Ñee runi orarluʼ casi modo bisiidiʼ Jesús la?
«Ora biluxe uníʼ Jesús irá nga, nabé bidxagayaa ca binni que modo bisiidi be.» (MAT. 7:28)
1, 2. Xiñee nabé bidxagayaa binni modo bisiidiʼ Jesús.
GUIRANU naquiiñeʼ guiene chaahuinu cani bisiidiʼ Jesús, tobi lucha Xiiñiʼ Dios, ne naquiiñeʼ gúninu ni na cani. Guirútiruʼ tu huaníʼ casi guniʼbe. Nga runi nánnanu nabé bidxagayaa binni ora bilúxebe libana ni bidiibe lu dani que (biindaʼ Mateo 7:28, 29).
2 Xiiñiʼ Dios qué nusiidiʼ casi bisiidiʼ ca escriba, purtiʼ laacaʼ bisiidicaʼ modo riníʼ ique binni guidxilayú. Laabe bisiidibe casi «tobi ni zanda guni mandar», purtiʼ guiráʼ cani bisiidibe zeeda cani de Dios (Juan 12:50). Yanna, guiduʼndaʼ chaahuinu cani bisiidiʼ Jesús lu libana que ne guidúʼyanu ximodo zanda gacanécani laanu para gánnanu ximodo guni orarnu.
Qué chuʼ dxi guni orarnu casi runi cani rucaachiʼ tu laa
3. Guníʼ xii nga bizeeteʼ Jesús lu Mateo 6:5.
3 Guiráʼ cani runi adorar Dios jneza naquiiñeʼ guni orarcaʼ, nga runi cadi gusaananu de guni orarnu. Peru cadi guiaandaʼ laanu guni orarnu casi bisiidiʼ Jesús lu libana ni bidii lu dani que. Ne lade cani guniʼbe zeeda ca diidxaʼ riʼ: «Ne ora iníʼ né tu Dios la? cadi guni tu casi ca binni ni na nachaʼhui peru cadi dxandí ni laa. Riulaʼdxi ca uzuhuaa ca ndaani yuʼdu para iníʼ né ca Dios. O pacaa la? runi ca ni lu calle para guʼya binni. Gabe caʼ laatu, zaa usisaca binni laacabe peru ngue si nga laani» (Mat. 6:5).
4-6. 1) Xiñee nabé guyuulaʼdxiʼ ca fariseu que guzuhuaacaʼ ndaaniʼ ca sinagoga que ne lu calle para guni orarcaʼ. 2) Xi guleendú ca fariseu que pur ni bíʼnicaʼ.
4 Cani dxandíʼ xpinni Cristu qué ñuni orarcaʼ Dios casi biʼniʼ ca fariseu que. Purtiʼ ca fariseu que guníʼ íquecaʼ jma nacháʼhuicaʼ que binni, peru cadi dxandíʼ ngue riácabe binni ne guiráʼ ni rúnicabe (Mat. 23:13-32). Ne laacaʼ guyuuláʼdxicaʼ «uzuhuaa ca ndaani yuʼdu» ne «lu calle» para guni orarcaʼ. Xiñee bíʼnicabe zacá yaʼ. «Para guʼya binni» laacabe. Ca judíu ni biʼniʼ adorar Dios lu primé siglu que gúpacaʼ costumbre guni orarcaʼ pur grupu ora rudiicaʼ ofrenda ni riaʼquiʼ ndaaniʼ yuʼduʼ que (zándaca bíʼnicabe ni siadóʼ biaʼ las nueve ne huadxí biaʼ las tres). Stale de ca binni de Jerusalén bidagulisaacaʼ ndaaniʼ yuʼduʼ para guni orarcaʼ, peru ca binni de xcaadxi guidxi que ruzuhuaacaʼ para guni orarcaʼ chupa biaje lu ti dxi ndaaniʼ ca sinagoga que (zanda gúʼndaluʼ Lucas 18:11, 13).
5 Cumu cadi guiráʼ diʼ binni nga nuu gaxha de yuʼduʼ que o de ti sinagoga ora maʼ cayaca ca oración que la? stale de laacabe biʼniʼ orarcaʼ ratiica si nuucaʼ ora ganda hora gúnicabe ni. Peru cani riuulaʼdxiʼ guʼyaʼ binni laacaʼ guni orarcaʼ la? ribézapecaʼ ganda ora que para guireecaʼ «lu calle» ne guni orarcaʼ ti guʼyaʼ ca binni zidiʼdiʼ ladu que laacaʼ. Ne ruyúbisicaʼ ximodo guiníʼnecaʼ «Dios xadxí» ti cuʼ binni naróʼ sticaʼ (Luc. 20:47). Cadi zacá diʼ naquiiñeʼ guni ca xpinni Cristu.
