Gacanenu cani maʼ bixeleʼ de xquidxi Dios
«Latáʼ, guieche né tu naa, purti bidxela dendxu stinne ni biniti.» (LUC. 15:6.)
1. Ximodo bisihuinni Jesús naca ti pastor ni nadxii ca xpinni ni zeeda gaca casi dendxuʼ.
JESUCRISTU, baʼduʼ lugola stiʼ Jiobá, nga «Pastor ni nandxóʼ stinu ni rapa chaahui laanu» (Heb. 13:20). Stiidxaʼ Dios maca guníʼ zeedabe lu Guidxilayú ne zácabe ti Pastor chaʼhuiʼ ne zúnibe stipa pur guidxélabe ca dendxuʼ stiʼ Israel ni canaguiniti, ne zacá gúcani (Mat. 2:1-6; 15:24). Ne cásica tuuxa ni rapa dendxuʼ dede rudii xquendanabani para gulá ca dendxuʼ stiʼ la? Jesús laaca bidii xquendanabani para gulá guiráʼ binni nachaʼhuiʼ ni zeeda gaca casi dendxuʼ ne gusisácacaʼ ni bíʼnibe ca (Juan 10:11, 15; 1 Juan 2:1, 2).
2. Xiñee maʼ bixeleʼ caadxi xpinni Cristu de xquidxi Dios.
2 Ca dxi stinu riʼ nabé triste nga guidúʼyanu nuu caadxi binni ni bisisaca guendaguti stiʼ Jesús ne dede bidiicaʼ laacaʼ Dios dxiqué ne yanna maʼ bixélecaʼ de xquídxibe. Zándaca bixélecabe purtiʼ bireecabe gana, pur xiixa guendahuará gúpacabe o pur xcaadxi cosa ni bizaacacabe. Peru naquiiñeʼ gánnanu cani nuu si ndaaniʼ xquidxi Dios nga zanda gatadxí ladxidoʼcaʼ ne chuʼcaʼ nayecheʼ casi guníʼ David lu Salmo 23. Luni biindaʼ David sicaríʼ: «Jiobá nga Pastor stinneʼ. Gastiʼ ziaadxaʼ naa» (Sal. 23:1). Dxandíʼ nga napa ca xpinni Dios guiráʼ ni iquiiñecaʼ para chuʼcaʼ galán ne laa, peru cani maʼ bixeleʼ ca cadi zacá diʼ nuucaʼ. Tu zanda gacané laacabe yaʼ. Ximodo zanda gacanenu laacabe para guibiguétacabe yaʼ.
Tu zanda gacané laacabe
3. Xi caquiiñeʼ gúninu para ganda gacanenu ca dendxuʼ huiiniʼ ni maʼ bireechú de xquidxi Dios, ne xi ejemplu guníʼ Jesús para guluíʼ ximodo gúninu ni.
3 Naquiiñeʼ gúninu stale stipa para gacanenu ca dendxuʼ huiiniʼ stiʼ Dios ni maʼ bireechú de laabe (Sal. 100:3). Jesús guníʼ ejemplu riʼ para gusihuinni zacá ni, nabe: «Pa ñapa ti hombre ti gayuaa dendxu ne niniti tobi, ñee qué nusaana be noventa y nueve que ne ñaazi be guiʼxhi niyubi be ni biniti que la? Ne ora ma bidxela be laame, ñee cadi jma ñeche né be laame que ca xcaadxi dendxu ni qué niniti que la? Zacaca qué racalaʼdxi Bixhoze tu ni nuu ibáʼ initi nin tobi de ca nahuiini riʼ» (Mat. 18:12-14). Yanna, tuu nga zanda gacané cani maʼ bixeleʼ de xquidxi Dios ca yaʼ.
4, 5. Ximodo naquiiñeʼ gapa ca binnigola ca dendxuʼ huiiniʼ stiʼ Dios.
