Gucané Biblia laacabe para bichaacabe
Xi bicaa ti gunaa gaca nachaʼhuiʼ neca dxiqué gulaʼnaʼ ra biʼniʼ dxiiñaʼ ne bitoo diamante, nuu ndaʼ ti ley na cadi jneza ni. Xi gucané ti gunaa ni gucalaʼdxiʼ ñuuti laca laa chupa biaje chuulaʼdxiʼ guibániruʼ. Xi biʼniʼ ti hombre para bisaana de xhudxi ne cubaʼ guixi. Gudiʼnu lugar laapecabe gábicabe ni laanu.
LABE MARGARET DEBRUYN
NÁPABE 45 IZA
DE BOTSUANA LAABE
BITOOBE DIAMANTE NE GULÁʼNABE
MODO BIBANEʼ DXIQUÉ: Bixhozeʼ de Alemania laa, peru guleebe guiʼchiʼ stibe para gácabe de África del Sudoeste (yanna riʼ lani Namibia). Naa guleʼ ndaani guidxi Gobabis. Jñaa zeeda de ti tribu láʼ Bangologa, de guidxi Botsuana.
Lu iza 1970, gobiernu stiʼ Sudáfrica nabé biʼniʼ mandar ndaaniʼ guidxi Namibia ne gudíxhecaʼ ti ley ra na guixeleʼ binni de xcaadxi raza. Cumu bixhozeʼ ne jñaa de gadxé gadxé raza laacaʼ la? bicaacabe laacaʼ guixélecaʼ. Ngue runi, bibiguetané jñaa naa ne ca bizanaʼ Botsuana. Raqué maʼ yendézadu ndaaniʼ guidxi Ghanzi.
Lu iza 1979, yendezaʼ sti gudxi láʼ Lobatsi, biaanaʼ ralidxi ti familia ni rapa bizabi dede dxi binduuxeʼ scuela. Despué bineʼ dxiiñaʼ de secretaria ndaaniʼ ti taller ra raca chaahuiʼ carru. Ra ziniiseʼ que guníʼ iqueʼ qué rudii diʼ Dios ni caquiiñenu, sínuque binni nga guni intiica cosa para gapa ni caquiiñeʼ.
Ngue runi bizuluáʼ gulanaʼ ni nápacabe ndaaniʼ taller que, gunda bineʼ ni pur puestu napaʼ que. Ne ora gueeda ti tren ndaaniʼ guidxi que huaxhinni la? naa ne ca xhamiguaʼ ribánadu ni ganda guicaadu raqué. Sti cosa ni bineʼ nga guyuaa lu ti negocio ni cadi jneza, bituaa diamante, oro, ne bronce. Gudubaʼ guixi, guyuuladxeʼ tindeniáʼ binni ne gupaʼ stale novio.
Iza 1993 gunaazecabe naa cabanaʼ ne pur ngue biniteʼ dxiiñaʼ stinneʼ. Xi biʼniʼ cani rabeʼ xhamiguaʼ que yaʼ. Bidxiidéchecaʼ naa purtiʼ laaca bidxíbicaʼ nigaacaʼ. Nabé bininá ngue naa stale ne guníʼ iqueʼ maʼ qué zuneʼ cré nin sti binni.
XIMODO GUCANÉ BIBLIA NAA PARA BICHAA: Sti iza que binebiaʼyaʼ Tim ne Virginia, chupa misioneru stiʼ ca testigu stiʼ Jiobá. Laacaʼ yegánnacaʼ naa sti lugar ra cayuneʼ dxiiñaʼ ne raqué bisiidicabe naa ni cá lu Biblia ora rahuaʼ gueta. Ora bidiéʼ cuenta zanda gacané ca binni que naa la? gudxeʼ laacabe chigusiidicabe naa ralidxeʼ.
Nagueendaca bidiéʼ cuenta caquiiñeʼ guchaa modo naa pa racaladxeʼ chuulaʼdxiʼ Dios ni runeʼ. Casi dxi biindaʼ 1 Corintios 6:9, 10 bidiéʼ cuenta qué ziuu «cani napa jnadxii, [...] nin ca gubaanaʼ, nin cani rucaa ique puru si gapa bidxichi, nin ca binni güeʼ, nin cani riguu dí, nin cani ruxhii pobre, nin tobi de ca nga qué ziuu ra runi mandar Dios». Ngue runi, chaahuiʼ chaahuiʼ bisaanaʼ ca cosa malu ni runeʼ que. Maʼ qué nibanaʼ ne maʼ qué nidxaagaʼ ca binni malu biniiseniáʼ que. Ne gucané Jiobá naa para bisaanaʼ guiráʼ ca novio gupaʼ que.
