Xi zanda gúninu para cadi guniná ca espíritu malu ca laanu

JAMES biniisi Malaita, tobi de ca isla stiʼ isla Salomón (Melanesia, Oceanía). Dede nahuiinibe bisiidicabe laabe gusisácabe ca espíritu ca ne gúnibe caadxi cosa para guinábabe gacanecaʼ laabe. James guníʼ sicaríʼ: «Qué ñuu dxi nidiʼdiʼ ndaaniʼ iqueʼ ninabaʼ ca espíritu ca ñuninacaʼ tuuxa binni, peru laaca guníʼ iqueʼ qué zanda guibaneʼ galán pa qué guinabaʼ laacabe gápacabe naa».

Cásica riníʼ ique stale binni ni nabani lu Guidxilayú, ca binni de isla Salomón cadi runi crésicaʼ zanda guniná ca espíritu ca binni, sínuque laaca zanda gacanecaʼ binni. Ne stale de ca binni ni nabeza ndaaniʼ ca isla riʼ riuuláʼdxicaʼ gúnicaʼ ni na ca espíritu ca, ne qué ridxíbicaʼ laacabe purtiʼ para laacaʼ nacháʼhuicabe.

Lu guiráʼ ni runi ca binni riʼ rihuinni runi crecaʼ napa ca espíritu ca poder. Casi guidxihuiiniʼ ra biniisi James que, cada gunadiaga ca gunaa que guʼndaʼ ti manihuiiniʼ ni láʼ korokoro maca zinduucaʼ xiiñicaʼ ndaaniʼ yoo. Laacabe riníʼ íquecabe rizaaca binni xiixa desgracia ora guʼndaʼ manihuiiniʼ riʼ.

Sti cosa ni rúnicabe para cadi guniná ca espíritu malu ca laacabe nga riguíxhecabe ti clase guié quichiʼ ra puertaʼ lídxicabe. James biʼniʼ nga ne xcaadxi cosa para cadi gacaná. Casi ora maʼ nuube ra dxiiñaʼ rutópabe cani riaana ora maʼ biluxe gudobe ne riguube cani ndaaniʼ ti bolsa para gusáʼbibe. Rúnibe zacá purtiʼ riníʼ íquebe zándaca iquiiñeʼ tuuxa bruju ni ne guni dañu laabe.

Zándaca xquídxiluʼ huaxiéʼ raca cani guninu riʼ. Peru zándaca rábiluʼ naquiiñeʼ gúniluʼ ni runi binni xquídxiluʼ para cadi guniná ca espíritu malu ca lii, cásica biʼniʼ James. Zándaca guiníʼ íqueluʼ naquiiñepeʼ gúniluʼ cani para chuʼluʼ galán.

Peru pa runi creluʼ ni na Biblia la? ziuuláʼdxiluʼ gánnaluʼ ximodo ricábini cani zeeda raríʼ: 1) Ximodo nga runiná ca espíritu malu ca binni. 2) Ñee dxandíʼ nga racané guiráʼ ni runi binni para cadi guniná ca espíritu ca laa la? O rucaani laacaʼ gúnicaʼ ni na ca espíritu ca. 3) Tu zanda gacané lii para cadi guniná ca espíritu malu ca lii.

Ximodo zanda guniná ca espíritu malu ca laanu

Stiidxaʼ Dios rusiidiʼ cadi espíritu stiʼ ca gueʼtuʼ ca nga ca espíritu malu ca. Biblia na: «Purtiʼ cani nabani nánnacaʼ záticaʼ; peru cani maʼ guti la? laacabe qué liica gánnacabe gastiʼ» (Eclesiastés 9:5). Ca espíritu ca nga ca ángel ni qué niná nuzuubaʼ diidxaʼ ne gúcacaʼ tobi si ne Binidxabaʼ para gusiguiicaʼ binni (Apocalipsis 12:9).

Nga runi, Biblia na naquiiñeʼ gápanu laanu de laacabe. Lu carta ni bicaa apóstol Pablu ra nuu ca xpinni Cristu de Éfeso que guníʼ: «Purti cadi binni guidxilayú cadinde né nu, sínuque cadinde né nu ca [...] espíritu ni runi mandar ndaani guidxilayú cahui riʼ, ne irá ca espíritu malu ni nuu neza ibáʼ». Apóstol Pedru guníʼ Binidxabaʼ nga ni runi mandar ca espíritu ca ne zeeda gácabe «casi ti lion ni canaguu beedxeʼ, canayubi tu uxuuxe» (Efesios 6:12; 1 Pedro 5:8).

