Gacanenu cani maʼ bixeleʼ ca guibiguétacaʼ ndaaniʼ xquidxi Dios nagueenda
«Tu ru ra nuu ñuu du yaʼ, Señor. Lii siouʼ nga ruiʼ neu laadu ni rudii enda nabani ni qué zaluxe.» (JUAN 6:68.)
1. Xi guníʼ Pedru ora bisaana stale discípulo stiʼ Jesús laa.
TI DXI la? stale de ca discípulo stiʼ Jesús qué ninacaʼ ñuni crecaʼ tobi de cani cusiidibe laacaʼ ne pur ngue bisaanacaʼ laabe. Ne ora gúdxibe ca apóstol stibe: «Laga laatu yaʼ, laca zabigueta tu la? Oraque na Simón Pedru rabi laabe: Tu ru ra nuu ñuu du yaʼ, Señor. Lii siouʼ nga ruiʼ neu laadu ni rudii enda nabani ni qué zaluxe» (Juan 6:51-69). Dxandíʼ gástiruʼ sti lugar ra zanda chécabe purtiʼ ndaaniʼ religión stiʼ ca judíu que maʼ cadi cusiidicaʼ laacabe ximodo guicaacabe «enda nabani ni qué zaluxe». Ne yanna riʼ, Babilonia roʼ, ni zeeda gaca guiráʼ ca religión ni cadi dxandíʼ ca, laaca qué rusiidiʼ ximodo guicaa binni guendanabani ni qué zaluxe ca. Nga runi, cani maʼ bixeleʼ de xquidxi Dios peru racaláʼdxicaʼ gusiéchecaʼ laabe la? «ma ora ireeche bacaandaʼ» sticaʼ ne guibiguétacaʼ ndaaniʼ xquidxi Dios (Rom. 13:11).
2. Xi naquiiñeʼ gúninu ora gabi tuuxa laanu biʼniʼ xiixa cosa malu.
2 Jiobá bizaalaʼdxiʼ ca dendxuʼ ni biniti stiʼ Israel que (biindaʼ Ezequiel 34:15, 16). Zacaca nga runi ca binnigola ca, riuuláʼdxicaʼ gacanecaʼ ca xpinni Dios ni maʼ bixeleʼ de laa ne nánnacaʼ naquiiñeʼ gúnicaʼ ni. Nga runi nuu biaje rinabaʼ ca binnigola ca tobi de cani rucheeche diidxaʼ chiganna tuuxa ni maʼ qué rucheeche diidxaʼ ne maʼ qué ridagulisaa ni canabaʼ gacanécabe laa para guʼndanécabe laa xiixa libru. Yanna, xi naquiiñeʼ guni ni rucheeche diidxaʼ ca pa gábibe laa bíʼnibe xiixa cosa nabé malu yaʼ. Lugar de gudii xpinni Cristu ca laabe conseju para guni chaahuibe guendanagana nápabe ca la? jma jneza gabi laabe guiníʼnebe ca binnigola. Pa guʼyaʼ ni rucheeche diidxaʼ ca qué ñúnibe ni la? naquiiñeʼ gabi ni ca binnigola (Lev. 5:1; Gál. 6:1).
3. Xi biʼniʼ pastor ni bizeeteʼ Jesús lu ejemplu stiʼ que ora bidxela dendxuʼ ni biniti que.
3 Lu tema ni gudídinu ca bieeteʼ de ejemplu ni guníʼ Jesús de ti hombre ni napa ti gayuaa dendxuʼ. Ora bidii hombre que cuenta cayaadxaʼ tobi de laacame la? bisaanabe 99 que ne yeyúbibe ni biniti que. ¡Guizáʼ biéchebe ora bidxélabe laame! (Luc. 15:4-7.) Zacaca nga riéchenu ora guibiguetaʼ ti xpinni Dios ndaaniʼ xquidxi. Ne zándaca bibiguétabe purtiʼ qué nusaana ca binnigola ne xcaadxi xpinni Cristu de nigánnacaʼ laabe, purtiʼ racaláʼdxicaʼ gacané Dios laabe sti biaje ne gapa laabe ne uguu ndaayaʼ laabe (Deu. 33:27; Sal. 91:14; Pro. 10:22). Xi zanda gúninu pa gábicabe laanu gacanenu tuuxa guibiguetaʼ ndaaniʼ xquidxi Dios yaʼ.
