinni ni bizuubaʼ stiidxaʼ que la? Coʼ.
10, 11. Xii nga qué zanda guni binni. Peru, xi zanda guni Jiobá.
10 Guiníʼ íquenu ni chiguininu riʼ: binni qué zanda gulá laa de lu naʼ guendaguti, purtiʼ guirutiʼ zanda gulá xhialma de lu naʼ Seol, ra rigachiʼ guiráʼ binni (Sal. 89:48). Yanna Jiobá yaʼ, ñee zanda gulabe laanu de lu naʼ guendaguti ca la? Ti gunaa Testigu ni bilá lu naʼ ca nazi rietenalaʼdxiʼ ni gudxi jñaa laa, jñaabe riʼ laaca Testigu laa, para quixhedxí ladxidoʼbe purtiʼ guti caadxi binni ni nadxiibe ra bideguyoocaʼ: «Pa ñaca qué liica nibani binni sti biaje la? ñee cadi nusihuinni nga jma nadipaʼ guendaguti ca la?». Peru Dios ni nandxóʼ ca jma nadipaʼ que guendaguti ca, purtiʼ laabe nga cudiibe guendanabani (Sal. 36:9). Guiráʼ cani nuu ndaaniʼ Seol o Hades la? nuucabe lu xquendabiaaniʼ Jiobá, ne guirácabe zusibánibe (Luc. 20:37, 38; Apo. 20:11-14).
11 Peru yanna riʼ laaca cayapa Jiobá ca xpinni ni ruzuubaʼ stiidxaʼ. Guidúʼyanu chonna modo culá Dios laanu.
Jiobá rapa laanu ti cadi guixélenu de laa
12, 13. Xiñee jma risaca nga chuʼnu galán ne Jiobá, ximodo racané Jiobá laanu para chuʼnu galán ne laa.
12 Jiobá rapa laanu ti cadi guixélenu de laa, ne nga nga ni jma risaca. Para laanu, ca xpinni Cristu, jma risaca nga chuʼnu galán ne Jiobá que gulanu xquendanabáninu (Sal. 25:14; 63:3). Pa qué chuʼnu galán ne Jiobá la? qué zabáninu nayecheʼ ne maʼ qué zacaanu guendanabani ni qué zaluxe chigudiibe ca.
13 Jiobá rudii laanu guiráʼ ni caquiiñenu para gacané laanu chuʼnu galán ne laabe. Cudiibe laanu Stiidxabe, espíritu santu stibe ne ca xpínnibe ni nuu lu guidubi naca Guidxilayú riʼ. Pa guidúʼndanu Stiidxabe guiráʼ dxi sin guireʼnu gana la? zaguidxi fe stinu ne qué zusaananu de cuézanu ni chigudii Dios laanu (Rom. 15:4). Pa guinábanu Dios espíritu stiʼ la? zápanu stale stipa para gudxíʼlunu cani cadi jneza guquiinde laanu gúninu (Luc. 11:13). Pa chinándanu ni gabi mozo ni nuu xpiaaniʼ ca laanu lu ca libru ne revista ca, ne chuunu guiráʼ ca guendaridagulisaa ni nápanu la? jma zacanécani laanu chuʼnu galán ne Jiobá (Mat. 24:45).
14. Guníʼ ti ejemplu ni cusihuinni pabiáʼ risaca nga gapa Jiobá laanu para cadi guixélenu de laa.
14 Guidúʼyanu ti ejemplu ni cusihuinni pabiáʼ risaca nga gapa Jiobá laanu ti cadi guixélenu de laa. Ra bizulú tema gudídinu ca bizéʼtenu de ti guendaxheelaʼ ni nabé guyuucaʼ xizaa pur biniti xiiñicaʼ Teresa. Qué nindaa gúnnacabe guyuu tu biiti xiiñidxaapacabe.a Bixhoze Teresa guníʼ: «Naa gunabaʼ Jiobá gapa Teresa [...]. Ora guti xiiñeʼ que, dxandíʼ guníʼ iqueʼ xiñee qué ñuni Jiobá ni gunabaʼ laa lu ca oración stinneʼ que. Neca nannaʼ cadi cayabi Jiobá laanu zulá cada tobi de ca xpinni, peru gunábaruaʼ laabe gusiénebe naa xiñee bizaaca xiiñeʼ desgracia que. Nabé nga gutadxí ladxiduáʼ ora bieneʼ rapa Jiobá laanu para cadi guixélenu de laa. Ne nga nga ni jma risaca purtiʼ zacaneni laanu guibáninu sin chuʼ dxi gátinu. Zacá nga modo gupa Jiobá Teresa, purtiʼ laa qué nixeleʼ de Jiobá dede dxi guti. Ratadxí ladxiduáʼ gannaʼ zusibani Jiobá laabe sti biaje».