4 Nanna dxíchinu zanda gacané ca binnigola guiráʼ ca xpinni Cristu ni maʼ bixeleʼ de xquidxi Dios. Peru naquiiñeʼ gánnacabe maʼ bidii ca dendxuʼ huiiniʼ ca laacaʼ Jiobá, nga runi nabé risácacaʼ para laabe (Sal. 79:13). Ca dendxuʼ huiiniʼ ca nabé caquiiñecaʼ chuʼ tu gapa laacaʼ, nga runi caquiiñeʼ gusihuinni ca binnigola ca nadxiicaʼ laacabe ne rizaaláʼdxicaʼ laacabe. Ora chiganna ca binnigola ca laacabe ne uguu gana laacabe la? zacaneni iguidxi fe stícabe ne guibiguétacabe ndaaniʼ xquidxi Dios (1 Cor. 8:1).
5 Ca binnigola ni zeeda gaca pastor stiʼ Dios ca nápacaʼ xidé chiyúbicaʼ ca dendxuʼ ni maʼ bixeleʼ ca ne guyúbicaʼ ximodo gacanecaʼ laacabe. Apóstol Pablu bisietenalaʼdxiʼ ca binnigola de gudxi Éfeso que xii nga naquiiñeʼ gúnicaʼ, nabe: «Lagapa laca laatu ne lagapa ca xpinni Cristu ni bisaana Espíritu Santu laatu gapa tu, casi rapa pastor dendxu stiʼ. Xpinni be laacaʼ purti bixhii be rini stibe pur laacaʼ» (Hech. 20:28). Apóstol Pedru laaca zacaca conseju bidii ca binnigola ni bibí de dxiqué: «Rinaba laatu, hermanu gola caʼ, lagapa ca xpinni Dios, cani bisaana be lu ná tu. Laguni ni de idubi ladxidóʼ to casi racalaʼdxi Dios, ne cadi purti napa tu xidé guni tu ni, nin pur bidxichi, sínuque laguni ni de idubi ladxidóʼ to. Cadi guni mandar tu laacabe casi ñaca laatu nga xpixuaana cabe, sínuque lasá jneza ti guʼya cabe ximodo ibani cabe» (1 Ped. 5:1-3).
6. Xiñee jma caquiiñeʼ gapa ca binnigola ca guiráʼ ca dendxuʼ huiiniʼ stiʼ Dios yanna.
6 Ca binnigola ni zeeda gácacaʼ casi pastor ca naquiiñeʼ chinándacaʼ ejemplu stiʼ Jesús, «pastor chaʼhuiʼ» que (Juan 10:11). Jesús nabé bizaalaʼdxiʼ ca dendxuʼ huiiniʼ stiʼ Dios. Ne bisihuínnibe pabiáʼ risaca nga gápacabe ca dendxuʼ ca pur ni gúdxibe Simón Pedru: «Gupa ca dendxu huiini stinneʼ» (biindaʼ Juan 21:15-17). Ca dendxuʼ huiiniʼ ca jma naquiiñeʼ gápacabe laacaʼ yanna riʼ, purtiʼ Binidxabaʼ cayuni stale cosa para guxheleʼ laacabe de Dios. Laabe nánnabe xi zucaa laanu gucheʼnu, nga runi riquiiñebe cani nuu lu guidxilayú riʼ para gucaabe laanu gucheʼnu (1 Juan 2:15-17; 5:19). Cani maʼ bixeleʼ de xquidxi Dios nga cani jma nagueenda zuchee, nga runi caquiiñeʼ chuʼ tu gacané laacaʼ chinándacaʼ ni na espíritu stiʼ Dios (Gál. 5:16-21, 25). Yanna, xi naquiiñeʼ guni ca binnigola ca para gacanecaʼ laacabe yaʼ. Naquiiñeʼ guinábacaʼ Dios gusiene laacaʼ ne gudii espíritu santu laacaʼ, ne iquiiñecaʼ Stiidxaʼ Dios jneza (Pro. 3:5, 6; Luc. 11:13; Heb. 4:12).
