Yenanda ejemplu stiʼ Jesús ne biʼniʼ adorar Dios casi riuulaʼdxiʼ
Cumu nadxii Dios binni la? cayábibe guiráʼ cani zeeda «de irá ladu ne de irá guidxi ne irá idioma» guni adorar laabe (Apo. 7:9, 10; 15:3, 4). Cani maʼ cayuni adorar Dios ca la? cayuuyacaʼ pabiáʼ nachaʼhuiʼ Jiobá (Sal. 27:4; 90:17). Laacabe laaca cayuundacabe cásica biindaʼ hombre bicaa salmo riʼ: «Guni adorarnu ne guindeteʼ íquenu; guzuxíbinu nezalú Jiobá, Dios ni bizáʼ laanu» (Sal. 95:6).
Modo racalaʼdxiʼ Dios guni adorarnu laa
Cumu tobi lucha Jesús nga xiiñiʼ Dios la? gunna chaahuibe ximodo riníʼ ique Bixhózebe ne gunáʼ nga ca conseju ni rudii ne gunáʼ nga ca ley stiʼ. Nga runi gunda gúdxibe binni ximódopeʼ nga racalaʼdxiʼ Dios guni adorárcabe laa. Sicaríʼ guniʼbe: «Naa nga neza ca, ne rusiide ni dxandíʼ ne rudiee enda nabani ni qué zaluxe. Iruti zie ra nuu Bixhoze pa cadi pur naa» (Juan 1:14; 14:6).
Jesús nga bisaana ejemplu jma jneza para guzuubaʼ binni diidxaʼ ne para cadi gudxiibaʼ laaca laa, purtiʼ laabe guniʼbe: «Qué rune gasti de naa siaʼ sínuque rinié ni bisiidi Bixhoze naa. Qué [...] riaana dxie de gune ni riulaʼdxi be» (Juan 8:28, 29). Xii nga cani bíʼnibe guyuulaʼdxiʼ Bixhózebe yaʼ.
Primé la? Jesús biquiiñeʼ xquendanabani para biʼniʼ xhiiñaʼ Dios si, ne ngaca nga ni naquiiñeʼ guni cani dxandíʼ runi adorar Jiobá. Cumu gunnaxhii Jesús Bixhoze la? bizuubabe stiidxaʼ ne bíʼnibe ni na nécaxa para bíʼnibe ni gúpabe xidé bisaanabe stale cosa (Fili. 2:7, 8). Nabé bisaca para Jesús gusiidiʼ binni gaca xpinni Dios purtiʼ zacá bisihuinni cayuni adorar Dios. Ne cumu nabé bicheechebe diidxaʼ la? dede cani qué ñuni cré laabe gúdxicaʼ laabe Maestru (Mat. 22:23, 24; Juan 3:2). Laaca gucanebe binni guiráʼ ora. Ne de guidubi ladxidoʼbe bíʼnibe ni, neca huaxiéʼ tiempu gúpabe para laabe (Mat. 14:13, 14; 20:28). Neca guizáʼ guyuu xhiiñabe la? guleebe tiempu para biʼniʼ orarbe Bixhózebe (Luc. 6:12). Nanna dxíchinu bisisaca Jiobá modo biʼniʼ adorarbe laa.
Gúninu stipa pur guni adorarnu Dios modo riuulaʼdxiʼ
Jiobá biiyaʼ bizuubaʼ Xiiñiʼ diidxaʼ ne binadiaga binni guniʼbe guyuuláʼdxibe cani biʼniʼ (Mat. 17:5). Peru Binidxabaʼ laaca biiyaʼ modo cuzuubabe stiidxaʼ Dios, ngue runi guzananda laabe. Xiñee yaʼ. Purtiʼ ante de Jesús guirútiruʼ tu nuzuubaʼ stiidxaʼ Jiobá ne ñuni adorar laabe modo riuuláʼdxibe. Ne Jesús nga primé ni gunda biʼniʼ ni, ngue runi guyuu Binidxabaʼ nucaa laabe nucheebe (Apo. 4:11).
Para gucaa Binidxabaʼ Jesús guchee la? guníʼ zudii laabe caadxi cosa ni uquiinde laabe gápabe. Binidxabaʼ «yené laabe lu ti dani ni jma nasoo, ne biluíʼ laabe irá xixé guidxi de idubi naca guidxilayú para guʼya be pabiáʼ sicarú cani. Ne na rabi laabe: Zudiee lii irá ni pa guzuxibi lu xañeeʼ usisaca lu naa. Oraque na be rabi be laa: Biree de ra nuaa [B]inidxabaʼ, purti cá lu Xquiʼchi Dios, Dios si nga naquiiñe usisaca cabe ne guni cabe ni na» (Mat. 4:8-10). Neca rihuinni galán ngue ni cudii Binidxabaʼ que la? Jesús gunna dxichi pa guzuxibi xañeebe maʼ cayuni adorar laabe zaqué. Peru Jesús maca gudixhe ique guni adorar Jiobá si.
