Chinándanu ejemplu stiʼ Siervu ni nadxii Dios
«¡Biiyaʼ! ¡Siervu stinneʼ, [...] ni racalaʼdxiʼ alma stinneʼ!» (ISA. 42:1)
1. Xi naquiiñeʼ gúninu yanna ra maʼ cadxiña dxi guietenaláʼdxinu guendaguti stiʼ Cristu, ne ximodo zacané nga laanu gúninu ni na Dios.
CUMU maʼ cadxiña dxi guietenaláʼdxinu guendaguti stiʼ Cristu la? galán chinándanu conseju stiʼ apóstol Pablu riʼ: «[Laguuyadxí] Jesús, purti nirudóʼ laa uzá lu neza udixhe Dios sa cani runi cre laa [...]. Laguuya si laatu pabiáʼ bininá cani ruchee laabe, ne ora guietenalaʼdxi tu modo udiʼdi be que la? qué zadxaga tu, ne qué zabí sa tu atrá» (Heb. 12:2, 3). Pa guʼndaʼ chaahuinu modo bizuubaʼ Jesús diidxaʼ dede ora guti la? cásica ca xpinni Cristu ni bibí pur espíritu santu ne zaqueca cani zeeda gaca casi xcaadxi dendxuʼ zanda gúnicaʼ ni na Dios sin guireecaʼ gana (zanda gúʼndaluʼ Gálatas 6:9).
2. Xi zanda guizíʼdinu de ca diidxaʼ riguixhená stiʼ Isaías ni cuzeeteʼ de Xiiñiʼ Dios.
2 Jiobá biquiiñeʼ Isaías para gucaa caadxi diidxaʼ riguixhená ni caníʼ de Xiiñibe. Ca diidxaʼ riguixhená ca zacané laanu guuyadxinu ejemplu stiʼ «Jesús, purti nirudóʼ laa uzá lu neza udixhe Dios sa cani runi cre laa».a Ora guidúʼndanu cani la? zazíʼdinu ximodo laabe, xi guiráʼ guendananá gudíʼdibe, ne de puestu risaca ni gucuaabe casi Rey ne modo bilabe laanu. Laaca zánnanu xi pur rietenaláʼdxinu guendaguti stiʼ Cristu, casi ni chigaca jueves 9 stiʼ abril iza riʼ despué de guiaaziʼ gubidxa.
Bihuinni tuu nga Siervu stiʼ Dios
3, 4. 1) Tuu nga cani rábicabe laacaʼ «siervu» lu libru stiʼ Isaías. 2) Tuu nga Siervu ni rieeteʼ lu capítulo 42, 49, 50, 52 ne 53 stiʼ Isaías.
3 Diidxaʼ «siervu» ca cayeeteʼ ni stale biaje lu libru stiʼ Isaías. Nuu biaje ora ruzeeteni diidxaʼ ca caniʼni de Isaías ni bicaa libru ca (Isa. 20:3; 44:26). Ne xcaadxi biaje caniʼni de guidxi Israel, ni laaca láʼ Jacob (Isa. 41:8, 9; 44:1, 2, 21). Peru diidxaʼ «siervu» ni cayeeteʼ lu capítulo 42, 49, 50, 52 ne 53 caniʼni de sti binni. Tu binni ca yaʼ. Para gánnanu tu laabe la? naquiiñeʼ gúʼndanu Stiidxaʼ Dios ni gucuá lu diidxaʼ griegu, purtiʼ racá rieeteʼ tuu nga Siervu stiʼ Jiobá ni cuzeeteʼ ca capítulo stiʼ Isaías ca. Casi lu libru stiʼ Hechos rieeteʼ de ti hombre ni biʼniʼ xhiiñaʼ gobiernu stiʼ Etiopía. Ora cayuundaʼ hombre riʼ tobi de ca diidxaʼ riguixhená ni nabé risaca ni maʼ bizéʼtenu ca, biseendaʼ espíritu santu Felipe ra nuu carretón dxíʼbabe ndaaniʼ que. Laabe ziyuundabe ca diidxaʼ ni cá lu Isaías 53:7, 8 ne gunabadiidxabe Felipe: «Gudxi naa tu cuzeeteʼ profeta Isaías raríʼ, de laca laa la? o de stobi». Felipe gudxi laabe caniʼni de Jesús, Mesías que (Hech. 8:26-35).