XI MAʼ GULEENDUAʼ: Stale stipa nga huayuneʼ para gucueezaʼ naa ne cadi tindeniáʼ ca xiiñeʼ ora gúnicaʼ xiixa ni cadi jneza (Efesios 4:31). Runeʼ stipa para cadi gacaʼ naduxhuʼ ne ca binnilidxeʼ, nga cayacané para chuʼdu tobi si ne chuʼdu nayecheʼ.
Ca xhamiguaʼ ne ca vecinu stinneʼ nánnacaʼ maʼ bichaa modo naa. Yanna maʼ qué ribanaʼ gastiʼ ra runeʼ dxiiñaʼ. Maʼ runeʼ ganar ni tideniáʼ dxi ne riquiiñeʼ tiempu stinneʼ para gusiideʼ xcaadxi binni ni cá lu Biblia. Rudiéʼ cuenta jneza nga ca diidxaʼ ca lu Proverbios 10:22: «Ndaayaʼ stiʼ Jiobá... nga nga ni runi binni ricu, ne qué rudiidibe yuubaʼ ne laani».
LABE GLORIA ELIZARRARÁS DE CHOPERENA
NÁPABE 37 IZA
DE MÉJICU LAABE
GUCALÁʼDXIBE ÑUUTIBE LACA LAABE
MODO BIBANEʼ DXIQUÉ: Biniiseʼ ti lugar ra nabeza stale binni napa bidxichi, Naucalpan (Estadu stiʼ Méjicu). Dxi gucaʼ nahuiiniʼ qué liica nuzuubaʼ diidxaʼ, nabé guyuuladxeʼ chaa saa. Bizuluáʼ gudubaʼ gueza dxi napaʼ 12 iza ne dxi maʼ napaʼ 14 bizuluáʼ güeʼ nisa dxuʼniʼ. Biaʼsi dxi maʼ bisaa 16 maʼ riguubaʼ guixi. Xhupa iza despué biree de ralidxeʼ. Stale de ca xhamiguaʼ gúpacaʼ guendanagana ralídxicaʼ, nabé gudindené ca binnilídxicaʼ laacaʼ ne gudíñecabe laacaʼ. Cadi zaqué diʼ gulezaʼ nibaneʼ, ngue runi chupa biaje gucalaʼdxeʼ ñuuteʼ laca naa.
Dxi maʼ bisaa 19 iza, bizuluáʼ bineʼ dxiiñaʼ de modelo ne bireeniáʼ jma políticu ne binni ni riree lu televisión. Despué bichaganayaʼ ne gupaʼ xiiñeʼ, peru naa ngue runeʼ mandar ndaaniʼ lidxeʼ. Neca maʼ bichaganayaʼ que riguubaruáʼ guixi ne rixudxeruáʼ, ne runeʼ intiicaʼ gapaʼ gana. Laaca nabé guniéʼ diidxaʼ guidxa ne guyuuladxeʼ chiste de laani. Ne cadi nguesi, feu modo ricabeʼ binni.
Ca binni ni bidxaagaʼ que laaca zaqueca laacaʼ. Nácabe napaʼ guiráʼ ni racaladxeʼ, peru neca napaʼ guiráʼ ngue qué ganda guibaneʼ nayecheʼ.
XIMODO GUCANÉ BIBLIA NAA PARA BICHAA: Lu iza 1998 bizuluáʼ biindaʼ Biblia ne ca testigu stiʼ Jiobá. Raqué biziideʼ zanda guibani binni nayecheʼ. Biziideʼ zuni Dios Guidxilayú riʼ ti paraísu ne zandísabe ca gueʼtuʼ ca. Ne sti cosa jma galán biziideʼ nga zanda guuyaʼ ora gaca cani.
Laaca biziideʼ naquiiñeʼ guzuubaʼ stiidxaʼ Dios para gusihuinneʼ nadxiee laabe (1 Juan 5:3). Dxandíʼ, nagana guca para naa guneʼ ni, purtiʼ qué huayuu dxi gudiéʼ lugar chuʼ tu gabi naa xi guneʼ. Peru bidiéʼ cuenta qué zanda diʼ guibaneʼ galán pa guneʼ guiráʼ ni na iqueʼ (Jeremías 10:23). Ngue runi, gunabaʼ Jiobá guluíʼ naa xi guneʼ ne gudii stipa naa para guneʼ guiráʼ ni caziideʼ que. Laaca gunabaʼ laabe gacanebe naa gusiideʼ ca xiiñeʼ modo guibánicaʼ jma galán.
