Zabániluʼ nayecheʼ pa gúniluʼ cani bisiidiʼ Jesús
«[Jesús] gudxiʼba lu ti dani ne gurí raqué. Oraque bidxiña irá cani jma riuu nú laabe para [...] bizulú be bisiidi be laacaʼ.» (MAT. 5:1, 2)
1, 2. 1) Xi biʼniʼ Jesús ante gudii libana lu dani que. 2) Xi bisiene Jesús ora bizulú libana stiʼ.
LU IZA 31 que bisaanagá Jesús de gucheeche diidxaʼ ndaaniʼ guidxi Galilea para cheʼ Jerusalén ra chigaca Pascua (Juan 5:1). Despué bibiguétabe Galilea, ne raqué guidubi ti gueelaʼ gunábabe Dios gacané laabe para cuibe ca doce apóstol stibe. Sti dxi que bidxiña jma binni Jesús ne bisiándabe cani huará. Despué guyebe lu ti dani ne raqué guribe para bisiidibe ca discípulo stibe ne xcaadxi binni (Mat. 4:23–5:2; Luc. 6:12-19).
2 Jesús bidii ti libana lu ti dani ne raqué bisiénebe zaca binni dichoso pa chuʼ galán ne Dios (biindaʼ Mateo 5:1-12). Ximodo nga raca binni dichoso yaʼ. Raca binni dichoso ora runi sentir galán purtiʼ nayecheʼ nuu ladxidóʼ. Ora bizeeteʼ Jesús gaʼ modo zanda guibani ca xpinni nayecheʼ que guníʼ xiñee zanda guibánicabe zacá. Cani guniʼbe ca nabé zacanécani laanu cásica gucanécani ca xpínnibe raca chupa mil iza. Guidúʼyanu cada tobi de laacani.
«Dichoso ni nanna gasti nga laa nezalú Dios»
3. Tuu nga cani «nanna gasti nga laa nezalú Dios».
3 «Dichoso ni nanna gasti nga laa nezalú Dios, purti stica irá ni napa Dios ladxi náʼ.» (Mat. 5:3.) Cani rieeteʼ gastiʼ nga laa nezalú Dios nga cani nanna caquiiñeʼ guluíʼ Dios laacaʼ ximodo guibánicaʼ ne caquiiñecaʼ guilaseláʼdxibe laacaʼ.
4, 5. 1) Xiñee dichoso cani nanna caquiiñeʼ guluíʼ Dios laacaʼ ximodo guibánicaʼ. 2) Xi caquiiñeʼ gúninu para guluíʼ Dios laanu ximodo guibáninu.
4 Cani nanna gastiʼ nga laa nezalú Dios dichoso laacaʼ purtiʼ «stica irá ni napa Dios ladxi náʼ». Ora biʼniʼ cré ca discípulo que Jesús nga Mesías la? maʼ gunda gúcacaʼ tobi de cani zanda guni mandarné laabe lu Reinu stiʼ Dios guibáʼ (Luc. 22:28-30). Pa guibáninu guibáʼ o lu Guidxilayú riʼ sin chuʼ dxi gátinu ndaaniʼ ti paraísu dxi maʼ guni mandar Reinu stiʼ Dios ca la? zabáninu nayecheʼ pa nánnanu caquiiñenu gusiene Dios laanu ximodo guibáninu ne gánnanu qué zanda guibáninu sin laa.
5 Cadi guiráʼ diʼ binni nanna caquiiñecaʼ guluíʼ Dios laacaʼ ximodo guibánicaʼ ne caquiiñecaʼ guilaseláʼdxibe laacaʼ. Xiñee yaʼ. Purtiʼ stale binni qué gapa fe ne qué rusisaca ca cosa ni zeeda de Dios (2 Tes. 3:1, 2; Heb. 12:16). Pa racaláʼdxinu gusiene Dios laanu ne guilaselaʼdxiʼ laanu la? naquiiñeʼ guiduʼndaʼ chaahuinu Biblia, gucheechenu diidxaʼ ne stale gana ne cadi gusaananu de chuunu ca guendaridagulisaa ca (Mat. 28:19, 20; Heb. 10:23-25).