4 Dxi naca Jesús baʼduhuiiniʼ la? Jiobá biquiiñeʼ Simeón, ti hombre nabé nachaʼhuiʼ, para guiníʼ «chi aca be biaani para cani cadi za de Israel» casi maca bizeeteʼ Isaías 42:6 ne 49:6 (Luc. 2:25-32). Laaca maca bieeteʼ lu Isaías 50:6-9 modo zuninácabe ne zuni búrlacabe Jesús gueelaʼ gaca juzgar que (Mat. 26:67; Luc. 22:63). Ne gudiʼdiʼ si Pentecostés ni guca lu iza 33 que bisihuinni apóstol Pedru Jesús ngue naca «Siervu» stiʼ Jiobá (Isa. 52:13; 53:11; biindaʼ Hechos 3:13, 26). Yanna, xi rizíʼdinu de ca diidxaʼ riguixhená ni caníʼ de Mesías riʼ yaʼ.
Jiobá bisiidiʼ Siervu stiʼ
5. Tuu nga bisiidiʼ Siervu stiʼ Dios que.
5 Tobi de ca diidxaʼ riguixhená stiʼ Isaías ni caníʼ de Siervu stiʼ Dios rusiidiʼ laanu guyuu Jesús gaxha de Bixhoze ante gueeda lu Guidxilayú riʼ (biindaʼ Isaías 50:4-9). Ne Siervu peʼ stiʼ Dios ca guníʼ Jiobá nga bisiidiʼ laa: «Laabe [...] ruxhélebe diagaʼ para gunadiagaʼ casi cani caziidiʼ jneza» (Isa. 50:4). Biaʼ dxi guyuunebe Bixhózebe bicaadiágabe laa, biziidibe stale de laa ne bizuubabe stiidxaʼ lu guiráʼ ni gudxi laabe. ¡Nabé risaca nga gusiidiʼ Dios ni bizáʼ guibáʼ ne Guidxilayú riʼ laabe!
6. Ximodo bisihuinni Siervu que nabé ruzuubaʼ stiidxaʼ Bixhoze.
6 Lu diidxaʼ riguixhená riʼ cayeeteʼ gudxi Siervu que Bixhoze: «Jiobá, Señor Ni Jma Nandxóʼ», nga rusihuinni nanna dxíchibe Jiobá nga ni jma nandxóʼ lu guidubi naca guibáʼ ne Guidxilayú. Ne rihuinni nabé bizuubabe stiidxaʼ Jiobá pur ca diidxaʼ riʼ, laabe guniʼbe: «Jiobá, Señor Ni Jma Nandxóʼ ca bixheleʼ diagaʼ, ne naa bizuubaʼ stiidxabe. Ne qué ñunediáʼ sti cosa ni qué ñábibe naa» (Isa. 50:5). Xiiñiʼ Dios que guyuu «gaxha de [Bixhoze] casi tobi ni runi xhiiñabe jnézapeʼ» ora guyáʼ guibáʼ, Guidxilayú ne binni. Laabe guyuube nayecheʼ nezalú Jiobá guiráʼ ora purtiʼ bizáʼ Guidxilayú, ne cani gunnaxhiibe nga ca xiiñiʼ binni guidxilayú (Pro. 8:22-31).
7. Ximodo nánnanu gunna dxichi Siervu que zacané Jiobá laa ora tiidiʼ lu guendanagana.
7 Siervu stiʼ Dios ca gunnaxhii binni guidxilayú ne bisiidiʼ Jiobá laabe, ca nga nga gucané laabe dxi beedabe lu Guidxilayú. Nécapeʼ guyuu tu guzananda laabe, qué nusaana de ñúnibe ni na Bixhózebe ne stale guendanayecheʼ (Sal. 40:8; Mat. 26:42; Juan 6:38). Jesús gunna dxichi zacané Bixhoze laa lu intiica guendanagana guidxaagalú. Laabe gunda guniʼbe ca diidxaʼ riguixhená ni maca bicaa Isaías riʼ: «Ni caníʼ nacaʼ ti binni nachaʼhuiʼ nuu gaxha de naa. Tu laa zanda gucaalú naa yaʼ. [...] ¡Laguuyaʼ! Jiobá, Señor Ni Jma Nandxóʼ ca, zacané naa» (Isa. 50:8, 9). Ne Jiobá gucané Siervu ca dxi bicheeche diidxaʼ lu Guidxilayú, casi ruzeeteʼ sti diidxaʼ riguixhená bicaa Isaías.
