Ni gusiiditu ca xiiñitu

Bilabe Pablu stiube

ÑEE nannuʼ gupa apóstol Pablu chupa chonna binnilidxi ni guca xpinni Cristu la?a... Ruluíʼ si guca ti bizáʼnabe ne ti sobrínube discípulo stiʼ Jesús. Qué rieeteʼ diʼ tu lácabe, peru nánnanu nabé nadxibalú guca sobrínube. Xiñee rininu zacá yaʼ. Purtiʼ ti biaje bilabe stiube. Ñuuláʼdxiluʼ ñabeʼ lii ximodo bíʼnibe ni la?...

Lu iza 56 yendá Pablu ndaaniʼ guidxi Jerusalén despué de guionna biaje guyé de misioneru. Raqué gunaazeʼ cani runi mandar guidxi que laabe ne guníʼ stiidxacaʼ guchíñacaʼ laabe nezalú juez. Peru ca xhenemígube qué nacaʼ gaca juzgársibe, sínuque racaláʼdxicaʼ guuticaʼ laabe. Ne cá íquecaʼ guseendacaʼ jma de 40 hombre para guuticaʼ laabe sin gudiibe cuenta.

Qué gánnadinu ximodo gunna sobrinu Pablu ni cá ique ca hombre que gúnicaʼ. Xi raʼbuʼ bíʼnibe yaʼ... Gúdxibe ni stiube. Oraqueca gudxi Pablu ti oficial nuu raqué ca diidxaʼ riʼ: «Yené hombre huiini ri ra nuu xaíque, purti napa be xiixa gabi be laa». Para gucuaa oficial que hombrehuiiniʼ que yené ra nuu xaíque, Claudio Lisias, ne gúdxibe laa napa hombrehuiiniʼ que xiixa ni gabi laabe. Bireené xaíque que laabe ti ladu, para gudxi hombrehuiiniʼ que laabe guiráʼ ni nanna.

Óraque gudxi Claudio Lisias laabe: «Uyé yanna ne qué chi tidxu iruti pa ma beda tidxu ni naa». Para biseendacaa xaíque que chupa oficial, ne biʼniʼ mandar cúʼcabe listu 200 soldadu, 70 ni dxiʼbaʼ maniʼ ne 200 ni naaze lanza para chinecaʼ Pablu Cesarea, ra nuu Félix, gobernador stiʼ Roma. Biaʼsi 470 soldadu nga bireenecaʼ Pablu huaxhinni que biaʼ las nueve, yesaanacaʼ laabe ra nuu Félix. Bicaa Claudio Lisias ti carta ra gúdxibe gobernador que nuu ca judíu que guuticaʼ Pablu.

Yanna para ganda ugaaniʼ ca judíu que donda Pablu napa xidé checaʼ nezalú juez ni nuu Cesarea. Peru qué gápacaʼ modo gusihuínnicaʼ bíʼnibe xiixa cosa malu. Neca zaqué biseguyoocabe Pablu chupa iza. Ngue runi, gunábabe guni juzgárcabe laabe Roma ne despué yenécabe laabe raqué (Hechos 23:16–24:27; 25:8-12).

Yanna xi rizíʼdinu de ni biʼniʼ sobrinu Pablu ca yaʼ... Pa nánnanu de xiixa ni zulá tuuxa, galán gácanu nadxibalú ne guininu ni. Ngapeʼ nga ni biʼniʼ Jesús. Neca nánnabe nuu caadxi binni racalaʼdxiʼ guuti laabe, gúcabe nadxibalú para guniʼbe de Reinu stiʼ Dios. Laabe nánnabe zalá ca binni ni guni ni na Reinu ca, nga runi biʼniʼ mandarbe laanu gucheechenu diidxaʼ. Ñee zúniluʼ ni biʼniʼ mandar Jesús ca la?... Para ganda guʼnuʼ ni naquiiñeʼ gácaluʼ nadxibalú cásica guca sobrinu Pablu que (Juan 7:1; 15:13; Mateo 24:14; 28:18-20).

Ti biaje bidii Pablu conseju riʼ Timoteu, ti hombrehuiiniʼ ni guca xhamígube: «Biiya ibani lu jneza ne zaqueca biiya usiidi lu ni jneza ne cadi iree chu lu de laani. Pa chi nanda lu irá ni cayabe lii ri la? zalá luʼ ne laca zulá lu cani cusiidi luʼ» (1 Timoteo 4:16). Nga nga ni biʼniʼ sobrinu Pablu. Yanna, ñee zácaluʼ nadxibalú casi laabe la?

[Cani cá ñee yaza]

Guendarinabadiidxaʼ:

❍ Xi nánnanu de chupa chonna binnilidxi Pablu.

❍ Xi biʼniʼ sobrinu Pablu para bilá laabe.

❍ Xi biʼniʼ mandar Jesús gúninu para guilá binni.