6 Jesús guníʼ «zaa usisaca binni [ca fariseu que] peru ngue si nga laani». Laacabe nabé guyuuláʼdxicabe gusisaca binni laacabe, peru casi guníʼ Jesús que «ngue si nga laani» purtiʼ Jiobá qué nucaadiaga diʼ ca oración stícabe. Peru bicaadiaga Jiobá ca oración stiʼ ca xpinni Cristu, ne zacá ni pur ca diidxaʼ ni guníʼ Jesús riʼ.
7. Ximodo naquiiñeʼ guiénenu ca diidxaʼ riʼ: «Ora chi iníʼ né tu Dios la? lachuu ndaani lidxi tu».
7 «Peru laatu, ora chi iníʼ né tu Dios la? lachuu ndaani lidxi tu, lauseegu ra puerta ne lainíʼ né Bixhoze tu ni qué rihuinni, ti laa ruuya ni runi binni ra nagaʼchiʼ, ne zaguixe laatu.» (Mat. 6:6.) Ora guníʼ Jesús chuʼnu ndaaniʼ lídxinu ne guséʼgunu xpuértanu para guni orarnu Dios la? cadi caníʼdibe qué zanda guni orarnu ra ridagulisaanu. Ni nabe racá nga cadi jneza guni orarnu para si guʼyaʼ binni laanu o para si uguucabe naróʼ stinu. Ne nga nga ni naquiiñeʼ gánnanu ora guni orarnu ra ridagulisaanu. Laaca naquiiñeʼ gúninu ni canabaʼ Jesús riʼ.
8. Xi guníʼ Jesús lu Mateo 6:7 cadi jneza gúninu ora guni orarnu.
8 «Ora ma caníʼ né tu laabe la? cadi utale tu diidxa [cadi guiniʼtu nguecaca ngueca, NM]casi runi ca binni ni qué runibiáʼ Dios, purti zácaxa ca tisi iníʼ ca stale diidxa zucaa diaga be laacaʼ.» (Mat. 6:7.) Lu textu ca cuzeeteʼ Jesús cadi jneza nga guiníʼ binni laaca ca diidxaʼ queca. Laabe qué niníʼdibe qué liica zanda guininu nguecaca ngueca para gudiʼnu xquíxepeʼ Dios o para guinábanu laabe xiixa pa de ladxidoʼno caree cani. Xiñee yaʼ. Purtiʼ gueelaʼ ante gati Jesús que biʼniʼ orar chupa chonna biaje ndaaniʼ jardín de Getsemaní ne laaca ngueca diidxaʼ biquiiñebe ora bíʼnibe cani (Mar. 14:32-39).
9, 10. Xi cadi naquiiñeʼ gúninu ora guni orarnu.
9 Ni cadi jneza nga guni orarnu «casi runi ca binni ni qué runibiáʼ Dios», purtiʼ laacaʼ nguecaca ngueca riniʼcaʼ lu ca oración sticaʼ. Laacabe de memoria riziidicabe ca oración ca ne ziuulaʼ rúnicabe cani. Zacá biʼniʼ cani biʼniʼ adorar Baal dxiqué, laacabe pur gana si bicaacabe ridxi dios ni cadi dxandíʼ ca purtiʼ «dede siadóʼ hasta galaa dxi que nácabe: ¡Baal, bicabi laadu!» (1 Rey. 18:26). Ca dxi stinu riʼ stale binni riquiiñeʼ stale diidxaʼ ne riniʼcaʼ nguecaca ngueca ora maʼ cayuni orarcaʼ, purtiʼ riníʼ íquecaʼ zacá «zucaa diaga» Dios laacaʼ. Peru Jesús guníʼ qué riuulaʼdxiʼ Jiobá gutale binni stale diidxaʼ lu oración stiʼ, nin gúnicaʼ ni ziuulaʼ ne guiziidicaʼ ni de memoria. Guidúʼyanu xiruʼ guníʼ Jesús.