Jiobá rudii stipa laanu ora huaranu
15. Ximodo racané Jiobá laanu ora cayuniná xiixa guendahuará laanu.
15 Jiobá zanda gudii stipa laanu ora maʼ huaranu, casi bidiibe stipa David (Sal. 41:3). Neca qué zúnibe ti milagru para gusiándabe laanu la? zacanebe laanu. Ca conseju ni zeeda ndaaniʼ Stiidxaʼ Dios zacanécani laanu gánnanu xi remediu zanda cuinu para laanu ne gánnanu xi gúninu lu xcaadxi cosa (Pro. 2:6). Ne revista Torre stiʼ ni rapa ne ¡Despertad! ca nabé huayacanécani laanu gunibiaʼnu xiixa guendahuará ne huasiénecani laanu xi zanda gúninu ne laacani. Jiobá zanda iquiiñeʼ espíritu stiʼ para gudii stipa laanu ti ganda gudxíʼlunu guendahuará ni gápanu ne cadi guixélenu de laabe neca guizaacanu intiica cosa (2 Cor. 4:7). Zacá qué zusidxágapeʼ guendahuará ca laanu dede gusaananu Jiobá chaahuidugá.
16. Ximodo cudxiilú ti xpinni Cristu guendahuará ni napa.
16 Lu primé párrafo stiʼ tema ni gudiʼdiʼ ca guninu de ti hombre huiiniʼ ni napa ti guendahuará nabé malu. Lu iza 1998 gúdxicabe laabe nápabe ti guendahuará ni láʼ esclerosis lateral amiotrófica, ne pur guendahuará ca maʼ qué liica ñanda niniibibe.b Ximodo bidxiilube guendahuará que yaʼ. Sicaríʼ guniʼbe: «Nuu biaje nabé riuaa triste ne rusidxaga guendahuará riʼ naa, óraca nga riníʼ iqueʼ jma galán ñateʼ ti nireecaʼ de castigu. Peru ora maʼ qué ganda guneʼ huantar la? rinabaʼ Jiobá quixhedxí ladxiduáʼ ne cadi guiree gana. Nannaʼ dxicheʼ ricabi Jiobá ca oración stinu. Ora maʼ nuaadxiéʼ la? randa riníʼ iqueʼ stale cosa ni uguu gana naa, casi ora gaca Guidxilayú riʼ ti paraísu ra zanda sayaʼ, gahuaʼ ni galán ne guinieniáʼ binnilidxeʼ diidxaʼ. Nabé risaca nga cadi guiree gana ti ganda gudxieeluáʼ ca guendanagana ni gapaʼ runi guendahuará riʼ. Guneʼ huantar la? racané naa cadi guixeleʼ de Jiobá ne cadi gusisacaʼ sti cosa jma que laabe. Runeʼ sentir casi David, purtiʼ laaca runeʼ cré cudii Jiobá stipa naa laga huaraʼyaʼ» (Isa. 35:5, 6).
Jiobá rudii ni iquiiñenu
17. Xi maʼ bidii stiidxaʼ Jiobá guni pur laanu ne ximodo rúnibe ni.
17 Jiobá maʼ bidii stiidxaʼ gudii laanu ni iquiiñenu (biindaʼ Mateo 6:33, 34 ne Hebreos 13:5, 6). Naquiiñeʼ gánnanu qué zuni diʼ Jiobá milagru para gudii laanu ni iquiiñenu, o guiniʼ íquenu maʼ qué zúninu dxiiñaʼ (2 Tes. 3:10). Ni dxandíʼ cayabi Jiobá laanu nga pa gúninu xhiiñaʼ Reinu primé ne gúninu dxiiñaʼ para gápanu ni guidoʼno la? dxandíʼ zacanebe laanu gápanu ni iquiiñenu para guibaninenu (1 Tes. 4:11, 12; 1 Tim. 5:8). Jiobá zanda gacané laanu ne qué ruxuíʼlunu modo gúnibe ni, laabe zanda iquiiñebe ti bíʼchinu o ti bizánanu para gudii laanu dxiiñaʼ gúninu o guni sti cosa para gacané laanu.