7. Pabiáʼ risaca para ca binnigola ca gápacaʼ ca dendxuʼ ni bisaana Jiobá lu nacaʼ.
7 Ca pastor ni guyuu Israel dxiqué riquiiñecaʼ ti vara ziuulaʼ nagandxu ique para gápacaʼ ca dendxuʼ sticaʼ, ne vara ca rábicabe ni cayado. Ora riguucabe o cueecabe ca dendxuʼ ndaaniʼ currá la? rutiidicabe laacame xaʼnaʼ cayado ca para ganda ugábacabe laacame ne gúʼyacabe cadi guiaadxaʼ nin tóbicame (Lev. 27:32; Miq. 2:12; 7:14). Ca binnigola ca laaca naquiiñeʼ gunibiáʼ chaahuicaʼ ca dendxuʼ huiiniʼ ni bisaana Dios lu nacaʼ ne gúʼyacaʼ xi caquiiñecabe (zanda gúʼndaluʼ Proverbios 27:23). Nga runi guiráʼ ca binnigola ca nánnacabe risaca nga chigánnacabe ca dendxuʼ huiiniʼ ca ne guyúbicabe ximodo gacanécabe cani maʼ bixeleʼ de xquidxi Dios. Ne Jiobá peʼ na zuyubi laacabe ne zudii ni iquiiñecabe (Eze. 34:11). Ne ora gacané ca binnigola ca guibiguetaʼ cani maʼ bireechú ca la? nabé rusiécheni Jiobá purtiʼ cayúnicabe cásica rúnibe.
8. Ximodo zanda gacané ca binnigola ca tuuxa ni maʼ bixeleʼ de xquidxi Dios.
8 Ora chiganna ti binnigola tuuxa xpinni Cristu ni huará la? nabé riecheʼ binni huará ca ne riguidxi fe stiʼ. Zacaca nga runi sentir tuuxa ni maʼ bixeleʼ de xquidxi Dios ora chigánnacabe laa. Ca binnigola ca zanda gúʼndacaʼ caadxi versículo stiʼ Biblia, xiixa tema ni zeeda lu ca revista ca, guiníʼcabe xiixa ni bieeteʼ lu guendaridagulisaa ni zacané laabe ne guni orarnécabe laabe. Zanda gábicabe laabe ziuulaʼdxiʼ xcaadxi xpinni Cristu gúʼyacaʼ laabe chebe guendaridagulisaa sti biaje (2 Cor. 1:3-7; Sant. 5:13-15). Laaca zacanécabe laabe pa chigánnacabe laabe, guiníʼnecabe laabe pur teléfono o gucaacabe ti carta ra nuube. Ne ora gacané ca binnigola ca ti dendxuʼ huiiniʼ ni maʼ bireechú la? guizáʼ rusiecheʼ ni laacabe.
Guiranu zanda gacanenu
9, 10. Xiñee cadi ca binnigola si nga naquiiñeʼ gacanecaʼ ca dendxuʼ huiiniʼ ni maʼ bixeleʼ de xquidxi Dios.
9 Ca dxi nabáninu riʼ zeʼ dxi jma nagana cani ne guiranu guizáʼ nuu xhiiñanu, nga runi zándaca qué gudiʼnu cuenta pa maʼ caxeleʼ ti xpinni Cristu de xquidxi Dios (Heb. 2:1). Peru Jiobá cayuuyaʼ laacabe, purtiʼ risácacabe para laa. Ne cada tobi de laacabe risaca para Jiobá casi risaca para laanu cada ndaa de xcuérpunu. Nga runi, guiranu naquiiñeʼ guizaaláʼdxinu ca bíʼchinu ne ca bizáʼnanu ne gapasaanu laanu (1 Cor. 12:25). Lii yaʼ, ñee ruuyaluʼ laacabe casi ruuyaʼ Jiobá laacabe la?