4. Xi rusiidiʼ Gálatas 6:2, 5 laanu.
4 Zanda gacanenu tuuxa guibiguetaʼ ndaaniʼ xquidxi Dios ora gusietenaláʼdxinu laabe nadxii Jiobá ca xpinni ne qué rinábabe laanu xiixa ni qué zanda gúninu. Laabe canábabe laanu guidúʼndanu Stiidxabe, chuunu ca guendaridagulisaa ca ne gucheechenu ca diidxaʼ nacubi ne galán stiʼ Reinu. Zándaca jma jneza nga guidúʼndanenu laabe Gálatas 6:2 ne gábinu laabe laaca zanda gacanécabe laanu ora tiidinu lu xiixa guendanagana, peru cada tobi de laanu naquiiñeʼ guni ni canabaʼ Dios laa, purtiʼ lu versículo 5 ca na «cada tobi nga naquiiñeʼ guni ni biaana lu naʼ [NM]», guirutiʼ zuni ni pur laanu.
Ñee bireecabe gana purtiʼ nisi cá íquecabe ni ricá ique binni la?
5, 6. 1) Xiñee naquiiñeʼ gucaadiaga chaahuinu ca xpinni Cristu ni maʼ bisaana de gucheechecaʼ diidxaʼ ne maʼ qué ridagulisaa. 2) Ximodo zanda gacaneluʼ laacabe gánnacabe maʼ cadi nayecheʼ nuucabe pur bixélecabe de xquidxi Dios.
5 Pa guiníʼ bíʼchinu ni maʼ qué rucheeche diidxaʼ ne maʼ qué ridagulisaa ca xi cayuni sentir la? naquiiñeʼ gucaadiaga chaahuiʼ binnigola o ni rucheeche diidxaʼ ca laabe purtiʼ zacá zanna ximodo gacané laabe. Guníʼ ique nácaluʼ ti binnigola ne zigánnaluʼ ti guendaxheelaʼ ni maʼ xadxí de qué huayecaʼ guendaridagulisaa purtiʼ «nisi [r]icá ique[caʼ] ni ricá ique binni» (Luc. 21:34). Zándaca chaahuidugá bisaanacabe de gucheechecabe diidxaʼ ne de guidagulisaacabe purtiʼ qué gápacabe bueltu o pur gucaláʼdxicabe nudiicabe guiráʼ ni iquiiñeʼ binnilídxicabe. Pa gábicabe lii naquiiñeʼ guireecabe ti tiempu para guiziiláʼdxicabe caadxi la? zanda gábiluʼ laacabe qué zacané diʼ nga laacabe (biindaʼ Proverbios 18:1). Zanda guyúbiluʼ ximodo guinabadiidxaluʼ laacabe: «Ñee jma nayecheʼ nuutu dede dxi maʼ qué rietu ca guendaridagulisaa ca la? Ñee jma galán nabánitu yanna la? Ñee nayecheʼ nuutu casi riuu ca binni ni nánnacaʼ zacané Jiobá laacaʼ la? (Neh. 8:10).
6 Cani gunabadiidxanu ca zanda gacanécani guiráʼ cani maʼ bixeleʼ de xquidxi Dios gudiicaʼ cuenta dede dxi laacaʼ bixélecaʼ de ca xpinni Cristu la? maʼ cadi nuucaʼ gaxha Jiobá ne maʼ cadi nayéchepeʼ nuucaʼ (Mat. 5:3; Heb. 10:24, 25). Zándaca gudiicabe cuenta maʼ cadi nayecheʼ diʼ nuucabe casi dxi bicheechecabe diidxaʼ (Mat. 28:19, 20). Yanna xi naquiiñeʼ gúninu yaʼ.
7. Xi zanda gábinu cani maʼ bixeleʼ de xquidxi Dios.
7 Jesús guníʼ: «Laguuya gá laatu cadi ma canazá tu canaxudxi tu ne nisi icá ique tu ni ricá ique binni ni qué runibiáʼ Dios. [...] Nga runi lagataná. Cadi guiaana dxí tu de iníʼ né tu Dios para ganda ilá tu de irá ni chi gaca ca» (Luc. 21:34-36). Cani maʼ bixeleʼ de xquidxi Dios peru racaláʼdxicaʼ guibiguétacaʼ chuʼcaʼ nayecheʼ casi dxiqué la? zanda gábinu laacabe guni orárcabe Jiobá para guinábacabe gudii laacabe espíritu santu ne gacané laacabe gúnicabe ni canábacabe (Luc. 11:13).
