Rucheechecabe diidxaʼ luguiaa
DXI guyuu apóstol Pablu ndaaniʼ guidxi Atenas bisiidibe binni de Jesús luguiaa (Hech. 17:17). Gulibe chebe luguiaa ca purtiʼ racá jma ridxá binni.
Chupa mil iza despué, cucheecheruʼ xquidxi Jiobá stiidxaʼ Reinu ra zanda guidxélacabe stale binni. Nuu caadxi Testigu riecaʼ luguiaa ne ra nuu stale negocio. Ora maʼ gucuaacabe permisu la? riguíxhecabe ti puestu ra gata ca libru ne ca revista para guʼyaʼ binni cani.
Guidúʼyanu ti ejemplu, ndaaniʼ guidxi Nueva Jersey (Estados Unidos) ra nuu stale negocio gudíxhecabe ti puestu de libru ne revista ni caníʼ ximodo guibani ca familia ca galán. Xi guleendúcabe yaʼ. Ti dxi si gudiizicabe 153 libru lu xhoopaʼ diidxaʼ.
Ti gunaa ni bidxiña ra nuu puestu que guizáʼ bicaadiágabe ni bisiene ti bizánanu laabe. Gunaa que bidii cuenta pabiáʼ naquiiñeʼ nga chinanda ca familia ca ni na Dios ne zaqueca cada tobi de laacaʼ. Ne gucuaabe ca libru riʼ: Guizíʼdinu de Maestru Ni Jma Nanna Gusiidiʼ, El secreto de la felicidad familiar ne Lo que los jóvenes preguntan. Respuestas prácticas.
Huadxí que laga zeʼ ti señor ra tienda ni nuu gaxha de ra nuu puestu que la? biiyadxibe libru Lo que los jóvenes preguntan. Bizánanu ni cayuni tender raqué biiyaʼ cayuuyadxibe libru que ne gunabadiidxaʼ laabe: «Ñee racaláʼdxiluʼ guicaaluʼ tobi de ca libru riʼ la?» óraque biluináʼ hombre que libru Lo que los jóvenes preguntan que. Para bidii bizánanu que laabe tobi. Hombre que gudxi laabe napa chonna xiiñiʼ, ne chupa de laacabe maʼ caniisicaʼ, ne laaca gudxi laabe ti biaje lu ti semana ribiné laacabe para guiníʼcabe diidxaʼ. Ora biiyabe cani cá ndaaniʼ libru que la? guniʼbe zanda iquiiñebe cani zeeda luni para guiníʼnebe cani binnilídxibe. Laaca biluíʼ bizánanu ca laabe libru El secreto de la felicidad familiar, ne gudxi laabe zeeda conseju ni zacané laabe ne xheelabe ora quixhe íquecabe xi gúnicabe ne binnilídxicabe. Hombre que bidii xquíxepeʼ laabe pur ni gúdxibe laa que, ne bidii laabe bueltu biaʼ guná ladxidóʼ pur libru que ne guníʼ chigánnacabe laa ralidxi.
Ximodo biʼniʼ sentir ca Testigu ca despué de bicheechecabe diidxaʼ guidubi dxi ra nuu ca negocio ca yaʼ. Ti bizánanu ca guníʼ: «Guyuaaladxepiáʼ nga modo bicheechedu diidxaʼ ra nuu ca negocio ca. ¡Nabé galán biʼneʼ sentir pur ni bínidu que!». Sti bizánanu guníʼ sicaríʼ: «Jiobá guníʼ zareeche ca diidxaʼ nacubi ne galán ca dede ca lugar jma zitu ni nuu lu Guidxilayú. Yanna ndaaniʼ guidxi Paramus (Nueva Jersey) riʼ, nuu binni ni riníʼ gadxé gadxé diidxaʼ ni maʼ cayuulaʼdxiʼ guiziidiʼ de Stiidxaʼ Dios. Nabé galán nga modo bicheechedu diidxaʼ raqué. Guiráʼ cani bicheechené laadu diidxaʼ raqué nayecheʼ guyuucaʼ. Ne guirutiʼ tu niníʼ maʼ napa gana chibíʼ para huadxí que».
Laanu, ca xpinni Cristu jma nga rucheechenu diidxaʼ de yoo pur yoo (Hech. 20:20). Peru, nuuruʼ xcaadxi modo zanda gucheechenu ca diidxaʼ nacubi ne galán ca. Ñuulaʼdxuʼ nucheecheluʼ diidxaʼ xcaadxi modo la? Zándaca guiníʼ íqueluʼ gucheecheluʼ diidxaʼ luguiaa ne ra nuu ca negocio ca.