10 Nécapeʼ ca binnigola nga naquiiñeʼ guyúbicaʼ ne gacanecaʼ cani maʼ bixeleʼ de xquidxi Dios la? cadi laasicabe nga naquiiñeʼ guizaaláʼdxicabe laacaʼ. Guiranu zanda gacanenu ca binnigola para uguʼnu gana cani maʼ bixeleʼ de xquidxi Dios ne gacanenu laacaʼ iguidxi fe sticaʼ ti guibiguétacaʼ ndaaniʼ xquídxibe. Ximodo zanda gúninu ni yaʼ.
11, 12. Xi zándaca guinabaʼ ca binnigola ca laanu gúninu.
11 Pa ti xpinni Cristu ni maʼ bixeleʼ de xquidxi Dios racalaʼdxiʼ gacanécabe laa la? zándaca guinabaʼ ti binnigola tuuxa ni rucheeche diidxaʼ ni zanda gacané laabe ne guʼndané laabe xiixa libru. Ni chigúnibe nga chigacanebe xpinni Cristu ca gannaxhii Dios sti biaje cásica bíʼnini dxi bizulú (Apo. 2:1, 4). Ni zacané ni maʼ bixeleʼ de xquidxi Dios ca nga gúʼndanebe laa cani maʼ qué ñunadiaga dxi bixeleʼ de xquidxi Dios.
12 Pa guinabaʼ ca binnigola ca lii chigannuʼ tuuxa ni caquiiñeʼ gacanécabe laa la? gunabaʼ Jiobá gacané lii ne uguu ndaayaʼ lii ti ganda gúniluʼ ni. Biblia na: «Lu naʼ Jiobá bisaana cani gúniluʼ, ne dxandíʼ zaca cani quixhe íqueluʼ» (Pro. 16:3). Guníʼ ique xiixa ejemplu zeeda lu Biblia ne xiixa ni zanda iquiiñeluʼ para guquídxiluʼ fe stiʼ xpinni Cristu ca. Ne guníʼ ique ejemplu stiʼ apóstol Pablu (biindaʼ Romanos 1:11, 12). Laabe nabé gúpabe gana gúʼyabe ca xpinni Cristu de Roma para gacanebe laacaʼ chuʼ fe sticaʼ naguidxi. Ne gunna dxíchibe laaca zacanecaʼ laabe. Ñee cadi ngaca naquiiñeʼ gánnanu ora chigacanenu cani maʼ bixeleʼ de xquidxi Dios la?
13. Xi zanda guinínenu ti xpinni Cristu ni maʼ bixeleʼ de xquidxi Jiobá.
13 Ora maʼ cayuundaneluʼ xpinni Cristu ni maʼ bixeleʼ ca la? gunabadiidxaʼ laabe ximodo binibiaʼbe stiidxaʼ Dios. Guniʼné laabe modo bíʼnitu xhiiñaʼ Dios dxiqué guirópatu, ne gudxi laabe guietenaláʼdxibe pabiáʼ sicarú ngue biʼniʼ sentirbe dxi ridagulisaabe, dxi riebe ca guendaridagulisaa roʼ ne dxi rigucheechebe diidxaʼ. Ne gudxi laabe pabiáʼ nayecheʼ runi sentirluʼ nuuluʼ gaxha de Jiobá (Sant. 4:8). Laaca zanda gábiluʼ laabe pabiáʼ rudiiluʼ xquíxepeʼ Jiobá pur guiráʼ ni cudii xquidxi, ne jmaruʼ si pur cani maʼ guniʼbe zudiibe laacaʼ ne pur riguixhedxibe ladxidoʼcaʼ ora rápacaʼ guendanagana (Rom. 15:4; 2 Cor. 1:3, 4).