Ñee bixélecabe purtiʼ qué ñuuláʼdxicabe xiixa ni guca ndaaniʼ xquidxi Dios la?
8, 9. Ximodo zanda gacané ti binnigola tuuxa ni bisaana de guni ni na Dios pur biiyaʼ xiixa ni qué ñuulaʼdxiʼ.
8 Cumu binni ruchee laanu la? nuu biaje qué ziuulaʼdxiʼ tuuxa ni guni stobi lade ca binni ridagulisaa, ne zándaca pur nga gacaná ne guixeleʼ de xquidxi Dios. Nuu tu rusaana de guni ni na Dios ora cadi zinanda tuuxa ni zaniruʼ lade ca binni ridagulisaa ca conseju ni zeeda lu Biblia. Pa chiganna ti binnigola tuuxa ni bixeleʼ de xquidxi Dios pur cani maʼ gúninu ca la? zanda gusiénebe laa cadi jneza diʼ guixélebe de Dios ne de xquidxi purtiʼ cadi Jiobá nga napa donda. Ñee cadi jma jneza nga cadi gusaananu de gúninu ni na Jiobá, ni naca Juez lu Guidxilayú riʼ, purtiʼ runi crenu nánnabe guiráʼ ni raca ne zuni chaahuibe cani la? (Gén. 18:25; Col. 3:23-25). Ora tuuxa dxandíʼ guirenda xiixa ñee ne guiaba la? qué ziaanadibe layú que, sínuque nagueendaca ziásabe.
9 Binnigola ca zanda gabi laabe nuu tu huasaana de guni ni na Dios pur bíʼyacaʼ xiixa ni qué ñuuláʼdxicaʼ peru despué bidiicaʼ cuenta cadi naquiiñeʼ diʼ nulábicaʼ ni. Zándaca ni qué ñuuláʼdxibe que maʼ cayácani jneza. Ne nuu tu ridxiichi ora uguu jnézacabe laa. Ora gaca nga la? naquiiñeʼ guni orar binni ca ne guiníʼ ique biaʼsi ngue guluu jnézacabe laa ne cadi naquiiñeʼ nidxiichi (Sal. 119:165; Heb. 12:5-13).
Ñee guca nagana ninándacabe xiixa ni cusiidiʼ Biblia la?
10, 11. Xi ñábiluʼ tuuxa ni qué náʼ chinanda xiixa ni cusiidiʼ Biblia.
10 Nuu tu huaxeleʼ de xquidxi Dios purtiʼ qué ñuuláʼdxicaʼ xiixa ni cusiidiʼ Biblia. Dxiqué la? ca israelita ni bireecaʼ de esclavu que bisiaandacabe ni biʼniʼ Jiobá pur laacabe ne guca nagana para laacabe ninándacabe ca conseju stibe (Sal. 106:13). Nga runi galán gusietenaláʼdxinu xpinni Cristu ca jnézapeʼ nga ni rusiidiʼ «mozo ni nuu xpiaani ne ni runi jneza» ca laanu (Mat. 24:45). Ne pur nga biziidibe ni dxandíʼ de Dios. Yanna, ñee cadi jma jneza nga guibiguétabe ndaaniʼ xquidxi Dios la? (2 Juan 4.)
11 Binnigola ni cayacané tuuxa ni maʼ bixeleʼ de xquidxi Dios ca, zanda gabi laabe guyuu caadxi discípulo ni bisaanacaʼ Jesús purtiʼ qué ninacaʼ ninándacaʼ tobi de cani bisiidibe laacaʼ (Juan 6:53, 66). Ora bixélecabe de Cristu ne de ca discípulo ni bizuubacaʼ diidxaʼ que la? bisihuínnicabe maʼ qué rusisácacabe guiráʼ ni cudii Jiobá laacabe ne maʼ qué ñuudícabe nayecheʼ. Yanna riʼ, ñee huadxela cani maʼ bixeleʼ de xquidxi Dios ca sti lugar ra gusiidicabe laacaʼ ni dxandíʼ de Dios la? Coʼ, purtiʼ gastiʼ diʼ ti lugar zacá.
Ñee bíʼnicabe xiixa cosa malu la?
12, 13. Ximodo zanda gacanenu tuuxa xpinni Cristu ni maʼ bixeleʼ de xquidxi Dios ne biʼniʼ xiixa cosa nabé malu.