«Dichoso ni nuu triste yanna»
6. Tuu nga ca binni ni nuu triste, ne xiñee dichoso laacabe.
6 «Dichoso ni nuu triste yanna, purti zaguixhe dxí Dios ladxidó caʼ.» (Mat. 5:4.) Cani «nuu triste» laaca nuucaʼ casi ca binni ni nanna caquiiñeʼ guluíʼ Dios laacaʼ ximodo guibánicaʼ. Ne cadi nuudicabe triste purtiʼ cadi galán modo nabánicabe, sínuque purtiʼ nánnacabe binni ruchee laacabe ne riuubaʼ ladxidóʼcabe gúʼyacabe modo racaná binni pur laani. Peru xiñee guníʼ Jesús dichoso laacabe pa nuucabe triste yaʼ. Purtiʼ maʼ nuucabe gaxha de Jiobá ne laabe riguixhedxibe ladxidoʼcaʼ ne purtiʼ nápacaʼ fe laabe ne Xiiñibe (Juan 3:36).
7. Ximodo naquiiñeʼ guidúʼyanu ca cosa nuu ndaaniʼ guidxilayú riʼ.
7 Ñee riuʼnu triste purtiʼ cadi cayaca ni jneza ndaaniʼ guidxilayú stiʼ Binidxabaʼ riʼ la? Ximodo naquiiñeʼ guidúʼyanu guidxilayú riʼ ne guiráʼ ca cosa ni cudiini laanu yaʼ. Apóstol Juan cacabi cani canabadiidxanu ca: «Ndaani guidxilayú riʼ riulaʼdxi binni guni ni na ique ne gapa irá ni guʼyaʼ, ne gaca tuuxa nezalú ca xcaadxi. Peru cadi de Dios zeeda irá nga» (1 Juan 2:16). Peru xi naquiiñeʼ gúninu pa gudiʼnu cuenta chaahuidugá maʼ cacá «espíritu [o modo riníʼ ique] binni guidxilayú» laanu ne pur nga maʼ cadi cayuni adorarnu Jiobá jneza yaʼ. Naquiiñeʼ guni orarnu Jiobá de guidubi ladxidoʼno, guidúʼndanu Biblia ne guyúbinu gacané ca binnigola laanu. Pa chuʼnu jma gaxha de Jiobá la? jma zatadxí ladxidoʼno neca guidxaagalunu guendananá (1 Cor. 2:12; Sal. 119:52; Sant. 5:14, 15).
«Dichoso ni nadóʼ»
8, 9. 1) Ximodo rusihuinni binni naca nadóʼ. 2) Xiñee dichoso cani nadóʼ.
8 «Dichoso ni nadóʼ purti zudii Dios laaca guidxilayú.» (Mat. 5:5.) Ora gácanu nadóʼ, o nachaʼhuiʼ la? cadi culuíʼ diʼ nga ridxíbinu binni o cayúnisinu ni para guʼyaʼ binni nacháʼhuinu (1 Tim. 6:11). Ti binni nadóʼ, runi ni na Jiobá ne rudii lugar guluiʼbe laa ximodo naquiiñeʼ guibani. Ne laaca rusihuinni nadóʼ ne guiráʼ binni, casi na conseju bidii apóstol Pablu ca xpinni Cristu de Roma que (biindaʼ Romanos 12:17-19).
9 Xiñee guníʼ Jesús «Dichoso ni nadóʼ» yaʼ. Purtiʼ Biblia na «zudii Dios laaca[be] guidxilayú». Jesús, hombre ni jma nadóʼ que, nga binni ni jma risaca ni chigudii Dios Guidxilayú (Sal. 2:8; Mat. 11:29; Heb. 2:8, 9). Ca binni nadóʼ ni chiguni mandarné Cristu ca laaca zacaacaʼ Guidxilayú ca (Rom. 8:16, 17). Ne stale binni nadóʼ zabani lu Guidxilayú riʼ sin chuʼ dxi gáticaʼ ne zuni mandar Reinu stiʼ Dios laacaʼ (Sal. 37:10, 11).
10. Xiñee qué zanda chuʼnu galán ne binni ne qué zanda ugaandanu ti guenda ndaaniʼ xquidxi Dios pa qué gácanu binni nadóʼ.
10 Laanu laaca naquiiñeʼ gácanu nadóʼ cásica guca Jesús. Peru xi zácaxa pa nabé nadúxhunu o nabé naná ca diidxaʼ rábinu ca bíʼchinu ne ca bizáʼnanu yaʼ. Zaxélecabe de laanu. Yanna, pa zacá ti xpinni Cristu ne racalaʼdxiʼ ugaanda xiixa guenda lade ca binni ridagulisaa la? qué zanda diʼ ugaandabe ni (1 Tim. 3:1, 3). Apóstol Pablu gudxi Tito gusietenalaʼdxiʼ ca xpinni Cristu de Creta cadi guyúbicaʼ tíndenecaʼ binni, sínuque guiénecaʼ laacabe ne gácacaʼ nadóʼ ne laacabe (Tito 3:1, 2). Nanna dxíchinu naca ca binni nadóʼ ca ti ndaayaʼ para xcaadxi binni.