14, 15. Xi ca ndaayaʼ ca nga naquiiñeʼ gusietenaláʼdxinu cani maʼ bixeleʼ de xquidxi Dios.
14 Ni zanda gacané xpinni Cristu ca nga gusietenaláʼdxiluʼ laabe ca ndaayaʼ ni gucuaabe dxi nuube ndaaniʼ xquidxi Dios. Tobi de ca ndaayaʼ ca nga binibiaʼbe Stiidxaʼ Dios ne cani naguixhe ique Dios guni (Pro. 4:18). Gudxi laabe pur yenándabe ni na espíritu stiʼ Dios que nga qué ñaca nagana para laabe nudxiilube ca cosa malu ni biquiinde laabe gúnibe (Gál. 5:22-26). Ne pur ni bíʼnibe ca gunda biʼniʼ orarbe Dios sin nuchiiñaʼ xquendabiaanibe laabe ne gudixhedxí Dios ladxidoʼbe ne gutadxí xquendabiaanibe (Fili. 4:6, 7). Ora guiníʼneluʼ laabe la? guníʼ ique cani maʼ bizéʼtenu ca ne bisihuinni dxandíʼ rizaaláʼdxiluʼ laabe, ne diidxaʼ nadóʼ gudxi laabe guibiguétabe ndaaniʼ xquidxi Dios (biindaʼ Filipenses 2:4).
15 Guníʼ ique nácaluʼ ti binnigola ne zigánnaluʼ ti guendaxheelaʼ ni maʼ bixeleʼ de xquidxi Dios. Zanda gábiluʼ laacabe guietenaláʼdxicabe ni biʼniʼ sentírcabe dxi binibiáʼcabe Stiidxaʼ Dios. ¡Guizáʼ sicarú nga ora biénecabe ni dxiqué! ¡Nabé nayecheʼ guyuucabe ora gúnnacabe gunáʼ nga ni dxandíʼ de Dios! (Juan 8:32.) Ne guizáʼ bidiicabe xquíxepeʼ Jiobá pur cani caziidicabe de laa, ne pur biiyacabe nabé nadxii Jiobá binni ne pur biiyacabe pabiáʼ sicarú nga cani naguixhe ique Dios guni (zanda gúʼndaluʼ Lucas 24:32). Bisietenalaʼdxiʼ laacabe guiráʼ ca xpinni Cristu ni maʼ bidiicaʼ laacaʼ Jiobá zanda guni orarcaʼ laabe ne chuʼcaʼ gaxha de laabe. Gudxi laacabe gúnicabe ni na ca «diidxa galán [stiʼ] Dios ni nandxóʼ ne risaca» ca sti biaje (1 Tim. 1:11).
Bisihuinni nadxiiruluʼ laacabe
16. Guníʼ ti ejemplu ni gusihuinni pabiáʼ racané guiráʼ ni runi ca binnigola ca ora chigánnacaʼ tuuxa ni maʼ bixeleʼ de xquidxi Dios.
16 Ñee dxandíʼ nga racané cani guninu ca la? Dxandíʼ pue. Ti hombre huiiniʼ ni bizulú bicheeche diidxaʼ dxi napa 12 iza la? bixélebe de xquidxi Dios dxi nápabe 15 iza. Peru despué bibiguétabe ra nuu ca binni ridagulisaa ne yanna maʼ zinebe jma de treinta iza de cayúnibe xhiiñaʼ Dios. Laabe gunda bibiguétabe ndaaniʼ xquidxi Dios purtiʼ gucané ti binnigola laabe. ¡Guizáʼ rudiibe xquíxepeʼ binnigola que pur gucané laabe!
17, 18. Xii nga ca guenda riquiiñeʼ gápanu para gacanenu cani maʼ bixeleʼ de xquidxi Dios.