Zándaca yanna riʼ qué zudiidiʼ Binidxabaʼ laanu guiráʼ reinu stiʼ Guidxilayú riʼ pa guni adorarnu laa. Peru caquiiñebe xcaadxi cosa para gucaabe laanu guni adorarnu laabe lugar de guni adorarnu Dios (2 Cor. 4:4).
Jesús qué nucheené diʼ Dios dede dxi guti. Zacá bisisácabe Jiobá ne qué huayuuruʼ sti binni guni casi bíʼnibe ca. Cani dxandíʼ xpinni Cristu runi stipa pur gusihuínnicaʼ zinándacaʼ ejemplu stiʼ Jesús ca ra guni adorarcaʼ Dios ne qué rudiicaʼ lugar xcaadxi cosa gucueeza laacaʼ de gúnicaʼ ni. Para laanu la? gástiruʼ nga ni jma risaca que chuʼnu galán ne Dios.
Zacaanu stale ndaayaʼ ora guni adorarnu Dios modo riuulaʼdxiʼ
Pa guni adorarnu Dios modo riuulaʼdxiʼ ne sin guchéʼnenu laa la? zacaanu stale ndaayaʼ (Sant. 1:27). Casi lu Guidxilayú riʼ la? zeʼ dxi jma stale binni cuyubi para laa si, ne nisi bidxichi cá íquecaʼ, rúnicaʼ laacaʼ nandxóʼ, qué riuuláʼdxicaʼ gúnicaʼ ni jneza (2 Tim. 3:1-5). Peru laanu la? galán nga nuunu ndaaniʼ xquidxi Dios purtiʼ racá zanda guidxaaganu binni ni runi ni jneza, nachaʼhuiʼ ne runi stipa pur chinanda ca ley ni naguixhe Dios para guni adorarnu laa. Ñee cadi riguixhedxí nga ladxidoʼno la?
Pa qué gudiʼnu lugar guni biidiʼ binni guidxilayú riʼ laanu la? zacaanu sti ndaayaʼ: ziuu xquendabiaaninu nayá. Pa chinándanu ca conseju stiʼ Dios ne pa chinándanu ca ley stiʼ ca gobiernu ca ora cadi cucaa cani laanu guchéʼnenu Dios la? ziuu xquendabiaaninu nayá (Mar. 12:17; Hech. 5:27-29).
Peru qué ziuu si xquendabiaaninu nayá, sínuque ziuʼnu nayecheʼ purtiʼ naguixhe íquenu guni adorarnu Dios de guidubi ladxidoʼno ne gúninu ni nabe lugar de gúninu ni rábinu. Ne lugar de guininu guidoʼno ne guideʼnu purtiʼ «qué ganna nu pa nabani ru nu ixíʼ» la? laanu nanna dxíchinu zabáninu ndaaniʼ ti paraísu ndaaniʼ Guidxilayú riʼ sin qué chuʼ dxi gátinu (1 Cor. 15:32).
Ndaaniʼ Biblia lu Apocalipsis caníʼ guiráʼ tu guni ni jneza nezalú Dios la? zalacaʼ ora gueeda ca dxi «jma nagana» ca. Laaca cuzeeteni: «Ne zapa ni zuba lu trono ca laacabe» (Apo. 7:13-15). Ni zuba lu trono ca nga Jiobá, ti Dios ni jma nandxóʼ. Bixuiʼlú pabiáʼ nayecheʼ zuni sentirnu ora chuʼnu ndaaniʼ paraísu stiʼ Jiobá ne gapa laanu ti cadi chuʼ ni guniná laanu. Ne dede ca yanna zanda guni sentirnu cayapa Jiobá laanu.
Apocalipsis laaca caníʼ guiráʼ cani cayuni adorar Dios modo riuulaʼdxiʼ la? zinebe laacaʼ «ra candani nisa rudii enda nabani». Nisa ni candani ca zeeda gaca guiráʼ ni rudii Jiobá laanu para gacané laanu guicaanu guendanabani ni qué zaluxe ca. Ne cumu guti Jesús pur laanu la? nga runi «zucuiidxi Dios irá nisa riete lú» binni (Apo. 7:17). Cumu gulené binni donda la? dxi ca maʼ zaree ni luguiacaʼ. Ne nabé nayecheʼ ziuu guiráʼ cani guibani lu Guidxilayú riʼ sin chuʼ dxi gáticaʼ. Yanna riʼ laaca nabé nayecheʼ nuu ca xpinni Dios ne rudiicaʼ xquíxepeʼ laabe, runi adorarcaʼ laabe ne rusisácacaʼ Dios cásica cayuni cani nuu guibáʼ ni ne ca diidxaʼ riʼ: «Naroʼba ne de enda ridxagayaa irá ni runi luʼ, [Jiobá] Dios ni jma nandxóʼ. Jneza ne sicarú irá ni riguixhe luʼ, lii ni runi mandar irá guidxi. Tuu nga qué idxibi lii ne usisaca lii yaʼ, Señor, purti iruti ru casi lii. Ne zeda uzuxibi irá binni xa ñee luʼ purti ma bihuinni jneza ni runi luʼ» (Apo. 15:3, 4).
[Dibuju/foto ni zeeda lu yaza 27]
Xi cudii Binidxabaʼ laanu para guni adorarnu laa