¡Zanda gucheecheluʼ diidxaʼ ratiica nuuluʼ!
1. 1) Pa racaláʼdxinu gucheechenu diidxaʼ ratiica nuunu, gunáʼ nga ca lugar ra zanda gúninu ni. 2) Panda de cani nuu raríʼ binibiaʼcaʼ ni dxandíʼ purtiʼ guniʼné ca Testigu laacaʼ ora nuucaʼ sti lugar.
1 Stale de ca xpinni Cristu rucheechecaʼ diidxaʼ ratiica nuucaʼ ne zacá huayacanecaʼ binni guiziidiʼ de Dios. Ñee nannuʼ panda de cani ridagulisaaneluʼ biziidicaʼ ni dxandíʼ zacá la? Zadxagayaaluʼ ora gannuʼ ni. Yanna, gunáʼ nga ca lugar ra zanda gucheechenu ca diidxaʼ nacubi ne galán ca yaʼ. Zanda gúninu ni ora guinínenu ca binni ni ridxaaganu guiráʼ dxi ra scuela, ra rúninu dxiiñaʼ, ora maʼ zisinu, ora chigánnanu ca binnilídxinu, ca vecinu stinu, ora maʼ ziuunu de viaje ne xcaadxi lugar. Lade ti grupu ra nuu jma de chupa gayuaa Testigu ni maʼ guyuunisa, 40% de laacaʼ bizulú biziidicaʼ ni dxandíʼ ora guniʼnécabe laacaʼ tobi de ca lugar ni bizéʼtenu ca, nga rusihuinni guizáʼ galán gucheechenu diidxaʼ ratiica nuunu.
2. Xi ejemplu zeeda lu Stiidxaʼ Dios stiʼ ca binni ni bicheechecaʼ diidxaʼ ratiica nuucaʼ.
2 Ca binni ni bicheeche diidxaʼ lu primé siglu que nabé bíʼnicaʼ dxiiñaʼ que ratiica nuucaʼ. Casi dxi zidiʼdiʼ Jesús Samaria, bicheechebe diidxaʼ ra nuu ti gunaa ni cabee nisa ra bizé stiʼ Jacob (Juan 4:6-26). Dxi ziyuundaʼ ti hombre ni biʼniʼ xhiiñaʼ gobiernu stiʼ Etiopía libru stiʼ Isaías, gunabadiidxaʼ Felipe laabe: «Rieʼnu gouʼ ni cayuunda lu ca», zaqué gunda bizulú guniʼné laabe (Hech. 8:26-38). Dxi biseguyoocabe Pablu guidxi Filipos, bicheechebe diidxaʼ ra nuu hombre ni cayapa lidxi guiibaʼ que (Hech. 16:23-34). Ne despué, «bieche né [Pablu] irá ni yeganna laa» ralidxi, ne «tutiica byuíʼ né be de enda runi mandar sti Dios ne stiidxa Señor Jesucristu» (Hech. 28:30, 31). Pa laacabe gunda bicheechecabe diidxaʼ ratiica nuucabe la? lii laaca zanda guʼnuʼ ni, neca nácaluʼ ti binni natuí. Ximodo yaʼ.
3. Xi zanda gacané laanu para cadi guidxíbinu ora guinínenu binni.
3 Ni zanda gúniluʼ primé. Stale biaje raca nagana para laanu guzulú guinínenu tuuxa binni ni qué runibiaʼnu. Ne nuu tiru, neca runibiaʼnu ti binni, zándaca zadxíbinu ne zaca nagana para laanu guinínenu laabe de ni zeeda lu Biblia. Peru pa guiníʼ íquenu pabiáʼ nachaʼhuiʼ Jiobá, pabiáʼ galán guiráʼ ni maʼ bizíʼdinu ne gúʼyanu pabiáʼ triste modo nabani ca binni ni nuu lu guidxilayú riʼ, ziale de ndaaniʼ ladxidoʼno guinínenu laacabe (Jon. 4:11; Sal. 40:5; Mat. 13:52). Laaca zanda guinábanu Jiobá gacané laanu para gácanu nadxibalú (1 Tes. 2:2). Sicaríʼ guníʼ ti xpinni Cristu ni guyé Scuela stiʼ Galaad: «Ora raca nagana para naa guinieniáʼ tuuxa la? rudieeʼ cuenta racané oración ca naa para ganda guneʼ ni». Pa runi sentirluʼ qué zanda guʼnuʼ ni la? zanda guʼnuʼ ti oración nagueenda ndaaniʼ ladxidoʼloʼ (Neh. 2:4).