Yanna, ximodo nga runiná Binidxabaʼ binni yaʼ. Ni jma rúnibe nga rusiguiibe ne ruquiindebe laacaʼ gucheenecaʼ Jiobá Dios. Nga runi Stiidxaʼ Dios na: «Binidxaba laca rutiidi laa casi tobi ni zeeda de Dios» (2 Corintios 11:14). Rúnibe laabe casi ti espíritu ni nachaʼhuiʼ, peru ni cá íquebe nga guninabe binni. Rusicáhuibe xquendabiaaniʼ binni para cadi gudii cuenta tupeʼ nga laabe ne para cadi gunibiaʼcaʼ Dios (2 Corintios 4:4). Xiñee rúnibe nga yaʼ.

Ni racalaʼdxiʼ Binidxabaʼ nga pa ñanda si guiráʼ binni ñuni adorar laa. Dede Jesús, Xiiñiʼ Dios, dxi guyuu lu Guidxilayú riʼ gucalaʼdxiʼ Binidxabaʼ nuzuxíbibe xañee ne ñuni adorarbe laa. Peru gudxi Jesús laabe: «Biree de ra nuaa binidxabaʼ, purti cá lu Xquiʼchi Dios, Dios si nga naquiiñeʼ usisaca cabe» (Mateo 4:9, 10). Jesús qué liica nuzuubaʼ stiidxaʼ Binidxabaʼ ne qué ñuni adorar laabe.

Jiobá jma nadipaʼ que guiráʼ xixé espíritu, ne zadxiña dxi gacanebe cani ruzuubaʼ stiidxabe pa gueeda guizaacacaʼ xiixa (Salmo 83:18; Romanos 16:20). Peru pa racaláʼdxinu chuulaʼdxiʼ Dios modo runi adorarnu laa la? naquiiñeʼ gúninu casi biʼniʼ Jesús ne gucáʼnanu intiica cosa ni guluíʼ cayúninu ni na Binidxabaʼ ne ca demonio stiʼ. Nga runi naquiiñeʼ gánnanu xii nga ca costumbre ni raca para guni adorárcabe ca espíritu ca. Ximodo zanda gánnanu ni yaʼ.

Ximodo gánnanu xii nga ca costumbre ni qué riuulaʼdxiʼ Dios

Jiobá Dios gudxi ca israelita bibani dxiqué cadi gúnicaʼ guiráʼ ni runi ca guidxi guyuu gaxha de xquídxicaʼ. Nabe: «Cadi naquiiñeʼ chuʼ ládetu tuuxa ni [...] cuee suerte, nin ni guni magia, nin ni chiyubi cani rudii señal ne ni runi brujería, nin ni runi dañu». Ne laaca gúdxibe laacaʼ xiñee: «Purtiʼ nanalaʼdxiʼ Jiobá guiráʼ binni runi ca cosa riʼ» (Deuteronomio 18:10-12).

Nga runi, ante gúninu xiixa costumbre ni runi ca binni ni nuu neza ra nabézanu la? galán guinabadiidxanu: «Ñee rucaani naa guneʼ cré raca binni dañu la? Ñee rucaani naa guneʼ cré nuu xiixa ni napa poder para gacané naa la? Ñee rúnicabe ni para guixeleʼ ca espíritu ca de laacabe o para gápani laacabe de xiixa la? Ñee zucaani naa guneʼ ni na ca espíritu malu ca ne maʼ cadi guneʼ ni na Jiobá o ni na Jesús la? (Romanos 14:11; Filipenses 2:9, 10).

Cadi jneza diʼ gúninu ca cosa ni maʼ bizéʼtenu ca. Apóstol Pablu gudxi ca xpinni Cristu: «Qué zanda di cui tu ruaa mexa sti [Jiobá] ne ruaa mexa sti ca [demonio]». Laaca guniʼbe pa chuʼ tu guni ni na Dios ne guni ni na ca espíritu malu ca zuchiichicaʼ Jiobá (1 Corintios 10:20-22). Dios racalaʼdxiʼ guni adorarnu laa si (Éxodo 20:4, 5).