10 «Cadi gaca tu casi laacabe, purti maca nanna Bixhoze tu xii nga caquiiñe tu ante inaba tu ni laa.» (Mat. 6:8.) Stale de ca xaíque stiʼ ca judíu que biʼniʼ orarcaʼ «casi runi ca binni ni qué runibiáʼ Dios». Laanu nánnanu cayuni adorarnu Jiobá jneza ora rúninu oración de guidubi ladxidoʼno para gudiʼnu xquíxepeʼ laabe, gusisácanu laabe ne guinábanu laabe xiixa (Fili. 4:6). Peru cada biaje guni orarnu la? cadi galán diʼ nga guininu nguecaca ngueca purtiʼ si riníʼ íquenu naquiiñeʼ gábinu Dios stale biaje ni caquiiñenu para cadi guiaandaʼ ni laa. Naquiiñeʼ guietenaláʼdxinu «nanna Bixhoze [n]u xii nga caquiiñe [n]u».
11. Xi naquiiñeʼ guietenaláʼdxinu ora guni orarnu nezalú binni.
11 Ti ndaayaʼ nga guni orarnu Dios, peru Jesús bisietenalaʼdxiʼ laanu qué riuulaʼdxiʼ diʼ Dios guiníʼ binni stale diidxaʼ ni cadi dxandíʼ caree de ndaaniʼ ladxidóʼ ora guni orar. Sti cosa ni naquiiñeʼ guietenaláʼdxinu nga qué rúninu oración nezalú binni ridagulisaa para guidxagayaacaʼ ni guininu. Laaca cadi naquiiñeʼ diʼ gúninu ca oración stinu ziuulaʼ dede gucaʼnu ca xpinni Cristu guiníʼ íquecaʼ pabiáʼ cayaadxaʼ para guiniʼcaʼ «amén». Ne cadi jneza guininu lu ca oración ca xiixa ni chigaca o gudiʼnu xiixa conseju cani cucaadiaga, purtiʼ pa gúninu zacá maʼ cadi zinándadinu cani bisiidiʼ Jesús lu libana ni bidii lu dani que.
Jesús bisiidiʼ laanu ximodo guni orarnu
12. Ximodo zanda gusiéneluʼ ca diidxaʼ «guisácapeʼ laluʼ».
12 Jesús qué niníʼ si xi cadi naquiiñeʼ guni ca discípulo stiʼ ora guni orarcaʼ, sínuque laaca gúdxibe laacaʼ xii nga ni jma jneza gúnicaʼ (biindaʼ Mateo 6:9-13). Laabe qué nusiidibe laacaʼ oración ni láʼ padrenuestro que para si guiziidicaʼ ni de memoria ne guiniʼcaʼ ni cada guni orarcaʼ, sínuque bisiidibe ni para gacaneni laacaʼ gánnacaʼ xi naquiiñeʼ guzeetecaʼ lu ca oración sticaʼ. Gúdxibe laacaʼ primé ca ni naquiiñeʼ guzeetecaʼ nga lá Dios, sicaríʼ guniʼbe: «Bixhózedu ni nuu guibáʼ guisácapeʼ laluʼ» (Mat. 6:9, NM). Rininu «Bixhózedu» Jiobá purtiʼ laabe nga bizaʼbe laanu, ne laabe nuube «guibáʼ» (Deu. 32:6; 2 Cró. 6:21; Hech. 17:24, 28). Ne ora guininu «Bixhózedu» ca la? laaca rusietanaláʼdxini laanu cadi laasinu nga nuunu gaxha de Jiobá, sínuque ne xcaadxi xpinni Cristu. Yanna, ora rininu «guisácapeʼ laluʼ» ca la? canábanu Jiobá gusihuinni laasi nga napa derechu guni mandar ne cadi casi guníʼ Binidxabaʼ ndaaniʼ jardín ni guyuu Edén que. Nanna dxíchinu zusihuinni Jiobá laasi nga napa derechu guni mandar ora cuee guiráʼ ca cosa malu ca lu Guidxilayú riʼ (Eze. 36:23).
13. 1) Ximodo chigaca ni rinábanu lu oración ni láʼ padrenuestro ora rininu «biseendaʼ reinu stiluʼ». 2) Xi zazaaca ora gaca ni na Dios lu Guidxilayú riʼ.