Modo bicheeche Siervu stiʼ Dios que diidxaʼ lu Guidxilayú
8. Xiñee nánnanu Jesús nga binni ni gulí Jiobá ni cayeeteʼ lu Isaías 42:1.
8 Stiidxaʼ Dios cayabi laanu xi bizaaca ora guyuunisa Jesús lu iza 29: «Biete Espíritu Santu luguiáʼ [Jesús], ne ucuá ti ridxi de ibáʼ: Lii nga Xiiñe ni nadxieeʼ ne ni rusieche naa» (Luc. 3:21, 22). Zacá bisihuinni Jiobá tuu nga binni ni gulí ni rieeteʼ lu ca diidxaʼ riguixhená stiʼ Isaías (biindaʼ Isaías 42:1-7). Ne dxi bicheeche Jesús diidxaʼ lu Guidxilayú biʼniʼ cásipeʼ na diidxaʼ riguixhená ca. Lu Evangeliu ni bicaa Mateu bizeeteʼ ca diidxaʼ ni cá lu Isaías 42:1-4 ne guniʼbe Jesús ngue biʼniʼ ni na ca diidxaʼ que (Mat. 12:15-21).
9, 10. 1) Ximodo biʼniʼ Jesús ni na ca diidxaʼ riguixhená stiʼ Isaías 42:3. 2) Ximodo bisihuinni Jesús naquiiñeʼ gúninu ni jneza. 3) Padxí nga gúʼyabe gaca ni jneza lu Guidxilayú riʼ.
9 Ca xaíque yuʼduʼ ni guyuu dxi bibani Jesús que nabé bíʼnicaʼ menu binni (Juan 7:47-49). Nabé guninácabe binni dede beeda gácacaʼ casi ti vara ni maʼ caluuza o ti mecha ni mayaca guizuíʼ. Peru Jesús biá ca binni pobre ne cani cayacaná (Mat. 9:35, 36). Laabe gúdxibe guiráʼ ca binni que: «Latáʼ ra nuaa irá ni ma bidxaga de cuyubi modo guía ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to» (Mat. 11:28). Laabe laaca bisihuínnibe ximodo nga naquiiñeʼ guni binni ni jneza ora bisiidibe ca ley stiʼ Jiobá ra caníʼ xii nga ni jneza ne ni cadi jneza (Isa. 42:3). Laaca bisiidibe laacaʼ iquiiñecaʼ Ley stiʼ Dios para gusihuínnicaʼ riénecaʼ binni ne rilaseláʼdxicaʼ laacabe (Mat. 23:23). Ne bisihuínnibe rúnibe ni jneza ora bicheechebe diidxaʼ ra nuu ca ricu ne ra nuu ca pobre (Mat. 11:5; Luc. 18:18-23).
10 Casi rieeteʼ lu ca diidxaʼ riguixhená bicaa Isaías que, ni gulí Jiobá que nga zuuyaʼ gaca ni jneza lu Guidxilayú (Isa. 42:4). Ne ngapeʼ nga ni maʼ cadi candaa chigúnibe casi Rey lu Reinu stiʼ Dios, ora gunitilube ca gobiernu nuu lu guidxilayú riʼ ne maʼ guni mandar Reinu stibe jneza. Ne óraca nga maʼ gúnibe «ti guidxilayú cubi» ra maʼ qué ziuu «enda nadxabaʼ» (2 Ped. 3:13; Dan. 2:44).
Ti «biaaniʼ» ne ti «pactu»
11. Ximodo nga beeda gaca Jesús casi «biaaniʼ para ca guidxi ca» lu primé siglu que, ne ximodo nácarube ni yanna.
11 Jesús nga beeda gaca casi «biaaniʼ para ca guidxi» ni rieeteʼ lu Isaías 42:6. Dxi bicheechebe diidxaʼ la? casi ñaca nuzaanibe binni, ne jmaruʼ si ra nuu ca judíu (Mat. 15:24; Hech. 3:26). Peru Jesús laaca guníʼ: «Naa zeda gaca casi biaani ni ruzaani binni guidxilayú» (Juan 8:12). Laabe beeda gácabe casi ti biaaniʼ para ca judíu ne para guiráʼ binni guidxilayú ora gucanebe laacaʼ gunibiaʼcaʼ Dios ne ora bidiibe xquendanabánibe para gulabe laacaʼ (Mat. 20:28). Biásasibe de lade gueʼtuʼ gúdxibe ca discípulo stibe naquiiñeʼ gucheechecaʼ diidxaʼ lu «idubi naca guidxilayú» (Hech. 1:8). Nga runi, ora biquiiñeʼ Pablu ne Bernabé diidxaʼ «ti biaani ni chi guzaani irá binni guidxilayú» ca la? caníʼcabe de dxiiñaʼ ni cayúnicabe ora cucheechecabe diidxaʼ lade ca binni ni cadi judíu que (Hech. 13:46-48; zanda gúʼndaluʼ Isaías 49:6). Ne yanna riʼ ca xpinni Cristu ni bibí pur espíritu santu ni nuuruʼ lu Guidxilayú nga cayuni dxiiñaʼ ca ne cani zeeda gaca casi xcaadxi dendxuʼ. Guirácabe cayacanécabe binni gunibiáʼ Dios ne gápacaʼ fe Jesús, ni zeeda gaca casi «biaaniʼ para ca guidxi ca».