Sti cosa ni naquiiñeʼ guidúʼyanu nga pa rucaa costumbre ca binni guni xiixa cosa ni cadi jneza para Dios. Guzéʼtenu ti ejemplu: ndaaniʼ stale guidxi cadi jneza diʼ ruuyacabe gapa binni jnadxii o gatané tuuxa ante guichaganáʼ ne Biblia laaca riníʼ cadi jneza guni binni zacá (1 Corintios 6:9, 10). Peru ndaaniʼ caadxi guidxi ni nuu lu Pacífico cadi malu diʼ ruuyacabe guni ti gunaa zacá pa despué guiníʼ bíʼnicabe dañu laa, ngue runi biʼniʼ zacá.a

Peru Biblia rusiidiʼ zabidxi Dios cuenta cada tobi de laanu pur cani gúninu (Romanos 14:12; Gálatas 6:7). Ni bizaaca Eva, primé gunaa ni bibani lu Guidxilayú riʼ, rusihuinni zacá ni. Laabe guniʼbe bicheenebe Dios purtiʼ bisiguii Binidxabaʼ laabe. Nabe: «Beendaʼ ca... laame bisiguiime naa, nga runi gudahuaʼ ni». Neca guniʼbe zacá gunabaʼ Jiobá cuenta laabe pur cani bíʼnibe (Génesis 3:13, 16, 19). Ngaca nga ni zuni Jiobá laanu (Hebreos 4:13).

Xi naquiiñeʼ gúninu

Pa racaláʼdxinu chuulaʼdxiʼ Dios cani rúninu ne chinándanu ca conseju stiʼ Biblia la? naquiiñeʼ guixélenu de ca espíritu malu ca. Nuu ti ejemplu galán stiʼ caadxi binni ni bibani Éfeso lu primé siglu. Cumu nuucabe guixélecabe de ca espíritu que la? Stiidxaʼ Dios na bitópacabe ca libru de brujería stícabe «para icá gui nezalú irá binni que» (Hechos 19:19).

Peru ante guzaaquicabe ca libru stícabe ca «beda ndee ruaa ca diidxa irá ni huayuni ca ni cadi jneza» (Hechos 19:18). Bíʼnicabe ni purtiʼ yendá cani bisiidiʼ Pablu que ndaaniʼ ladxidóʼcabe. Ngue nga ni bicaa laacabe guzaaquicabe ca libru stícabe ne gusaanacabe guiráʼ cani maʼ biaacabe gúnicabe.

Nagana raca para stale binni gusaana cani maʼ biaa guni. James, hombre ni bizéʼtenu primé que bizulú biindaʼ Biblia ne ca testigu stiʼ Jiobá. Ne neca nabé guyuuláʼdxibe cani caziidibe que bíʼnirube guiráʼ ca costumbre ni runi ca binni xquídxibe. Ra guníʼ ique chaahuibe de cani caziidibe bidiibe cuenta neca runi crebe cani chiguni Jiobá, peru ruyúbirube gapa ca espíritu que laabe.

Xi gucané laabe guchaabe yaʼ. Laabe guniʼbe: «Gunabaʼ Jiobá gapa naa ne gacané naa guneʼ cré laa de guidubi ladxiduáʼ, ne óraque bisaanaʼ ca costumbre que». Ñee bininá ca espíritu que laabe la? James guníʼ: «Qué ñacaʼ gastiʼ. Yanna huaxa jma maʼ runeʼ cré Jiobá ne zanda gaca xhamiguaʼ laabe». James maʼ ziné gadxe iza de cayuni xhiiñaʼ Dios ne rusiidibe binni ni cá lu Biblia.

Xiñee qué gúniluʼ casi biʼniʼ James yaʼ. Biiyaʼ chaahuiʼ guiráʼ ca costumbre runi ca binni xquídxiluʼ ne guníʼ ique pa riuulaʼdxiʼ Dios cani (Romanos 12:1, 2). Pa guʼyuʼ cadi jneza cani la? guca nadxibalú ne bisaana cani. Dxandipeʼ zapa Jiobá lii ne zanda chuʼluʼ gaxha de laabe (2 Corintios 6:16-18). Cásica James que, zuuyaluʼ dxandíʼ ni na ca diidxaʼ riʼ: «Lá Jiobá zeeda gaca casi ti torre nadipaʼ. Ra nuuni rié binni nachaʼhuiʼ para guilá» (Proverbios 18:10).

[Cani cá ñee yaza]

[Credit Line 13]

Ni bidii Dr. Bakshi Jehangir

[Ca dibuju/foto ni zeeda lu yaza 13]

Korokoro

[Ca dibuju/foto ni zeeda lu yaza 13]

Dxaapahuiiniʼ riʼ cutopa bigú guendaró purtiʼ cadxibi iquiiñeʼ binni ni para guni dañu laacaʼ