13 «Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú.» (Mat. 6:10, NM.) Xii nga Reinu ni rinábanu gueeda lu oración ni rábicabe padrenuestro ca yaʼ. Nga nga ti gobiernu ni nuu guibáʼ ra chiguni mandar Cristu ne ca xpinni ni bibí ora guiásacaʼ lade gueʼtuʼ para checaʼ guibáʼ (Dan. 7:13, 14, 18; Isa. 9:6, 7). Ora rinábanu guseendaʼ Dios «Reinu» stiʼ la? canábanu gunduuxeni guiráʼ ca binni malu ni riníʼ qué gapa Dios derechu guni mandar. Qué zandaa zaca nga, ne óraca zaca Guidxilayú riʼ ti paraísu ra chigaca ni jneza si, ziuu guendariuudxi luni ne zapa binni stale ni iquiiñeʼ (Sal. 72:1-15; Dan. 2:44; 2 Ped. 3:13). Maʼ cayaca ni na Dios guibáʼ, nga runi yanna rinábanu gaca ni nabe lu Guidxilayú riʼ, o cani naguixhe íquebe gúnibe luni. Ne tobi de cani chigúnibe nga chigunduuxebe ca xhenemígube, cásica bíʼnibe dxiqué (biindaʼ Salmo 83:1, 2, 13-18).
14. Xiñee jneza nga guinábanu guendaró ni tiidinésinu dxi.
14 «Dané laadu endaró tidi né du dxi.» (Mat. 6:11; Luc. 11:3.) Ca diidxaʼ ca cusihuínnicani canábanu Jiobá guendaró ni tiidinésinu dxi. Cumu nanna dxíchinu zanda gudii Jiobá laanu ni iquiiñenu guiráʼ dxi la? nga runi ni naquiiñeʼ si guinábanu laabe nga ni tiidinésinu ti dxi. Ni rieeteʼ lu oración ca rusietenaláʼdxini laanu ni biʼniʼ mandar Jiobá guni cada tobi de ca israelita que ora gúdxibe laacaʼ lu desiertu que gutópacaʼ biaʼ maná iquiiñecaʼ ti dxi si (Éxo. 16:4).
15. Xi naquiiñeʼ gúninu para gutiidilaʼdxiʼ Dios stóndanu.
15 Sti cosa ni rinábanu lu oración ca rusietenaláʼdxini laanu xi naquiiñeʼ gúninu, Jesús guníʼ sicaríʼ: «Bisiaanda ni ruchéʼ né du lii, casi rusiáʼnda du ni ruchee né cabe laadu» (Mat. 6:12). Zanda gusiaandaʼ Jiobá o gutiidilaʼdxiʼ stóndanu pa maʼ bitiidiláʼdxinu stonda cani bicheené laanu (biindaʼ Mateo 6:14, 15). Nga runi, naquiiñeʼ gutiidiláʼdxinu stonda cani gucheené laanu de guidubi ladxidoʼno (Efe. 4:32; Col. 3:13).
16. Xi riníʼ ca diidxaʼ «cadi udiiu lugar cuba yu binidxaba laadu» ne «bilá laadu de lu ná be» ca yaʼ.
16 «Cadi udiiu lugar cuba yu binidxaba laadu, sínuque bilá laadu de lu ná be.» (Mat. 6:13.) Ximodo naquiiñeʼ guiénenu ca diidxaʼ ca yaʼ. Ora rábinu Dios ca diidxaʼ «cadi udiiu lugar cuba yu binidxaba laadu» ca la? cayábinu laabe gacanebe laanu para cadi guchéʼnenu laabe. Ne ora rininu «bilá laadu de lu ná be» la? canábanu Jiobá gacané laanu para cadi gusaba Binidxabaʼ laanu. Ne nanna dxíchinu «qué zudii [Jiobá] lugar gueeda xiixa lugui[anu] ni qué zanda gua[n]u» (biindaʼ 1 Corintios 10:13).
Laguinabaʼ, laguyubi, laguxhidxináʼ
17, 18. Xi cusiidiʼ Jesús ne ca diidxaʼ «lainaba», «lauyubi» ne «lauxhidxi náʼ».
17 Apóstol Pablu gudxi ca xpinni Cristu: «Cadi usaana tu de iníʼ né tu Dios» (Rom. 12:12). Ne Jesús laaca bidii ti mandatu casi bíʼnibe ca ora guníʼ sicaríʼ: «Lainaba lu Dios, zudii laatu. Lauyubi, zadxela tu. Lauxhidxi náʼ, zaxele chuʼ tu. Purti tutiica inaba zacaa, ne ni uyubi zadxela, ne ni uxhidxi ná zaxele chuʼ» (Mat. 7:7, 8). Nga runi, galán nga guinábanu lu oración stinu ca cosa ni riuulaʼdxiʼ Dios. Ne apóstol Juan laaca bicaa caadxi diidxaʼ casi guníʼ Jesús ca: «Nanna dxichi nu pa inaba nu ni riulaʼdxi Dios gaca la? zucaa diaga laanu» (1 Juan 5:14).