Guizáʼ guca nagana para naa guchaa, peru bizuluáʼ bineʼ ni na Efesios 4:22-24: «Cadi ucaa ique tu ni ucuá ique tu chiqué, [...] naquiiñe ibani tu modo naguixhe Dios ne usihuinni tu dxandí ma adxé laatu yanna, purti ma nayá xpida tu ne runi tu ni jneza». Para gusihuinneʼ maʼ gadxé naa la? naquiiñeʼ gusaanaʼ de cubaʼ gueza ne de guiniéʼ diidxaʼ guidxa. Biaʼ chonna iza bindaa para gunda bisaanaʼ cani, peru gunda bineʼ ni ne despué guyuaanisaʼ para gacaʼ testigu stiʼ Jiobá.
Óraque huaxa maʼ bineʼ dxiiñaʼ ni raca caber naa, maʼ bizuubaʼ stiidxaʼ xheelaʼ ne maʼ gupaʼ ca xiiñeʼ. Bineʼ ni na conseju ni zeeda lu 1 Pedro 3:1, 2: «Hermana caʼ, lauzuuba stiidxa xheela tu, purti pa nuu de laaca qué runi cre stiidxa Cristu la? zándaca iguudxi ra guʼya runi xheela jneza ne runi respetar laa. Ne zacá cadi naquiiñe iníʼ pe tu para ucuudxi tu laacaʼ».
XI MAʼ GULEENDUAʼ: Qué rusaanaʼ de gudiéʼ xquíxepeʼ Jiobá pur biluiʼbe naa nabé risaca guendanabani stiʼ binni. Nannaʼ maʼ bichaa modo naa ne yanna huaxa jma zanda gusiniiseʼ ca xiiñeʼ modo naquiiñeʼ gácani. Ora rietenaladxeʼ modo bibaneʼ dxiqué la? ruchiiñaruʼ xquendabiaaneʼ naa, peru qué riaandaʼ diʼ naa nanna Jiobá xi nuu ndaaniʼ ladxiduáʼ (1 Juan 3:19, 20). Dede dxi maʼ runeʼ ni na ca conseju zeeda lu Biblia la? runeʼ sentir rápani naa de ca cosa malu ca ne maʼ nuudxí ladxiduáʼ.
LABE JAILSON CORREA DE OLIVEIRA
NÁPABE 33 IZA
DE BRASIL LAABE
GUXÚDXIBE NE GUDÚʼBABE GUIXI
MODO BIBANEʼ DXIQUÉ: Guleʼ Bagé, ti guidxi stiʼ Brasil ni dxaaga Uruguay, nabeza biaʼ 100,000 binni ndaaniʼ ni. Lugar riʼ runi binni dxiiñaʼ layú ne rusiniisicaʼ maniʼ, casi yuze ne dendxuʼ. Naa biniiseʼ ti lugar nabé pobre, nuu stale banda ni runi cosa malu ne nabé rixúdxicaʼ ne rigúʼbacaʼ guixi.
Despué de bisaanaʼ scuela bizuluáʼ guxudxeʼ, guduubaʼ guixi ne bicaadiagaʼ heavy metal. Qué ñuneʼ crediáʼ pa nuu Dios pur guiráʼ cosa malu ni raca lu Guidxilayú riʼ.
Nabé guyuuladxeʼ guxhidxeʼ guitarra ne guyuu biaje biquiiñeʼ libru Apocalipsis para gucaa canción. Peru nagueenda bibiá grupu stinneʼ, ngue runi, bizuluáʼ gudubaʼ guixi ni jma runiná binni. Dede guníʼ iqueʼ zaa gateʼ ra cagubaʼ ni, purtiʼ stale de ca artista ni riuuladxeʼ modo ruxhidxi que huayáticaʼ zaqué.
Gulanaʼ xpueltu jñaabidaʼ para sieʼ guixi cubaʼ purtiʼ laa ngue bisiniisi naa. Guyuu biaje gunabadiidxabe naa paraa riquiiñeʼ bueltu que, peru naa rusiguiee laabe. De raqué laaca guyuuladxeʼ guneʼ magia negra, purtiʼ rabeʼ zacaneni naa guneʼ ca canción stinneʼ jma galán.