12 Caadxi de ca xpinni Cristu maʼ qué rucheechecaʼ diidxaʼ ne maʼ bisaanacaʼ de checaʼ ca guendaridagulisaa ca purtiʼ bíʼnicaʼ xiixa cosa nabé malu. Ne ridxíbicabe guibiguétacabe purtiʼ riníʼ íquecabe pa guiníʼcabe xi bíʼnicabe la? zareecabe de ndaaniʼ xquidxi Dios. Peru pa maʼ cadi cayúnicabe cosa malu ne maʼ guca arrepentírcabe de guidubi ladxidóʼcabe la? qué zabeedícabe laacaʼ ndaaniʼ xquidxi Dios (2 Cor. 7:10, 11). Nabé ziechené ca binni ridagulisaa laacabe ora guibiguétacabe ne ca binnigola ca zacané laacabe para chúʼcabe gaxha de Dios sti biaje.
13 Guníʼ ique gunábacabe lii chigannuʼ tuuxa ni maʼ bixeleʼ de xquidxi Dios. Xi naquiiñeʼ gúniluʼ pa gábibe lii bíʼnibe ti cosa nabé malu yaʼ. Casi maʼ guninu ra bizulú tema riʼ, jma galán guinábaluʼ laabe cadi gábibe lii xi bíʼnibe, sínuque gudxi laabe gábibe ni ca binnigola. Pa qué náʼ ni bichee ca guni zacá la? lii naquiiñeʼ chinándaluʼ ni cayabi Biblia lii gúniluʼ ora guizaaca xiixa zacá (biindaʼ Levítico 5:1). Pa gúniluʼ zacá la? zusihuínniluʼ rusisácaluʼ lá Jiobá ne rizaaláʼdxiluʼ chuʼ ca binni ridagulisaa galán ne Dios. Ca binnigola ca nánnacaʼ ximodo gacanecaʼ cani racalaʼdxiʼ guibiguetaʼ ndaaniʼ xquidxi Dios para gúnicaʼ ni nabe. Ne pa caquiiñeʼ uguu jnézacabe tuuxa ni bichee la? zúnicabe ni, peru ne diidxaʼ nadóʼ (Heb. 12:7-11). Pa ni bixeleʼ de xquidxi Dios ca guiníʼ dxandíʼ bichee, ne maʼ bisaana de guni cosa malu ca ne gusihuinni dxandíʼ maʼ guca arrepentir la? naquiiñeʼ gánnabe zacané ca binnigola laabe ne zutiidilaʼdxiʼ Jiobá stóndabe (Isa. 1:18; 55:7; Sant. 5:13-16).
Nayecheʼ riuʼnu ora guibiguetaʼ tuuxa ni bixeleʼ de xquidxi Dios
14. Guníʼ ejemplu stiʼ hombre huiiniʼ ni gudxite herencia gucuaa que.
14 Ora gacanenu tuuxa ni maʼ bixeleʼ de xquidxi Dios la? zanda iquiiñenu ejemplu stiʼ hombre huiiniʼ ni biree de ralidxi, ni cayeeteʼ lu Lucas 15:11-24. Luni guníʼ Jesús gucuaa hombre huiiniʼ que herencia stiʼ ne gudxítebe bueltu ni gucuaabe que luguiáʼ ca gunaa ni guyuunebe. Peru despué bixhacaláʼdxibe modo nabánibe que. Cumu guizáʼ triste nuube ne qué gápabe ni gobe la? bibiguétabe ralídxibe. Ora biʼyaʼ bixhózebe laabe dede zitu que la? guizáʼ biecheʼ; biree guxooñeʼ yeguidxagalú laabe ne gudiidxiʼ laabe ne bidii ti bixiduʼ laabe. Ejemplu riʼ zanda gucaa ni xpinni Cristu ni maʼ bixeleʼ ca guibiguetaʼ ndaaniʼ xquidxi Dios. Cumu maʼ cadi candaa zanitilú guiráʼ cosa malu nuu lu guidxilayú riʼ la? nga runi naquiiñeʼ guibiguétabe nagueendaca.