«Dichoso ni rinaba ladxidóʼ guni ni na Dios»
11-13. 1) Ora bizeeteʼ Jesús naquiiñeʼ gúninu ni na Jiobá, xiruʼ bizeetebe naquiiñeʼ gúninu. 2) Ximodo racané Jiobá laanu gánnanu xii nga ni jneza.
11 «Dichoso ni rinaba ladxidóʼ guni ni na Dios, ne qué ganda chuʼ dxí dede qué guni ni, purti zacané Dios laa guni ni, ne ziecheʼ.» (Mat. 5:6.) Ora guníʼ Jesús naquiiñeʼ gúninu ni na Dios la? laaca guniʼbe naquiiñeʼ gúninu ni na ca ley stiʼ Dios. Ti hombre bicaa Salmo guníʼ guyuulaʼdxiʼ guni ni na ca ley stiʼ Jiobá (Sal. 119:20). Yanna laanu yaʼ, ñee laaca riuuláʼdxinu gúninu ni na ca ley stiʼ Jiobá cásica biʼniʼ hombre bicaa Salmo que la?
12 Jesús guníʼ ziuu ca binni ni racalaʼdxiʼ guni ni na Jiobá nayecheʼ purtiʼ zánnacaʼ xii nga ni jneza. Ne nánnanu zacá cayuni Jiobá ni, purtiʼ despué de saa stiʼ Pentecostés iza 33 que biquiiñebe espíritu santu stibe para bisihuínnibe «xii nga jneza» (Juan 16:8). Dios biquiiñeʼ espíritu santu stiʼ para gucané caadxi hombre bicaa Stiidxabe lu diidxaʼ griegu, ne laacani nabé racanécani laanu «ibani nu casi na Dios» (2 Tim. 3:16). Espíritu santu stiʼ Dios ca laaca racaneni laanu «ibani [n]u modo naguixhe Dios ne usihuinni [n]u dxandí ma adxé laa[n]u yanna, purti ma nayá xpida [n]u ne runi [n]u ni jneza» (Efe. 4:24). Nabé ratadxí ladxidoʼno nga gánnanu pur guti Jesús pur laanu nga zanda guʼyaʼ Dios laanu casi binni ni runi ni jneza pa gaca arrepentirnu ne guyúbinu gutiidilaʼdxiʼ Dios stóndanu (biindaʼ Romanos 3:23, 24).
13 Cani chiguibani ndaaniʼ ti paraísu lu Guidxilayú riʼ sin qué chuʼ dxi gáticaʼ jma zacané Jiobá laacaʼ gánnacaʼ xii nga ni jneza. Peru laga cabézanu gaca nga naquiiñeʼ chinándanu ca ley stiʼ Jiobá guiráʼ ora. Jesús guníʼ: «Nirudó laguyubi [Reinu stiʼ Dios] ne sa tu modo na» (Mat. 6:33). Pa gúninu zacá la? jma zúninu «xhiiña Señor» ne dxandíʼ ziuʼnu nayecheʼ (1 Cor. 15:58).
Xiñee dichoso cani rilaselaʼdxiʼ binni
14, 15. 1) Ximodo zanda gusihuínninu rilaseláʼdxinu binni. 2) Xiñee dichoso cani rilaselaʼdxiʼ.
14 «Dichoso ni riá [«rilaselaʼdxiʼ», NM] stobi, purti laca ziá [«zalaselaʼdxiʼ», NM] Dios laa.» (Mat. 5:7.) Rilaselaʼdxiʼ binni stobi purtiʼ riá laabe. Casi Jesús la? bisiándabe stale binni purtiʼ biabe laacaʼ (Mat. 14:14). Rusihuínninu rilaseláʼdxinu binni ora rutiidiláʼdxinu stóndacaʼ, cásica rilaselaʼdxiʼ Jiobá cani raca arrepentir ora gucheené laabe (Éxo. 34:6, 7; Sal. 103:10). Laaca rilaseláʼdxinu binni ora racanenu cani cadiʼdiʼ ra nagana ne ora nacháʼhuinu ne laacaʼ. Ne jma risaca nga gusihuínninu rilaseláʼdxinu binni ora gusíʼdinu laacabe ni zeeda lu Biblia. Pa gúninu zacá la? zusihuínninu zinándanu ejemplu stiʼ Jesús, purtiʼ laa bisihuinni biá binni ni yeyubi laa ora «bizulú bisiidi laacabe stale cosa» (Mar. 6:34).
