Modo gucheecheluʼ diidxaʼ jma jneza: biyubi modo guzulú guiníʼneluʼ binni de stiidxaʼ Dios ra tiica nuuluʼ

Xiñee risaca gúniluʼ ni. Ora maʼ canagucheechenu diidxaʼ de yoo pur yoo, nuu binni qué ridxélanu laacaʼ ra lídxicaʼ para guinínenu laacaʼ. Peru zándaca guidxaaganu laacabe ora maʼ ziuunu ndaaniʼ carru, ora cabézanu guni tender doctor laanu, ora maʼ caziiláʼdxinu ra dxiiñaʼ ora rireʼnu recreu ra scuela ne ora rúninu xcaadxi cosa. Ni racalaʼdxiʼ Jiobá nga laaca gucaadiaga guiráʼ ca binni ca de stiidxaʼ Reinu (1 Tim. 2:3, 4). Stale biaje naquiiñeʼ quixhe íquenu guzulunu guinínenu binni de stiidxaʼ Dios.

Ximodo zanda gúniluʼ ni:

Biʼyaʼ tuu nga zanda guiníʼneluʼ. Ñee ruluíʼ zanda guidxíñaluʼ binni ca ne guiníʼneluʼ laa la? Ñee zanda güitu diidxaʼ sin chuʼ ni guchiiñaʼ laatu lugar ca la? Ni runi caadxi publicador primé nga ruyadxícabe lú ca binni ca ne ruxidxinécabe laacaʼ. Pa guxidxi binni ca la? ruyúbicabe ximodo guzulú guiniʼnécabe laa.
Biʼniʼ orar Dios ndaaniʼ ladxidoʼloʼ pa gúʼyaluʼ caquiiñeluʼ valor para guiníʼneluʼ binni (Neh. 2:4; Hech. 4:29).
Cadi guzululuʼ né diidxaʼ nagana, zanda ugapadiúxisiouʼ laabe. Jesús qué nuzuluca niniʼné samaritana que de Reinu stiʼ Dios (Juan 4:7). Nuu biaje zanda guzululuʼ gábiluʼ binni ca xiixa ni galán de laa, zanda gaʼbuʼ laabe: «Pabiáʼ galán ribidxí ca xiiñiluʼ». Laaca zanda guinabadiidxaluʼ sicaríʼ: «Ñee biiyaluʼ ca noticia gudiʼdiʼ nuchiʼ la?».
Ora maʼ bizululuʼ caníʼneluʼ tuuxa, biyubi modo guiníʼneluʼ laabe de stiidxaʼ Dios, cadi gacalúguluʼ. Laaca lade ra cayuiitu diidxaʼ ca nga maʼ guzululuʼ guiníʼneluʼ laabe de Dios. Zanda guiniʼluʼ xiixa ni gucaa laabe gánnarube jma o gucaa laabe guinabadiidxabe lii. Casi pa caniʼtu de binnilídxitu la? zanda gaʼbuʼ laabe: «Biindaʼ ti tema ni cudii conseju ximodo gusiniisi binni xiiñiʼ ne huayacaneni naa». Pa caniʼtu de xiixa noticia la? zanda guiniʼluʼ: «Cadi xadxí guizáʼ biecheʼ purtiʼ deruʼ biindaʼ caadxi noticia nabé galán». Cadi guireeluʼ gana pa maʼ qué gudii tiempu guiníʼneluʼ laabe de Dios.
Yené caadxi tratadu, libru o revista ni zanda gusaananeluʼ binni ni chuulaʼdxiʼ gucaadiaga de Dios.

Biʼniʼ stipa guʼnuʼ ndiʼ beeu riʼ:

Guiráʼ semana biʼniʼ stipa pur guiníʼneluʼ neca ti binni de Dios ra tiica nuuluʼ.