4. Xi zanda quixhe íqueluʼ gúniluʼ primé ne xiñee.
4 Para ganda guzulú gucheechenu diidxaʼ ratiica nuunu la? cadi caquiiñepeʼ guiniʼ íquenu xipeʼ zanda gábinu binni cásica rúninu ora maʼ zigucheechenu diidxaʼ de yoo pur yoo o gúʼndanenu binni ti textu. Ni zanda quixhe íqueluʼ guʼnuʼ primé nga guzulú guníʼneluʼ binni de xiixa cosa, ne cadi nagueendaca gábiluʼ laabe ni zeeda lu Biblia. Stale de ca xpinni Cristu ni runi zacá, riniʼcaʼ jma nagueenda ridxélacaʼ modo gusiidicaʼ binni de lu Biblia. Yanna, pa qué naʼ binni gucaadiaga lii la? cadi gucaaluʼ laabe gúnibe ni. Gudxi laabe maʼ cheluʼ, peru bíʼnini né respetu.
5. Xi runi ti gunaa Testigu para randa rucheeche diidxaʼ ratiica nuu.
5 Ti gunaa Testigu ni nabé natuí maʼ bidxela modo guzulú guiniʼné binni: ora maʼ canasibe, ruuyadxibe lú tuuxa ne ruxidxinebe laa. Pa guxidxiné binni laabe la? nagueendaca ruzeetebe de xiixa cosa. Ne pa galán guicabi binni laabe la? nga racané laabe gánnabe zándaruʼ guiníʼnebe laacaʼ. Rucaadiaga chaahuibe ne riníʼ íquebe xi tema zeeda lu Biblia jma ziuulaʼdxiʼ binni gucaadiaga. Pur ni rúnibe ca maʼ bisaananebe binni stale libru ne revista, dede maʼ bizulú cayuundanebe ti binni de Biblia.
6. Ximodo zanda guzulú guiníʼneluʼ binni ratiica nuuluʼ.
6 Ximodo zanda guzulú guiníʼneluʼ binni. Xi zanda guininu para guzulú guinínenu binni yaʼ. Bietenalaʼdxiʼ, para gunda bizulú guniʼné Jesús gunaa nuu ruaa bizé que la? ni bíʼnisibe nga gunábabe laa caadxi nisa (Juan 4:7). Nga runi, pa ugapadiúxinu tuuxa o guinabadiidxanu laa xiixa cosa la? zanda gacaneni laanu para guzulú guinínenu laabe. Ne zándaca ora maʼ cayuiʼtu diidxaʼ, zuuyuʼ galán nga guzeeteluʼ ni na xiixa textu ni gucaa laabe chuuláʼdxibe guiziidibe jma (Ecl. 11:6). Stale tu huayuuyaʼ riná binni gucaadiaga laa ora ruzeeteʼ de xiixa ni riuuláʼdxicabe, purtiʼ rucaani binni ganna jma ne guinabadiidxaruʼ de laani. Casi pa cabézaluʼ hora guni tender doctor lii la? zanda guiniʼluʼ: «¡Guizáʼ nayecheʼ ziuaaʼ ora maʼ qué chuʼ guendahuará!».
7. Ximodo zanda gucheechenu diidxaʼ ratiica nuunu pa guidúʼyanu xi cayuni binni.
7 Laaca galán guiníʼ íquenu xidé zanda guinínenu binni pur ni guidúʼyanu cayúnicaʼ. Casi pa guidúʼyanu ti binni ni nabé ruzuubaʼ ca xiiñiʼ diidxaʼ la? zanda gábinu laa galán modo cusiniisi ca xiiñiʼ ne guinabadiidxanu laa: «Xi racané lii para gusiniisiluʼ laacabe galán pue». Ti gunaa Testigu ranna xidé riníʼ ca binni ni runiné dxiiñaʼ ne despué rudiibe laacaʼ xiixa guiʼchiʼ ni caníʼ de xiixa tema ni ziuuláʼdxicaʼ. Ti biaje gúnnabe chiguichaganáʼ tobi de ca baʼdudxaapaʼ runinebe dxiiñaʼ, ngue runi bidiibe laa ti revista ¡Despertad! ni caníʼ de ximodo zanda gaca ti guendaxheelaʼ. Zaqué gunda guníʼnebe baʼdudxaapaʼ que de xcaadxi tema ni zeeda lu Biblia.