15 Nanna dxíchinu jneza nga ni guníʼ Jesús riʼ: «Dichoso ni riá [«rilaselaʼdxiʼ», NM] stobi, purti laca ziá [«zalaselaʼdxiʼ», NM] Dios laa». Nanna dxíchinu laaca ziácabe laanu pa guianu binni. Ne pa guilaseláʼdxinu binni la? laaca zalaselaʼdxiʼ Jiobá laanu ora cuidxi cuenta laanu ne zutiidiláʼdxibe stóndanu (Sant. 2:13). Casi maʼ bidúʼyanu ca, cani guilaselaʼdxiʼ si binni nga zutiidilaʼdxiʼ Dios stonda ne zabánicaʼ sin chuʼ dxi gáticaʼ (Mat. 6:15).
Xiñee dichoso ca binni ni nayá ladxidóʼ
16. Ximodo nga rusihuinni ti binni nayá ladxidóʼ, ne ximodo nga ruuyacabe Dios.
16 «Dichoso ni nayá ladxidóʼ purti zuuya Dios.» (Mat. 5:8.) Zahuinni nayá ladxidoʼno pur modo nácanu ne sti binni ne pur cani racaláʼdxinu gúninu. Pa gúninu zacá zusihuínninu nadxiinu binni de guidubi ladxidoʼno (1 Tim. 1:5). Ne zácanu tobi de ca binni ni zuuyaʼ Dios. Peru cadi dxandíʼ diʼ zadúʼyanu laapebe, purtiʼ guirutiʼ tu zanda guʼyaʼ Dios ne guibani (Éxo. 33:20). Zanda guidúʼyanu Dios ora guidúʼndanu ca guenda ni gupa Jesús purtiʼ bisihuínnibe ximodo Bixhózebe. Jesús peʼ guníʼ: «Ni ma biiya naa la? ma biiya Bixhozeʼ» (Juan 14:7-9). Guiranu, cani rúninu ni na Dios lu Guidxilayú riʼ zanda guidúʼyanu laabe ora guidúʼyanu guiráʼ ni rúnibe pur laanu (Job 42:5). Peru, ca xpinni Cristu ni bibí pur espíritu ca zuuyapécabe Bixhózecabe dxi guiásacabe lade gueʼtuʼ casi espíritu para chécabe guibáʼ (1 Juan 3:2).
17. Xi zúninu pa nayá ladxidoʼno.
17 Ca binni ni nayá xquendanabani ne rinanda ca ley stiʼ Jiobá qué riuuláʼdxicaʼ ca cosa ni ruuyaʼ Jiobá nabiidiʼ (1 Cró. 28:9; Isa. 52:11). Zusihuínninu nayá ladxidoʼno pur ni guininu ne pur ni gúninu, ne ora guni adorarnu Dios qué zúninu ni para si guʼyaʼ binni laanu.
Ni riguixhedxí guenda ridinde runi xiiñiʼ Dios laa
18, 19. Xii nga ni qué runi binni «ni riguixhe dxí enda ridínde».
18 «Dichoso ni riguixhe dxí enda ridínde, purti runi xiiñi Dios laa.» (Mat. 5:9.) Ca binni ni guníʼ Jesús lu textu riʼ qué runibiáʼsicabe laacaʼ pur cani rúnicaʼ, sínuque laaca pur cani qué rúnicaʼ. Tobi de cani qué rúnicabe nga qué ruquíxecabe ni guni binni laacabe, sínuque «nachaʼhui[cabe] ne irá» binni (1 Tes. 5:15).
19 Ca diidxaʼ «ni riguixhe dxí enda ridínde» ni zeeda lu Mateo 5:9 ca lu griegu riniʼni tuuxa ni ruyubi chuʼ binni tobi si. Clase binni ca qué runi diʼ xiixa ni guxheleʼ cani nuu tobi si (Pro. 16:28). Ne laaca rúnicabe stipa pur «cadi chuʼ dinde né[cabe] irutiʼ» (Heb. 12:14).