18 Ca diidxaʼ «lainaba» ne «lauyubi» ni guníʼ Jesús ca culuíʼcani laanu cadi naquiiñeʼ gusaananu de guni orarnu Dios de guidubi ladxidoʼno. Ne laaca cayabi Jesús laanu «lauxhidxi náʼ» ti ganda chuʼnu lu Reinu stiʼ Dios ne guicaanu ca ndaayaʼ chigudii Reinu ca. Peru, ñee dxandíʼ nga zacabi Dios ca oración stinu la? Zacábibe cani pa gúninu ni nabe, purtiʼ Jesús guníʼ ca diidxaʼ riʼ: «Tutiica inaba zacaa, ne ni uyubi zadxela, ne ni uxhidxi ná zaxele chuʼ». Nuu stale ejemplu stiʼ ca xpinni Jiobá ni rusihuinni rucaadiágabe oración sticaʼ (Sal. 65:2).
19, 20. Ximodo culuíʼ ca diidxaʼ ni cá lu Mateo 7:9-11 ca laanu zeeda gaca Jiobá casi ti binni ni nadxii xiiñiʼ.
19 Jesús na zeeda gaca Dios casi ti binni ni nadxii xiiñiʼ, ne rudii guiráʼ ni galán xiiñiʼ. Guníʼ ique nuuluʼ ora caníʼ Jesús ca diidxaʼ riʼ: «Lácaxa nuu tuuxa lade tu, pa ninaba xiiñi laa ti gueta, nudii ti guie. O pa ninaba be laa ti benda, ñee nudii laabe ti beenda la? Pa laatu cadi nachaʼhui tu casi Dios ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué gudii ni galán cani inaba laa» (Mat. 7:9-11).
20 Neca cadi nachaʼhuiʼ bixhoze binni casi nachaʼhuiʼ Dios pur gulenecaʼ donda la? nadxiicaʼ xiiñicaʼ. Ne ti binni ni nadxii xiiñiʼ qué zusiguii laabe, sínuque zuyubi gusigaʼdeʼ laabe ni galán. Zacaca nga runi Bixhózenu ni nuu guibáʼ, laaca rudii laanu «ni galán» casi espíritu santu stiʼ (Luc. 11:13). Ne espíritu santu ca nga racané laanu gúninu ni na Jiobá, Dios ni rudii laanu «irá ni nachaʼhui ne irá ni dxandí sicarú» (Sant. 1:17).
Naquiiñeʼ guyúbirunu ximodo gacané cani bisiidiʼ Jesús ca laanu
21, 22. 1) Xiñee nabé risaca cani bisiidiʼ Jesús lu libana bidiibe lu dani que. 2) Ximodo ruuyaluʼ cani bisiidiʼ Jesús ca.
21 Nanna dxíchinu libana ni bidii Jesús lu dani que nga ni jma risaca. Stale cosa rusiidini laanu de Dios ne sicarú modo rusiéneni de laabe. Casi maʼ bidúʼyanu lu guionnaʼ tema ni maʼ bidúʼndanu ca, guizáʼ racanécani laanu ora gúninu ni na ca conseju ni zeeda lu libana ca. Cani bisiidiʼ Jesús laanu ca racanécani laanu guibáninu jma jneza ne gánnanu nabé galán ni chiguicaanu despué.
22 Lu ca tema ni maʼ bidúʼndanu ca maʼ bidúʼyanu chupa chonna si de ca cosa ni risaca bisiidiʼ Jesús. Ngue runi «nabé bidxagayaa ca binni que modo bisiidi» Jesús laacaʼ (Mat. 7:28). Laaca zacaca zácanu pa guidúʼndanu ne guiníʼ íquenu guiráʼ cani risaca bisiidiʼ Jesús, Maestru Ni Jma Nanna Gusiidiʼ que.
Xi nicábiluʼ
• Ximodo guníʼ Jesús runi ca fariseu que oración.
• Xiñee cadi jneza nga guininu nguecaca ngueca ora maʼ cayuni orarnu.
• Xi rinábanu lu oración ni láʼ padrenuestro que.
• Xi cusiidiʼ Jesús ne ca diidxaʼ «lainaba», «lauyubi» ne «lauxhidxi náʼ».
[Dibuju/foto ni zeeda lu yaza 15]
Jesús guníʼ cadi jneza biʼniʼ ca fariseu que purtiʼ laacaʼ biʼniʼ orarcaʼ para si guʼyaʼ binni laacaʼ
[Dibuju/foto ni zeeda lu yaza 17]
Ñee nánnaluʼ xiñee jneza nga guinábanu Dios gudii ni guidoʼno cada dxi la?