8. Ximodo zanda iquiiñenu ca revista ca para guzulú guinínenu binni.
8 Sti cosa ni zanda gúninu para guinínenu binni nga gúʼndanu ca revista ca ra guʼyaʼ xcaadxi binni laanu. Ti hombre ni naca Testigu ruxheleʼ revista Torre stiʼ ni rapa o ¡Despertad! ra zeeda xiixa tema ni nanna ziuulaʼdxiʼ binni ne ruzulú ruundaʼ ni. Pa gudiibe cuenta nuu tu cayuuyadxí revista ca la? rinabadiidxabe laa xiixa o ruzeetebe xidé caníʼ tema ca. Ni rúnibe ca racaneni laabe para guiníʼnebe binni ne ganda gucheechebe diidxaʼ. Ne nuu tiru, neca gusaanasinu tobi de ca revista ca ra guʼyaʼ binni ni, zanda gucaani cani runinenu dxiiñaʼ o cani rinenu scuela gúʼyacaʼ ni ne guinabadiidxacaʼ laanu xiixa de laani.
9, 10. 1) Xiruʼ zanda gúninu para guidxélanu xcaadxi modo gucheechenu diidxaʼ ratiica nuunu. 2) Ximodo huayuʼnuʼ ni.
9 Naquiiñeʼ guyúbiluʼ modo guʼnuʼ ni. Cumu yanna nga jma caquiiñeʼ gucheechenu diidxaʼ la? nabé risaca gúninu dxiiñaʼ riʼ ratiica nuunu ne cadi ora ganda si. Lu ca cosa ni rúninu guiráʼ dxi, naquiiñeʼ gúʼyanu xi zanda gúninu para guzulú guinínenu binni de Biblia. Dede ante guníʼ ique tuu nga ca binni ni zándaca guidxaagaluʼ dxi ca ne xi zanda guzeeteluʼ para guzulú guiníʼneluʼ laacabe. Guzáneca ti Biblia ne xcaadxi guiʼchiʼ ni rudii xquidxi Dios laanu para gusaananeluʼ tuuxa ni chuulaʼdxiʼ guiziidiʼ (1 Ped. 3:15).
10 Stale de cani rucheeche diidxaʼ huadxélacaʼ xcaadxi modo para guiníʼnecaʼ binni ratiica nuucaʼ. Guzéʼtenu xi runi ti gunaa Testigu ni nabeza ndaaniʼ ti edificiu ra qué randa diʼ riuu tutiica binni. Laabe ruzulú riguixhe chaahuibe rompecabeza ra zeeda caadxi dibuju sicarú, ne rúnibe ni lugar ni napa edificiu que para guiziilaʼdxiʼ binni. Ora ruzuhuaadxí binni ra nuube para gabi laabe galán dibuju zeeda lu rompecabeza ni cayúnibe la? oraqueca rábibe laacaʼ ni ruzeeteʼ Biblia de «ti ibáʼ cubi ne ti guidxilayú cubi» (Apo. 21:1-4). Xi xcaadxi modo raʼbuʼ zanda gucheecheluʼ diidxaʼ ratiica nuuluʼ.
11. Xi zanda gúninu para gacanenu ca binni ni guinínenu ratiica nuunu pa chuuláʼdxicaʼ guiziidicaʼ jma.
11 Gucané ca binni ni riuulaʼdxiʼ guiziidiʼ jma. Pa guidxélaluʼ tuuxa ni chuulaʼdxiʼ gucaadiaga, gucané laabe para ganda guiziidibe jma. Para ganda guʼnuʼ nga zanda gaʼbuʼ laabe: «Guyuuladxeʼ modo gunieniáʼ lii. Paraa zanda guuyaʼ lii sti biaje para guinírunu jma de tema riʼ». Caadxi xpinni Cristu rúnicaʼ sicaríʼ: rudiicaʼ binni ti guiʼchiʼ huiiniʼ ra cá paneza lídxicaʼ ne númeru de teléfono sticaʼ ne rábicaʼ laabe: «Galanpeʼ modo gunieniáʼ lii. Pa riuuláʼdxiluʼ gánnaluʼ jma de ni guninu riʼ, biquiiñeʼ guiʼchiʼ huiiniʼ riʼ para guiníʼneluʼ naa». Pa ruluíʼ qué zanda guni tenderluʼ binni ca la? bichá guiʼchiʼ ni láʼ Sírvase visitar (S-43-S) ne bidiini secretariu stiʼ ca binni ridagulisaa ra rieluʼ, ne maʼ laa gudiini neza binni ridagulisaa ni zanda gacané binni ca.
12. 1) Xiñee naquiiñeʼ gucaʼnu tiempu rucheechenu diidxaʼ ratiica nuunu. 2) Xi huabeendú cani runi zacá (biiyaʼ cuadru ni láʼ «Ni huabeendú ca xpinni Cristu ora rucheechecaʼ diidxaʼ ratiica nuucaʼ»).