17 Racanenu guiráʼ cani maʼ bixeleʼ de xquidxi Dios ca guibiguétacaʼ lade ca binni ridagulisaa purtiʼ nadxiinu laacaʼ. Jesús gudxi ca discípulo stiʼ: «Chi tixhe caʼ xiixa nacubi guni tu, ganaxhii saa tu cásica huayanaxhiee laatu. Zacá laganaxhii saa. Pa ganaxhii saa tu zacá la? zanna binni xpinne laatu» (Juan 13:34, 35). Zacá ni, ora rusihuínninu nadxiinu binni nga ranna binni dxandíʼ xpinni Cristu laanu. Ñee cadi naquiiñeʼ gucaa nga laanu gusihuínninu nadxiinu ca bíʼchinu ne ca bizáʼnanu ni maʼ bixeleʼ de xquidxi Dios la? Naquiiñeʼ pue. Peru para gacanenu laabe naquiiñeʼ gusihuínninu xcaadxi guenda ni naquiiñeʼ gapa ca xpinni Cristu.
18 Xi ca guenda ndiʼ caninu yaʼ. Aparte de gannaxhiinu binni la? laaca naquiiñeʼ guianu binni, gácanu nachaʼhuiʼ ne gácanu nadóʼ ne cadi guidxiichinu nagueenda. Ne nuu biaje la? zándaca naquiiñeʼ gutiidiláʼdxinu donda stiʼ tuuxa. Pablu bicaa: «Nga runi laguiá binni ne lagaca nachaʼhui ne laacaʼ. Cadi udxiiba tu laca laatu, lagaca nadóʼ, cadi idxiichi tu neca uyubi cabe uchiichi cabe laatu. Cadi ixhacalaʼdxi saa tu, ne laguni perdonar ni guni stobi laatu. Casi bini perdonar Cristu laatu, zacaca laguni. Peru jma naquiiñe ganaxhii saa tu, purti zacá zaca pe tu tobi si» (Col. 3:12-14).
19. Xiñee nabé risaca gúninu stipa pur gacanenu ca dendxuʼ huiiniʼ ca guibiguétacaʼ ndaaniʼ xquidxi Dios.
19 Lu sti tema ca zadúʼyanu xiñee rixeleʼ caadxi xpinni Cristu de ndaaniʼ xquidxi Dios ne laaca zazíʼdinu pabiáʼ nayecheʼ ziuu ca binni ridagulisaa ora guibiguétacabe. Lu tema riʼ ne lu sti tema ca cusiidicani laanu pa gúninu stipa pur gacanenu ca dendxuʼ huiiniʼ ca la? zanda guibiguétacabe ndaaniʼ xquidxi Dios. Ndaaniʼ Guidxilayú nabézanu riʼ, stale binni nabé cuyubi gapa bidxiichi, peru laanu ruyúbinu guilá ti binni purtiʼ jma risácabe que guiráʼ xixé oro ni nuu lu Guidxilayú. Zacá bisihuinni Jesús ni lu ejemplu stiʼ dendxuʼ huiiniʼ ni biniti que (Mat. 18:12-14). Qué chuʼ dxi gusiaandaluʼ ni ne biʼniʼ stipa pur gacaneluʼ ca dendxuʼ huiiniʼ ni nadxii Jiobá ne maʼ bixeleʼ de laabe.
Xi nicábiluʼ
• Xi naquiiñeʼ guni ca binnigola ora gúʼyacaʼ maʼ bixeleʼ tuuxa de xquidxi Dios.
• Ximodo zanda gacané guiranu cani maʼ bixeleʼ de xquidxi Dios.
• Xii nga ca guenda ni naquiiñeʼ gápanu para ganda gacanenu cani maʼ bixeleʼ de xquidxi Dios.
[Dibuju/foto ni zeeda lu yaza 10]
Ca binnigola ca rúnicaʼ stipa pur gacanecaʼ ca xpinni Cristu ni maʼ bixeleʼ de xquidxi Dios