Cani bisiidiʼ Jesús

Ca oración ni rucaadiaga Dios

Jesús nabé guniʼné Bixhoze ora maʼ nuu laa si ne biʼniʼ mandarbe ca discípulo stibe gúnicaʼ zacaca. Biblia na: «Ti dxi nuu Jesús ti lugar, caníʼ né Dios. Biluxe si be, na tobi de ca discípulu stibe rabi laabe: Señor, bisiidi laadu iní né du Dios [...]. Para rabi be laacaʼ: Ora iniʼ né tu Dios la? sicarí nga iníʼ tu: Bixhoze du ni nuu ibáʼ, rinaba du gusisaca irá binni [laluʼ]» (Lucas 5:16; 11:1, 2). Raríʼ bisihuinni Jesús naquiiñeʼ guiniʼné binni Bixhózebe, Jiobá, ora guni orar. Laasibe nga Dios ni bizáʼ guiráʼ cosa ne «Ni rucaadiaga oración» (Salmo 65:2).

Ñee rucaadiaga Dios guiráʼ oración la?

Dios qué riuulaʼdxiʼ diʼ guininu ngueca ca ngueca lu ca oración stinu. Jesús guníʼ: «Ne ora ma caníʼ né tu laabe la? cadi utale tu diidxa [«cadi guiniʼtu ngueca ca ngueca», NM]» (Mateo 6:7). Ndiʼ rusiidiʼ laanu caquiiñeʼ guininu ni nuu ndaaniʼ ladxidoʼno ora guni orarnu Bixhózenu ni nuu guibáʼ. Ti biaje, bisiidiʼ Jesús jma riuulaʼdxiʼ Dios gucaadiaga oración stiʼ ti binni ni maʼ guca arrepentir de ni biʼniʼ, que stiʼ tuuxa ni rudxiibaʼ laca laa ne runi guiráʼ costumbre stiʼ religión ra nuu (Lucas 18:10-14). Nga runi, pa racaláʼdxinu gucaadiaga Dios oración stinu la? cadi naquiiñeʼ diʼ gudxíʼbanu laca laanu ne gúninu stipa pur gúninu ni canábabe laanu. Jesús peʼ guníʼ: «Rinié ni bisiidi Bixhoze naa», ne óraque guniʼbe xiñee, nabe: «Purti qué riaana dxie de gune ni riulaʼdxi be» (Juan 8:28, 29). Ne lu ti oración gúdxibe Dios sicaríʼ: «Cadi gaca ni rabeʼ, sínuque ni na luʼ» (Lucas 22:42).

Xi guiráʼ nga naquiiñeʼ guzéʼtenu lu ca oración stinu

Cumu maʼ guníʼcabe mal de lá Dios la? guníʼ Jesús: «Laatu la? naquiiñeʼ guni orartu sicaríʼ: “Bixhózedu ni nuu guibáʼ guisácapeʼ laluʼ. Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú”» (Mateo 6:9, 10, NM). Ne caquiiñeʼ guinábanu gueeda Reinu stiʼ Dios. Xiñee yaʼ. Purtiʼ laani nga gobiernu ni chiguiquiiñeʼ Dios para guni ni naguixhe ique guibáʼ ne lu Guidxilayú. Jesús laaca guníʼ zanda guinábanu «endaró tidi né [n]u dxi», pur dxiiñaʼ ni gúninu, ni gácanu, ra chuʼnu o guendanazaaca stinu. Laaca guniʼbe caquiiñeʼ guinábanu Dios gusiaandaʼ ni bicheʼnu (Lucas 11:3, 4).

Ñee jneza nga guni orarnu pur xcaadxi binni la?

Jneza, purtiʼ Biblia na Jesús peʼ biʼniʼ ni. Ti biaje «bedané cabe caadxi baʼdu ra nuu Jesús para quixhe ná luguiá caʼ ne iníʼ né Dios pur laacaʼ» (Mateo 19:13). Ne gúdxibe apóstol Pedru: «Ma unaba lu Dios pur lii cadi guiaadxa fe lii» (Lucas 22:32). Jesús bisiidiʼ caquiiñeʼ guni orarnu pur xcaadxi binni, dede pur cani rizánanda laanu o ni riguudí laanu (Mateo 5:44; Lucas 6:28).

Xiñee cadi naquiiñeʼ gusaananu de guni orarnu

Jesús gulee tiempu para guni orar ne gúdxibe ca discípulo stibe guiníʼnecaʼ Dios sin guireecaʼ gana (Lucas 18:1). Jiobá cayabi laanu guni crenu zacanebe laanu ne guinábanu laabe guiráʼ ora pur ca cosa ni riguu xizaa laanu. Jesús guníʼ: «Lainaba lu Dios, zudii laatu». Ca diidxaʼ riʼ rusihuínnicani rucaadiaga Jiobá oración stiʼ cani nadxii laabe ne cani ruuyaʼ laabe casi Bixhoze. Jesús bisiene: «Pa laatu cadi nachaʼhui tu ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué udii Espíritu Santu ni inaba laa» (Lucas 11:5-13).

[Nota 16]

Pa riuuláʼdxiluʼ gánnaluʼ jma de laani la? biiyaʼ capítulo 17 stiʼ libru Xipeʼ ndiʼ cusiidiʼ Biblia*

[Ni caníʼ yaza 16]

* Ni biʼniʼ ca testigu stiʼ Jiobá.