18. Guníʼ ti ejemplu ni cusihuinni rudii Jiobá ni iquiiñenu.
18 Guietenaláʼdxinu gunaa ni bizéʼtenu napa ti xiiñiʼ lu tema gudiʼdiʼ que. Dxi yendézacabe sti ladu nabé nagana guca para laabe guidxélabe dxiiñaʼ. Sicaríʼ guniʼbe: «Rigucheecheʼ diidxaʼ siadóʼ ne guidubi huadxí ca maʼ ziyubeʼ dxiiñaʼ. Rietenalaʼdxeʼ dxi yesiéʼ leche ndaaniʼ ti tienda. Biiyadxiéʼ ca caja dxaʼ verdura que, peru qué gapaʼ bueltu sieʼ cani. Qué huayuu dxi guneʼ sentir triste biaʼ bineʼ sentir dxi que. Peru ora yendayaʼ ra yoo, dede bidxagayaa ora biiyaʼ lu patiu stinneʼ nuu jma bolsa ni dxaʼ guiráʼ clase verdura. Guizáʼ stale cani dede ñanda nindaacani beeuʼ. Dede dxaʼ nisa luaʼ bidiéʼ xquíxepeʼ Jiobá». Qué nindaa gúnnabe tobi de cani ridagulisaanebe ni napa ti ndaa layú huiiniʼ nga bisaana ca bolsa que. Despué biseendabe ti guiʼchiʼ huiiniʼ ra na: «Rudiee xquíxepeʼ lii pur ni bíʼniluʼ pur naa nase que peru laaca rudiee xquíxepeʼ Jiobá pur bicaa lii gácaluʼ nachaʼhuiʼ ne naa ne zacá bisietenaláʼdxibe naa pabiáʼ nadxiibe naa» (Pro. 19:17).
19. Xi nanna dxíchinu zuni Jiobá pur laanu ora guedandá dxi jma nagana ca, ne xi naquiiñeʼ guni crenu yanna.
19 Ni biʼniʼ Jiobá dxiqué ne ni cayuni yanna racané laanu ganna dxíchinu qué ziuu dxi gusaanabe laanu. Qué zandaa zeeda dxi nagana ca luguiáʼ ca xpinni Binidxabaʼ, ne dxi ca nga jma zaquiiñenu gacané Dios laanu. Laanu ca xpínnibe nánnanu zanda guyúbinu laabe ne ziuʼnu nayecheʼ purtiʼ maʼ qué zandaa zulabe laanu (Luc. 21:28). Laga guedandá dxi ca, naquiiñeʼ guni crenu zacané Jiobá laanu neca guizaacanu intiica cosa. Qué chuʼ dxi gusiaandanu caʼruʼ guchaa Jiobá modo laa ne zulabe laanu.
[Cani cá ñee yaza]
a Biiyaʼ tema ni láʼ «Qué nusaanadu de ñúnidu ni na Jiobá neca bizaacadu ti desgracia» ni zeeda lu ¡Despertad! 22 stiʼ julio 2001, yaza 19-23.
b Biiyaʼ tema ni láʼ «Fe ni napaʼ racané naa guneʼ huantar guendahuará ni láʼ esclerosis lateral amiotrófica» ni zeeda lu ¡Despertad! enero 2006 yaza 25-29.
Rietenalaʼdxuʼ la?
• Ximodo nga rulá Jiobá ca xpinni ni maʼ guti.
• Xiñee jma risaca nga chuʼnu galán ne Jiobá.
• Ximodo rudii Jiobá laanu cani iquiiñenu.
[Dibuju/foto ni zeeda lu yaza 8]
Rutherford ne cani biʼniné dxiiñaʼ biteguyoocabe laacaʼ lu iza 1918. Ne despué bireecaʼ ne guníʼcabe maʼ qué gápacaʼ donda
[Dibuju/foto ni zeeda lu yaza 10]
Jiobá zanda gudii stipa laanu ora maʼ huaranu