4 Biyubi gánnaluʼ pa dxandíʼ nga cani zeeda lu Biblia
«Xiñee cadi cayuni cre tu.» (Lucas 24:38)
XIÑEE RACA NAGANA PARA BINNI GUNI CRÉ. Caadxi de ca discípulo stiʼ Jesús laaca guca nagana para laacaʼ ñuni crecaʼ (Mateo 14:30; Lucas 24:36-39; Juan 20:24, 25). Biblia na «[c]uchéʼ nu» pa cayaadxaʼ fe laanu (Hebreos 12:1). Ne apóstol Pablu na: «Cadi irá binni runi cre» o napa fe (2 Tesalonicenses 3:2). Cadi pur nga guininu nuu binni qué zanda guni cré, sínuque stale binni qué ruyubi ganna chaahuiʼ ni zeeda lu Biblia. Peru ora tuuxa guni stipa pur guni cré o gapa fe la? racané Dios laa.
XI NAQUIIÑEʼ GÚNILUʼ PARA GUNI CRELUʼ. Ni gúniluʼ primé nga gúʼyaluʼ xii nga cani rucueeza lii guni creluʼ. Guzéʼtenu ni bizaaca Tomás: apóstol riʼ guca nagana para laa ñuni cré dxandíʼ maʼ biasa Jesús de lade gueʼtuʼ, neca maʼ gudxi xcaadxi discípulo que laabe maʼ biiyacaʼ Jesús. Laabe nuube gúʼyapebe pa dxandíʼ ni. Ne zaqué gúcani, Jesús bidii lugar gúʼyabe laa, óraque guca fe stiʼ Tomás jma naguidxi (Juan 20:24-29).
Lu Biblia cusiidiʼ Jiobá Dios laanu guiráʼ ni caquiiñeʼ gánnanu para guni crenu. Nuu binni maʼ qué runi cré Dios purtiʼ na laabe nga nápabe donda pur ridinde ca guidxi ca, pur ca guendaquéiquiiñeʼ ne pur ca yuubaʼ nuu lu Guidxilayú riʼ. Guidúʼyanu xi rusiidiʼ Biblia de laani.
Cadi Dios diʼ nga cayuni mandar yanna. Jesús guníʼ Binidxabaʼ nga «xaíque sti guidxilayú riʼ», laabe nácabe ti espíritu nabé malu (Juan 14:30). Ti biaje gudxi Binidxabaʼ Jesús zudii laabe «idubi naca guidxilayú» pa guni adorarbe laa. Sicaríʼ guniʼbe: «Zudiee lii irá ca guidxi sicarú ca, purti stinne cani, ne zanda udiee cani tutiica acaladxeʼ». Óraque bicabi Jesús laabe: «Cá lu Xquiʼchi Dios: “Dios si nga naquiiñe usisaca cabe, ne guni cabe ni na”» (Lucas 4:5-8). Racá ridúʼyanu Binidxabaʼ nga cayuni mandar lu guidxilayú riʼ. Nga runi, laabe ne ca gobiernu ni runi ni nabe nga nápacabe donda pur guiráʼ ca yuubaʼ nuu yanna, cadi Dios diʼ (Apocalipsis 12:9, 12).
Mayaca cuee Jiobá guiráʼ yuubaʼ. Dios maʼ biʼniʼ Jesucristu, rey stiʼ ti Reinu ni chiguni mandar binni (Mateo 6:9, 10; 1 Corintios 15:20-28). Ne lu Biblia maca cá zanna guiráʼ binni nuu lu guidubi Guidxilayú ni chiguni Reinu riʼ (Mateo 24:14). Maʼ cadi candaa diʼ para cuee gobiernu ca guiráʼ cani cucaalú laa ne tobi si tiru zabeeni guiráʼ ca yuubaʼ ca (Daniel 2:44; Mateo 25:31-33, 46; Apocalipsis 21:3, 4).
XI RIBEENDÚ BINNI. Biblia na zeeda gaca binni ni qué runi cré casi xcuidi, purtiʼ rinándacaʼ «intiica nacubi ni canausiidi binni» (Efesios 4:14; 2 Pedro 2:1). Peru cani ruyubi guiziidiʼ chaahuiʼ la? ruzuhuaa dxiichicaʼ lu «ni runi cre [caʼ]», o raca fe sticaʼ jma naguidxi (1 Corintios 16:13).
Ca testigu stiʼ Jiobá ziuuláʼdxicaʼ gacanecaʼ lii guni creluʼ cani zeeda lu Biblia ne gaca fe stiluʼ naguidxi. Guniʼné laacabe ne biiyaʼ xii nga rusiidicabe. Pa gúniluʼ ni zaca fe stiluʼ jma naguidxi.
Pa riuuláʼdxiluʼ gánnaluʼ jma de laani la? biiyaʼ capítulo 8 ne 11 stiʼ libru Xipeʼ ndiʼ cusiidiʼ Biblia,a ra na «Xii nga Reinu stiʼ Dios» ne «Xiñee cudii Dios lugar nuu guendananá».
[Cani cá ñee yaza]
a Ni biʼniʼ ca testigu stiʼ Jiobá.
[Ca dibuju/foto ni zeeda lu yaza 9]
Cani ruyubi ganna xi rusiidiʼ Biblia la? riguidxi fe sticaʼ