15. Xiñee rixeleʼ caadxi binni de xquidxi Dios.
15 Nécaxa hombre huiiniʼ ni gudxite herencia stiʼ que málasi zeʼ de ralidxi la? stale de cani rixeleʼ de xquidxi Dios chaahuidugá rúnicaʼ ni, cásica ti canuá ni nuu guriá nisa ne chaahuidugá maʼ ziguixeleʼ. Casi maʼ bidúʼyanu ca, caadxi de ca xpinni Cristu nisi ricá íquecaʼ guiráʼ ni ricá ique binni guidxilayú, ne pur nga rixélecaʼ de Jiobá. Ne nuu xcaadxi laaca rixélecaʼ ora gúʼyacaʼ xiixa ni qué chuuláʼdxicaʼ de ti xpinni Cristu o purtiʼ qué nacaʼ chinándacaʼ xiixa ni rusiidiʼ Biblia. Ne xcaadxi laaca rixélecaʼ de xquidxi Dios purtiʼ bíʼnicaʼ xiixa cosa nabé malu. Pa chinándanu guiráʼ cani cayeeteʼ lu tema riʼ la? zanda gacanenu cani maʼ bixeleʼ de xquidxi Jiobá laga zándaruʼ.
¡Galán maʼ bibiguétaluʼ xiiñeʼ!
16-18. 1) Ximodo gucané ti binnigola ti xpinni Cristu ni bisaana de nucheeche diidxaʼ ne nidagulisaa stale iza. 2) Xiñee bisaanabe de nucheechebe diidxaʼ ne nidagulisaabe yaʼ. Xi bicaa laabe guibiguétabe ndaaniʼ xquidxi Dios. Ximodo bidxagalú ca binni ridagulisaa laabe yaʼ.
16 Ti binnigola guníʼ: «Guiráʼ cani naca binnigola ra ridagulisaadu la? rúnicaʼ stipa pur chigánnacaʼ cani maʼ qué rucheeche diidxaʼ ne maʼ qué ridagulisaa. Rietenalaʼdxeʼ ti xpinni Cristu ni bisiideʼ laa de stiidxaʼ Dios ne gudiʼdiʼ biaʼ 25 iza de qué nucheeche diidxaʼ ne qué nidagulisaa. Laabe nagana ra gudíʼdibe, ngue runi gudxeʼ laabe ximodo zanda gacané ca conseju ni zeeda lu Biblia laabe. Gudiʼdiʼ si dxi la? bizulú guyebe ca guendaridagulisaa que ne biindanécabe laabe Biblia, purtiʼ maʼ racaláʼdxibe guibiguétabe ndaaniʼ xquidxi Dios».
17 Xiñee bisaana bíʼchinu ca de gucheeche diidxaʼ ne guidagulisaa yaʼ. Labe guniʼbe sicaríʼ: «Chaahuidugá bixeleʼ de Jiobá purtiʼ jma gucuá iqueʼ guneʼ ni runi binni guidxilayú. Qué nindaa de ngue bisaanaʼ de guundaʼ Biblia, gucheecheʼ diidxaʼ, ne maʼ qué ñaa ca guendaridagulisaa ca. Dxi bidiéʼ cuenta maʼ bixeleʼ de xquidxi Dios. Peru ora biiyaʼ pabiáʼ bizaalaʼdxiʼ binnigola ca naa la? bicaa nga naa guibiguetaʼ ndaaniʼ xquidxi Dios sti biaje». Ora biindanécabe laabe Biblia la? maʼ qué ñápapebe guendanagana. Laabe guniʼbe: «Bidiéʼ cuenta caquiiñeʼ gannaxhii Jiobá naa ne gusiénebe naa xi guneʼ ne zaqueca gusiidiʼ xquídxibe naa».
18 Ximodo bidxaagalú ca binni ridagulisaa laabe yaʼ. Sicaríʼ guniʼbe: «Biʼneʼ sentir casi hombre huiiniʼ ni guníʼ Jesús gudxite herencia stiʼ que. Ne ti bizánanu ni ridagulisaa raqué ne maʼ ziné treinta iza de cayuni xhiiñaʼ Jiobá gudxi naa: “¡Galán maʼ bibiguétaluʼ xiiñeʼ!”. Ca diidxaʼ ca yendácani de ndaaniʼ ladxeduáʼ. Dxandíʼ, caquiiñepeʼ guibiguetaʼ lade ca binni ridagulisaa. Nabé rudiéʼ xquíxepeʼ binnigola que ne ca binni ridagulisaa pur gunnaxhiicaʼ naa ne bizaaláʼdxicaʼ naa ne gucanecaʼ naa sin nireecaʼ gana. Cumu biiyaʼ nadxii binnigola que Jiobá ne nadxiibe binni la? ngue bicaa naa guibiguetaʼ ndaaniʼ xquidxi Dios».