20. Tuu nga cani maʼ naca xiiñiʼ Dios, ne tuu nga cani chigácani despué.
20 Ca binni «ni riguixhe dxí enda ridinde» ca dichoso laacaʼ «purti runi xiiñi Dios» laacaʼ. Jiobá maʼ gucuaa ca xpinni Cristu ni bibí pur espíritu ca casi xiiñiʼ ne nuucaʼ jma gaxha de laabe. Nápacabe ndaayaʼ ca purtiʼ nápacabe fe Cristu ne pur runi adorárcabe Dios ni nadxii laanu ne ni riguixhedxí ladxidoʼno (2 Cor. 13:11; Juan 1:12). Yanna, xi zanda guininu de ca xpinni Cristu ni zeeda gaca casi «xcaadxi dendxu» ca yaʼ. Neca Jesús nga «Bixhóze[cabe] ne qué zusaana de gácabe ni» lu ti mil iza chiguni mandarbe ca la? ora maʼ guiluxe ti mil iza ca laaca zuzuubabe stiidxaʼ Jiobá, ne cani zeeda gaca casi xcaadxi dendxuʼ ca óraca maʼ dxandipeʼ zácacaʼ xiiñiʼ Jiobá (Juan 10:16; Isa. 9:6; Rom. 8:21; 1 Cor. 15:27, 28).
21. Xi zúninu pa gudiʼnu lugar gacané espíritu santu laanu.
21 Pa gudiʼnu lugar gacané espíritu santu laanu la? zudii binni cuenta qué riuuláʼdxinu tíndenu. Ne qué «zuchiichi saa nu» laanu (Gál. 5:22-26). Naquiiñeʼ gúninu stipa pur «cadi chuʼ dinde né [n]u irutiʼ» (Rom. 12:18).
Dichoso laanu neca sananda binni laanu
22-24. 1) Xiñee dichoso cani canazanándacabe laacaʼ purtiʼ cayúnicaʼ ni na Dios. 2) Xi zazíʼdinu lu xhupa tema ca.
22 «Dichoso ni [rizananda] binni laa, ti cayuni ni na Dios, purti sti irá ni napa Dios ladxi náʼ.» (Mat. 5:10.) Guníʼ si Jesús ca diidxaʼ ca laaca guníʼ: «Dichoso laatu ora rulaa binni diidxa laatu, ne [rizananda] ca laatu ne ribee ca falsu luguiá tu purti xpinne laatu. Laguiecheʼ neca cazaaca tu irá nga, purti nabé sicarú ni chi gudii Dios laatu ibáʼ, ne nanna ca tu zacaca biʼni cabe ca profeta sti Dios chiqué» (Mat. 5:11, 12).
23 Cásica bíʼnicabe cani riguixhená de dxiqué, laanu laaca nánnanu zaníʼ binni laanu, zandisaʼ falsu luguianu ne zazanándacabe laanu purtiʼ cayúninu ni na Dios. Peru pa guni huantarnu ca guendanagana ca la? ziéchenu purtiʼ nánnanu cusiéchenu ladxidóʼ Jiobá ne cusisácanu laabe (1 Ped. 2:19-21). Qué zusaananu de chuʼnu nayecheʼ ora gúninu ni na Jiobá neca gápanu guendanagana yanna ne despué. Ne qué zucaacani ca xpinni Cristu ni chiguni mandarné laabe gusaanacaʼ de chuʼcaʼ nayecheʼ nin cani chiguibani lu Guidxilayú riʼ sin qué chuʼ dxi gáticaʼ. Cani guninu ca cusihuínnicani nápanu ndaayaʼ stiʼ Dios ne rusihuínnicani cudiibe laanu cani caquiiñenu.
24 Peru nuuruʼ ni zanda guizíʼdinu lu libana ni bidii Jesús lu dani que. Lu xhupa tema ca zazíʼdinu xcaadxi cosa risaca. Primé zadúʼyanu ximodo zanda gúninu cani bisiidiʼ Jesús lu xquendanabáninu.
Xi nicábiluʼ
• Xiñee dichoso cani «nanna gasti nga laa nezalú Dios».
• Xiñee dichoso cani nadóʼ.
• Xiñee dichoso ca xpinni Cristu ora sananda binni laacaʼ.
• Gunáʼ tobi de ca modo bizeeteʼ Jesús zanda gaca binni dichoso jma guyuuláʼdxiluʼ.
[Dibuju/foto ni zeeda lu yaza 7]
Jesús bizeeteʼ gaʼ modo zanda gaca binni dichoso, ne zanda gacanécani binni yanna cásica gucanécani ca binni ni bibani lu primé siglu que
[Dibuju/foto ni zeeda lu yaza 8]
Zusihuínninu nabé rilaseláʼdxinu binni ora gusíʼdinu laacaʼ cani zeeda lu Biblia