Testigu stiʼ Jiobá laanu guiráʼ ora
1. Xi rizíʼdinu de Jesús dxi guníʼnebe ti gunaa ruaa ti bizé.
1 Maʼ ziné Jesús chupa chonna ora de canazá; maʼ bidxágabe ne guizáʼ cayátibe nisa. Ngue runi, laga zisíʼ ca discípulo que guendaró la? guribe guriá guidxi Samaria para guiziiláʼdxibe. Cadi zédibe guidxi Samaria para gucheechebe diidxaʼ, sínuque zidíʼdisibe guriá guidxi que para chebe Galilea, raqué nga chigucheechebe diidxaʼ. Neca zaqué, qué nunítibe tiempu ne guníʼnebe ti gunaa ni zicaa nisa ra caziiláʼdxibe que (Juan 4:5-14). Xiñee yaʼ. Purtiʼ qué nusaana de nusiidibe binni ni dxandíʼ de Jiobá (Apo. 3:14). Pa racaláʼdxinu chinándanu ejemplu stiʼ Jesús la? laaca naquiiñeʼ gusíʼdinu binni de Jiobá ratiica nuunu (1 Ped. 2:21).
2. Ximodo zanda chuʼnu listu para gucheechenu diidxaʼ ratiica nuunu.
2 Guyuu listu. Zusihuínninu nuunu listu para gucheechenu diidxaʼ, pa chinenu libru, revista ne xcaadxi guiʼchiʼ ratiica chuunu. Stale xpinni Cristu rizanecaʼ tratadu para gusaananecaʼ ni cani rutoo ndaaniʼ ca tienda ca, cani runi dxiiñaʼ ra gasolinera ne xcaadxi binni ni ridxaagacaʼ guiráʼ dxi (Ecl. 11:6). Ti gunaa Testigu ni nabé rié de viaje qué riaadxaʼ ti Biblia huiiniʼ ne libru Xipeʼ ndiʼ cusiidiʼ Biblia ndaaniʼ bolsa stiʼ, ne ruyúbibe modo guiníʼnebe binni cuí cueʼbe.
3. Ximodo zanda guzulú guinínenu binni.
3 Bizulú guniʼné binni. Para gucheechenu diidxaʼ ratiica nuunu la? cadi naquiiñepeʼ guininu de ti tema ni zeeda lu Biblia cásipeʼ guzulunu. Casi dxi guniʼné Jesús gunaa que ruaa ti bizé la? cadi casi zebe gúdxibe laa laabe nga Mesías, sínuque gunábasibe laa caadxi nisa para guebe, ngue nga ni bicaa samaritana que guinabadiidxaʼ laabe xcaadxi cosa (Juan 4:7-9). Ti gunaa Testigu bidii cuenta zanda guni cásica bíʼnibe ca ora guinabadiidxacabe laa pa guyuulaʼdxiʼ xiixa saa ni guca. Lugar de guiniʼbe qué rúnibe ni purtiʼ nácabe testigu stiʼ Jiobá la? ricábibe sicaríʼ: «Maʼ gudixhe iqueʼ cadi gunediáʼ saa ca». Ora riniʼbe zacá nabé rucaa nga binni guinabadiidxaʼ laabe xiñee, zacá randa ruzulú rusiidibe laaca de Biblia.
4. Xiñee riguu Mateo 28:18-20 gana lii.
4 Nécapeʼ maʼ xadxí nga de biluxe Jesús dxiiñaʼ de gucheeche diidxaʼ ndaaniʼ Guidxilayú riʼ la? rizaaláʼdxirube gúninu ni cásica biʼniʼ mandarbe gácani (Mat. 28:18-20). Nga runi, chinándanu ejemplu stibe, ne gusihuínninu nuunu listu para gusíʼdinu binni de ni runi crenu ratiica nuunu (Heb. 10:23).