12 Naquiiñeʼ gucaaluʼ tiempu ni riquiiñeluʼ para gucheecheluʼ diidxaʼ ratiica nuuluʼ. Cadi guiaandaʼ lii gucaaluʼ ni, neca chupa chonna minutu si guníʼneluʼ binni. Pa ñaca guiráʼ ca xpinni Cristu nucheechecaʼ diidxaʼ ratiica nuucaʼ neca gaayuʼ minutu guiráʼ dxi la? ¡lu ti beeu si ñúnicabe jma de diecisiete millón de hora!
13. Xi razón nápanu para gucheechenu diidxaʼ ratiica nuunu.
13 Gunáʼ nga ca razón nápanu para gucheechenu diidxaʼ ratiica nuunu yaʼ. Rúninu ni purtiʼ nadxiinu Jiobá ne nadxiinu binni (Mat. 22:37-39). Cumu rusisácanu ca guenda stiʼ Jiobá ne cani naguixhe íquebe gúnibe la? rucaa nga laanu guininu pabiáʼ risaca modo runi mandarbe (Sal. 145:7, 10-12). Cumu nabé rápanu gana gacanenu binni la? rúninu stipa pur gucheechenu ca diidxaʼ nacubi ne galán ca ratiica nuunu, laga nuuruʼ tiempu (Rom. 10:13, 14). Pa quixhe chaahuinu ximodo gúninu ni ne chuʼnu listu dede ante la? guiranu zanda gucheechenu diidxaʼ ratiica nuunu, ne dede zanda gacanenu tuuxa binni ni nayá ladxidóʼ guiziidiʼ ni dxandíʼ. ¡Guizáʼ ziéchenu pa gácani zacá!
[Ni caníʼ yaza 4]
Qué zaca nagana para lii guzulú guiníʼneluʼ binni pa gábiluʼ laacaʼ tu lii
[Cuadru ni zeeda lu yaza 5]
Stale de cani rucheeche diidxaʼ maʼ huadxélacaʼ xcaadxi modo para guiníʼnecaʼ binni ratiica nuucaʼ
[Cuadru ni zeeda lu yaza 5]
Ni zanda gacané lii para guzulú guiníʼneluʼ binni
◼ Gunabaʼ Jiobá gacané lii guzululuʼ
◼ Biyubi ca binni ni cadi cayaca purá cani ruluíʼ zaná gucaadiaga lii
◼ Biiyadxí lú ti binni, bixidxiné laabe ne guníʼ de xiixa ni riuulaʼdxiʼ guirópatu
◼ Bicaadiaga chaahuiʼ
[Cuadru ni zeeda lu yaza 6]
Ni huabeendú ca xpinni Cristu ora rucheechecaʼ diidxaʼ ratiica nuucaʼ
• Guidúʼyanu xi biʼniʼ ti xpinni Cristu laga cabeza cayaca chaahuiʼ carru stiʼ ndaaniʼ ti taller. Bizulú bicheechebe diidxaʼ ra nuu ca binni que ne bidiibe laacaʼ ti invitación para chigucaadiágacaʼ ti libana ni chitiidiʼ lu ti guendaridagulisaa roʼ. Gudiʼdiʼ si ti iza, dxi nuube ra ti guendaridagulisaa roʼ, bidxiña ti xpinni Cristu ni qué runibiaʼbe ne cayecheʼ bidiináʼ laabe. ¡Gúcasini tobi de ca hombre ni bidiibe invitación ndaaniʼ taller iza gudiʼdiʼ que! Yegucaadiaga hombre que libana que ne gunabaʼ guʼndanécabe laa Biblia. Yanna laabe ne xheelabe maʼ guyuunísacabe.
• Guzéʼtenu xi runi ti gunaa xpinni Cristu ni bizulú biziidiʼ ni dxandíʼ ora guniʼnécabe laa tobi de ca lugar ni bizéʼtenu ra bizulú tema riʼ. Laabe riníʼnebe ca binni ni runibiaʼbe pur ca xiiñibe. Zacá randa riníʼnebe ca vecinu stibe, ca binni ni runibiaʼbe ra scuela ne ca binni ni rié junta stiʼ ca xiiñiʼ. Cada biaje guiníʼnebe tuuxa, rábibe laa xiixa ni zeeda lu Biblia, ni cayacané laabe gusiniisibe ca xiiñibe; de racá maʼ riniʼbe de sti tema. Ora maʼ bizulú caníʼnebe binni ca la? jma nagueenda raca para laabe guzeetebe xiixa ni cá lu Biblia ora guiníʼnebe laa sti biaje. Né modo rúnibe riʼ, maʼ gucanebe doce binni chúʼnisa.