12. Ximodo nga biquiiñeʼ Jiobá Siervu stiʼ para biʼniʼ ti pactu ne binni.
12 Lu diidxaʼ riguixhená ni zeeda lu Isaías 42:6 ca laaca gudxi Jiobá Siervu ni gulí que ca diidxaʼ riʼ: «Zapaʼ lii ne zaquiiñeʼ lii para guneʼ ti pactu ne binni» (Isa. 42:6). Binidxabaʼ biyubi ximodo nuchee Jesús ti maʼ cadi ñúniruʼ dxiiñaʼ bidii Dios laa, peru Jiobá gupa Xiiñiʼ dede dxi guti (Mat. 2:13; Juan 7:30). De racá gundísabe laa de lade gueʼtuʼ ne biquiiñebe laa para bíʼnibe ti pactu ne xquídxibe. Ne pactu ca o ni bizabiruaa Dios ca bisihuínnini qué zusaana Siervu stiʼ Dios ca de gaca casi «biaaniʼ para ca guidxi ca» ne zacanebe binni gunibiáʼ Dios (biindaʼ Isaías 49:8, 9).b
13. Ximodo gucané Jesús binni guiree de ndaaniʼ religión ni cadi dxandíʼ dxi guyuu lu Guidxilayú, ne ximodo cayúnibe ni yanna.
13 Casi guníʼ Jiobá que, bisianda Siervu stibe «lu cani qué ruuyaʼ», guleebe «cani deguyoo ndaaniʼ lidxi guiibaʼ» ne laaca guleebe «cani nuu ra nacahui» (Isa. 42:7). Para gunda bíʼnibe nga la? bisihuínnibe gunáʼ nga ca costumbre ni cadi zeeda ndaaniʼ Stiidxaʼ Dios ni gupa religión que ne bicheechebe ca diidxaʼ nacubi ne galán stiʼ Reinu (Mat. 15:3; Luc. 8:1). Zacá nga guleebe stale judíu de ndaaniʼ ca religión ni cadi dxandíʼ que, ne beeda gácacaʼ discípulo stibe (Juan 8:31, 32). Jesús maʼ gucané millón de binni ni cadi naca judíu para guireecaʼ de ndaaniʼ ca religión ni cadi dxandíʼ ca. Ne bidiibe mandatu riʼ ca xpínnibe: «Laché irá xixé guidxi, lachiusiidi irá xixé binni sa nanda naa». Ne laaca gúdxibe laacaʼ qué zaxélebe de laacaʼ «dede dxi iluxe guidxilayú» (Mat. 28:19, 20). Zacá ni, dede guibáʼ cayuuyaʼ Jesucristu guireeche diidxaʼ lu guidubi naca Guidxilayú.
Jiobá bidii Siervu stiʼ ti puestu ni jma risaca
14, 15. Ximodo bisisaca Jiobá Siervu stiʼ, ne xiñee bíʼnibe ni.
14 Lu sti diidxaʼ riguixhená ra cayeeteʼ de Siervu riʼ, Jiobá guníʼ: «¡Laguuyaʼ! Siervu stinneʼ zanna xi naquiiñeʼ guni. Zudiee laabe ti puestu risaca, ne dxandipeʼ zudxiibaʼ laabe ne nabé zusisacaʼ laabe» (Isa. 52:13). Cumu qué nusaana Jesús de nusihuinni napa Dios derechu de guni mandar ne bíʼnibe ni na Dios neca bidxaagalube guendanagana la? bidii Jiobá laabe ti puestu ni jma risaca.
15 Apóstol Pedru guníʼ ca diidxaʼ riʼ ora bizeeteʼ de Jesús: «Ma nuu Cristu ibáʼ zuba cueʼ Dios, ne irá ca ángel ne cani runi mandar ne cani nandxóʼ ruzuuba ca stiidxa be» (1 Ped. 3:22). Ne apóstol Pablu laaca bicaa ca diidxaʼ riʼ: «Ne ra ma naca be binni guidxilayú, bidii be lugar uca be biaʼ ri tiʼ, ne bizuuba be diidxa dede uná be guti be lu [yaga] casi rati cani qué iquiiñeʼ. Ngue runi ma bidxiiba Dios laabe ne bisisaca laabe jma que irá xixé, ti ora guiete lá be guzuxibi irá cani nuu ibáʼ ne irá cani nuu ndaani guidxilayú ne irá cani nuu xaguete guidxilayú, ne iníʼ ca nezalú iráʼ: “Jesucristu nga Señor”, ne zacá usisaca ca Dios Bixhoze be» (Fili. 2:8-11).
