Cani ruundaʼ revista riʼ racaláʼdxicaʼ gánnacaʼ

Xiñee bichee Adán pa bizáʼ Dios laabe sin donda

Bicheebe purtiʼ bizáʼ Dios laabe para ganda cuibe xi gúnibe. Neca binni sin donda laabe gunda gulibe xi gúnibe. Cadi guiaandaʼ laanu Dios si nga qué ziuu dxi guchee lu guiráʼ xixé ni guni (Deuteronomio 32:3, 4; Salmo 18:30; Marcos 10:18). Xcaadxi cosa, nécapeʼ guyáʼcani jneza para gúnicani xiixa la? nuu ra qué zanda iquiiñecani. Guzéʼtenu ti ejemplu. Ti gudxiu la? guyáʼ para guchuuguʼ beela, peru qué zanda iquiiñenu ni para guidóʼnenu sopa. Nga runi, pa iquiiñenu ca cosa ca para ni guyáʼcani la? zanda guininu jneza bizáʼcabe ni. Zacaca nga rizaaca ne ti binni ni qué ñalené donda, pa chinándabe ni maca nexheʼ gúnibe la? zanda guininu jnézapeʼ guyaʼbe.

Yanna, xi para bizáʼ Dios Adán yaʼ. Guyaʼbe para gaca bixhoze stale binni laabe, ne ca binni riʼ laaca zanda cuicaʼ xi gúnicaʼ. Guirácabe zanda gusihuínnicabe nadxiicabe Dios pa gúnicabe ni na ca ley stiʼ ne guiale ni de laasicabe. Dios qué nuzáʼ diʼ binni casi ti robot para gúnicaʼ ni nabe, sínuque naquiiñeʼ guiale de ndaaniʼ ladxidoʼcaʼ guzuubacaʼ stiidxabe (Deuteronomio 10:12, 13; 30:19, 20). Pa nuzáʼ Dios Adán casi ti robot para nuzuubaʼ stiidxasibe la? ñaadxaʼ xiixa laa, o maʼ ñaca ti binni napa donda. Yanna, ximodo biquiiñeʼ Adán guenda bidii Dios laa que yaʼ. Biblia na yenándabe ejemplu stiʼ xheelabe ne qué nuzuubabe stiidxaʼ Dios ora gudxi laabe cadi gobe «cuananaxhi stiʼ yaga stiʼ guendananna ni jneza ne ni cadi jneza» (Génesis 2:17; 3:1-6).

Yanna, ñee biaandaʼ ñuni Dios laabe jma naguidxi para cadi nucheebe ora ñuu tu nucaa laabe ñúnibe ni la? Coʼ. Ante guchee Adán que biiyaʼ Jiobá jneza ngue guca guiráʼ cosa ndaaniʼ Guidxilayú riʼ, dede ne primé hombre ne primé gunaa que (Génesis 1:31). Nga runi, ora bichee Adán qué niníʼ diʼ Dios bicheebe purtiʼ qué nuzáʼ laabe jneza, sínuque ne stale razón bigaaniʼ donda laabe (Génesis 3:17-19). Pa ñannaxhii Adán Dios de guidubi ladxidóʼ ne ñannaxhii ca ley stibe la? qué nuchee diʼ.

Guiníʼ íquenu de Jesús, laa laaca guca ti binni sin donda casi Adán. Laabe beedabe de Adán, ne laaca qué ñalenédibe xiixa ni nucaa laabe nucheebe, purtiʼ pur espíritu santu nga guca xiiñiʼ jñaabe laabe (Lucas 1:30, 31; 2:21; 3:23, 38). Peru Jesús qué ñuni casi biʼniʼ Adán, purtiʼ laapeʼ gulí cadi gucheené Bixhoze neca bidxaagalú stale cosa ni bicaa laa ñúnini. Nga runi, Adán si nga napa donda pur bichee, purtiʼ de laabe biale gucheenebe Dios.

Yanna, xiñee bíʼnibe zacá yaʼ. Ñee guníʼ íquebe zabánibe jma galán la? Coʼ, purtiʼ Apóstol Pablu guníʼ: «Cadi Adán di bisiguii binidxabaʼ» (1 Timoteo 2:14). Laabe bíʼnibe ni na xheelabe, laa nga gudó cuananaxhi stiʼ yaga ni gudxi Dios laa cadi gó. Jma bisaca para Adán guni ni na xheelaʼ que guzuubaʼ stiidxaʼ Dios ni bizáʼ laa. Ora bidii xheelabe laabe cuananaxhi que nga niníʼ íquebe zaxélebe de Jiobá pa gobe ni. Cumu qué ñánnaxhiibe Dios de guidubi ladxidoʼbe la? ngue runi qué ñanda nuzuhuaabe dxiichiʼ ora bidii xheelabe laabe cuananaxhi que.

Cumu bichee Adán ante gapa xiiñiʼ la? nga runi guiranu nácanu binni ruchee. Peru cásica laabe, laanu laaca zanda cuinu xi gúninu. Nga runi, jma galán guiníʼ íquenu pabiáʼ nachaʼhuiʼ Jiobá ne laanu ne quixhe íquenu gannaxhiinu laabe. Caquiiñeʼ gúninu ni nabe ne guzúʼbanu stiidxabe de guidubi ladxidoʼno (Salmo 63:6; Mateo 22:36, 37).