Gucané laacabe guibiguétacabe nagueendaca
19, 20. 1) Ximodo zanda gacaneluʼ cani maʼ qué rucheeche diidxaʼ ne maʼ qué ridagulisaa guibiguétacaʼ ndaaniʼ xquidxi Dios. 2) Ximodo nusiéneluʼ laacabe cadi canabaʼ Dios laanu ni qué zanda gúninu.
19 Nabáninu lu ca últimu dxi stiʼ ca cosa malu riʼ ne mayaca guinitilúcani. Nga runi, zanda gábiluʼ cani maʼ qué rucheeche diidxaʼ ne maʼ qué ridagulisaa ca guzulú gúnicaʼ ni sti biaje. Gudxi laacabe nuu Binidxabaʼ guxheleʼ laacabe de Dios ne gucaa laacabe guni crécabe jma galán zabánicabe pa gusaanacabe de guni adorárcabe Jiobá jneza. Bisietenalaʼdxiʼ laacabe cadi gusaanacabe de chinándacabe ejemplu stiʼ Jesús purtiʼ zacatiʼ nga zabánicabe galán (biindaʼ Mateo 11:28-30).
20 Gucané laacabe gánnacabe cadi canabaʼ Dios laanu xiixa ni qué zanda gúninu. Caadxi dxi ante gati Jesús que la? bindaate María, bizaʼnaʼ Lázaro que, aceite rindáʼ naxhi ne risaca luguiabe. Ora guníʼ caadxi binni cadi jneza ni biʼniʼ María que la? gudxi Jesús laacabe: «Zaa nuu be. [...] Laabe ma biʼni be biáʼ gunda» (Mar. 14:6-8). Sti dxi bisisaca Jesús ni bisaba ti viuda pobre ndaaniʼ ti caja ni nuu ndaaniʼ yuʼduʼ que, purtiʼ neca huaxieʼni la? bidiibe biaʼ nápabe (Luc. 21:1-4). Stale de laanu zanda chuunu ca guendaridagulisaa ca ne gucheechenu stiidxaʼ Reinu. Ne stale de cani maʼ qué rucheeche diidxaʼ ne maʼ qué ridagulisaa yanna riʼ la? laaca zanda gacané Jiobá laacaʼ gúnicaʼ ni sti biaje.
21, 22. Xi naquiiñeʼ ganna dxichi cani guibiguetaʼ ra nuu Jiobá.
21 Pa cadxíbibe gúʼyabe xcaadxi xpinni Cristu ora guibiguétabe laa, zanda gusietenaláʼdxiluʼ laabe ora bibiguetaʼ hombre huiiniʼ ni gudxite herencia stiʼ que la? biéchecabe ora bidxagalúcabe laa. Ne gudxi laabe zacaca nga raca ora guibiguetaʼ tuuxa ndaaniʼ xquidxi Dios. Gudxi laabe gucaalube Binidxabaʼ ne guidxíñabe Dios (Sant. 4:7, 8).
22 Cani racalaʼdxiʼ guibiguetaʼ ra nuu Jiobá la? nabé sicarú zadxagalúcabe laacaʼ (Lam. 3:40). Nanna dxíchinu dxi bíʼnicabe ni na Jiobá la? guizáʼ nayecheʼ guyuucabe. Ne pa guiníʼ íquecabe gúnicabe ni nabe sti biaje la? naquiiñeʼ gánnacabe zacaacabe stale ndaayaʼ.
Xi nicábiluʼ
• Ximodo ñacaneluʼ tuuxa ni maʼ bixeleʼ purtiʼ qué ñuulaʼdxiʼ xiixa ni guca ndaaniʼ xquidxi Dios.
• Xi ñábiluʼ tuuxa ni qué niná ninanda xiixa ni rusiidiʼ Biblia ne pur nga bixeleʼ de xquidxi Dios.
• Ximodo zanda gacaneluʼ tuuxa ni caníʼ íqueruʼ pa zabiguetaʼ lade ca binni ridagulisaa.
[Dibuju/foto ni zeeda lu yaza 13]
Ora gabi tuuxa ni maʼ bixeleʼ de xquidxi Dios lii xi runi sentir la? bicaadiaga chaahuiʼ laabe
[Dibuju/foto ni zeeda lu yaza 15]
Ejemplu ni guníʼ Jesús stiʼ hombre huiiniʼ ni gudxite herencia stiʼ que, zanda gucaani ca xpinni Cristu guibiguétacaʼ ndaaniʼ xquidxi Dios