16. 1) Ximodo bisisaca Jiobá Jesús lu iza 1914. 2) Xi guiráʼ maʼ biʼniʼ Jesús dede dxi ca.
16 Lu iza 1914, Jiobá bisisaca Jesús ora bidiibe laa ti puestu ni jma risaca: gaca Rey lu Reinu stiʼ Dios (Sal. 2:6; Dan. 7:13, 14). Dede dxi ca nga cayuni mandarbe lade ca xhenemígube (Sal. 110:2). Primé gudixhedxibe Binidxabaʼ ne ca demonio stiʼ ne bilaabe laacaʼ lu Guidxilayú riʼ (Apo. 12:7-12). De raqué Jesús, Ciro ni jma risaca, gulee ca xpinni ni bibí pur espíritu santu, ni nuuruʼ lu Guidxilayú riʼ de Babilonia guidxi roʼ (Apo. 18:2; Isa. 44:28). Laabe nga cusiénebe ca xpínnibe ximodo gucheechecaʼ diidxaʼ lu guidubi naca Guidxilayú, ne pur nga maʼ bidagulisaa xcaadxi bíʼchibe ne bizáʼnabe ni cheʼ guibáʼ, ne zaqueca maʼ bitagulisaabe millón de ca binni ni zeeda gaca casi xcaadxi dendxuʼ. Laacabe nga cani cayacané grupu huiiniʼ de dendxuʼ ca (Apo. 12:17; Juan 10:16; Luc. 12:32, NM).
17. Xi bizíʼdinu de Siervu stiʼ Dios bidúʼndasinu ca diidxaʼ riguixhená stiʼ Isaías.
17 Despué de bidúʼndanu ca diidxaʼ riguixhená stiʼ Isaías ca zándaca jma bicaacani laanu gusisácanu Jesucristu, Rey ni zulá laanu. Jesús bizuubaʼ diidxaʼ dxi guyuu lu Guidxilayú ne nga bisihuinni jneza modo bisiidiʼ Bixhózebe laabe guibáʼ. Ne maʼ bisihuínnibe nácabe casi ti «biaaniʼ para ca guidxi ca», cadi dxi bicheechesibe diidxaʼ lu Guidxilayú, sínuque dede yanna purtiʼ laaca cayuuyabe dxiiñaʼ ni cayuni ca discípulo stibe. Lu sti tema ca zadúʼndanu sti diidxaʼ riguixhená ra cayeeteʼ modo bininá binni Siervu stiʼ Dios ca ne modo gútibe para bilabe laanu. Naquiiñeʼ guiníʼ ique chaahuinu cani maʼ gúninu ca, jmaruʼ si yanna purtiʼ maʼ cadxiña dxi guietenaláʼdxinu guendaguti stiʼ Cristu (Heb. 12:2, 3).
[Cani cá ñee yaza]
a Ca diidxaʼ riguixhená riʼ zeeda cani lu Isaías 42:1-7; 49:1-12; 50:4-9, ne 52:13–53:12.
b Lu libru Las profecías de Isaías, una luz para toda la humanidad II, yaza 136-145, caníʼ jma de ca diidxaʼ riguixhená ni zeeda lu Isaías 49:1-12.
Xi bizíʼdinu
• Tuu nga «siervu» ni rieeteʼ lu ca diidxaʼ riguixhená stiʼ Isaías, ne ximodo nánnanu ni.
• Ximodo bisiidiʼ Jiobá Siervu stiʼ.
• Ximodo beeda gaca Jesús casi «biaaniʼ para ca guidxi ca».
• Ximodo bisisaca Jiobá Siervu stiʼ.
[Dibuju/foto ni zeeda lu yaza 21]
Felipe guníʼ Jesús nga «siervu» ni bizeeteʼ Isaías que
[Dibuju/foto ni zeeda lu yaza 23]
Jesús, Siervu ni gulí Dios que biá binni pobre ne cani cayacaná
[Dibuju/foto ni zeeda lu yaza 24]
Jiobá bisisaca Jesús ne biʼniʼ laabe Rey lu Reinu stiʼ