• Ti dxi guyé ti hombre ni rutoo seguru ralidxi ti gunaa Testigu, ne oraqueca guniʼné gunaa que laabe de Dios. Gunaa Testigu que gudxi laabe pa ñuuláʼdxibe nibánibe sin ñaca huarabe, ñuube nayecheʼ ne nibánibe sin ñátibe. Laabe guniʼbe ñuuláʼdxibe, ne gunabadiidxabe Testigu que xi tipu de seguru ngue cuzeeteʼ. Biluíʼ gunaa que laabe xiná Biblia chiguni Dios. Gucuaa señor que tobi de ca guiʼchiʼ rusaananenu binni ne ti huadxí si biindabe guidubi ni. Bidxela modo para cheʼ tuuxa guʼndané laabe Biblia. Bizulú guyebe guendaridagulisaa ne despué guyuunísabe.
• Dxi zeʼ ti gunaa xpinni Cristu ndaaniʼ avión, bizulú cayuíʼnebe gunaa zuba cueʼbe que diidxaʼ, ne zaqué gunda guníʼnebe laa de Dios. Yendásicabe ra zécabe que, bidii Testigu que laabe ti guiʼchiʼ huiiniʼ ra cá paneza lidxi ne númeru de teléfono stiʼ, ne gudxi laabe guinábabe ca testigu stiʼ Jiobá gúʼndanecaʼ laabe Biblia sti biaje tiidicaʼ ralídxibe. Biáʼsipeʼ sti dxi que bixhidxináʼ chupa Testigu ra puertaʼ lídxibe. Bizulú biindabe Biblia, biziidibe nagueenda ne guyuunísabe ne qué nindaa de ngue maʼ laapebe ruundanebe chonna binni de lu Biblia.
• Ti xpinni Cristu ni qué ruuyaʼ ni napa 100 iza ne nabeza ndaaniʼ ti yoo ra rápacabe ca binnigola, gatigá riníʼ sicaríʼ: «Caquiiñenu Reinu stiʼ Dios». Ni riniʼbe ca rucaani ca enfermera ne xcaadxi binni huará guinabadiidxacaʼ laabe de laani, zacá randa rusiénebe laacaʼ xii nga Reinu ca. Ti dxi, gunabadiidxaʼ tobi de ca gunna ni runi dxiiñaʼ raqué laabe xi chigúnibe ndaaniʼ Paraísu. Laabe bicábibe: «Zuuyaʼ ne zazayaʼ sti biaje ne óraca zucaaguiéʼ silla de rueda stinneʼ riʼ». Cumu qué ruuyabe la? rinábabe gunaa que guʼndaʼ ca revista ca para gucaadiágabe. Ti dxi beeda ti baʼdudxaapaʼ stibe raqué ne gudxi gunaa ni runi dxiiñaʼ raqué baʼdudxaapaʼ que pa zaa chiné ca revista que ralidxi. Tobi de ca enfermera que guníʼ: «Maʼ ndiʼ nga stiidxadu ndaaniʼ yoo riʼ yanna “Caquiiñenu Reinu stiʼ Dios”».
• Guidúʼyanu xi biʼniʼ sti gunaa Testigu laga zuhuaa lu fila para guiuu ndaaniʼ ti restaurán. Dede ra zuhuaabe que binadiágabe caníʼ ti grupu de hombre huaniisi ni zuba gaxha de raqué de política. Ora guníʼ tobi de laacabe qué zanda diʼ guni chaahuiʼ gobiernu ca guendanagana stiʼ binni la? gunaa que guníʼ ique sicaríʼ: «Yanna nga zanda guinieeʼ». Nagueendaca biʼniʼ orarbe ne bidxíñabe ca binni que. Primeru gúdxibe laacaʼ tu laabe ne guniʼbe de ti gobiernu ni zanda guni chaahuiʼ guiráʼ guendanagana napa binni, laani nga Reinu stiʼ Dios ne biluiʼbe laacaʼ ti folletu. Óraque bidxiña gerente que. Gunaa Testigu que guníʼ ique chitídxibe laa guiree de raqué. Peru xi guca yaʼ. Gudxi gerente que laabe bicaadiaga laacabe ne laaca rapa gana guicaa ti folletu. De raqué beeda ti gunaa runi dxiiñaʼ raqué, dede cayuunaʼ gudxi laabe laaca bicaadiaga ni guníʼcabe. Maca biindanécabe laabe Biblia dxiqué ne yanna maʼ rápabe gana guʼndanécabe laabe sti biaje.