XIMODO GUCANÉ BIBLIA NAA PARA BICHAA: Ora bizuluáʼ biindaʼ Biblia ne guyaa ca guendaridagulisaa stiʼ ca testigu stiʼ Jiobá la? bichaa modo riníʼ iqueʼ. Chaahuiʼ chaahuiʼ maʼ guyuuladxeʼ guibaneʼ ne chuaa nayecheʼ. Ca dxi que, ziuularuʼ guicha iqueʼ para gusihuinneʼ qué riuuladxediáʼ modo nabani binni, peru bichaa modo naa que ne bigayaʼ guicha iqueʼ. Laaca bieneʼ caquiiñeʼ gusaanaʼ de xhudxeʼ, de cubaʼ gueza ne guixi pa racaladxeʼ guneʼ ni riuulaʼdxiʼ Dios. Ne laaca maʼ qué nucaadiagaʼ ca saa ni riuuladxeʼ que.
Primé biaje guyaa ti guendaridagulisaa stiʼ ca testigu stiʼ Jiobá, nabé guyuuladxeʼ ti versículo stiʼ Biblia ni cá cueʼ yoo que. Textu que nga Proverbios 3:5, 6, ra na: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu». Ora guníʼ iqueʼ de ni na textu que la? bidiéʼ cuenta zanda gacané Jiobá naa pa gudiéʼ lugar gúnibe ni.
Dxandíʼ, nabé nagana guca para naa gusaanaʼ ca viciu stinneʼ ne cani maʼ biaa guneʼ que, gúcani casi ora nugayaʼ ti chú nayaʼ (Mateo 18:8, 9). Nannaʼ dxicheʼ qué ñanda diʼ nuchaa pa ñabeʼ ñuneʼ ni chaahuiʼ chaahuiʼ. Ngue runi, guniéʼ ti dxi: «¡Maʼ chigusaanaʼ guiráʼ ni!», ne tobi si tiru bisaanaʼ guiráʼ ca viciu que. Laaca maʼ qué ñaadiáʼ ca lugar ra riaa que ne maʼ qué nidxaagaʼ binni ni ñándaca nucaa naa ñuneʼ guiráʼ ni bineʼ dxiqué.
Ca dxi que biziideʼ gusisacaʼ stipa runeʼ guiráʼ dxi pur gusaanaʼ ca viciu que ne cadi guibiguetaʼ lu cani ora maʼ nuaa triste. Guníʼ iqueʼ guizáʼ risaca nga guʼyaʼ Jiobá naa casi ti binni ni nayá, cásica modo nabaneʼ ne modo chuaa nezalube. Gunabaʼ laabe gacanebe naa gusiaandaʼ modo bibaneʼ dxiqué ne guicá iqueʼ ni chigudiibe laanu, ne laabe bidiibe naa stipa ni caquiiñeʼ para guneʼ ni. Dxandíʼ, nannaʼ guyuu biaje bibiguetaʼ lu cani. Peru qué nusaanaʼ de niziideʼ ni cá lu Biblia neca nuu biaje birayaʼ gueelaʼ nayaa.
Lu Biblia biziideʼ stale cosa de Dios, biziideʼ rizaaláʼdxibe cada tobi de laanu, zunitilube religión ni cadi dxandíʼ ne cayacanebe guireeche diidxaʼ lu guidubi naca Guidxilayú (Mateo 7:21-23; 24:14; 1 Pedro 5:6, 7). Biiyaʼ jneza ngue guiráʼ ni biziideʼ que, zeeda gácani casi ora ñuni binni ti rompecabeza, biáʼsipeʼ riaba cada pieza. Ngue runi, gudixhe iqueʼ guneʼ ni na Dios biaʼ dxi guibaneʼ, para gusihuinneʼ pabiáʼ cayecheʼ pur guiráʼ ni bíʼnibe pur naa.
XI MAʼ GULEENDUAʼ: Yanna huaxa maʼ nannaʼ xi pur nabaneʼ (Eclesiastés 12:13). Ne lugar de gaxha bueltu binnilidxeʼ la? maʼ racaniáʼ laacaʼ. Rinieniáʼ jñaabidaʼ xi riziideʼ lu Biblia ne laabe laaca maʼ gudixhe íquebe gúnibe ni na Jiobá. Ngaca nga ni maʼ biʼniʼ xcaadxi binnilidxeʼ ne tobi de cani guyuu lu grupu ni gupaʼ que.
Yanna maʼ bichaganayaʼ ne naa ne xheelaʼ riquiiñedu tiempu stidu para gusíʼdidu binni ni cá lu Biblia. Maʼ biziideʼ guneʼ cré Jiobá de guidubi ladxiduáʼ ne pur nga maʼ gucuaa stale ndaayaʼ.
[Ni caníʼ yaza 29]
«Chaahuiʼ chaahuiʼ maʼ guyuuladxeʼ guibaneʼ ne chuaa nayecheʼ»